Esoto

39 Ne faite ne latou ki filo lanu moana, vulu lanu violeta mo filo lanu kula+ a gatu kolā ne ‵laga faka‵lei mō te taviniga i te koga tapu. Ne faite ne latou a gatu tapu mō Alona,+ e ‵tusa mo te fakatonuga a Ieova ne fai ki a Mose.

2 Ne faite ne ia a te efota+ ki aulo, filo lanu moana, vulu lanu violeta, filo lanu kula mo laugatu lino ne mio faka‵lei ana filo. 3 Ne tukituki ne latou a aulo ke manifinifi kae isiisi ne ia ke pelā me ne filo ko te mea ke ‵sui fakatasi mo filo lanu moana, vulu lanu violeta, filo lanu kula mo laugatu lino ‵lei, kae ‵sui a mea fakagali‵gali ki ei. 4 Ne faite ne latou ne potu laugatu i tuauma o te efota kolā ne faka‵mau kae ne ‵soko fakatasi ki ei ana feitu e lua. 5 A te fusi telā ne ‵laga, kae ne ‵sui ki luga i te efota mo ‵sai te efota ke ‵mau i tena tulaga,+ ne faite foki ki mea konā, ki te aulo, filo lanu moana, vulu lanu violeta, filo lanu kula mo laugatu lino ne mio faka‵lei ana filo, e ‵tusa mo te fakatonuga a Ieova ne fai ki a Mose.

6 Tenā ne tuku ei ne latou a fatu ko onika ki luga i teuteuga aulo, kae ta ne latou i luga i ei a igoa o tama tāgata a Isalaelu, e pelā eiloa mo te auala e ta ei ne latou se fakamailoga.+ 7 Ne tuku ne ia a mea konā ki luga i potu laugatu i tuauma o te efota ke fai pelā me ne fatu fakamanatu mō tino Isalaelu,+ e ‵tusa mo te fakatonuga a Ieova ne fai ki a Mose. 8 Tenā ne fai ei ne ia te ufi fatafata+ e pelā eiloa mo galuega a se tino ‵sui mea fakagali‵gali, e pelā eiloa mo te faitega o te efota, ne faite ki aulo, filo lanu moana, vulu lanu violeta, filo lanu kula mo laugatu lino ne mio faka‵lei ana filo.+ 9 A te mea tenā e sikuea māfai e fetulua. Ne fai ne latou te ufi fatafata telā e ‵pau tena loa mo tena lauefa mo te aga* e tasi o te lima māfai ko fetulua. 10 Ne faka‵tu ne latou a laina e fa o fatu tāua i luga i ei. A te laina muamua ko te lupi, topasa mo te emela. 11 A te laina i te lua ko te takosi, safaila mo te iasipi. 12 A te laina i te tolu ko te fatu ko te lesema, akate mo te ametisi. 13 Kae ko te laina i te fa ko te kuate lanu ‵sega, onika mo te iasepi. Ne faka‵mau a mea konā ki teuteuga aulo. 14 Ne ‵pau eiloa a fatu mo te aofaki o igoa o tama tāgata e toko 12 a Isalaelu, kae ko igoa ne ta e pelā me se fakamailoga, a igoa takitasi e sui i ei a matakaiga e 12.

15 Tenā ne faite ei ne latou a filifili i luga i te ufi fatafata, e pelā me ne uka mai te tinā aulo.+ 16 Kae ne faite ne latou a teuteuga aulo e lua mo ligi aulo e lua kae faka‵mau atu a ligi e lua konā ki ‵kōna e lua o te ufi fatafata. 17 Oti aka, faulu ei ne latou a uka aulo e lua ki loto i ligi e lua i ‵kōna o te ufi fatafata. 18 Tenā ne faulu ei ne latou a mata e lua o uka e lua ki loto i teuteuga e lua kae faka‵mau atu ki potu laugatu i tuauma i te feitu ki mua o te efota. 19 Oti aka, faite ei ne latou a ligi aulo e lua kae faka‵mau atu ki mata e lua o te ufi fatafata i tena feitu ki loto, telā e saga ki te efota.+ 20 Tenā ne faite ei ne latou a nisi ligi aulo e lua kae tuku i te feitu ki mua o te efota, mai lalo o potu laugatu i tuauma, kae pili ki te koga telā e soko i ei, mai luga o te fusi o te efota telā ne ‵laga. 21 Fakamuli loa, ‵sai ei ne latou te ufi fatafata ki se uka lanu moana mai i ana ligi ki ligi o te efota, ke taofi i ei te ufi fatafata i tena tulaga tonu i luga i te efota, mai luga o te fusi telā ne ‵laga, e ‵tusa mo te fakatonuga a Ieova ne fai ki a Mose.

22 Tenā ne faite ei ne ia te gatu ‵loa e seai ne lima o te efota ki filo lanu moana katoa, kae e ‵laga ne se tino ‵laga laugatu.+ 23 A te pūga o te gatu ‵loa e seai ne lima e tu i te kogaloto, e pelā mo te ua o se gatu tau fiti. A te pūga i ei e ‵laga fakatamilo ko te mea ke se mafai o masae. 24 Oti aka, faite ei ne latou i kapakapa ki lalo o te gatu ‵loa e seai ne lima i ei a pomekalanite kolā e faite ki filo lanu moana, vulu lanu violeta mo filo lanu kula kolā ne mio fakatasi. 25 Kae ne faite ne latou a pēle ki te tinā aulo kae tuku i va o pomekalanite e fakatamilo katoa i te kapakapa ki lalo o te gatu ‵loa e seai ne lima i ei; 26 ne fakavasavasa ne latou a te pēle mo te pomekalanite, se pēle mo se pomekalanite, e fakatamilo katoa i te kapakapa ki lalo o te gatu ‵loa e seai ne lima, telā ne fakaaoga i te faiga o te taviniga, e ‵tusa mo te fakatonuga a Ieova ne fai ki a Mose.

27 Kae ne faite ne latou a gatu mai laugatu lino ‵lei mō Alona mo ana tama tāgata, kae ne ‵laga ne se tino ‵laga laugatu,+ 28 mo te pulou laugatu+ mai laugatu lino ‵lei, te pulou fakagaligali+ mai laugatu lino ‵lei, ko tivae ‵mutu+ mai laugatu lino ne mio faka‵lei ana filo, 29 mo te fusi ne faite ki laugatu lino ne mio faka‵lei ana filo, filo lanu moana, vulu lanu violeta mo filo lanu kula kolā ne ‵laga fakatasi, e ‵tusa mo te fakatonuga a Ieova ne fai ki a Mose.

30 Oti aka, faite ei ne latou se mea malipolipo, ko te fakailoga tapu o te tukuatuga,* ki te tinā aulo kae ta i luga i ei a pati konei “A Ieova e ‵malu,”+ e pelā eiloa mo te auala e ta sāle i ei se fakamailoga. 31 Ne ‵sai ne latou ki ei se uka telā ne faite ki filo lanu moana ko te mea ke tuku ne latou ki luga i te pulou laugatu, e ‵tusa mo te fakatonuga a Ieova ne fai ki a Mose.

32 Ne palele atu katoa a galuega ne fai ki te faleie tapu, te faleie o maopoopoga, kae ne fai ne tino Isalaelu a mea katoa kolā ne fakatonu ne Ieova ki a Mose.+ Ne fai eiloa ne latou a mea konā.

33 Tenā ne avatu ei ne latou te faleie tapu+ ki a Mose, ko te faleie+ mo ana meāfale katoa: ana pine,+ ana feitu fale,+ ana lakau faka‵lava+ mo ana pou mo ana lagolago;+ 34 ko tena ufi telā ne faite ki pa‵kili o mamoe ne vali ke kula,+ tena ufi telā ne faite ki pa‵kili o takesa,* te ‵pui laugatu e ‵pui i ei;+ 35 te pusa o te Feagaiga mo ana amo+ mo te ‵pono;+ 36 te taipola, ana meāfale katoa+ mo te falaoa ne ofo atu ki te Atua; 37 te tugamoli telā ne faite ki te tinā aulo, ana moli,+ te laina o moli, mo ana meāfale katoa+ mo sinu mo faka‵ka a moli;+ 38 te fatafaitaulaga aulo,+ te sinu mo faū a tino,+ ko mea ma‵nogi,+ te ‵pui laugatu+ mō te mataloa o te faleie; 39 te fatafaitaulaga kopa+ mo tena mea valavala kopa, ana amo,+ ana meāfale katoa,+ te pesini mo tena tulaga;+ 40 ko ‵pui laugatu o te koga ateatea, ana pou mo ana lagolago,+ te ‵pui laugatu+ mō te mataloa o te koga ateatea, ana uka mo ana pine faka‵lave+ mo meāfale katoa mo fai te taviniga i te faleie tapu, ko te faleie o maopoopoga; 41 ko gatu kolā ne ‵laga faka‵lei mo fai te taviniga i te koga tapuaki, ko gatu tapu mō te faitaulaga ko Alona,+ mo gatu o ana tama tāgata kolā e tavini atu e pelā me ne faitaulaga.

42 E ‵tusa mo mea katoa kolā ne fakatonu atu ne Ieova ke fai ne Mose, ne fai eiloa ne tino Isalaelu a galuega katoa+ konā. 43 I te taimi ne iloilo ei ne Mose olotou galuega katoa, ne lavea ne ia me ne fai ne latou e ‵tusa mo te fakatonuga a Ieova kae ne fakamanuia atu a Mose ki a latou.