“A Koe se Tino Telā e Tāua ˋki”!

1-2. E mafai pefea o iloa ne tatou me tāua tatou i te kilokiloga a Ieova?

E ISI ne tavini pele a Ieova e mafauˋfau me ko seai se lotou aoga. Kāti e fai penā ona ko faifaiga ne fai ne nisi tino ki a latou e pelā me i a latou e seai ne aoga. Kai tupu eiloa se mea penā ki a koe? Kafai e penā loa, e mafai pefea o loto talitonu koe me tāua eiloa koe i te kilokiloga a Ieova?

² Kāti ka aoga ki a koe ke onoono ki tala i te Tusi Tapu kolā e fakaasi mai ei a faifaiga e manako a Ieova ke fai ki tino. Ne fakaasi atu ne tena Tama ko Iesu te fakaaloalo mo te āva ki tino. Mai te fai penā, e fakaasi mai ne ia me fakatāua ne lāua mo tena Tamana a tino maˋlalo kolā e mafauˋfau me seai se lotou aoga. (Ioa. 5:19; Epe. 1:3) I te mataupu tenei, ka onoono tatou ki te: (1) te auala e fesoasoani atu a Iesu ke lavea ne tino a te tāua o latou mo te (2) te auala e mafai o fakatalitonu ne tatou ki a tatou eiloa me koi tāua tatou i te kilokiloga a te Atua.—Haka. 2:7.

TE AUALA NE FESOASOANI ATU A IESU KE ILOA NE TINO TE LOTOU TĀUA

3. Ne pefea a faifaiga a Iesu ki tino Kalilaia kolā ne olo atu ki a ia mō se fesoasoani?

³ I te tolu o ana malaga talai i Kalilaia, ne ualolo atu faeloa a tino ki a Iesu o fakalogoˋlogo ki a ia kae ke fakaˋlei olotou masaki. Ne fai mai a Iesu “me ko paˋka kae tuku tiaki latou e pelā me ne mamoe e seai se lotou tino tausi.” (Mata. 9:36; onoono ki manatu mō sukesukega.) Ne ˋkilo atu olotou takitaki lotu ki a latou e pelā me ne tino e se tāua kae taku foki ne latou a tino konā e pelā me ne “tino malaia.” (Ioa. 7:​47-49; manatu mō sukesukega) Kae ne atafai a Iesu ki a latou kae fakaaoga ana taimi o akoako latou kae fakaˋlei olotou maˋsaki. (Mata. 9:35) E se gata i ei, ko te mea ke mafai o fesoasoani atu ki tino e tokouke, ne akoako ne ia ana apositolo ke fai te galuega talai kae tuku atu foki ki a latou a te pule ke fakaˋlei a maˋsaki.—Mata. 10:​5-8.

4. Se a te mea e tauloto ne koe mai faifaiga a Iesu ki ana tino fakalogoˋlogo loto mauˋlalo?

⁴ E auala i ana faifaiga atafai kae āva ki ana tino fakalogoˋlogo, ne fakaasi mai ne Iesu me e ˋkilo atu lāua mo tena Tamana ki tino kolā e manatu fatauva ki ei te tokoukega o tino e pelā me ne tino tāua. Kafai koe se tavini a Ieova kae fakalotolotolua koe ki tou tāua, mafaufau ki te auala ne saga atu ei a Iesu ki tino maˋlalo kolā ne maˋnako o tauloto ki mea e uke mai i a ia. A te fai penā ka fesoasoani atu ke lavea ne koe a tou tāua i te kilokiloga a Ieova.

5. Fakamatala mai a fakanofonofoga o se fafine Kalilaia telā ne fetaui mo Iesu.

⁵ Ne seki akoako atu fua a Iesu ki potukau o tino kae ne saga tonu atu foki ki tino taki tokotasi. E pelā mo te taimi ne fai ei tena galuega talai i Kalilaia, ne fetaui a Iesu mo se fafine telā ne ˋtafe malosi tena sua i tausaga e 12. (Male. 5:25) Ona ko tena masaki, ko se ˋma ei a ia e ˋtusa mo te Tulafono, kae ko so se tino e patele ki a ia ka se ˋma foki. Kāti ne fai ne te mea tenei ke se mafai o ˋkau fakatasi a ia mo tino. E se gata i ei, ko se mafai foki o ˋkau fakatasi a ia ke tapuaki mo nisi tino i te sunako io me i taimi o aso fakamanatu. (Levi. 15:​19, 25) E mautinoa me ne logoˋmae te fafine tenei i tena masaki kae ne maua foki ne ia a lagonaga me e se alofagina a ia.—Male. 5:26.

6. I te auala fea ne ˋlei ei te masaki o te fafine ne ˋtafe tena sua?

⁶ Ne manako te fafine masaki tenei ke fakaˋlei a ia ne Iesu. Kae ne seki fanatu ˋtonu tou fafine ki a Iesu. Kaia? Kāti ne mā tou fafine i te tulaga o tena masaki. Io me kāti ne mataku i a Iesu ma kaitaua atu me ne fanatu a ia ki loto i se vaitino e tokouke mo tena tulaga sē ˋma. Tenā ne fakapatele ei tou fafine ki te gatu o Iesu mo te loto talitonu me kāti ka ˋlei i ei tena masaki. (Male. 5:​27, 28) Ne maua ne tou fafine te taui o tena fakatuanaki—ne ˋlei eiloa tena masaki. Oti aka, ne ˋsala a Iesu me ko oi ne patele atu ki a ia, kae ne fakaasi atu ne tou fafine a te mea ne fai ne ia. Ne a faifaiga ne fai ne Iesu ki tou fafine?

7. Ne a faifaiga ne fai ne Iesu ki se fafine telā ne logoˋmae malosi? (Maleko 5:34)

⁷ Ne atafai kae āva a Iesu ki te fafine tenā. Ne lavea ne ia me ne “mataku te fafine kae polepole.” (Male. 5:33) Tenā ne faipati atu ei a ia mo te atafai ki tou fafine. Ne taku ne ia a tou fafine e pelā me ko “taku tama”—se tugapati alofa telā e fakaasi atu i ei a te āva mo te atafai. (Faitau te Maleko 5:34.) Tenei fua te taimi i te Tusi Tapu ne taku ei ne Iesu se fafine e pelā me ko ‘taku tama,’ kāti ne fakaaoga ne ia a te pati atafai tenei ona ko te kilo atu ki te fafine tenā e ‘mataku.’ Mafaufau la ki te fiafia telā kāti ne maua ne tou fafine! Moi ne seki faipati atu a Iesu mo te atafai ki a ia, penei e maua ne ia a lagonaga sē ˋlei faitalia me ko oti ne fakaˋlei tena masaki. Kae i lō te fai penā, ne fesoasoani atu a Iesu ki tou fafine ke lavea ne ia me i a ia se tama pele telā e tāua ˋki eiloa ki tena Tamana alofa i te lagi.

8. Ne a tulaga faigaˋta ne fepaki mo se tuagane i Brazil?

⁸ I aso nei foki, e pokotia a nisi tavini a te Atua i masaki kolā e fai ei ke maua ne latou a lagonaga logoˋmae. A Maria,a se paenia tumau i Brazil, ne fanau mai e seai ne ana vae kae seai foki sena lima fakamaui. Ne fai mai tou fafine: “Ne fai fakamasei faeloa au ne tamaˋliki i te akoga ona ko te toku tulaga sē katoatoa. E uke a igoa fakalogoˋmae o oku i a latou. Ke oko foki loa ki toku kāiga ne ˋkilo fatauva mai ki a au.”

9. Ne fesoasoani atu pefea ki a Maria ke lavea ne ia me tāua a ia ki a Ieova?

⁹ Ne maua pefea ne Maria se fesoasoani? I te taimi ne fai ei tou fafine pelā me se Molimau a Ieova, ne fakamafanafana atu a taina Kelisiano ki a ia kae fesoasoani atu ke ˋpau tena kilokiloga ki a ia e pelā mo Ieova. Ne fai mai tou fafine: “E se lava a itulau i taku tusi ke tusi ne au ki lalo a igoa o tino katoa kolā ne fesoasoani mai ki a au. E fakafetai au ki a Ieova mo toku loto kātoa mo te tukumaiga se kāiga gali faka-te-agaga penei ki a au.” Ne fesoasoani atu a taina mo tuagane faka-te-agaga o Maria ke iloa ne ia me tāua ˋki eiloa a ia i te kilokiloga a te Atua.

10. Ne a tulaga faigaˋta ne fepaki mo Malia te Makatala? (Onoono foki ki ata.)

¹⁰ Mafaufau ki te auala ne fesoasoani atu a Iesu ki se isi tino—ko Malia te Makatala. Ne pukea a ia ne temoni e tokofitu! (Luka 8:2) Kāti ne fai ne tou fafine a mea fai fakaaˋtea ona ko ia e pukea ne temoni, kae ne fai ei ke maˋtaku a tino i a ia. I te taimi faigata tenā o tena olaga, kāti ne maua ne ia a lagonaga me e se aˋlofa a tino ki a ia, seai se tokagamalie kae ko seai sena aoga. Kāti ne ˋtuli keaˋtea ne Iesu a temoni konā mai tou fafine kae ne fai ei a ia mo fai se soko fakamaoni e tokotasi o Iesu. Se a te suā auala ne fesoasoani atu ei a Iesu ki a Malia te Makatala ke iloa ne ia me tāua tou fafine i te kilokiloga a te Atua?

11. Ne fakaasi atu pefea ne Iesu ki a Malia te Makatala me tāua tou fafine ki te Atua? (Onoono foki ki ata.)

¹¹ Ne ˋkami ne Iesu a Malia te Makatala ke olo tasi latou i ana malaga talai.b Ona ko te mea tenā, ne maua faeloa ne ia a mea aoga mai te fakalogologo atu ki tou tagata e akoako a nisi tino. Ne fakasae atu foki a Iesu ki tou fafine i te aso eiloa ne fakatu aka ei a ia mai te mate. A ia se tokotasi o soko muamua eiloa ne faipati atu a Iesu ki ei i te aso tenā. Ne ˋtofi foki ne Iesu a tou fafine ke fanatu o fakailoa ki ana apositolo me i a ia ko oti ne toe fakatu aka. A mea katoa konei e fakaasi mai ei me tāua ˋki eiloa tou fafine ki a Ieova!—Ioa. 20:​11-18.

12. Kaia ne maua ei ne Lidia a lagonaga me ko seai sena aoga?

¹² E pelā eiloa mo Malia te Makatala, e tokouke a tino i aso nei e maua foki ne latou a lagonaga me ko seai se lotou aoga. Ne fai mai a Lidia, se tuagane mai Sepania, me mai mua o fanau a ia ne mafaufau tena mātua ke fakatō tena pepe. Ne masaua ne Lidia, me i te taimi foki eiloa koi foliki a ia ne seki fia saga atu tena mātua o tausi fakaˋlei tou fafine, kae fai atu faeloa ne ia a pati ˋmafa ki a ia. Ne fai mai tou fafine: “Tasi o mea e fakamoemoe au ki ei ko te mea ke aˋlofa mai a tino ki a au kae talia ne latou au. Ne mafaufau au me ka se mafai eiloa o maua ne au te vaegā alofa tenā me ko oti ne fai mai a toku mātua ki a au me i a au se tino masei.”

13. Ne a mea ne fesoasoani atu ki a Lidia ke lavea ne ia me tāua a ia ki a Ieova?

¹³ I te taimi ne tauloto ei a Lidia ki te munatonu, ne fesoasoani atu eiloa ana ˋtalo totino mo ana sukesukega e pelā foki mo pati mo faifaiga aˋlofa a taina Kelisiano, ke lavea ne ia me tāua eiloa a ia i te kilokiloga a Ieova. Ne fai mai tou fafine: “E fai mai faeloa taku avaga me alofa a ia ki a au. E fakamasaua mai faeloa ne ia i taimi e uke a uiga ˋgali o oku. Konā foki a pati ne fai mai ne nisi taugasoa pele o oku.” E mata, e mafai o masaua ne koe se tino telā e manakogina ke iloa ne ia me tāua eiloa a ia i te kilokiloga a Ieova?

ˋKILO KI A TATOU EILOA E PELĀ MO TE KILOKILOGA A IEOVA

14. E fesoasoani mai pefea te 1 Samuelu 16:7 ke iloa ne tatou te auala e kilo atu ei a Ieova ki tino? (Onoono foki ki te pokisi “Kaia e Fakatāua ei ne Ieova Ana Tino?”)

¹⁴ Ke masaua me e se kilo atu a Ieova ki a koe e pelā mo te auala e ˋkilo atu a te lalolagi ki a koe. (Faitau te 1 Samuelu 16:7.) E se fakatāua ne ia koe ona ko ou foliga totino, tou tulaga i te olaga, io me ko akoakoga maˋluga ne kau koe ki ei. (Isa. 55:​8, 9) Tela la, taumafai ke kilo ifo koe ki a koe eiloa e ˋtusa mo tulaga o Ieova kae e se ˋtusa mo te auala e ˋkilo atu ei a te lalolagi ki a koe. E mafai o faitau koe ki tala i te Tusi Tapu kolā e fakaasi mai ei me ne fakatāua ne Ieova a tino kolā ne manatu fakalotolotolua ki te lotou tāua, e pelā mo Elia, Naomi, mo Hana. E mafai foki o tusi ne koe ki lalo a mea kolā ne ˋtupu ki a koe, e fakamaoni atu i ei me e alofa kae fakatāua malosi eiloa ne Ieova a koe. E se gata i ei, e mafai foki o onoono koe ki fakamatalaga kolā e maua i ˋtou tusi e uiga ki te tāua o se tino.c

15. Kaia ne kilo atu ei a Ieova ki a Tanielu e pelā me “se tino telā e tāua ˋki”? (Tanielu 9:23)

¹⁵ Ke masaua me ona ko tou fakamaoni ko tāua ei koe i te kilokiloga a Ieova. I se taimi e tasi, kāti ko 90 tupu i ei a tausaga o te pelofeta ko Tanielu, ne “vāivāi malosi” a ia kae loto vāivāi. (Tani. 9:​20, 21) Ne fakamalosi pefea ne Ieova a ia? Ne uga atu ne te Atua a te agelu ko Kapilielu ke fakamasaua atu ki a Tanielu me i a ia “se tino telā e tāua ˋki” kae ko oti foki ne lagona mai ne ia ana ˋtalo. (Faitau te Tanielu 9:23.) Kaia ne tāua malosi ei a Tanielu ki te Atua? I tafa o ana nisi uiga ˋgali e uke, ne tāua eiloa a Tanielu ona ko tena amiotonu mo tena fakamaoni. (Eseki. 14:14) Ne fai ne Ieova ke tusi te tala tenā ki loto i tena Muna, ke mafai o maua ne tatou se fakamafanafanaga mai i ei. (Loma 15:4) E fakalogologo foki a Ieova ki au ˋtalo kae fakatāua ne ia koe ona ko tou alofa ki te mea tonu mo tou tavini fakamaoni atu ki a ia.—Mika 6:​8, fml.; Epe. 6:10.

16. Ne a mea e mafai o fesoasoani atu ki a koe ke kilo atu ki a Ieova e pelā me se Tamana alofa?

¹⁶ Kilo ki a Ieova e pelā me se Tamana telā e alofa ki a koe. E manako a ia o fesoasoani ki a koe, kae e se salasala ki au mea ˋse. (Sala. 130:3; Mata. 7:11; Luka 12:​6, 7) A te mafaufau ˋloto ki te mea tenā ne fesoasoani atu ki tino e tokouke kolā ne maua ne latou a lagonaga me ko seai se lotou aoga. E pelā mo Michelle se tuagane mai Sepania, ne maua faeloa ne ia a lagonaga me e se alofagina a ia kae seai foki sena aoga ona ko pati ˋmafa ne fai atu sāle ne tena avaga i loto i se fia tausaga. Ne fai mai tou fafine, “I so se taimi e maua ne au a lagonaga me ko seai soku aoga, e taumafai o fakaataata ne au a Ieova e tauave ne ia au i ana lima kae fakaasi mai ne ia te alofa, kae puipui foki ne ia au.” (Sala. 28:9) E fakamasaua ifo faeloa a Lauren, se tuagane mai Afelika ki Saute ki a ia eiloa, penei: “Kafai ne ˋtaki mai ne Ieova a au mo te atafai ki a ia ki uka o te alofa, kae fakapilipili ne ia au ki a ia i tausaga katoa konei, kae fakaaoga foki ne ia au ke akoako atu a nisi tino, ko tena uiga e fakatāua malosi eiloa ne ia au e pelā me se tino e lasi tena aoga.”—Ho. 11:4.

17. Ne a mea e mafai o fesoasoani atu ki a koe ke loto talitonu me ko maua ne koe te taliaga a Ieova? (Salamo 5:12) (Onoono foki ki te ata.)

¹⁷ Ke loto talitonu me maua ne koe te taliaga a Ieova. (Faitau te Salamo 5:12.) Ne fakatusa ne Tavita a te taliaga a Ieova ki “se talita lasi” telā e puipui ne ia a tino amioˋtonu. Kafai ko iloa ne koe me ko maua ne koe te taliaga a Ieova mo tena fesoasoani, ka mafai eiloa o puipui ei koe ke mo a ma maua ne koe ne manatu fakalotolotolua. E iloa pefea ne koe me ko maua ne koe te taliaga a Ieova? E pelā mo mea ne tauloto tatou ki ei, e tuku mai ne Ieova a tena Muna ko te Tusi Tapu ke fakaasi mai ei ana lagonaga e uiga ki a tatou. E se gata i ei, e fakaaoga ne ia a toeaina, taugasoa ˋpili mo nisi tino ke fakamasaua atu ki a koe me tāua koe i tena kilokiloga. E ˋtau o kilo atu pefea koe ki pati fakamalosi konā?

18. Kaia e ˋtau ei o talia ne koe a pati fakamālō e fai atu ki a koe?

¹⁸ Ke mo a ma se talia ne koe a pati fakamālō mai i a latou kolā e iloa ne latou koe kae aˋlofa ki a koe. Ke masaua me mafai o fakaaoga ne Ieova a latou ke fesoasoani atu ke lavea ne koe me e maua ne koe tena taliaga. Ne fai mai a Michelle telā ne sae muamua mai, “Ne kamata o talia malielie ne au i toku loto a pati aˋlofa mai nisi tino. E se faigofie kae e iloa ne au me tenei te mea e manako a Ieova ke fai ne au.” Ne fesoasoani atu foki a toeaina mo te aˋlofa ki a Michelle ke lavea ne ia a te alofa o Ieova ki a ia. Ko tavini atu nei a ia e pelā me se paenia kae galue sē tumau i te Peteli.

19. Kaia e mafai ei o loto talitonu koe me e tāua koe i te kilokiloga a te Atua?

¹⁹ E fakamasaua mai a Iesu mo te alofa me e tāua ˋki eiloa a tatou ki te ˋtou Tamana i te lagi. (Luka 12:24) Tela la, e ˋtau o loto taliˋtonu tatou me e kilo mai a Ieova ki a tatou e pelā me ne tino e tāua. Ke mo a eiloa e puli i a tatou a te mea tenei! Kae ke na fai ne tatou a te ˋtoe mea e mafai ke fesoasoani atu ki nisi tino ke iloa ne latou a te tāua o latou i te kilokiloga a te Atua!