Ke na Fakamalosi Koe ne te Alofa ke Tumau i te Talai!

1. Ne a mea ne iloa aka ne tatou mai te fono tausaga 2023?

I TE fono tausaga 2023,a ne maua ne tatou a mainaga ‵fou ki nisi o ‵tou talitonuga kae lagona foki a faka‵pulaga fakafiafia e uiga ki te ‵tou galuega talai. E pelā me se fakaakoakoga, ne tauloto tatou me e mafai o isi ne tino ka maua ne latou te avanoaga ke ‵kau atu ki te feitu o Ieova mai tua o te fakaseaiga o Papelonia te Sili. Ne iloa aka foki ne tatou me kamata mai i a Novema 2023, ka se manakogina ke lipoti atu ne tino talai o te Malo a olotou mea katoa ne fai i te galuega talai. E mata, e fakauiga i ei me ko se tāua malosi kae ko se fakava‵vave foki a te ‵tou galuega talai ona ko ‵fuliga konā? Ikai!

2. Kaia ko gasolo atu nei o tāua a te ‵tou galuega talai i aso takitasi? (Maleko 13:10)

² Ko sili atu nei te tāua o te ‵tou galuega talai i aso takitasi. Kaia? Me ko toetoe a te taimi. Mafaufau ki te mea ne ‵valo mai ne Iesu e uiga ki te galuega talai i aso fakaoti. (Faitau te Maleko 13:10.) E ‵tusa mo te tala a Mataio, ne fai mai a Iesu me i te tala ‵lei ka talai atu ki te lalolagi nofoaki kātoa koi tuai o oko mai “te gataga.” (Mata. 24:14) A te tugapati tenā e fakasino atu loa ki te fakaseaiga katoatoa o te olaga masei tenei a Satani. Ko oti ne fakatoka ne Ieova a te “aso mo te itula” ka ‵tupu i ei a mea konā. (Mata. 24:36; 25:13; Galu. 1:7) Ko pilipili eiloa o oko atu tatou ki te taimi tenā. (Loma 13:11) Kae i te taimi tenei, ke na tumau tatou i te talai atu ke oko eiloa ki te gataga.

3. Se a te mea e fakamalosi ei tatou ke talai atu?

³ I te taimi e mafaufau ‵loto ei ki te ‵tou galuega talai, ke fesili ifo ne tatou a te fesili tāua tenei: Kaia e talai atu ei ne tatou te tala ‵lei? Me e fakamalosi aka tatou ne te alofa ke talai atu. A mea e fai ne tatou i te galuega talai, e fakaasi atu i ei a te ‵tou a‵lofa—‵tou a‵lofa ki te tala ‵lei, ‵tou a‵lofa ki tino, kae sili atu i ei, ko te ‵tou a‵lofa ki a Ieova mo tena igoa. Ke na sau‵tala nei tatou ki mea takitasi konā.

E TALAI TATOU ONA KO TE A‵LOFA KI TE TALA ‵LEI

4. Pefea ‵tou lagonaga māfai e lagona ne tatou se tala ‵lei?

⁴ Mafaufau ki ou lagonaga i te taimi ne maua ne koe se tala ‵lei kae fakafiafia—kāti se tino i tou kāiga ne fatoa fanau tena pepe io me maua ne koe se galuega ‵togi telā e manakogina malosi ne koe. E mautinoa eiloa me ka fiafia koe o fakailoa atu te tala ‵lei tenā ki ou kāiga mo taugasoa. E mata, ne maua foki ne koe lagonaga tai ‵pau i te lagonaga ne koe te ‵toe tala ‵lei i tala katoa—te tala ‵lei o te Malo o te Atua?

5. Pefea ou lagonaga i te taimi muamua ne tauloto koe ki te munatonu mai te Muna a te Atua? (Onoono foki ki ata.)

⁵ Toe mafaufau aka la ki te taimi muamua ne tauloto koe ki te munatonu i te Muna a te Atua. Ne iloa ne koe me i tou Tamana i te lagi e alofa ki a koe, e manako ke aofia koe i tena kaukāiga o tino tapuaki, ne tauto me ka fakaseai ne ia a logo‵maega, kae e mafai o toe fetaui koe mo ou tino pele māfai ko toe faka‵tu aka ki te ola i te lalolagi fou—mo nisi mea e uke atu. (Male. 10:​29, 30; Ioa. 5:​28, 29; Loma 8:​38, 39; Faka. 21:​3, 4) Ne otia eiloa tou loto i muna‵tonu konā. (Luka 24:32) Ne fiafia koe ki au mea ne tauloto, kae e manako koe o fakaasi atu ke iloa ne tino katoa!—Fakatusa ki te Ielemia 20:9.

6. Ne a mea e tauloto ne koe mai te tala o Ernest mo Rose?

⁶ Mafaufau ki te tala tenei. Se taina e igoa ki a Ernestb telā ko sefulu ana tausaga kae mate tena tamana. Muna a Ernest: “Ne mafaufau au: ‘E mata, ko oti ne fanatu a ia ki te lagi? Io me ka mate a ia ki te se-gata-mai?’ Ne loto masei au ki nisi tamaliki kolā koi ola a olotou tamana.” Ne fano faeloa a Ernest ki te tanuga, totuli i te tanu o tena tamana kae ‵talo atu: “Te Atua fakamolemole, e fia iloa ne au me tefea nei toku teti.” Mai tua o se 17 tausaga ne mate ei tena tamana, kae ne talia ne Ernest ke fai sena akoga faka-te-Tusi Tapu. Ko oko loa i ana fiafia ke iloa atu me i tino ‵mate e seai se lotou mea e iloa, e pelā eiloa me ko ‵tō olotou ‵moe, kae tauto mai te Tusi Tapu e uiga ki te toetuga i aso mai mua. (Fai. 9:​5, 10; Galu. 24:15) Fatoa maua eiloa ne ia a tali ki fesili kolā ko leva ne fia iloa ne ia! Ne fiafia ‵ki a Ernest ki muna‵tonu mai te Tusi Tapu kolā ne tauloto ne ia. Ne kau atu tena avaga ko Rose, ki tena akoga kae ne fiafia foki tou fafine ki ana mea ne tauloto. I te 1978, ne papatiso lāua. Ne loto finafinau lāua o fakaasi atu a talitonuga tāua konā ki lā kāiga, taugasoa, mo so se tino telā e fia fakalogologo. Ona ko te mea tenā, ne fesoasoani atu a Ernest mo Rose ki tino e silia atu mo te toko 70 ke gasolo ki mua i te papatisoga.

7. Se a te mea e tupu māfai ko ‵goto tonu ki ‵tou loto a te fiafia ki te munatonu i te Tusi Tapu? (Luka 6:45)

⁷ E manino ‵lei, me kafai e ‵goto tonu a te munatonu i te Tusi Tapu ki ‵tou loto, e ma‵nako eiloa tatou o fakaasi atu ki tino. (Faitau te Luka 6:45.) E fai tatou pelā mo soko o Iesu i te senitenali muamua kolā ne fai mai: “E se mafai eiloa o fakagata te mā fai‵pati ki mea ko oti ne lavea kae lagona ne māua.” (Galu. 4:20) Ona ko te ‵tou fia‵fia malosi ki te munatonu, e ma‵nako foki tatou o fakaasi atu ki tino e tokouke.

E TALAI TATOU ONA KO TE A‵LOFA KI TINO

8. Ne a mea ka fakamalosi aka ei tatou ke talai atu te tala ‵lei ki nisi tino? (Onoono ki te pokisi “Alofa ki Tino—Fai a Soko.”) (Onoono foki ki te ata.)

⁸ E a‵lofa tatou ki tino e pelā eiloa mo Ieova mo tena Tama. (Faata. 8:31; Ioa. 3:16) E a‵lofa tatou ki tino kolā e ola “e aunoa mo te Atua” kae seai foki se lotou “fakamoemoega.” (Efe. 2:12) Ko ma‵lemu latou i fakalavelave o te olaga nei, kae ‵nofo tatou mo te gatu faola telā e ma‵nako latou ki ei—ko te tala ‵lei o te Malo o te Atua. Ka fakamalosi aka tatou ne te alofa mo te atafai ki vaegā tino penā ke fai so se taumafaiga ke talai atu te tala ‵lei ki a latou. Kafai e lagona ne latou te fekau tāua tenā, ka maua ne latou te fakamoemoega, fesoasoani atu ke maua ne latou te ‵toe olaga fakafiafia i te taimi nei, kae tuku atu i ei se avanoaga ke maua te fakamoemoega telā ko “te ola tonu”—te ola se-gata-mai—i te lalolagi fou a te Atua.—1 Timo. 6:19.

9. Se a te faka‵pulaga e fakailoa atu ne tatou e uiga ki aso mai mua, kae kaia? (Esekielu 33:​7, 8)

⁹ E fakamalosi foki tatou ne te alofa ki tino ke fakailoa atu ki a latou me ko pili o fakaseai atu te lalolagi masei tenei. (Faitau te Esekielu 33:​7, 8.) E a‵lofa tatou ki ‵tou tuakoi mo ‵tou kāiga sē tali‵tonu. E tokouke a tino e ola i olotou olaga masani e aunoa mo te iloa me ka isi se mea ka tupu—te “‵toe fakalavelave lasi telā ne seki tupu aka eiloa talu mai te kamataga o te lalolagi ke oko mai ki te taimi nei, kae ka se toe tupu eiloa se mea penā.” (Mata. 24:21) E ma‵nako tatou ke iloa ne latou a te mea ka tupu i te taimi o te fakamasinoga—ka fakaseai atu a lotu ‵se kae fakaoti eiloa ki te fakaseaiatuga o te lalolagi masei tenei i te taua o Amaketo. (Faka. 16:​14, 16; 17:​16, 17; 19:​11, 19, 20) E ‵talo tatou me ka tokouke a tino e ‵saga mai ki te faka‵pulaga tenā kae ‵kau mo tatou i te tapuakiga ‵ma i te taimi nei. Kae pefea a tino kolā e se fia faka‵logo ki te faka‵pulaga tenā i te taimi nei, e aofia i ei a ‵tou kāiga pele?

10. Kaia e tāua ei ke tumau tatou i fakailoa fakavave atu ki tino a mea ko pili o ‵tupu?

¹⁰ E pelā mo te mea ne fakamatala mai i te mataupu mai mua, e mafai o faka‵sao ne Ieova a tino kolā ko kamata o fakatuanaki ki a ia māfai ko lavea ne latou te fakaseaiga o Papelonia te Sili. Kafai e penā loa, ko sili atu nei i te tāua ke tumau tatou i te fakailoa atu a te faka‵pulaga tenā ki tino i te taimi nei. Mafaufau ki te mea tenei: A mea e fakaasi atu ne tatou ki a latou i te taimi nei, e mafai o masaua ne latou i te taimi tenā. (Fakatusa ki te Esekielu 33:33.) Kāti ka masaua ne latou a te faka‵pulaga ne lagona ne latou mai i a tatou kae fakamalosi ei latou ke ‵kau mai ki a tatou i te tapuakiga tonu a koi tuai o tō talimuli. E pelā mo te tausi pagota i Filipi telā ne ‵fuli tena loto i te otiga ne “poko fakavave se mafuie lasi,” nisi tino kolā e se ‵saga mai i te taimi nei, ka mafai o ‵fuli olotou loto māfai ko lavea ne latou a te fakaseaiga fakapoi o Papelonia te Sili.—Galu. 16:​25-34.

E TALAI TATOU ONA KO TE A‵LOFA KI A IEOVA MO TENA IGOA

11. I te auala fea e tuku atu ne tatou a te vikiga, te ‵malu mo te malosi ki a Ieova? (Fakaasiga 4:11) (Onoono foki ki ata.)

¹¹ A te ‵toe pogai tāua e talai ei ne tatou te tala ‵lei, ona ko ‵tou a‵lofa ki a Ieova te Atua mo tena igoa tapu. E ‵kilo atu tatou ki te ‵tou galuega talai e pelā me se auala ke ‵viki atu ki te Atua e a‵lofa tatou ki ei. (Faitau te Fakaasiga 4:11.) E ‵lago atu tatou mo te loto kātoa me e ‵tau eiloa o maua ne Ieova te Atua a te vikiga mo te ‵malu, mo te malosi mai ana tino tapuaki fakamaoni. E ‵viki kae faka‵malu ne tatou a ia mai te fakailoa atu ki nisi tino a fakamaoniga mautinoa me ne “faite ne [ia] a mea katoa” kae e maua ne tatou a te ola ona ko ia. E tuku atu ne tatou ki a ia te malosi—‵tou malosi—māfai e fakaaoga ‵tou taimi, malosi, mo kope ke ‵kau katoatoa atu ki te galuega talai e ‵tusa mo ‵tou fakanofonofoga. (Mata. 6:33; Luka 13:24; Kolose 3:23) Tela la, e fia‵fia tatou o fai‵pati e uiga ki te Atua e a‵lofa tatou ki ei. E fakamalosi foki tatou ke fakaasi atu ki nisi tino a tena igoa mo te uiga o tena igoa. Kaia?

12. E faka‵malu pefea ne tatou a te igoa o Ieova i te galuega talai?

¹² Ko te ‵tou a‵lofa ki a Ieova e fakamalosi ei tatou ke faka‵malu tena igoa. (Mata. 6:9) Ko tena uiga, e ma‵nako tatou o fakailoa atu ki tino me i mea ma‵sei ne fai atu ne Satani e uiga ki a Ieova, ne loi katoa. (Kene. 3:​1-5; Iopu 2:4; Ioa. 8:44) I te ‵tou galuega talai, e ma‵nako malosi tatou o ‵tu mō te ‵tou Atua, mai te fakailoa atu te munatonu e uiga ki a ia ki tino katoa kolā e fia fakalogo‵logo mai. E ma‵nako tatou ke iloa ne tino katoa me i tena toe uiga sili ko te alofa, tena pulega ko te ‵toe pulega amiotonu kae tonu, kae ko pili o fakaseai atu ne tena Malo a logo‵maega katoa kae aumai te filemu mo te fiafia ki te kaukāiga o tino. (Sala. 37:​10, 11, 29; 1 Ioa. 4:8) Kafai e ‵pulu ne tatou te ata o Ieova i te ‵tou galuega talai, ko faka‵malu eiloa ne tatou a tena igoa. E maua foki ne tatou a te lotomalie ke iloa atu me ko ola tatou e ‵tusa mo ‵tou igoa. Pefea la?

13. Kaia e fakamata‵mata ei tatou ke fakaigoa ki Molimau a Ieova? (Isaia 43:​10-12)

¹³ Ne filifili aka tatou ne Ieova ke fai mo ana “molimau.” (Faitau te Isaia 43:​10-12.) I tausaga ko ‵teka, ne fai mai te tusi mai te Potukau Pule, penei: “E maua eiloa ne tatou a te ‵toe tauliaga sili ke taku e pelā me ne Molimau a Ieova.” Kaia? Mafaufau ki se fakatusaga. Kafai e manako koe ki se tino ke molimau ki a koe i se fono tulafono, ka filifili ne koe se tino e iloa kae talitonu koe ki ei, se tino telā e ‵lei tena ata i mua o tino, kae fai ei ke tali‵tonu a tino ki a ia. Mai te filifili ne ia tatou ke fai mo ana Molimau, e fakaasi mai ne Ieova me e iloa ‵lei ne ia tatou kae talitonu a ia me ka fakailoa atu ne tatou ki tino me i a ia ko te Atua tonu fua e tokotasi. Se tauliaga eiloa ke fai tatou mo ana Molimau kae fakaaoga so se avanoaga ke fakasalalau atu a tena igoa kae ke manumalo i loi e uke ne fai e uiga ki a ia. Mai te fai penā, ko ola eiloa tatou e ‵tusa mo te igoa telā e fakamata‵mata tatou o tauave, ko Molimau a Ieova!—Sala. 83:18; Loma 10:​13-15.

KA TUMAU TATOU I TE TALAI KE OKO KI TE GATAGA

14. Ne a mea ‵gali ko pili o ‵tupu i aso mai mua nei?

¹⁴ E fia‵fia eiloa tatou ke lavea atu a mea ‵gali ko pili o ‵tupu i aso mai mua! Fakatasi mo te fakamanuiaga a Ieova, e fakamoe‵moe tatou ke lavea atu a tino e tokouke e talia ne latou a te munatonu mai mua o kamata a te fakalavelave lasi. E se gata i ei, e fia‵fia tatou me i te taimi foki loa o te fakalavelave lasi, te ‵toe taimi faigata eiloa i tala fakasolopito—e mafai eiloa o lavea ne tatou a tino e tokouke e ‵fuli kea‵tea mai te lalolagi a Satani kae ‵kau fakatasi mo tatou o ‵viki atu ki a Ieova!—Galu. 13:48.

15-16. Se a te galuega ka fai faeloa ne tatou, kae ka gata atu mafea?

¹⁵ I te taimi nei, e isi se galuega e ‵tau o fai ne tatou. E maua ne tatou te tauliaga ke aofia i se galuega telā ka se toe fai—te talaiatuga o te tala ‵lei o te Malo o te Atua ki te lalolagi kātoa. I te taimi foki tenā, e ‵tau o fakailoa atu ne tatou te mea tenā ki tino. E manakogina ke iloa ne tino me ko pili ‵ki mai eiloa te gataga o te olaga masei tenei. Tela la, kafai ko oko mai te taimi o te fakamasinoga, ka iloa ne latou me i te fekau e talai ne tatou ne aumai i a Ieova te Atua.—Eseki. 38:23.

¹⁶ Tela la, ne a mea e ‵tau o fakaiku aka ke fai ne tatou? Ona ko te alofa—te alofa ki te tala ‵lei, te alofa ki tino kae sili i mea katoa, ko te alofa ki a Ieova te Atua mo tena igoa—ka tumau eiloa tatou i te talai atu mo te fakava‵vave, te loto malosi mo te loto finafinau ke oko ki te taimi ko fai mai ei a Ieova, “Ko lava!”