Ke Matapula‵pula o ‵Teke Atu Faeloa a Fakaosoosoga

1-2. (a) Se a te faka‵pulaga ne fai atu ne Iesu ki ana soko? (e) Kaia ne tiakina ei ne soko a Iesu? (Onoono foki ki ata.)

“E MANAKO ki ei te loto, kae ko vāivāi te foitino.”a (Mata. 26:41e) Mai pati konā, ne fakaasi mai ei ne Iesu me e malamalama a ia i ‵tou tulaga sē ‵lei katoatoa. Kae ne aofia foki i ana pati konā se faka‵pulaga: Fakaeteete ke mo a ma tō talitonu ki a koe eiloa. I nai itula mai mua malie o fai ne Iesu a pati konā, ne fai atu ana soko mo te loto tali‵tonu me ka ‵piki ‵mau latou ki te lotou Matai. (Mata. 26:35) Ne ma‵nako latou o fai te mea tonu. Kae ne seki iloa ne latou me kafai ko fe‵paki fakavave latou mo se tulaga faigata, e faigofie fua ke galo atu te malosi ke fai te mea tonu. Tenā te mea ne fakailoa atu a Iesu ki a latou, penei: “Ke tumau i te matapula‵pula kae ‵talo faeloa, ko te mea ke se fakaosoosogina koutou.”—Mata. 26:41a.

² Se mea fakafanoanoa me ne seki tumau a soko i te matapula‵pula. I te taimi ne puke ei a Iesu, e mata, ne ‵piki ‵mau latou ki a ia io me ne tosina atu latou ki te fakaosoosoga ke ‵tele kea‵tea? Ona ko te sē matapula‵pula, ne fai ne soko a te mea ne fai atu latou me ka se fai lele ne latou—ne tiakina ne latou a Iesu.—Mata. 26:56.

3. (a) Ke tumau i te fakamaoni ki a Ieova, kaia e ‵tau o ‵kalo kea‵tea tatou mai te tō tali‵tonu eiloa ki a tatou? (e) Ne a mea ka sau‵tala tatou ki ei i te mataupu tenei?

³ Ke mo a ma tō tali‵tonu ki a tatou eiloa. E tonu, ko oti ne fakaiku aka ne tatou ke mo a ma fai so se mea telā e fakafanoanoa atu ki a Ieova. Kae ona ko te tulaga sē ‵lei katoatoa, e mafai eiloa o fakaosoosogina tatou ke fai se mea ‵se. (Loma 5:12; 7:​21-23) Kafai e se fakaeteete tatou, e mafai eiloa o tosina atu tatou ki te faiga o se mea ‵se. Ke tumau i te fakamaoni ki a Ieova mo tena Tama, e ‵tau o faka‵logo tatou ki te fakatonuga a Iesu ke ‵teke atu faeloa a te fakaosoosoga ke agasala. E fesoasoani mai te mataupu tenei ke fai ne tatou te mea tenā. Muamua la, ka sau‵tala tatou me ne a auala e ‵tau eiloa o matapula‵pula tatou ki ei. Ka oti, ko sau‵tala ei tatou ki auala ke ‵teke atu ki fakaosoosoga. Kae ko te ‵toe mea, ka sau‵tala tatou ki te auala ke tumau i te matapula‵pula.

KE ‵TEKE ATU KI OU VĀIVĀIGA

4-5. Kaia e ‵tau ei o matapula‵pula tatou ke oko foki loa ki te ‵teke atu ki te faiga o tamā agasala?

⁴ Ke oko foki loa ki tamā agasala, e mafai eiloa o fakavāivāi ei ‵tou fesokotakiga mo Ieova. E mafai foki o takitaki atu tatou ki te faiga o agasala matagā e uke atu.

⁵ A tatou katoa e fakafesagai atu ki te fakaosoosoga ke agasala. Kae e tofu katoa tatou mo vāivāiga, pelā mo te faiga o se agasala matagā, te aofia i se vaega o amioga lai‵lai, io me ko te talia ne tatou a mafaufauga o te lalolagi. E pelā me se fakaakoakoga, kāti e taua atu se tino ki te fakaosoosoga ke aofia i amioga fakatauavaga sē ‵tau. A te suā tino kāti e taua atu ki te fakaosoosoga ke aofia i faifaiga lai‵lai, pelā mo te fai tokotasi io me ko te onoono ki ata ma‵sei. Kae ko te suā tino kāti e taua atu ki te mataku ki tino, te fia tu tokotasi, te kaitaua vave, io me se isi mea aka. E pelā mo pati a Iakopo, “e tofotofogina a tino taki tokotasi mai te saga atu ki takolekolega o ana manakoga totino.”—Iako. 1:14.

6. Se a te mea e ‵tau o fakamaoni tatou ki ei? Fakamatala mai.

⁶ E mata, e iloa ne koe a feitu kolā e faigofie o tofotofogina ei koe? Se mea fakamataku ke sē ‵saga atu ki ‵tou vāivāiga io me mafau‵fau me e ma‵losi ‵ki tatou o ‵kalo kea‵tea mai te faiga o se agasala. (1 Ioa. 1:8) Masaua me ne fai mai a Paulo, me ke oko foki ki a latou “kolā ko ma‵tua ‵lei i te feitu faka-te-agaga” e mafai o tofotofogina māfai e se tumau latou i te matapula‵pula. (Kala. 6:1) Tela la, e ‵tau mo tatou o fakamaoni ki a tatou eiloa kae ke lavea a feitu kolā e vāi‵vai ei tatou.—2 Koli. 13:5.

7. Se a te mea e ‵tau o ‵saga faka‵lei atu tatou ki ei? Fakamatala mai.

⁷ Kafai ko iloa ne tatou a feitu kolā e tofotofogina i ei tatou, ne a ‵tou mea e ‵tau o fai? Fakamalosi o ‵teke atu a fakaosoosoga konā! E pelā mo taimi o te Tusi Tapu, a te ‵toe vaega vāivāi eiloa o se ‵pui o te fakai ko ana mataloa. Tenā te pogai e tokouke i ei a leoleo i mataloa ko te mea ke puipui a te fakai. I se auala tai ‵pau, e ‵tau o ‵saga faka‵lei atu tatou ki so se feitu telā e iloa ne tatou me e vāi‵vai i ei tatou.—1 Koli. 9:27.

KE ‵TEKE ATU KI FAKAOSOOSOGA MO TE AGASALA

8-9. Ne mafai pefea ne te tamataene telā e fakamatala mai i te Faataoto mataupu 7 o kalo kea‵tea mai te faiga o se agasala matagā? (Faataoto 7:​8, 9, 13, 14, 21)

⁸ E mafai pefea o ‵teke atu tatou ki fakaosoosoga mo te agasala? Mafaufau ki mea e mafai o tauloto ne tatou mai te tamataene telā ne fakamatala mai i te Faataoto mataupu 7. Ne aofia a ia i faifaiga fakatauavaga sē ‵tau mo se fafine talitāgata. E fai mai te fuaiupu 22 me “i konā eiloa” fanatu ei te tamataene tenei i tua o tou fafine. Kae pelā mo te mea e fakaasi mai i fuaiupu mai mua, ne fai ne ia a nisi fakaikuga va‵lea mai mua o te mea tenei, telā ne iku atu ei fakamuli ki te faiga o se agasala.

⁹ Ne a mea ne fai ne ia muamua telā ne iku atu ei ki te faiga o se agasala matagā? Muamua la, i te afiafi, ne “fanatu a ia i te auala e pili ki te ‵kōna o te [fafine talitāgata].” Oti, sasale atu ei a ia i te auala ki te fale o tou fafine. (Faitau te Faataoto 7:​8, 9.) I te laveaga ne ia te fafine, ne seki fulitua a ia. I lō te fai penā, ne talia ne ia te sogi a tou fafine kae fakalogologo i te taimi ne faipati tou fafine ki taulaga ‵kai fakatasi kolā ne ofo ne ia, kāti me e manako tou fafine ke mafaufau a tou tagata i a ia e sē se tino masei. (Faitau te Faataoto 7:​13, 14, 21.) Moi se fai ne te tamataene a mea va‵lea konei, penei e mafai o kalo kea‵tea a ia mai te fakaosoosoga ke fai se mea telā e iku atu ki te faiga o se agasala.

10. E mafai pefea o fai ne se tino i aso nei a te mea ‵se telā ne fai ne te tamataene?

¹⁰ E fakaasi mai i te tala o Solomona a te mea e mafai o tupu ki so se tino tapuaki o Ieova. E mafai o tosina atu a ia ki te faiga o se agasala matagā kae fakamuli ko mafaufau me i mea katoa ne ‵tupu fakavave “i konā eiloa.” Io me kāti ka fai aka a ia, “Seiloa me kaia ne tupu i ei.” Kae kafai e mafaufau a ia ki te mea ne tupu, e mautinoa me ka lavea aka ne ia me ne fai ne ia a fakaikuga va‵lea mai mua o fai ne ia se agasala matagā. Kāti ne filifili ne ia a taugasoa ma‵sei, fakafiafiaga sē ‵lei, fakatuatusi i te neti kolā e fano a ia ki ei, mo koga e fano a ia ki ei kolā e se ‵tau o fano ki ei se Kelisiano. Kāti ko se fai foki ana ‵talo, faitau ki te Tusi Tapu, kau ki fakatasiga, io me fano i te galuega talai. E pelā mo te tamataene telā ne fakamatala mai i te Faataoto, kāti ne seki fai ne ia a te agasala “i konā eiloa.”

11. Ne a mea e ‵tau o fai ne tatou ko te mea ke ‵kalo kea‵tea mai te agasala?

¹¹ Se a te akoakoga mō tatou? E ‵tau mo tatou o ‵kalo kea‵tea mai i te agasala e penā foki mo auala kolā e ‵taki atu ei tatou ki ei. Tenā eiloa te mea ne fakamatala mai ne Solomona mai tua o te fakamatalamaiga ne ia te mea ne tupu ki te tamataene mo te fafine talitāgata. E uiga ki te fafine, e fai mai a ia: “Ke mo a ma fanatu koe i ana ala.” (Faata. 7:25) Ne fai mai foki a ia e uiga ki se vaegā fafine masei penei: “Faka‵mao kea‵tea mai tou fafine; ke mo a ma fakapilipili atu ki te mataloa o tena fale.” (Faata. 5:​3, 8) E tonu, ke puipui tatou mai te faiga o se agasala, e ‵tau mo tatou o ‵kalo kea‵tea mai tulaga kolā e ‵taki atu ei tatou ke fai se mea ‵se.b Kāti e aofia i ei a te ‵kalo kea‵tea mai nisi tulaga io me ko faifaiga kolā e se masei ki Kelisiano, kae e mafai o fakaosooso aka ei tatou ke fai se mea ‵se.—Mata. 5:​29, 30.

12. Se a te fakaikuga ne fai ne Iopu, kae ne fesoasoani atu pefea ke kalo kea‵tea a ia mai fakaosoosoga? (Iopu 31:1)

¹² Ke ‵kalo kea‵tea mai tulaga kolā e iku atu ki te agasala, e ‵tau o fai ne tatou se fakaikuga ‵mautakitaki. Tenā te mea ne fai ne Iopu. Ne fai ne ia “se feagaiga mo [ana] mata” ke mo a ma kilo atu ki se fafine mo tena loto e lailai. (Faitau te Iopu 31:1.) A te tautali ki tena fakaikuga, ka fesoasoani atu ke faka‵mao kea‵tea a ia mai te mulilua. Ke na fakaiku aka foki ne tatou ke ‵kalo kea‵tea mai so se mea telā e mafai o fakaosooso ei tatou ke fai se mea ‵se.

13. Kaia e ‵tau ei o puipui ne tatou a ‵tou mafaufau? (Onoono foki ki ata.)

¹³ E ‵tau foki mo tatou o puipui ‵tou mafaufau. (Eso. 20:17) Nisi tino e tali‵tonu me e se masei a te mafau‵fau ki mea ma‵sei, mea tāua fua ke se fai ne latou. Kae e ‵se a mafaufauga konā. A te tino telā e mafaufau faeloa ki mea ma‵sei, ka manako malosi o fai a mea kolā e mafaufau a ia ki ei. Kafai e fai ne ia, ka fai fua i ei ke faigata o ‵teke atu ne ia te manakoga masei tenā. E tonu, i nisi taimi ka ‵sae aka a mafaufauga ma‵sei. A te kī tāua ko te ‵teke fakavave atu a mafaufauga konā kae sui ki mafaufauga ‵ma. Kafai e fai ne tatou, ka puipui ei tatou mai te faiga o se agasala matagā, me e se talia ne tatou ke malosi a te manakoga tenā i loto i a tatou.—Fili. 4:8; Kolose 3:2; Iako. 1:​13-15.

14. Ne a foki nisi mea e mafai o fesoasoani mai ke puipui ei tatou mai fakaosoosoga?

¹⁴ Ne a foki a mea e mafai ne tatou o fai ke puipui ei tatou mai fakaosoosoga? E ‵tau o tali‵tonu katoatoa tatou me ka aoga faeloa a te fakalogo ki tulafono a Ieova. Kāti e faigata i nisi taimi ke fakafetaui aka a ‵tou mafaufauga mo manakoga mo mea e talia ne te Atua, kae kafai e taumafai malosi tatou o fai te mea tenā, ka maua eiloa ne tatou a te fiafia tonu.

15. A te atiakaga o se manakoga tonu ka fesoasoani mai pefea ke puipui ei tatou mai fakaosoosoga?

¹⁵ E ‵tau o ati aka ne tatou a manakoga ‵tonu. Kafai e tauloto tatou ke “takalia‵lia ki te mea masei, kae fia‵fia ki te mea ‵lei,” ka fakamalosi aka ei ‵tou fakaikuga ke fai a te mea tonu kae ‵kalo kea‵tea mai tulaga kolā e iku atu ki te faiga o se agasala. (Amo. 5:15) Kafai e maua ne tatou a manakoga ‵tonu, ka mafai foki o ‵teke ne tatou se fakaosoosoga māfai ko sae aka se tulaga telā e seki fakamoe‵moe ki ei.

16. E fesoasoani mai pefea a polokalame faka-te-agaga ke tumau tatou i te matapula‵pula? (Onoono foki ki ata.)

¹⁶ E mafai pefea o ati aka ne tatou a manakoga ‵tonu? E ‵tau o fakalave‵lave faeloa tatou i ‵tou polokalame faka-te-agaga. Kafai e ‵kau tatou ki fakatasiga Kelisiano io me ko te galuega talai, ka faigata o fakaosoosogina tatou ke fai se mea ‵se. I lō te fai penā, ka ati aka ne tatou a te manakoga ke fakafiafia a Ieova. (Mata. 28:​19, 20; Epe. 10:​24, 25) Mai te fai‵tau, suke‵suke ki te Muna a te Atua kae mafaufau ‵loto ki ei, ko fakamalosi aka ei ‵tou a‵lofa ki te mea ‵lei kae takalia‵lia ki te mea masei. (Iosu. 1:8; Sala. 1:​2, 3; 119:​97, 101) Masaua me ne fai atu a Iesu ki ana soko: “‵Talo faeloa, ko te mea ke se fakaosoosogina koutou.” (Mata. 26:41) Kafai e fakaaoga ‵tou taimi o ‵talo atu ki te ‵tou Tamana i te lagi, ko tuku atu ne tatou se avanoaga ke fesoasoani mai a ia kae fakamalosi aka ‵tou fakaikuga ke fakafiafia a ia.—Iako. 4:8.

TUMAU I TE MATAPULA‵PULA

17. Se a te vāivāiga o Petelu telā ne taua atu a ia ki ei i taimi e uke?

¹⁷ Kāti e mafai o manumalo katoatoa tatou i ‵tou nisi vāivāiga. Kae kāti e manakogina ke tumau tatou i te taua atu ki nisi vāivāiga. Mafaufau ki te fakaakoakoga a te apositolo ko Petelu. Ne mataku a ia ki tino i te taimi ne fakafiti ne ia a Iesu fakatolu taimi. (Mata. 26:​69-75) Fakamuli ifo, ne foliga mai me ne manumalo a Petelu i tena vāivāiga tenā, i te taimi ne talai atu a ia mo te loto toa i mua o te Sanetulini. (Galu. 5:​27-29) Kae i tausaga fakamuli ifo, ona ko te “mataku i tino pilitome,” ne fakagata ne ia mō se taimi toetoe a te ‵kai fakatasi mo Kelisiano mai Fenua Fakaa‵tea. (Kala. 2:​11, 12) Ne toe mataku foki a Petelu ki tino. Kāti ne seki galo katoatoa atu a tena vāivāiga tenā.

18. Se a te mea e mafai o tupu ki nisi vāivāiga o tatou?

¹⁸ Kāti e mafai foki o fakafesagai atu tatou ki se tulaga tai ‵pau penā. Pefea la? Kāti e mafai o toe tofotofogina tatou ne se vāivāiga telā ko oti ne manumalo tatou i ei. E pelā me se fakaakoakoga, ne fai ‵tonu mai se taina: “E nofo ki se sefulu tausaga ne ‵teke atu au ki te onoono ki ata ma‵sei, kae ne talitonu au me ko manumalo au i toku vāivāiga tenā. Kae ne fai a toku vāivāiga e pelā me se manu fakamataku telā e ‵muni kae faka‵tali ki te taimi tonu ke oso mai.” Se mea fakafiafia, me ne seki ‵fiu vave a ia. Ne iloa aka ne ia me manakogina a taumafaiga i aso takitasi ke ‵teke atu ki te vāivāiga tenei—kāti mō te ‵toega o tena olaga i te fakanofonofoga tenei. Mai te fesoasoani o tena avaga mo toeaina o te fakapotopotoga, ne fai ne ia a taumafaiga e uke ke ‵teke atu ki te onoono ki ata ma‵sei.

19. E mafai pefea o ‵teke atu faeloa ne tatou se vāivāiga masani?

¹⁹ E mafai pefea o ‵teke atu tatou ki se vāivāiga masani kae taumafai ke se toe fai ne tatou? Mai te faka‵logo ki polopolokiga a Iesu e uiga ki fakaosoosoga: “Ke tumau i te matapula‵pula.” Ke oko foki loa ki taimi kolā e mafaufau ei koe i a koe e malosi, ke tumau eiloa i te kalo kea‵tea mai tulaga kolā e mafai o iku atu ki fakaosoosoga. (1 Koli. 10:12) Tumau i te fakagalue aka a auala kolā e mafai o manumalo i ei tatou. E fai mai te Faataoto 28:14: “E fiafia te tagata telā e matapulapula faeloa.”—2 Pe. 3:14.

FAKAMANUIAGA MŌ LATOU KOLA E TUMAU I TE MATAPULA‵PULA

20-21. (a) Ne a fakamanuiaga ka maua ne tatou māfai e tumau i te matapula‵pula ke mo a ma fakaosoosogina? (e) Kafai e fai ‵tou tusaga, ne a mea ka fai ne Ieova mō tatou? (2 Kolinito 4:7)

²⁰ E mautinoa i a tatou me i te ‵toe mea ‵lei mō tatou ko te tumau i te matapula‵pula ke mo a ma fakaosoosogina. A fakafiafiaga o te agasala kolā e mafai o ofo mai ki a tatou “e se tumau” kae ko te ola e ‵tusa mo tulaga o Ieova, ka fai ne ia ke fia‵fia malosi tatou. (Epe. 11:25; Sala. 19:8) E fai tatou penā ona ko tatou ne faite ke ola e ‵tusa mo ana auala. (Kene. 1:27) Tela la, ka maua eiloa ne tatou se loto lagona ‵lei kae fai ei ke tumau tatou i te auala ki te ola se-gata-mai.—1 Timo. 6:12; 2 Timo. 1:3; Iuta 20, 21.

²¹ E tonu, e “vāivāi te foitino.” Kae e se fakauiga i ei me e se mafai o fai ne tatou se mea ki ‵tou vāivāiga. A Ieova e toka o tuku mai te malosi e manakogina ne tatou. (Faitau te 2 Kolinito 4:7.) Kae ke masaua, me e tuku mai eiloa ne Ieova a te malosi telā e sili atu i te malosi masani. A te malosi masani—telā ko taumafaiga e fai ne tatou i aso takitasi ke puipui tatou mai fakaosoosoga—ko te ‵tou tiute ke taua atu ki ‵tou vāivāiga. Kafai e fai ‵tou tusaga, e mafai o tali‵tonu tatou me ka tali mai ne Ieova a ‵tou ‵talo, kae tuku mai se malosi fakaopoopo māfai e ma‵nako tatou ki ei. (1 Koli. 10:13) Ao, mai te fesoasoani o Ieova, e mafai eiloa o tumau tatou i te matapula‵pula ke mo a ma fakaosoosogina.