Te Lua Samuelu

10 Fakamuli ifo, ne mate te tupu o tino Amoni+ kae ko tena tama tagata ko Hanuna ne fai mo tupu e sui ei a ia.+ 2 Tenā ne fai aka ei a Tavita: “Ka fakaasi atu eiloa ne au te alofa fakamaoni ki a Hanuna te tama tagata a Nahasa me ne fakaasi mai ne tena tamana te alofa fakamaoni ki a au.” Tenā ne uga atu ei ne Tavita ana tavini ke olo o fakamafanafana a tou tagata ona ko te galo atu o tena tamana. Kae i te okoatuga o tavini a Tavita ki te fenua o tino Amoni, 3 ne fai atu a pelenise o tino Amoni ki a Hanuna te lotou aliki: “E mata, e mafaufau koe me e fakaaloalo atu a Tavita ki tou tamana mai te ugamaiga ne ia o tino ke fakamafanafana koe? E mata, ko uga mai ne Tavita ana tavini konā ke iloilo ne latou ‵tou fakai kae sipai foki ne latou ko te mea ke mafai o fakatakavale ne latou a tatou?” 4 Tenā ne puke ei ne Hanuna a tavini a Tavita kae ‵vele ne ia te āfa o olotou talafa+ kae ‵kati olotou gatu ke oko ki olotou papamuli kae tuku atu ke olo. 5 I te taimi ne fakailoa atu ei ki a Tavita a te mea tenei, ne uga fakavave atu ne ia a tāgata ke fakafetaui ki a latou, me ko oti eiloa ne fakamasiasi a tāgata konā; kae ne fai atu a te tupu ki a latou: “‵Nofo i Ieliko+ ke oko ki te taimi ko toe ‵loa ei otou talafa, ko ‵foki mai ei koutou.”

6 Fakamuli ifo, ne iloa ne tino Amoni i a Tavita ko takalialia ki a latou, tenā ne uga ei ne tino Amoni a avefekau ke ‵togi mai a tino Sulia mai Petelehopa+ mo tino Sulia mai Sopa,+ e toko 20,000 sotia sa‵sale; mo te tupu o Maaka+ mo tāgata e toko 1,000; kae mai Isetopa* e toko 12,000 tāgata.+ 7 I te logoga a Tavita i te mea tenei, uga atu ei ne ia a Ioapo mo tena kautau katoa, e aofia i ei ana toa ‵mafi.+ 8 Ne olo atu a tino Amoni kae fakatoka o taua atu i te auala ki loto i te fakai kae ko tino Sulia mai Sopa mo Lehopa, fakatasi mo Isetopa* mo Maaka ne ‵tu i a latou eiloa i se koga tai ‵mao i te laukele ateatea.

9 I te taimi ne lavea ei ne Ioapo me i te kautau ko toka o taua mai i ana mua e pelā foki mo te feitu ki tua, ne filifili aka ne ia a nisi sotia ‵lei eiloa o Isalaelu kae fakatoka ne ia ke taua atu ki tino Sulia.+ 10 Ne tuku ne ia te ‵toega o tāgata mai lalo i te takitakiga a tena taina ko Apisai,+ ko te mea ke fakatoka latou o taua atu ki tino Amoni.+ 11 Tenā ne fai atu ei a ia: “Kafai a tino Sulia e ma‵losi atu i a au, e ‵tau mo koe o vau o fakasao au; kae kafai a tino Amoni e ma‵losi atu i a koe, ko au ka fanatu o fakasao koe. 12 E ‵tau mo tatou o fakama‵losi kae loto ‵toa+ mō ‵tou tino mo fakai o te ‵tou Atua, kae ka fai ne Ieova a te mea e ‵lei i tena kilokiloga.”+

13 Tenā ne olo atu ei a Ioapo mo ana tāgata o taua atu ki tino Sulia, kae ne ‵tele latou mai i ana mua.+ 14 I te laveaga ne tino Amoni me ko oti ne ‵tele kea‵tea a tino Sulia, ne ‵tele foki latou kea‵tea mai i a Apisai kae olo atu ki loto i te fakai. Oti aka, foki mai ei a Ioapo mai tino Amoni kae vau ki Ielusalema.

15 I te laveaga ne tino Sulia i a latou ko takavale i tino Isalaelu, ne toe maopoopo fakatasi latou.+ 16 Tenā ne uga ei te fekau a Hatatesa+ ki tino Sulia i kogā koga o te Vaitafe,*+ kae ne olo atu latou ki Helami fakatasi mo Sopaka te takitaki kautau a Hatatesa telā ne takitaki ne ia latou.

17 I te okoatuga o te tala ki a Tavita, ne fakamaopoopo fakavave mai ne ia a te kau Isalaelu katoa kae olo atu ki te suā feitu o te Iolitana, oko atu ei ki Helami. Ne fakatoka a tino Sulia o taua ki a Tavita kae ne taua atu latou ki a ia.+ 18 Kae ne ‵tele kea‵tea a tino Sulia mai te kau Isalaelu; kae ne tamate ne Tavita a tino faka‵tele kaliota e toko 700 mo tāgata faka‵tele solofanua e toko 40,000 a tino Sulia, kae ne tamate ne ia a Sopaka te takitaki o te lotou kautau, tenā ne mate ei i konā.+ 19 I te iloaga ne tupu katoa, ko tavini a Hatatesa i a latou ko takavale i te kau Isalaelu, ne fai fakavave ne latou ke maua se va filemu mo tino Isalaelu kae ne fai ei latou mo fai olotou tavini;+ kae ne ma‵taku a tino Sulia ma toe fesoasoani atu ki tino Amoni.