Ke na Fakamalosi Aka Koe ne “te Tulafono o te Atafai”

“NE GALI ki a au a te atafai o taina mo tuagane Kelisiano,” ko pati a Lisa.a Ne fakasino atu a ia ki te pogai ne tosina atu ei a ia ki te munatonu. Kae e tai penā foki a Anne, telā ne taku ‵tonu mai, “Ne sili atu toku fiafia ki te lotou atafai i lō olotou akoakoga.” Nei la, ko fia‵fia a te avā tuagane konei ki te fai‵tau ki te Tusi Tapu kae mafaufau ‵loto ki ei, kae ne lasi ‵ki te fakamalosiga o faifaiga atafai ki a lāua.

E fakaasi atu pefea ne tatou a faifaiga atafai kolā e mafai o otia i ei a loto o tino i ‵tou tafa? Ke na sau‵tala tatou ki auala e lua: ‵tou gutu mo ‵tou faifaiga. Ka oti, ko mafau‵fau ei tatou e uiga ki tino kolā e ‵tau o fakaasi atu ki ei te atafai.

“TE TULAFONO O TE ATAFAI” I TOU GUTU

A te fafine avaga atamai telā e fakamatala mai i te Faataoto mataupu 31 e maua i tena gutu a “te tulafono o te atafai.” (Faata. 31:26) E talia ne tou fafine a te “tulafono” tenei ke pule atu ki te auala e faipati atu ei a ia mo ana pati e fai. E tāua foki ke maua ne tamana a te “tulafono” tenei i olotou gutu. E iloa ‵lei ne te tokoukega o mātua me e mafai o pokotia olotou tama‵liki i se auala sē ‵lei i pati ‵mafa. Kafai e fai‵pati kaitāua atu a mātua, ka se tali faka‵lei mai olotou tama‵liki. Tela la, ko te mea ke momea aka te ‵gali mo te ma‵goi o pati, e ‵tau mo matua o taumafai ke fai‵pati atu mo te atafai.

Faitalia me ko koe se mātua io me ikai, e mafai pefea o takitaki tou gutu ne te atafai? E maua atu ne tatou a te tali i te vaega muamua o te Faataoto 31:26: “E ‵tala tena gutu mo te poto.” E aofia i te mea tenā te filifiliga faka‵lei o ‵tou pati mo te auala e fai‵pati atu ei tatou. E fesoasoani sāle mai māfai e fesili ifo tatou, ‘E mata, aku pati ka fai atu ka fakamalosi aka i ei a te kaitaua io me ka fakafilemu aka ei a te tulaga kaitaua?’ (Faata. 15:1) Ao, se mea poto ke mafaufau faka‵lei muamua ki ei.

E fai mai a te suā faataoto: “A pati e fai mo te sē mafaufau e ‵pau mo te ‵suki o se pelu.” (Faata. 12:18) Kafai e mafau‵fau tatou ki te auala e pokotia i ei a nisi tino i ‵tou pati mo te auala e fai‵pati atu tatou, ka momea aka a te mafai ne tatou o pule faka‵lei atu ki ‵tou gutu. Ao, a te fakagalue aka o “te tulafono o te atafai” ka fesoasoani mai ke taofi aka ne tatou a pati ‵mafa mo pati sē ‵lei. (Efe. 4:31, 32) Ka sui ne tatou a mafaufauga mo pati sē ‵lei ki pati ata‵fai kae ‵lei mo te alofa. Ne tuku mai ne Ieova se fakaakoakoga i te feitu tenei, i te taimi ne fakatalitonu atu ei a ia ki tena tavini ko Elia telā ko polepole i te mataku. A te agelu telā ne sui atu ne ia a Ieova, ne faipati atu i “se leo filemu kae malalo.” (1 Tupu 19:12) A te ‵tonuga loa, e uke atu a mea e aofia i te atafai i lō pati atafai. E ‵tau foki o fakaasi atu ne tatou a faifaiga atafai. E pefea la?

E FAKAMALOSI ATU A FAIFAIGA ATAFAI KI NISI TINO

Kafai e fakaakoako atu tatou ki a Ieova, e fakafetaui aka ne tatou a ‵tou pati mo faifaiga atafai. (Efe. 4:32; 5:1, 2) A Lisa, telā ne taku atu muamua, ne fakamatala mai ne ia a te atafai o te kau Molimau. “I te taimi ne faimālō te motou kāiga ke olo atu keatea i se taimi toetoe, e tokolua tauavaga i te fakapotopotoga, ne puke olotou aso malōlō ke fesoasoani mai i te taliga o omotou kope. I te taimi tenā, e seki fai saku akoga faka-te-Tusi Tapu!” A faifaiga atafai konā ne fakamalosi atu ki a Lisa ke iloilo faka‵lei aka ne ia a te munatonu.

A Anne, telā ne taku atu i te kamataga, ne fakatāua foki ne ia a te atafai o te kau Molimau. Ana muna: “Ona ko te tulaga o te lalolagi, ne kamata o fakalotolotolua malosi au. Ne faigata ke talitonu au ki tino.” Ne toe fai mai tou fafine: “I te taimi ne fetaui au mo te kau Molimau, ne fakalotolotolua au ki olotou faifaiga. Ne mafaufau au, ‘Kaia e fia ‵saga malosi mai latou ki a au?’ Kae ne fakamalosi mai a te atafai tonu o toku faiakoga i te Tusi Tapu ke talitonu ki a ia.” Ne a mea ‵lei ne iku mai i ei? “Fakamuli ifo, ne saga tonu atu au ki aku mea ne tauloto.”

Mafaufau la me ne otia malosi a Lisa mo Anne i faifaiga a‵lofa o te atafai kolā ne fakaasi atu ne tino kese‵kese i te fakapotopotoga, kae ne fakamalosi atu te mea tenā ki te lā tauloto ki te munatonu. A te atafai ne fakaasi atu ne te fakapotopotoga ne fesoasoani atu ke mafai o fakaasi atu ne lāua te loto tali‵tonu ki a Ieova mo ana tino.

FAKAMASANI KE FAKAASI ATU TE ATAFAI FAKAATUA KI NISI TINO

Kāti e ma‵nako malosi a nisi tino ke fakaaoga a pati atafai kae fakamisikata atu ona ko te auala ne puti aka i ei latou. E ‵tau eiloa o fakamālō atu ki vaegā faifaiga āva penā kolā e fakamalosi aka ne tuu io me se manakoga masani. Kae kafai ko fakamalosi aka fua tatou ne pogai konā, kāti ka se fakaasi atu i ei a te atafai fakaatua.—Fakatusa ki te Galuega 28:2.

A te atafai tonu fakaatua se vaega o te fuataga o te agaga tapu o te Atua. (Kala. 5:22, 23) Tela la, a te atiakaga o te atafai, e aofia i ei a te ga‵lue fakatasi mo te fakamalosiga a te agaga. E fetaui ‵lei te mea tenā mo te ‵tou manakoga ke fakaakoako ki a Ieova mo Iesu. Kae e pelā me ne Kelisiano, e ‵saga malosi atu tatou ki nisi tino. Kae e fakamalosi aka tatou ne te alofa ki a Ieova te Atua mo te alofa ki tino. Tenā, ko fai ei te ‵tou atafai mo fai se uiga fakavae telā e vau mai i te loto kae talia ne te Atua.

KO OI E ‵TAU O FAKAASI ATU KI EI TE ATAFAI?

Kāti se mea masani ke fakaasi atu te atafai ki a latou kolā e atafai mai ki a tatou io me ko tino kolā e iloa ne tatou. (2 Samu. 2:6) A te auala e tasi ko te fakafetai atu ki a latou. (Kol. 3:15) Kae e a māfai e mafau‵fau tatou me e se ‵tau o fakaasi atu te atafai ki se tino?

Mafaufau ki te mea tenei: Ne tuku mai ne Ieova te ‵toe fakaakoakoga sili o te fakaasimaiga o te atafai telā e seki ‵tau o fakaasi mai, kae e akoako mai tena Muna tusia e uiga ki te fakaasiatuga o te uiga tenei. A te tugapati ko te “alofa tauanoa” e fakaaoga i taimi e uke i Tusitusiga Eleni Kelisiano. E fakaasi mai pefea ne te Atua a te atafai ki a tatou?

Mafaufau ki te fia miliona o tino kolā ko oti ne fakaasi atu ne Ieova a te atafai mai te tuku atu ki a latou a mea e manakogina ke tumau i te ola. (Mata. 5:45) A te ‵tonuga loa, ne fakaasi atu ne Ieova te atafai ki a latou a koi tuai o iloa ne tino a ia. (Efe. 2:4, 5, 8) E pelā mo te tukumaiga ne ia a tena toe mea ‵lei, ko Tena Tama eiloa e tokotasi mō tino katoa. Ne tusi mai te apositolo ko Paulo me ne tuku mai ne Ieova te togiola “e ‵tusa mo te lasi o tena alofa tauanoa.” (Efe. 1:7) E se gata i ei, e tiga eiloa e agasala kae fakafanoanoa ne tatou a Ieova, e tumau eiloa a ia i te takitaki mo te akoako mai ki a tatou. E fai Ana akoakoga mo ana pati e pelā me ne “afuga vaiua.” (Teu. 32:2) E mautinoa me e se mafai o toe ‵togi atu ki a ia ana faifaiga atafai katoa ki a tatou. Kae se mea tonu me e fakalago‵lago tatou ki te atafai o Ieova mō ‵tou olaga i aso mai mua.—Fakatusa ki te 1 Petelu 1:13.

E aunoa mo te fakalotolotolua, a te atafai o Ieova se mea gali kae fakamalosi loto. Tela la, i lō te filifili aka o tino kolā e fia fakaasi atu ne tatou a te atafai ki ei, e ‵tau mo tatou o taumafai o fakaakoako ki a Ieova mai te fakaasi atu o te atafai e pelā me se vaega o ‵tou olaga i aso katoa. (1 Tesa. 5:15) Kafai e fakaasi atu faeloa ne tatou a te atafai, ko fai ei tatou pelā me se afi mafanafana i se aso ‵moko. E fai i ei tatou e pelā me se fakamafanafanaga ki ‵tou kāiga, soa ga‵lue, tama‵liki i te akoga, mo tuakoi.

Mafaufau ki tino i ‵tou kāiga io me ko tau fakapotopotoga kolā ko fakamalosi aka ne au pati mo faiga atafai. Kāti e isi se tino i tau fakapotopotoga telā e manako malosi ki se fesoasoani ke fai se galuega i te fale kae tausi atu ki te fatoaga io me ke fai faeloa se galuega e pelā mo te ‵togimaiga o mea mai sitoa. E se gata i ei, kafai e fetaui koe mo se tino i te galuega talai telā e manako ki se fesoasoani, e mata, e mafai ne koe o fesoasoani atu i nisi auala aoga?

I te fakaakoako atu ki a Ieova, ke na takitaki faeloa ‵tou pati mo faiga ne “te tulafono o te atafai.”