AUALA KE MANUMALO I LAGONAGA TAKALIALIA

1 | Sa Fakailoga Tino

Akoakoga i te Tusi Tapu:

“Te Atua e se fakailoga tino, kae ko [tino katoa] mai so se fenua [kolā] e ma‵taku ki a ia kae fai mea tonu e talia eiloa ne ia.”—GALUEGA 10:34, 35.

Tena Uiga:

A Ieovaa te Atua e se fakamasino ne ia tatou e auala i ‵tou fenua, itukāiga, ‵lanu, io me ko tuu mo aganuu. Kae e saga a ia ki toe mea tāua—ko mea i ‵tou loto. E tonu, a “te tagata e kilo fua ki mea e lavea ki mata, kae ko Ieova e kilo ki te loto.”—1 Samuelu 16:7.

Mea e Mafai o Fai ne Koe:

E tiga eiloa e se iloa ne tatou a mea i loto o tino, e mafai o fakaakoako tatou ki te Atua kae ‵kilo atu ki nisi tino e aunoa mo te fakailoga tino. Taumafai o kilo ki tino taki tokotasi i lō te potukau e aofia a ia i ei. Kafai e maua ne koe a lagonaga sē ‵lei ki nisi tino—kāti ki tino mai nisi itukāiga io me ko olotou fenua—‵talo ki te Atua kae fakamolemole atu ke fesoasoani mai ki a koe ke tapale kea‵tea a uiga konā. (Salamo 139:23, 24) Kafai e fakamolemole atu koe mo te loto kātoa ki a Ieova ke tuku atu te malosi ke mo a koe ma fakailoga tino, e mafai o mautinoa i a koe me ka fakalogologo a ia ki tau ‵talo kae fesoasoani atu ki a koe.—1 Petelu 3:12.

a Ieova ko te igoa totino o te Atua.—Salamo 83:18.

“Ne seki saga‵saga fakatasi muamua eiloa au mo se tino ‵kena . . . Nei la, ko aofia au i se kautaina tonu i te lalolagi kātoa.”—TITUS

Tala Tonu—TITUS

Ne Manumalo i Ana Lagonaga Takalialia

A Titus ne aofia i se potukau o tino fakasaua kolā ne kaitaua malosi ki tulafono e uiga ki te fakakese‵kese tino. Ne fai mai a ia: “Ne olo matou ki koga kolā e se talia i ei a tāgata uli, e pelā mo fale talimalo mo koga inu kava, ke faka‵tupu fua a taua.” Ne fai ‵tonu mai a Titus me ne fai a ia penā ona ko ana lagonaga takalialia, kae ne toe fai mai: “Kafai e kinau au mo so se tino, se tagata io me se fafine, ko au faeloa e fusu muamua atu.”

Ne kamata a Titus o ‵fuli i te taimi ne kamata ei o sukesuke a ia ki te Tusi Tapu mo Molimau a Ieova. Kafai e faitau a ia ki te Tusi Tapu e lagona eiloa ne ia te aoga malosi ki a ia. Ne otia malosi tena loto i te folafolaga e uiga ki te lalolagi i aso mai mua telā “ka se toe ai se mate, ka se toe ai foki se fanoanoa, se tagi io me se ‵mae.”—Fakaasiga 21:3, 4.

Muamua la, ne faigata ki a Titus ke tapale keatea mai tena loto a lagonaga takalialia. “Ne faigata ‵ki ke ‵fuli oku vaegā mafaufauga mo aku faifaiga,” ko ana pati. Kae ne fesoasoani atu eiloa ana mea ne tauloto i te Galuega 10:34, 35, telā e fakaasi mai i ei me i te Atua e se fakailoga tino.

Ne a mea ne iku mai i ei? Ne fai mai a Titus: “Ne talitonu au me i Molimau a Ieova ko te lotu tonu i te laveaga ne au a te fakatau a‵lofa o latou, faitalia olotou itukāiga io me ko olotou ‵lanu. A koi tuai au o papatiso e pelā se Molimau, ne ‵kami au ne se tino ‵kena i te fakapotopotoga ki tena fale ke ‵kai fakatasi mo latou. Ko pelā eiloa me se moemiti. Ne seki saga‵saga fakatasi eiloa. au mo se tino ‵kena muamua, kae nei ko kai au i tena fale. Nei la, ko aofia au i se kautaina tonu i te lalolagi kātoa.”