E se mafai ne tāgata o fakagata a taua
Te Auala ka Gata Atu ei a Taua mo Kinauga Fakasaua
E fai mai te Tusi Tapu me ko te Atua ka aumai ne ia a “te gataga ki taua i te lalolagi kātoa,” kae e se ko tino.—Salamo 46:9.
KA FAKASEAI ATU NE TE ATUA A MALO KATOA O TĀGATA
Ka fakaseai atu ne te Atua a malo katoa o tāgata e auala i te mea telā e taku ne te Tusi Tapu me ko te taua o Amaketo.a (Fakaasiga 16:16) I te taimi tenā, ka maopoopo fakatasi a “tupu o te lalolagi nofoaki kātoa” mō “te taua i te aso lasi o te Atua Malosi Katoatoa.” (Fakaasiga 16:14) A Amaketo ko te taua a te Atua ke fakagata ei a taua katoa.
Ka sui ne te Atua a malo o tāgata ki tena Malo, io me ko tena pulega, telā ka pule mai i te lagi kae ka se mafai o fakaseai atu. (Tanielu 2:44) Ko oti ne ˋtofi aka ne te Atua a tena Tama, ko Iesu Keliso, ke fai mo Tupu i ei. (Isaia 9:6, 7; Mataio 28:18) A te pulega tenei ko te Malob telā ne akoako ne Iesu ana soko ke ˋtalo atu ki ei. (Mataio 6:9, 10) A tino katoa i te lalolagi ka ˋkau fakatasi mai lalo o te pulega tenei telā ko Iesu te Pule i ei.
E se pelā mo pulega a tāgata, ka se fakaaoga eiloa ne Iesu tena tulaga pule mō tena ˋlei eiloa. Ona ko ia e se fakailoga tino kae fapito, ka seai se tino e manavase me ka tuku tiaki io me fakaasi atu a faifaiga sē ˋlei ki a ia ona ko tena fenua, itukāiga io me ko tena putiakaga. (Isaia 11:3, 4) Kae ka se taua eiloa a tino mō olotou saolotoga. Kaia? Me ka saga atu eiloa a Iesu ki te ˋlei o tino taki tokotasi. “Ka fakasao ne ia te tino mativa telā e tagi mō se fesoasoani, e pelā foki mo te tino malalo mo so se tino e seai sena fesoasoani. . . . Ka fakaˋsao ne ia latou mai pulega fakasaua mo fakasauaga.”—Salamo 72:12-14.
Ka fakaseai atu ne te Malo o te Atua a meatau fakamaˋtaku katoa mai te lalolagi. (Mika 4:3) Ka fakaseai foki ne ia a tino maˋsei kolā e se maˋnako ke fakagata a taua io me fakamakosu ne latou te filemu o nisi tino. (Salamo 37:9, 10) Ka maua faeloa ne so se tagata, fafine io me se tamaliki te tokagamalie i so se koga e olo ei latou i te lalolagi.—Esekielu 34:28.
Ka maua ne tino te ˋtoe olaga gali mai lalo i te pulega a te Atua. Ka fakaseai atu ei a fakalavelave kolā e fai ei ke taua a tino, pelā mo te mativa, te fiakai, mo te sē lava o fale ˋnofo. Ka maua ne tino katoa a meaˋkai paleni e uke mo se koga gali ke ˋnofo i ei.—Salamo 72:16; Isaia 65:21-23.
Ko pili o fakaseai atu a ikuga maˋsei katoa o taua ne te Malo o te Atua. E aofia i ei a logoˋmaega i te feitu faka-te-foitino, feitu tau te mafaufau mo lagonaga logoˋmae kolā e māfua mai i taua. A latou foki kolā ne ˋmate atu ka toe fakaˋtu aka ki te ola i te lalolagi. (Isaia 25:8; 26:19; 35:5, 6) Ka ˋkau fakatasi a kāiga kae ko ikuga sē ˋlei kolā ne māfua mai i taua ka aofia i mea mua kolā “ka palele atu.”—Fakaasiga 21:4.
KA FAKASEAI NE TE ATUA TE AGASALA
Kafai ko pule mai te Malo o te Atua, ka ˋkau fakatasi a tino o tapuaki ki te Atua tonu fua e tokotasi, ko Ieovac, “te Atua o te alofa mo te filemu.” (2 Kolinito 13:11) Ka tauloto a tino ke iloa o ola fakatasi i te filemu. (Isaia 2:3, 4; 11:9) A latou katoa kolā e fakagalue ne latou a olotou mea e tauloto ka saoloto mai ikuga o te agasala.—Loma 8:20, 21.
KA FAKASEAI ATU A SATANI MO ANA TEMONI
Ka fakaseai ne te Malo o te Atua a latou kolā e fakamāfua ne latou a taua, ko Satani mo ana temoni. (Fakaasiga 20:1-3, 10) Ka “lasi te filemu” e maua, māfai ko fakaseai atu olotou fakamalosiga maˋsei.—Salamo 72:7.
E mafai o talitonu koe me ka taunu eiloa a te tautoga a te Atua ke fakaseai a taua mo kinauga fakasaua. E mafai kae manako foki a ia o fakaseai atu a taua.
E maua ne te Atua te poto mo te malosi e manakogina ke fakaseai atu a taua mo amioga fakasaua. (Iopu 9:4) E seai eiloa se mea e se mafai o fakataunu ne ia.—Iopu 42:2.
E takalialia te Atua ke lavea ne ia a tino e logoˋmae. (Isaia 63:9) E “takalialia [foki] a ia ki so se tino telā e fiafia ki amioga fakasaua.”—Salamo 11:5.
E tausi faeloa te Atua ki ana pati; a ia e se mafai o loi.—Isaia 55:10, 11; Tito 1:2.
Ka aumai ne te Atua a te filemu tonu kae tumau i aso mai mua.
Ka fakaseai ne te Atua a taua
a Faitau te mataupu “Se a te Taua o Amaketo?” i te jw.org.
b Onoono ki te vitio Se a te Malo o te Atua? i te jw.org.
c A Ieova ko te igoa totino o te Atua.—Salamo 83:18.