Fakatumau te Malosi o Tou Fakamoemoega Faka-Kelisiano

1. Se a te fakamoemoega ko oti ne tuku mai ne Ieova ki a tatou?

KO OTI ne tuku mai ne Ieova a te fakamoemoega fakaofoofogia ko te ola se-gata-mai. E fakamoe‵moe a nisi tino ke ola ki te se-gata-mai i te lagi e pelā me ne tino faka-te-agaga. (1 Koli. 15:50, 53) Kae ko te tokoukega o tino e fakamoe‵moe ke ola ki te se-gata-mai i te lalolagi i te malosi ‵lei katoatoa mo te fiafia. (Faka. 21:3, 4) Faitalia me e olioli ki te ola se-gata-mai i te lagi io me ko te lalolagi, e tāua eiloa te ‵tou fakamoemoega ki a tatou.

2. Se a te mea e fakavae ki ei ‵tou fakamoemoega, kae kaia e fai atu ei tatou penā?

² A te pati “fakamoemoega,” e pelā mo te auala e fakaaoga i te Tusi Tapu, e mafai o fakauiga ki se “fakamoemoega me ka oko mai a mea ‵lei.” A te ‵tou fakamoemoega mō aso mai mua e mautinoa me e aumai mai i a Ieova. (Loma 15:13) E iloa ne tatou a mea ko oti ne tauto mai ne ia, kae e iloa foki ne tatou me ne fakataunu faeloa ne ia ana pati. (Nume. 23:19) E tali‵tonu tatou me e maua ne Ieova a te manakoga mo te malosi ke fakataunu a mea katoa ne fai mai me ka fai ne ia. Tela la, e se fakavae ‵tou fakamoemoega ki mafaufauga sē ‵tonu; e fakavae eiloa ki fakamaoniga mo mea ‵tonu.

3. Ne a mea ka sau‵tala tatou ki ei i te mataupu tenei? (Salamo 27:14)

³ E alofa mai te ‵tou Tamana faka-te-lagi ki a tatou, kae e manako foki a ia ke tali‵tonu tatou ki a ia. (Faitau te Salamo 27:14.) Kafai e fakamoe‵moe malosi tatou ki a Ieova, ka mafai ne tatou o kufaki i tofotofoga kae ‵kilo atu ki aso mai mua i te loto malosi mo te fiafia. Ke na mafau‵fau tatou ki te auala e puipui ei tatou ne te ‵tou fakamoemoega. Ke fai penā, ka mafau‵fau muamua tatou ki te auala e fai ei te fakamoemoega e pelā me se taula mo se puloutau. Ka oti, ko ko sau‵tala ei tatou ki te auala e mafai o fakamalosi aka ne tatou ‵tou fakamoemoega.

E FAI ‵TOU FAKAMOEMOEGA E PELĀ ME SE TAULA

4. E fai pefea a te fakamoemoega e pelā me se taula? (Epelu 6:19)

⁴ I tena tusi ki te kau Epelu, ne faka‵pau ne te apositolo ko Paulo a te ‵tou fakamoemoega ki se taula. (Faitau te Epelu 6:19.) Ne masani o faimalaga atu i vaka i te tai, tela la, ne iloa ne Paulo me e fakaaoga a taula ke faka‵mautakitaki a te vaka mai te tapeapea atu. I te taimi e tasi, ne fanatu a ia i se vaka e pelā me se pasese, kae ne fepaki mo se afā lasi. I te taimi ne tupu ei te afā, ne lavea ne ia a kauvaka e ‵pei atu a taula ki te tai, ke puipui ei a te vaka mai i te kasa atu ki kaupapa ‵lasi fakama‵taku. (Galu. 27:29, 39-41) E pelā me se taula telā e faka‵mautakitaki i ei se vaka, e faka‵mautakitaki ne te ‵tou fakamoemoega a tatou, ko te mea ke mo a ma tapea‵pea atu keatea mai i a Ieova, māfai ko fe‵paki tatou mo fakalavelave faiga‵ta. E fesoasoani mai a te ‵tou fakamoemoega mautinoa ke mafai o ‵tele atu tatou i loto i tofotofoga e pelā me ne afā ona ko te ‵tou tali‵tonu me ko pili mai a taimi filemu i aso mai mua. Masaua me ne fakailoa mai a Iesu, me ka fakasauagina tatou. (Ioa. 15:20) Tela la, a te mafaufau ‵loto ki te ‵tou taui i aso mai mua, e faka‵mautakitaki aka ei tatou i te ‵tou olaga faka-Kelisiano.

5. Ne fesoasoani atu pefea a te fakamoemoega ki a Iesu i te taimi ne fakafesagai atu ei a ia ki te mate?

⁵ Mafaufau ki te fakamoemoega telā ne faka‵mautakitaki i ei a Iesu, faitalia a te mate fakalumalumagina telā ne faka‵tali mai ki a ia. I te aso o te Penitekoso 33 T.A., ne siki mai ne te apositolo ko Petelu se valoaga mai i te tusi o Salamo telā e fakaasi mai i se auala gali a te loto talitonu mo te filemu o Iesu: “Au ka nofo mo te fakamoemoe; me ka se tuku tiaki ne koe au i te Tanuga, io me talia ne koe a tau tino fakamaoni ke oko te pala ki tena foitino. . . . Ka faka‵fonu ne koe au ki te fiafia lasi i ou mua.” (Galu. 2:25-28; Sala. 16:8-11) Faitalia me ne iloa ne Iesu me i a ia ka mate, ne maua ne ia se fakamoemoega mautinoa me ka toe fakatu a ia ne te Atua, kae ka maua ne ia te fiafia ke ‵toe ‵kau fakatasi mo tena Tamana i te lagi.—Epe. 12:2, 3.

6. Ne a pati a se taina e tokotasi e uiga ki te fakamoemoega?

⁶ Ne fesoasoani atu te ‵tou fakamoemoega faka-Kelisiano ki ‵tou taina mo tuagane e tokouke ke kufaki. Mafaufau ki te tala o Leonard Chinn, se taina fakamaoni telā ne nofo i Egelani. I te taimi o te Taua Muamua a te Lalolagi, ne ‵pei a ia ki te falepuipui me ne ita fitifiti tou tagata ke kau atu ki te kautau. Ne ‵loka a ia i se tamā potu mō se lua masina kae ‵soko atu ki ei, ne fakagalue ‵mafa ne latou a ia. Ne tusi fakamuli mai tou tagata: “A mea ne fe‵paki mo au e faka‵mafa mai i ei a te tāua o te fakamoemoega ke mafai o kufaki. E maua ne tatou a tala e uiga ki te fakaakoakoga a Iesu, te kau apositolo, mo te kau pelofeta, kae maua foki ne tatou a folafolaga ‵gali i te Tusi Tapu. E tuku mai ne mea katoa konei a te fakamoemoega sili mō aso mai mua, kae fakamalosi ei tatou ke kufaki.” A te fakamoemoega se taula ki a Leonard, kae e mafai foki o fai mo fai se taula ki a tatou.

7. E fakamalosi aka pefea ne tofotofoga a te ‵tou fakamoemoega? (Loma 5:3-5; Iakopo 1:12)

⁷ E momea aka te malosi o te ‵tou fakamoemoega māfai ko oti ne kufaki tatou i tofotofoga kae lagona ne tatou a te fesoasoani mo te taliaga a Ieova. (Faitau te Loma 5:3-5; Iakopo 1:12.) Tela la, e maua ne tatou se fakamoemoega telā e malosi atu i lō te taimi muamua ne talia ne tatou te tala ‵lei. E manako a Satani ke manava‵se tatou i ‵tou tofotofoga, kae fakatasi mo te fesoasoani o Ieova, e mafai o fakafesagai atu tatou ki tofotofoga takitasi konā mo te manuia.

E FAI TE ‵TOU FAKAMOEMOEGA E PELĀ ME SE PULOUTAU

8. E fai pefea a te fakamoemoega e pelā me se puloutau? (1 Tesalonia 5:8)

⁸ E fakatusa foki ne te Tusi Tapu a te ‵tou fakamoemoega ki se puloutau. (Faitau te 1 Tesalonia 5:8.) E pei ne se sotia a te puloutau ke puipui ei tena ulu mai matasana a tena fili kolā e taumafai o fakalogo‵mae atu ki a ia. I te ‵tou taua faka-te-agaga, e ‵tau o puipui ne tatou ‵tou mafaufau mai i matasana a Satani. E tuku mai ne ia a tofotofoga mo manatu kese‵kese, kolā ne fakatoka ke fakamasei ei ‵tou mafaufauga. E pelā mo te puipui ne te puloutau a te ulu o se sotia, e puipui ne te ‵tou fakamoemoega a ‵tou mafaufauga ko te mea ke tumau tatou i te fakamaoni ki a Ieova.

9. Se a te ikuga māfai e seai se fakamoemoega o tino?

⁹ A te ‵tou fakamoemoega ki te ola se-gata-mai ka fesoasoani mai ke gasue‵sue tatou mo te ‵poto mo te malamalama. I te suā feitu, kafai e vāivāi ‵tou fakamoemoega kae talia ne tatou a mafaufauga faka-te-foitino, e mafai o galo atu a te ‵tou fakamoemoega ki te ola se-gata-mai. Mafaufau ki nisi mea ne ‵tupu ki Kelisiano kolā ne ‵nofo atu i Kolinito i aso mua. Ne galo atu te lotou fakatuanaki ki se tautoga tāua a te Atua—te fakamoemoega ki te toetuga. (1 Koli. 15:12) Ne fai atu a Paulo me e aunoa mo se fakamoemoega i aso mai mua, e ola fua a tino mō te aso nei. (1 Koli. 15:32) I aso nei, e tokouke a tino kolā e seai se lotou fakamoemoega ki folafolaga a te Atua e ola mō te taimi nei, mai te faiga o so se mea telā e mafai o maua mai i ei te fiafia. Kae e maua ne tatou a te loto talitonu ki folafolaga a te Atua mō aso mai mua. E fai a te ‵tou fakamoemoega e pelā me se puloutau fakatusa telā e puipui ei ‵tou mafaufauga, kae puipui foki tatou mai te fakaiku aka ke aofia i se olaga kaimanako telā e fakamasei ei ‵tou fesokotakiga mo Ieova.—1 Koli. 15:33, 34.

10. E mafai pefea o puipui tatou ne te fakamoemoega mai mafaufauga sē ‵tonu?

¹⁰ E mafai foki o puipui tatou ne te ‵tou fakamoemoega e pelā me se puloutau mai te mafaufau me e seai se aoga ke taumafai o fakafiafia a Ieova. E pelā mo nisi tino, kāti e fai mai latou: ‘Ka se mafai o aofia au i a latou kolā ka ola ki te se-gata-mai. Au e sē se tino ‵lei. E se mafai eiloa o fetaui ‵lei au ki tulaga o te Atua. Masaua a te tino fakamafanafana loi a Iopu, ko Elifasa, telā ne fakaaoga ne ia a fakamatalaga tai ‵pau ki a Iopu. Ne fai atu a Elifasa: “Se a te tagata e ‵tau ei a ia o ‵ma?” Kae ne toe fai atu a ia e uiga ki te Atua: “Kiloke! E seai sena fakatuanaki ki ana tino tapu, ke oko ki te lagi e se ‵ma i tena kilokiloga.” (Iopu 15:14, 15) Ko tafaga te ‵loi o pati konā! Masaua a te tino telā e fakamalosi ne ia a vaegā mafaufauga penā—Satani. E iloa ne ia me kafai e mafau‵fau faeloa tatou penā, ka gasolo o vāivāi ‵tou fakamoemoega. I lō te fai penā, ke ‵teke atu ki vaegā loi penā, kae ‵saga tonu atu ki folafolaga a Ieova. Ke mo a eiloa ma fakalotolotolua koe me e manako a ia ke ola koe ki te se-gata-mai, kae ka fesoasoani atu a ia ke oko atu koe ki te fakamoemoega tenā.—1 Timo. 2:3, 4.

KE TUMAU TE MALOSI O TOU FAKAMOEMOEGA

11. Kaia e ‵tau ei o kufaki tatou i te taimi e faka‵tali ei ke fakataunu ‵tou fakamoemoega?

¹¹ E se faigofie faeloa ke fakatumau te malosi o ‵tou fakamoemoega. Kāti e mafai o se lava ‵tou kufaki i te taimi e faka‵tali ei tatou ki te Atua. Kae ko Ieova e ola ki te se-gata-mai, kae ko tena kilokiloga ki te taimi e ‵kese mai i a tatou. (2 Pe. 3:8, 9) Ka fakataunu ne ia tena fuafuaga i te ‵toe auala ‵lei, kae kāti ka se gasuesue a ia i te taimi e fakamoe‵moe tatou ki ei. Se a te mea e mafai o fesoasoani mai ke tumau te malosi o ‵tou fakamoemoega i te taimi e faka‵tali ei tatou mo te kufaki ke fakataunu ne te Atua ana folafolaga?—Iako. 5:7, 8.

12. E ‵tusa mo te Epelu 11:1, 6, se a te sokoga o te fakamoemoega ki te fakatuanaki?

¹² Ka tumau te malosi o ‵tou fakamoemoega māfai e fakapilipili atu faeloa ki a Ieova, te tino telā e fakamautinoa ne ia ‵tou fakamoemoega. A te ‵tonuga loa, e soko tasi ne te Tusi Tapu a te fakamoemoega ki te fakatuanaki me e ola a Ieova kae “tuku atu ne ia te taui ki a latou kolā e ‵sala malosi atu ki a ia.” (Faitau te Epelu 11:1, 6.) A te momea aka o te fai o Ieova e pelā me se tino tonu ki a tatou, ko te momea aka foki o te ‵tou loto tali‵tonu me ka fai ne ia a mea katoa ne folafola mai ne ia. Ke na mafau‵fau tatou ki auala aoga ke fakamalosi aka ei te ‵tou fesokotakiga mo Ieova, kae fakatumau te malosi o te ‵tou fakamoemoega.

13. E mafai pefea o fakapilipili atu tatou ki te Atua?

¹³ ‵Talo ki a Ieova, kae faitau tena Muna. E tiga eiloa e se mafai o lavea ne tatou a Ieova, e mafai o fakapili‵pili tatou ki a ia. E mafai o fai‵pati atu tatou ki a ia i se ‵talo, kae maua te loto talitonu me ka fakalogologo mai a ia ki a tatou. (Iele. 29:11, 12) E mafai o fakalogo‵logo tatou ki te Atua mai te faitau ki tena Muna kae mafaufau ‵loto ki ei. Kafai e fai‵tau tatou e uiga ki te auala ne tausi atu a Ieova ki a latou kolā ne fakamaoni ki a ia i aso ko ‵teka, ka gasolo aka o malosi te ‵tou fakamoemoega. A mea katoa i te Muna a te Atua “ne tusi ke akoako ei tatou, me e auala i te ‵tou kufaki mo fakamafanafanaga mai i Tusitusiga Tapu, ko mafai ei o maua ne tatou a te fakamoemoega.”—Loma 15:4.

14. Kaia e ‵tau ei o mafaufau ‵loto tatou ki mea ne fai ne Ieova mō nisi tino?

¹⁴ Mafaufau ‵loto ki te auala ne fakataunu ne Ieova ana folafolaga. Mafaufau ki mea ne fai ne te Atua ki a Apelaamo mo Sala. Ne oko atu lāua ki se tulaga telā ko se mafai o fai lā tama‵liki, ona ko te lā ma‵tua. Kae ne tauto atu te Atua me ka maua eiloa ne lāua se tamaliki. (Kene. 18:10) Ne a lagonaga o Apelaamo e uiga ki ei? E fai mai te Tusi Tapu: “Ne . . . fakatuanaki me ka fai a ia mo fai te tamana o atufenua e uke.” (Loma 4:18) E tiga eiloa ne foliga mai me ka se taunu te lā fakamoemoega e ‵tusa mo te kilokiloga faka-te-tagata, ne maua ne Apelaamo te loto talitonu me ka fakataunu ne Ieova tena folafolaga. Ne seki fanoanoa eiloa a te tagata fakamaoni tenā. (Loma 4:19-21) E akoako mai ne vaegā tala penā, me e mafai faeloa o fakalago‵lago tatou ki a Ieova ke fakataunu ana folafolaga, faitalia te foliga faigata mai ki a tatou a te tulaga tenā.

15. Kaia e ‵tau ei o mafaufau ‵loto tatou ki mea ko oti ne fai ne te Atua mō koe?

¹⁵ Mafaufau ‵loto ki mea ne fai ne Ieova mō koe. Mafaufau e uiga ki te auala ne maua ne koe a mea aoga mai te fakataunuga o folafolaga i te Muna a te Atua. E pelā mo te mea ne folafola mai ne Iesu, me ka tuku mai ne tena Tamana a mea e manakogina ke tausi ei te olaga. (Mata. 6:32, 33) Ne fakatalitonu atu foki ne Iesu ki a koe me ka tuku atu ne te Atua a tena agaga tapu māfai e fakamolemole atu koe ki ei. (Luka 11:13) Ne fakataunu eiloa ne Ieova a folafolaga konā. Kāti e mafai foki o mafaufau koe ki nisi folafolaga ne fakataunu ne ia mō koe. E pelā eiloa mo ana folafolaga me ka fakamagalo, fakamafanafana, kae fagai ne ia koe i te feitu faka-te-agaga. (Mata. 6:14; 24:45; 2 Koli. 1:3) Kafai e mafau‵fau ‵loto koe ki mea ko oti ne fai ne te Atua mō koe, ka fakamalosi aka tou fakamoemoega ki mea ka fai ne ia mō koe i aso mai mua.

KE FIAFIA KI TE FAKAMOEMOEGA

16. Kaia e fai ei a te fakamoemoega e pelā me se meaalofa tāua?

¹⁶ A te ‵tou fakamoemoega ke ola ki te se-gata-mai, se meaalofa tāua mai te Atua. E olioli eiloa tatou ki te fakamoemoega gali tenā i aso mai mua—se mea telā e mafai o tali‵tonu tatou me ka taunu eiloa. E fai mo fai ‵tou taula, telā e faka‵mautakitaki ne ia tatou ko te mea ke mafai o kufaki i tofotofoga, ke fa‵ki i fakasauaga, kae penā foki māfai ko fakafesagai atu tatou ki te mate. E fai foki mo fai ‵tou puloutau, me e puipui ei ‵tou mafaufauga ko te mea ke mafai ne tatou o ‵teke atu ki mea ‵se kae puke ‵mau ki mea ‵tonu. E fai foki ne te ‵tou fakamoemoega telā e fakavae ki te Tusi Tapu ke fakapilipili atu tatou ki te Atua, kae fakaasi mai foki i ei a te lasi o tena alofa ki a tatou. E maua ne tatou a mea aoga e uke māfai e fakatumau ne tatou a te maina mo te malosi o te ‵tou fakamoemoega.

17. Kaia e iku atu i ei te ‵tou fakamoemoega ki te fiafia?

¹⁷ “Ke fia‵fia ki te otou fakamoemoega,” ne fakamalosi atu a te apositolo ko Paulo i tena tusi ki te kau Loma. (Loma 12:12) Ne mafai o fiafia a Paulo me ne mautinoa i a ia, me kafai e tumau a ia i te fakamaoni, ka maua ne ia te ola se-gata-mai i te lagi. E mafai foki o fia‵fia tatou ki te ‵tou fakamoemoega, ona ko te mea e mautinoa i a tatou me ka fakataunu ne Ieova ana folafolaga. E pelā eiloa mo te mea ne tusi mai ne te faisalamo: “E fiafia a te tino . . . telā e fakamoemoe ki a Ieova tena Atua, . . . te Atua telā e tumau faeloa i te fakamaoni.”—Sala. 146:5, 6.