Fakaakoako ki a Ieova mo Iesu i te Auala e Mafaufau ei Koe

1-2. Ne a mea e aofia i te alofa ki a Ieova, kae ne fakamaoni mai pefea ne Iesu te mea tenā?

“E ‵TAU mo koe o alofa ki a Ieova tou Atua mo tou loto kātoa mo tou ola kātoa mo tou malosi kātoa mo tou mafaufau kātoa.” (Luka 10:27) Ne fakaasi faka‵lei mai ne Iesu me tenei te ‵toe fakatonuga tāua i te Tulafono a Mose. Ke masaua me i te ‵tou a‵lofa ki a Ieova e aofia i ei a mea i ‵tou loto, kolā ko ‵tou manakoga mo lagonaga. E aofia foki i ei a ‵tou tapuakiga telā e fai mo te loto kātoa mo ‵tou malosi. Kae ko te alofa ki a Ieova e aofia foki i ei a ‵tou mafaufau, telā ko te auala e mafau‵fau ei tatou ki se mea. E tonu, e se mafai o malamalama katoatoa tatou i mafaufauga o Ieova. Kae e mafai o malamalama tatou i mafaufauga o te Atua māfai e suke‵suke ki “te mafaufau o Keliso” me e fakaata mai ne Iesu i se auala ‵lei katoatoa a mafaufauga o tena Tamana.—1 Koli. 2:16 mo te manatu mō sukesukega “we do have the mind of Christ.”

² A Iesu ne alofa ki a Ieova mo tena mafaufau kātoa. Ne iloa ne ia te loto o te Atua mō ia kae ne fakaiku aka ne ia ke ola e ‵tusa mo tena loto, faitalia me ka iku atu a te fai penā ki tena logo‵mae ona ko te faiga o te mea tonu. Mai te saga tonu atu ki te faiga o te loto o tena Tamana, ne seki talia ne ia so se mea ke fakalavelave atu ki tena fakamoemoega tenā.

3. Ne a mea ne tauloto ne te apositolo ko Petelu mai i a Iesu, kae se a te mea ne fakamalosi atu a Petelu ke fai ne Kelisiano? (1 Petelu 4:1)

³ Ne maua ne Petelu mo ana taina apositolo te tauliaga ke ‵nofo fakatasi mo Iesu kae ke tauloto mai i a ia e uiga ki te auala e mafaufau ei a ia. I te taimi ne tusi atu ei ne Petelu a tena tusi fakaosofia muamua, ne fakamalosi atu a ia ki Kelisiano ke toka o puipui olotou mafaufau ki te vaegā manatu telā i a Keliso.a (Faitau te 1 Petelu 4:1.) I te ‵gana Eleni, i te taimi ne fai atu a Petelu: “Puipui otou mafaufau,” ne fakaaoga ne ia te tugapati telā e masani o fakasino atu ki se sotia telā ko toka mo ana meatau mō te taua. Tela la, kafai e fakaakoako a Kelisiano ki te auala e mafaufau ei a Iesu, ka fai te mea tenā pelā me se meatau ke ‵teke ne latou so se manakoga agasala mo te lalolagi telā e pule ki ei a Satani.—2 Koli. 10:​3-5; Efe. 6:12.

4. E fesoasoani mai pefea te mataupu tenei ke tau‵tali tatou i te manatu fesoasoani o Petelu?

⁴ Ka sau‵tala nei tatou ki te auala e mafaufau ei a Iesu mo te auala ke fakaakoako ki a ia. Ka onoono tatou ki te auala e mafai o (1) fakaakoako ki te auala e mafaufau ei a Ieova, telā ka fesoasoani mai ke tasi tatou i mea e mafau‵fau ki ei, (2) ke loto maulalo, kae ko te (3) ke maua se mafaufau ‵lei mai te fakalagolago ki a Ieova i ‵talo.

FAKAAKOAKO KI TE AUALA E MAFAUFAU EI A IEOVA

5. I te auala fea ne seki mafaufau ei a Petelu e pelā mo Ieova i se taimi e tasi?

⁵ Mafaufau ki te taimi ne seki fakaata mai ne Petelu a te auala e mafaufau ei a Ieova. Ne fai atu a Iesu ki ana apositolo me e ‵tau mo ia o fano ki Ielusalema, tuku atu ki takitaki lotu i konā, kufaki i fakasauaga, kae tamate. (Mata. 16:21) Kāti ne faigata ki a Petelu a te manatu me ka talia ne Ieova a Iesu—te fakamoemoega o Isalaelu mo te Mesia telā ne folafola mai—ke tamate. (Mata. 16:16) Tenā, ne ‵taki ei ne Petelu a Iesu ki se feitu kae fai atu: “Te Aliki, ke alofa koe ki a koe eiloa; ke mo a eiloa e tupu te mea tenei ki a koe.” (Mata. 16:22) Ona ko te mea ne seki mafaufau a Petelu e pelā mo Ieova, ne seki tasi ei te mafaufau o ia mo Iesu e uiga ki te mea tenā.

6. Ne fakaasi mai pefea ne Iesu me ne ‵pau ana mafaufauga mo Ieova?

⁶ A mafaufauga o Iesu ne ‵pau eiloa mo mafaufauga o tena Tamana i te lagi. Ne fai atu a Iesu ki a Petelu: “Fano kea‵tea mai i a au, e Satani! Ko fai koe mo fai se fakalavelave ki a au, me i a koe e se mafaufau e pelā mo te Atua kae e pelā mo tāgata.” (Mata. 16:23) Kāti ne fai atu ne Petelu a pati konā mo lagonaga ‵lei, kae ui i ei, ne seki talia ne Iesu tena manatu. Tenei te akoakoga mō tatou. E se ko te loto o Ieova ke ola a Iesu i se olaga saogalemu. I konā eiloa, ne tauloto ne Petelu se akoakoga tāua me ‵tau o fai ne ia a mafaufauga o te Atua e pelā me ko ana mafaufauga.

7. Ne fakaasi fakamuli atu pefea ne Petelu me ne manako a ia ke mafaufau e pelā mo Ieova? (Onoono ki te ata.)

⁷ Fakamuli ifo, ne fakaasi mai ne Petelu me ne manako a ia ke mafaufau e pelā mo Ieova. Ko oko mai te taimi ke fai a tino kolā ne seki pilitome mo fai a tino o te Atua. Ne ‵tofi aka a Petelu ke talai ki a Konelio, telā ko te tino muamua mai tino o Fenua Fakaa‵tea ke aofia i te potukau o tino tapuaki ‵fou konei. E se fia fai‵pati sāle a tino Iutaia ki tino mai Fenua Fakaa‵tea, tela la, ne ‵tau eiloa o ‵fuli ne Petelu te auala e mafaufau ei a ia ko te mea ke toka a ia mō tena tofiga tenā. I te iloaga ne Petelu a te loto o te Atua e uiga ki te mea tenei, ne ‵fuli ei tena kilokiloga. Ona ko te mea tenā, i te taimi ne uga atu ei te fekau ki a ia, ne “loto fiafia” a ia o fano. (Galu. 10:​28, 29) Ne talai atu a ia ki a Konelio mo tena kāiga, kae ne papatiso latou.—Galu. 10:​21-23, 34, 35, 44-48.

8. E fakaasi atu pefea ne tatou me e fetaui ‵tou mafaufauga mo mafaufauga o Ieova? (1 Petelu 3:8)

⁸ I tausaga fakamuli ifo, ne fakamalosi atu a Petelu ki taina Kelisiano ko latou ke “tasi i te mafaufau.” (Faitau te 1 Petelu 3:8) E pelā me ne tino o Ieova, e mafai tatou o tasi i te mafaufau māfai e mafaufau ‵loto tatou ki te auala e mafaufau ei a Ieova kolā e fakaasi mai i tena Muna. E pelā me se fakaakoakoga, ne fakamalosi atu a Iesu ki ana soko ke fakamuamua a te Malo i olotou olaga. (Mata. 6:33) Kae kāti ko fakaiku aka ne se tino talai i tau fakapotopotoga ke kau atu ki se vaega o te taviniga tumau. I lō te fai atu ke filifili se isi galuega tai ‵lei atu, ke faipati atu ki a ia e uiga ki te gali mo te aoga o tena fakamoemoega tenā kae ka toka koe o fesoasoani atu ki a ia.

KE LOTO MAULALO

9-10. Ne fakaasi mai pefea ne Iesu te loto maulalo tu ‵kese?

⁹ I te po mai mua o tamate, ne fakaasi atu ne Iesu se akoakoga tāua o te loto maulalo ki a Petelu mo nisi apositolo. Mai mua malie, ne uga ne Iesu a Petelu mo Ioane ke olo o fakatoka a mea mō te ‵toe ‵kaiga a Iesu mo latou a koi tuai a ia o mate. Tasi o mea kāti ne fai ne lāua ko te fakamautinoaga me isi se pesini mo ne solo ko te mea ke mafai o mulumulu a vae o mālō a koi tuai o ‵kai. Kae ko oi te tino loto maulalo ka mafai o fai ne ia te galuega fatauva tenā?

¹⁰ E aunoa mo te fakatalave, ne fakaasi atu ne Iesu te loto maulalo tu ‵kese. Ne ‵poi ‵ki a te kau apositolo i te ‵kiloatuga ki a Iesu e fai ne ia te galuega telā e masani o fai ne se tavini. Ne tapale ne Iesu tena gatu tafa ki tua, ‵sai se solo ki tena taugasulu, ‵ligi a vai ki loto i se pesini, kae kamata o mulumulu ne ia a olotou vae. (Ioa. 13:​4, 5) Kāti ne tai leva loa te taimi ke mulumulu a vae o apositolo e toko 12—e aofia i ei a Iuta, telā ka fakalata ne ia a Iesu. Kae ne fakaoti eiloa ne Iesu mo te loto maulalo a te galuega tenā. Oti aka, fai atu ei a Iesu mo te kufaki ki a latou: “E malamalama koutou i te mea telā ne fai ne au ki a koutou? E taku ne koutou au ki te ‘Faiakoga’ mo te ‘Aliki,’ kae e tonu eiloa koutou me ko au eiloa tenā. Tela la, kafai au ko te Aliki mo te Faiakoga kae ne mulumulu ne au otou vae, e ‵tau foki mo koutou o fakatau mulumulu otou vae.”—Ioa. 13:​12-14.

11. Ne fakaasi mai pefea ne Petelu me ne tauloto a ia ke loto maulalo? (1 Petelu 5:5) (Onoono foki ki te ata.)

¹¹ Ne tauloto ne Petelu te loto maulalo mai i a Iesu. I te taimi ko nofo ei a Iesu i te lagi, ne fai ne Petelu se vavega mai te faka‵leiga o se tagata telā ne ‵pili talu tena fanaumaiga. (Galu. 1:​8, 9; 3:​2, 6-8) Ne lavea ne se vaitino a te vavega tenei, kae ne mumu atu ki a Petelu. (Galu. 3:11) E mata, ne talia ne Petelu a tavaega a tino ki a ia i te taimi tenā, maise loa me ne tupu aka a ia i se fenua telā e fakatāua ne tino i ei a tulaga ma‵luga mo te takutakua? Ikai, ne loto maulalo a ia o fai atu me e ‵tau fua o avatu a tavaega ki a Ieova mo Iesu, i ana pati: “E auala i tena igoa [Iesu], mo te mā fakatuanaki ki tena igoa, ko malosi ei te tagata tenei e pelā mo te mea ko lavea kae iloa ne koutou.” (Galu. 3:​12-16) A pati ne fakaaoga ne Petelu i sena tusi ki Kelisiano e uiga ki te tāua ke ati aka te loto maulalo, e fakamasaua mai ei ki a tatou a te taimi ne ‵sai ei ne Iesu se solo ki tena taugasulu kae ‵mulu a vae o ana apositolo.—Faitau te 1 Petelu 5:5.

12. E mafai pefea o tumau tatou i te loto maulalo, e pelā mo Petelu?

¹² E mafai o fakaakoako tatou ki a Petelu i te atiakaga o te loto maulalo. Masaua me e uke atu a mea e aofia i te loto maulalo tonu i lō te fai atu fua o pati ‵lei. A te pati telā ne ‵fuli ne Petelu ki te loto maulalo, e fakaasi mai i ei me i te loto maulalo e aofia i ei te auala e mafau‵fau ei tatou ki a tatou eiloa e pelā foki mo nisi tino. E fai ne tatou a galuega mō nisi tino ona ko te ‵tou a‵lofa ki Ieova mo tino, kae e se ko te mea ke tavae tatou ne tino. Kafai e fia‵fia tatou o tavini atu ki a Ieova mo ‵tou taina i so se auala faitalia me e se lavea mai ne nisi tino a ‵tou galuega, ko fakaasi atu eiloa ne tatou a te loto maulalo.—Mata. 6:​1-4.

KE “‵LEI OTOU MAFAUFAU”

13. Fakamatala mai a mea e aofia i ei i te ‘‵lei o te mafaufau.’

¹³ Ne a mea e aofia i ei a te ‘‵lei o te mafaufau’? (1 Pe. 4:7) A te Kelisiano telā e ‵lei tena mafaufau e fai ne ia ‵toe mea e mafai ke fai a fakaikuga ‵lei kolā e fakaata mai ei a mafaufauga o Ieova. E iloa ne te Kelisiano tenā me e seai se mea i te olaga nei e sili atu tena tāua i lō tena fesokotakiga mo Ieova. E malamalama a ia me e se mafai o iloa ne ia a mea katoa. Kae e fakaasi atu tena fakalagolago ki te Atua mai te ‵talo atu faeloa mo te loto maulalo ki a Ieova mō tena takitakiga.b

14. Ne seki fakalagolago pefea a Petelu i se taimi e tasi ki a Ieova?

¹⁴ I tena toe po mai mua o mate, ne fakailoa atu a Iesu ki ana soko: “Ka tiaki katoa ne koutou au i te po tenei.” Ne tali atu a Petelu mo te loto talitonu, penei: “E ui eiloa e tiaki ne latou katoa konei a koe, kae e se mafai ne au o tiaki koe!” I te po tenā, ne fakamalosi atu a Iesu ki nisi o ana soko, penei: “Ke tumau i te matapula‵pula kae ‵talo faeloa.” (Mata. 26:​31, 33, 41) Moi ne fakalogo a Petelu ki te manatu fesoasoani tenā i te taimi muamua, kāti ne mafai eiloa o maua ne ia te loto malosi o fai atu i a ia se soko o Iesu. I lō te fai penā, ne salamō ‵ki a Petelu i te taimi ne fakafiti ne ia a tena Matai.—Mata. 26:​69-75.

15. Ne maua pefea ne Iesu te mafaufau ‵lei i tena toe po e pelā me se tagata faka-te-foitino?

¹⁵ Ne fakalagolago katoatoa a Iesu ki a Ieova. E tiga eiloa ne ‵lei katoatoa a Iesu, ne ‵talo faeloa a ia. Tenā ne maua i ei ne ia te loto malosi ke fai te mea e loto ki ei a Ieova. (Mata. 26:​39, 42, 44; Ioa. 18:​4, 5) E mautinoa eiloa, me ne seki puli i a Petelu a ‵talo e uke ne fai ne Iesu i tena toe po.

16. Ne fakaasi mai pefea ne Petelu me ne ati aka ne ia se mafaufau ‵lei? (1 Petelu 4:7)

¹⁶ Fakamuli loa, ne tauloto ne Petelu te tāua ke fakalagolago malosi ki a Ieova i ‵talo. I tena toetuga, ne toe fakamautinoa atu ne Iesu ki a Petelu mo nisi apositolo me ka maua ne latou a te agaga tapu ko te mea ke fakataunu te lotou galuega ke talai atu. Kae ne fai atu a Iesu ke faka‵tali latou i Ielusalema ke oko ki te taimi ko kamata ei te lotou galuega. (Luka 24:49; Galu. 1:​4, 5) Ne a mea ne fai ne Petelu i te taimi koi faka‵tali ei? Ne “talo atu faeloa” a Petelu mo ana taina Kelisiano. (Galu. 1:​13, 14) Fakamuli ifo, ne fakamalosi atu a Petelu i tena tusi muamua, ki ana taina Kelisiano ke fai ke ‵lei olotou mafaufau kae ke fakalagolago faeloa ki a Ieova i ‵talo. (Faitau te 1 Petelu 4:7.) Ne tauloto a Petelu ke fakalagolago ki a Ieova kae fai foki pelā me se pou malosi o te fakapotopotoga.—Kala. 2:9.

17. Faitalia te atamai o tatou i nisi mea, se a te mea e ‵tau o fai faeloa ne tatou? (Onoono foki ki te ata.)

¹⁷ Ke ‵lei ‵tou mafaufau, e ‵tau o fakapili‵pili atu faeloa tatou ki a Ieova e auala i ‵talo. Faitalia te atamai o tatou i nisi mea, kae e ‵tau eiloa o ‵talo faeloa tatou ki a Ieova. Tela la, kafai ko fai a ‵tou fakaikuga tāua, e ‵talo tatou ki a Ieova mō se takitakiga, mo te loto tali‵tonu me e iloa ne ia te ‵toe mea ‵lei mō tatou.

18. E mafai pefea o fai ke ‵pau ‵tou mafaufauga mo mafaufauga o Ieova?

¹⁸ E loto fakafetai tatou me ne faite ne Ieova tatou i se auala telā e mafai o fakaakoako tatou ki ana uiga. (Kene. 1:26) E tonu, e se mafai o fakaakoako tatou ki a Ieova i se auala ‵lei katoatoa. (Isa. 55:9) Kae e pelā mo Petelu, e mafai o fai ke ‵pau ‵tou mafaufauga mo mafaufauga o Ieova. Ke na fai tatou penā mai te fakaakoako ki te auala e mafaufau ei a Ieova, ke loto maulalo, kae fai ke ‵lei ‵tou mafaufau.