A te Alofa o te Atua e Tumau ki te Se-Gata-Mai

1-2. Se a te fakalavelave e fepaki mo Kelisiano e tokouke?

FAKAATAATA aka la se pōti e tele atu i loto i se kaumatagi malosi. Ona ko te ˋlasi o peau, ko ˋti malosi ei te pōti. Ka ˋti malosi kae tapea te pōti ki te koga e fano te au ki ei, vagana ke ˋpei ifo ne se tino se taula. Ka fai ne te taula tenā ke ˋmautakitaki te pōti kae ke se tapea atu i te taimi o te kaumatagi malosi.

² Kafai e fakafesagai koe mo se fakalavelave faigata, kāti ka fai eiloa koe pelā mo te pōti tenā. E mafai o mafuliˋfuli fakavave ou lagonaga. I te aso nei, e mafai o talitonu koe ki te alofa mo te fesoasoani o Ieova ki a koe; i te suā aso, ko fakalotolotolua koe me e mata e lavea ne ia a mea e fepaki mo koe io me ikai. (Sala. 10:1; 13:1) Kāti e fai mai ne se taugasoa a pati fakamafanafana kae ka ˋlei ei ou lagonaga mō se vaitaimi. (Faata. 17:17; 25:11) Oti aka ko toe kamata koe o fakalotolotolua. Kāti ka mafaufau koe me e mata, koi fakatāua ne Ieova a koe io me ikai. E mafai pefea o ˋmautakitaki koe e pelā me se taula i te taimi e fakafesagai atu ei ki se fakalavelave? I nisi tugapati, e mafai pefea o mautinoa i a koe—kae tumau i te talitonu—ki te alofa mo te fesoasoani o Ieova ki a koe?

3. Se a te uiga o te “alofa fakamaoni” telā e sae mai i te Salamo 31:7 mo te 136:​1, kae kaia e mafai o fai atu tatou i a Ieova ko te ˋtoe fakaakoakoga sili o te alofa fakamaoni? (Onoono foki ki te ata.)

³ Tasi te auala e mafai o ˋmautakitaki tatou e pelā me se taula māfai e fakafesagai atu ki se fakalavelave, ko te masaua ne tatou te alofa fakamaoni o Ieova. (Faitau te Salamo 31:7; 136:1.) A te pati “alofa fakamaoni” e fakamatala mai ei se fesokotakiga ˋpoko kae tumau telā e fakaasi atu ne te suā tino ki te suā tino. A Ieova ko te ˋtoe fakaakoakoga sili o te alofa fakamaoni. E tonu, e fakamatala mai i te Tusi Tapu a ia e pelā me e “ˋfonu i te alofa fakamaoni.” (Eso. 34:​6, 7) E fai mai foki te Tusi Tapu e uiga ki a Ieova penei: “A koe e ˋfonu i te alofa fakamaoni ki a latou katoa kolā e kaˋlaga atu ki a koe.” (Sala. 86:5) Mafaufau la ki te uiga o pati konā: E se mafai ne Ieova o tiakina ana tavini fakamaoni! Kafai e masaua ne koe me i a Ieova e fakamaoni, ka fai ei ke ˋmautakitaki koe i te taimi e fakafesagai atu ki se fakalavelave faigata.—Sala. 23:4.

MASAUA I TE ALOFA O IEOVA SE AKOAKOGA FAKAVAE I TE TUSI TAPU

4. Taku mai ne akoakoga fakavae i te Tusi Tapu kae fakamatala mai a te pogai e talitonu katoatoa koe ki ei.

⁴ A te suā auala e mafai o ˋmautakitaki koe e pelā me se taula i taimi o fakalavelave, ko te masaua me i te alofa o Ieova se akoakoga fakavae i te Tusi Tapu. Se a tau fakaˋtau māfai e lagona ne koe a te fuaiupu tenei, “akoakoga fakavae i te Tusi Tapu?” Kāti ka mafaufau koe ki akoakoga kolā ne tauloto ne koe mai te Muna a te Atua. E pelā me se fakaakoakoga, ne tauloto koe me i te igoa o te Atua ko Ieova, a Iesu ko te Tama eiloa e tokotasi a te Atua, a tino ˋmate e seai se mea a latou e iloa, kae ka isi se palataiso i te lalolagi telā ka ola i ei a tino ki te se-gata-mai. (Sala. 83:18; Fai. 9:5; Ioa. 3:16; Faka. 21:​3, 4) I te taimi eiloa ne talia ne koe a akoakoga konā, ne faigata ke toe tiaki ne koe. Kaia? Me ko malamalama koe me i akoakoga konei ne fakavae ki mea ˋtonu. Ke onoono nei tatou ki te auala e mafai o fesoasoani atu a te iloa ne koe me i te alofa o Ieova se akoakoga fakavae i te Tusi Tapu, ke tapale keaˋtea ne koe a te manatu me e se saga mai io me lavea ne Ieova a fakalavelave e fepaki mo koe.

5. Fakamatala mai te auala e mafai ne se tino o ˋteke atu a akoakoga ˋse.

⁵ I te taimi ne kamata koe o sukesuke ki te Tusi Tapu, se a te mea ne fesoasoani atu ke ˋteke ne koe a akoakoga ˋse? Kāti ne fai ne koe a te mea tenei, mai te fakatusatusa ne koe a mea ne akoako atu i tau lotu mo mea e akoako mai i te Tusi Tapu. Mafaufau ki se fakaakoakoga: Mafaufau me ne talitonu muamua koe i a Iesu ko te Atua Malosi Katoatoa. Kae i te taimi ko sukesuke koe ki te Tusi Tapu, kāti ne mafaufau aka koe penei, ‘E mata, e tonu eiloa te akoakoga tenā?’ Mai tua o te sukesukega ki fakamaoniga i te Tusi Tapu ko mafai o tali atu koe ikai. Ko sui ei ne koe te akoakoga ˋse tenā ki te munatonu tenei mai te Tusi Tapu: A Iesu ko “te uluaki o mea katoa ne faite,” “ko te Tama fagasele e tokotasi a te Atua.” (Ko. 1:15; Ioa. 3:18) E tonu, a akoakoga ˋse e mafai eiloa o “ˋmau olotou aka” kae faigata ke ˋteke ki ei. (2 Koli. 10:​4, 5) Kae kafai ko maua ne koe o ˋteke atu ki ei, ko se mafai ei o toe foki koe ki tua i akoakoga kolā ko oti ne tiakina ne koe.—Fili. 3:13.

6. Kaia e mafai o talitonu koe me i te ‘alofa fakamaoni o Ieova e tumau ki te se-gata-mai’?

⁶ E mafai ne koe o fai se mea tai ˋpau ki mea e akoako mai i te Tusi Tapu e uiga ki te alofa o Ieova. I te taimi e fakafesagai koe ki se fakalavelave, kafai ko kamata o fakalotolotolua koe ki te alofa o Ieova, ke fesili ifo penei, ‘E mata, e tonu te mea e mafaufau au ki ei?’ Ke fakatusatusa ou manatu fakalotolotolua e uiga ki te alofa o Ieova ki pati i te Salamo 136:1—te tusi siki fakavae o te mataupu tenei. Kaia e fakamatala mai ei ne Ieova a tena alofa e pelā me e “fakamaoni”? Kaia e fakafokifoki mai ei a te manatu me i “tena alofa fakamaoni e tumau ki te se-gata-mai” faka-26 taimi i te salamo tenā? E pelā mo mea ne sauˋtala tatou ki ei, a te alofa fakamaoni o Ieova mō ana tino se akoakoga tāua i te Tusi Tapu, e pelā eiloa mo nisi akoakoga kolā ko oti ne talia ne koe mai te Muna a te Atua. A te manatu me e kilo atu a Ieova ki a koe e pelā me e se aoga io me e se alofagina, se akoakoga loi. ˋTeke atu a te akoakoga tenā, e pelā loa ma ˋteke atu ne koe so se akoakoga ˋse!

7. Taku mai a nisi tusi faiˋtau e fakatalitonu mai ei ki a tatou a te alofa o Ieova.

⁷ E maua i te Tusi Tapu a fakatalitonuga o te alofa o Ieova. E pelā me se fakaakoakoga, ne fai atu a Iesu ki ana soko: “E sili atu te tāua o koutou i lō manu eva foˋliki e uke.” (Mata. 10:31) Ne fai atu foki a Ieova ki ana tino penei: “Ka fakamalosi ne au a koe, ao, ka fesoasoani atu au ki a koe, ka puke ˋmau au ki a koe i toku lima fakaatamai o te amiotonu.” (Isa. 41:10) Mafaufau la ki te maˋnino o fakamatalaga konā. Ne seki fai mai a Iesu, ‘Kāti e sili atu te tāua o koutou,’ kae e seki fai mai a Ieova ‘Kāti ka fesoasoani atu au ki a koe.’ Kae ne fai mai lāua penei: “E sili atu te tāua o koutou” kae “ka fesoasoani atu au ki a koe.” Kafai e fakalotolotolua koe ki te alofa o Ieova māfai e fepaki koe mo se fakalavelave, a tusi faiˋtau konei e se fai fua i ei ke ˋlei ou lagonaga; e fesoasoani atu ke iloa ˋlei ne koe me alofa a ia ki a koe. Ne fakavae eiloa ki fakamatalaga ˋtonu. Kafai e ˋtalo koe ki a Ieova e uiga ki ou manatu fakalotolotolua kae mafaufau fakaˋlei ki tusi faiˋtau konei, ko mafai ei o fai atu ne koe a pati i te 1 Ioane 4:16: “Kae ko tatou ko iloa kae taliˋtonu ki te alofa o te Atua mō tatou.”a

8. Se a te mea e mafai ne koe o fai māfai e fakalotolotolua koe i nisi taimi ki te alofa o Ieova mō koe?

⁸ Kae e a māfai koi fakalotolotolua eiloa koe ki te alofa o Ieova? Ke fakatusatusa ne koe te lagonaga tenā ki mea ko iloa ne koe e uiga ki a ia. A lagonaga e se fakatalitonugina e pelā mo manatu ˋtonu, kae ko te alofa o Ieova telā e akoako mai i te Tusi Tapu se manatu tonu. Kafai e se taliˋtonu tatou me i a Ieova e alofa mai, ko tena uiga ko se fakatāua ne tatou a tena toe uiga tāua—ko te alofa.—1 Ioa. 4:8.

MAFAUFAU FAKAˋLEI KI TE ‘ALOFA O IEOVA KI A KOUTOU’

9-10. Se a te mea ne fakauiga a Iesu ki ei i ana pati konei: “E alofa eiloa te Tamana ki a koutou,” kolā e fakamau i te Ioane 16:​26, 27? (Onoono foki ki te ata.)

⁹ E mafai o tauloto tatou ki mea e uke e uiga ki te alofa o Ieova mai te mafauˋfau ki pati a Iesu ki ana soko: “E alofa eiloa te Tamana ki a koutou.” (Faitau te Ioane 16:​26, 27.) Ne seki fai atu ne Iesu a pati konei ko te mea fua ke ˋlei a lagonaga o ana soko. A te ˋtonuga loa, kafai e faiˋtau tatou ki fuaiupu mai mua o ana pati konā, ko iloa ei ne tatou me ne seki fakauiga a ia ki lagonaga o ana soko. Kae ne faipati a ia ki se mataupu fakaaˋtea—ko ˋtalo.

¹⁰ Ne fatoa fai atu ne Iesu ki ana soko me e ˋtau mo latou o ˋtalo atu e auala i a ia, kae e se ki a ia. (Ioa. 16:​23, 24) E tāua ˋki ke iloa ne latou a te mea tenā. Mai tua o tena toetuga, kāti ne maˋnako a soko ke ˋtalo atu ki a Iesu. A te ˋtonuga loa, a Iesu se taugasoa o latou. Ne mafai o fakasakoˋsako mai latou me ona ko tena alofa mō latou, ka manako eiloa a ia o fakalogologo ki olotou ˋtalo kae fakamolemole atu ki tena Tamana ke fesoasoani ki a latou. Kae ne fai atu a Iesu me e se ˋtau o mafauˋfau latou penā. Kaia? Me ne fai atu a ia ki a latou: “E alofa eiloa te Tamana ki a koutou.” A te manatu tonu tenā, se vaega o akoakoga fakavae i te Tusi Tapu e uiga ki ˋtalo. Mafaufau la ki te uiga o te mea tenā ki a koe. Mai i au sukesukega ki te Tusi Tapu, ko iloa ne koe a Iesu kae alofa foki ki a ia. (Ioa. 14:21) Kae e pelā mo soko i te senitenali muamua, e mafai o ˋtalo atu koe mo te loto talitonu ki te Atua, mo te iloa me e “alofa eiloa te Tamana ki a koutou.” E fakaasi atu ne koe a tou fakatuanaki ki pati konā i taimi takitasi e ˋtalo atu ei koe ki a Ieova.—1 Ioa. 5:14.

KE MALAMALAMA I TE MĀFUAGA O MANATU FAKALOTOLOTOLUA

11. Kaia ka fiafia ei a Satani māfai ko fakalotolotolua tatou ki te alofa o Ieova?

¹¹ E māfua mai i fea a manatu fakalotolotolua e uiga ki te alofa o Ieova? E mafai o tali atu koe me e māfua mai i a Satani, kae e mafai o tonu a te manatu tenā. A te Tiapolo e taumafai o “salasala ke folo ne ia se tino” i a tatou, kae ka fiafia eiloa a ia māfai e fakalotolotolua tatou ki te alofa o Ieova. (1 Pe. 5:8) A te ˋtonuga loa, ne fakamalosi aka a Ieova ne tena alofa ke tuku mai ne ia a te togiola—se mea telā e manako a Satani ke mafauˋfau tatou me e se ˋtau o maua ne tatou. (Epe. 2:9) Kae ko oi ka fiafia māfai e fakalotolotolua tatou ki te alofa o Ieova? Ko Satani. Kae ko oi ka fiafia māfai tatou e loto vāiˋvai kae taofi aka te ˋtou taviniga ki a Ieova? Ko Satani. E manako a Satani ke mafauˋfau tatou me e se alofa mai a Ieova. Kae e se tonu te manatu tenā. Ko Satani eiloa te tino ne galo atu i a ia a te alofa o Ieova. Kae e auala i se ‘togafiti masei’ a ia e tasi, e taumafai a ia ke mafauˋfau tatou me i a Ieova e se alofa kae e ˋteke ne ia tatou. (Efe. 6:11) Kafai ko iloa ne tatou a taumafaiga e fai ne te ˋtou fili, e mafai eiloa o fakamalosi aka ne tatou a te ˋtou fakaikuga ke “ˋteke te Tiapolo.”—Iako. 4:7.

12-13. E mafai pefea o fai ne te ˋtou tulaga agasala ke fakalotolotolua tatou ki te alofa o Ieova mō tatou?

¹² E isi se suā mea telā e fai ne ia ke fakalotolotolua tatou ki te alofa o Ieova mō tatou. Se a la te mea tenā? Ko te ˋtou tulaga agasala. (Sala. 51:5; Loma 5:12) Ne fakamasei ne te agasala a te fesokotakiga i te va o tino mo te Atua. Ne fakamasei foki ne ia a te mafaufau, te loto mo te foitino o te tino.

¹³ E fai ne te agasala ke pokotia foki ˋtou lagonaga i se auala sē ˋlei, kae fai ei ke maua ne tatou a lagonaga sē ˋlei, manavase, sē tokagamalie, kae masiasi. E mafai o maua ne tatou a lagonaga konā māfai e fai ne tatou se agasala. Kae e mafai foki o ˋsae aka ona ko te mea e iloa ne tatou te ˋtou tulaga agasala—se tulaga telā e se fetaui mo te auala ne faite ei tatou. (Loma 8:​20, 21) E pelā mo te motoka telā e malū tena teka e se mafai o tele fakaˋlei, e se mafai foki ne tatou tino sē ˋlei katoatoa o fai fakaˋlei ne tatou a mea e ˋtusa mo te auala ne faite ei tatou. Tela la, e sē se mea fakapoi me maua ne tatou a manatu fakalotolotolua i nisi taimi e uiga ki te alofa o Ieova mō tatou. Kafai e tupu te mea tenā, e ˋtau o masaua ne tatou me i a Ieova ko “te Atua sili kae fakaofoofogia telā e . . . fakaasi atu te alofa fakamaoni ki a latou kolā e aˋlofa ki a ia kae tausi ki ana fakatonuga.”—Nee. 1:5.

14. E fesoasoani mai pefea a te mafaufau ki te togiola ke ˋteke te manatu me e se mafai o alofa mai a Ieova ki a tatou? (Loma 5:8) (Onoono foki ki te pokisi “Ke Fakaeteete i ‘te Malosi Fakaloiloi o te Agasala.’”)

¹⁴ E tonu, i nisi taimi e mafauˋfau tatou me e se ˋtau o maua ne tatou a te alofa o Ieova. Kae se mea tonu eiloa me e se ˋtau o maua ne tatou a tena alofa. Kae tenā te pogai e tu ˋkese i ei a tena alofa mō tatou. E seai se mea e mafai o fai ne tatou ke maua ne tatou a te alofa o Ieova. Kae ne tuku mai ne Ieova a te togiola ko te mea ke mafai o fakamagalo ei ˋtou agasala ona ko tena alofa ki a tatou. (1 Ioa. 4:10) Ke masaua foki me ne vau a Iesu o fakaˋsao a tino agasala, kae e se ko tino ˋlei katoatoa. (Faitau te Loma 5:8.) E se mafai ne tatou katoa o fai a mea i se auala ˋlei katoatoa, kae e se fakamoemoe a Ieova ke ˋlei katoatoa a mea e fai ne tatou. Kafai e malamalama tatou me e mafai ne te ˋtou tulaga agasala o fai tatou ke fakalotolotolua ki te alofa o Ieova, e mafai eiloa ne tatou o fakaiku aka ke mo a ma tupu te mea tenei.—Loma 7:​24, 25.

FAKAIKU AKA KE TUMAU I TE FAKAMAONI

15-16. Kafai e tumau tatou i te fakamaoni ki a Ieova, se a te mea e mafai o mautinoa i a tatou, kae kaia? (2 Samuelu 22:26)

¹⁵ E manako a Ieova ke fai ne tatou a te filifiliga tonu mai te “ˋpiki ˋmau ki a ia.” (Teu. 30:​19, 20) Kafai e fai tatou penā, e mautinoa me ka tumau te fakamaoni o ia ki a tatou. (Faitau te 2 Samuelu 22:26.) Kafai foki loa e tumau tatou i te fakamaoni ki a Ieova, e mautinoa i a tatou me ka fesoasoani mai a ia ke kufaki tatou i so se fakalavelave i ˋtou olaga.

¹⁶ E pelā mo mea ko oti ne sauˋtala tatou ki ei, e isi eiloa se pogai ke ˋmautakitaki tatou e pelā me se taula i te taimi e feˋpaki ei mo fakalavelave. E iloa ne tatou me alofa mai a Ieova kae ka fesoasoani mai foki. Tenā te mea e akoako mai i te Tusi Tapu. Kafai e fakalotolotolua tatou ki tena alofa, e mafai o mafauˋfau tatou ki mea ko iloa ne tatou me e ˋtonu i lō te fakatāua ne tatou a ˋtou lagonaga i te taimi tenā. Ke na tumau i te taliˋtonu ki te munatonu fakavae i te Tusi Tapu, me i te alofa fakamaoni o Ieova e tumau ki te se-gata-mai.