Te Lua Samuelu

20 E isi se tagata faka‵tupu fakalavelave e igoa ki a Seepa+ te tama tagata a Pikeli, te tino Peniamina. Ne ili ne ia te pu+ kae fai atu: “E seai se motou vaega i a Tavita, kae seai se motou tofi i te tama a Iese.+ Tino Isalaelu, ‵foki ki otou atua.”*+ 2 I konā, ne tiaki ne tino Isalaelu katoa a Tavita kae tau‵tali atu i a Seepa te tama tagata a Pikeli;+ kae ko tino Iuta ne ‵piki ‵mau ki te lotou tupu, mai te Iolitana ke oko ki Ielusalema.+

3 I te fokiatuga a Tavita ki tena fale* i Ielusalema,+ ne puke ne te tupu ana avaga fakasalasala e tokosefulu kolā ne tuku ne ia ke tausi te fale,+ kae avatu ki se fale telā e leoleo faka‵lei. Ne avatu ne ia meakai ki a latou, kae ne seki ‵moe eiloa a ia mo latou.+ Ne ‵nofo latou i konā ke oko ki te aso ne ‵mate ei latou, kae ne ola e pelā me ne fāfine ko ‵mate olotou avaga, faitalia me koi ola eiloa te lotou avaga.

4 Ne fai atu te tupu ki a Amasa:+ “Fakamaopoopo mai a tāgata Iuta ki a au i konei i loto i aso e tolu, kae e ‵tau foki koe o vau ki konei.” 5 Tenā ne fano ei a Amasa o fakamaopoopo mai a tino Iuta, kae ne seki vau tou tagata i te taimi tonu telā ne ‵tau o vau a ia i ei. 6 Ne fai atu a Tavita ki a Apisai:+ “A Seepa+ te tama tagata a Pikeli e mafai o ma‵sei atu ana mea e fai ki a tatou i lō Apisaloma.+ Puke a tavini o tou aliki kae olo o afuli a ia, ko te mea ke seai ne fakai e puipui faka‵lei e maua ne ia ke sao a ia mai i a tatou.” 7 Tenā ne olo atu ei a tāgata a Ioapo,+ ko tino Keleti, tino Peletite,+ mo tāgata ‵mafi katoa o afuli a ia; ne tiaki ne latou a Ielusalema o afuli a Seepa te tama tagata a Pikeli. 8 I te lotou piliatuga ki te fatu lasi i Kipeona,+ ne fanatu a Amasa+ o fakafetaui ki a latou. A Ioapo e pei ki ana gatu tau, kae e isi sena pelu e ‵sulu i te mea e tuku i ei kae ‵sai ki tena kautega. I tena fanatuga ki mua ne tō ei tena pelu.

9 Ne fai atu a Ioapo ki a Amasa: “E ‵lei koe e toku taina?” Tenā ne puke atu ei te lima fakaatamai o Ioapo ki te talafa o Amasa e pelā me ka sogi atu ki a ia. 10 E se iloa ne Amasa a te pelu i te lima o Ioapo, kae ne ‵suki ne Ioapo a ia i tena tinae,+ kae ‵to mai ana gakau ki tua i te laukele. Ne seki manakogina ke toe ‵suki ne ia; ne lava loa i te sukiga e tasi ke tamate ei a ia. Tenā ne olo atu ei a Ioapo mo tena taina ko Apisai o afuli a Seepa te tama tagata a Pikeli.

11 Ne tu atu se tamataene e tokotasi a Ioapo i ana tafa kae fai atu: “So se tino e kau i te feitu o Ioapo mo so se tino e kau i a Tavita, ke tautali la i a Ioapo!” 12 I te taimi tenā a Amasa e ‵fonu i toto kae takato i te kogaloto o te auala. I te laveaga ne te tagata tenā me i tino ko ‵tu katoa, ne ave kea‵tea ne ia a Amasa ki tua mo te auala. Ne ‵pei atu ne ia se gatu mai luga i ei, me ne lavea ne ia i tino ko ‵tu katoa māfai ko oko atu ki ei. 13 I te otiga ne ave kea‵tea ne ia ki tua mo te auala, ne tau‵tali atu a tāgata katoa i a Ioapo o afuli a Seepa+ te tama tagata a Pikeli.

14 Ne ulu atu a Seepa i loto i matakāiga katoa o Isalaelu ke oko atu ki Apelu i Peta-maka.+ Ne maopoopo fakatasi a tino Pikeli kae olo atu foki ki loto i te fakai mai ana tua.

15 Ne olo atu a Ioapo mo ana tāgata* kae nikoi ne latou a tou tagata i Apelu i Peta-maka kae fakatu aka ne latou se koga maluga ke taua atu ki te fakai telā e tu i loto i se ‵pui. Kae ko tāgata katoa a Ioapo ne keli ne latou a te ‵pui ke siga ki lalo. 16 Kae ne kalaga mai se fafine poto mai te fakai: “Faka‵logo mai, e tāgata, faka‵logo mai! Fakamolemole, fai atu ki a Ioapo penei, ‘Vau ki konei, ke faipati atu au ki a koe.’” 17 Tenā ne fanatu ei tou tagata ke pili atu ki te fafine, kae ne fai atu tou fafine: “A koe ko Ioapo?” Ne tali atu a ia: “Ao.” Kae ne fai atu tou fafine: “Fakalogo mai ki pati a tau tavini.” Ana muna: “Au tenei e fakalogologo atu.” 18 Ne toe fai atu tou fafine: “I aso mua e masani sāle o fai aka penei, ‘Tuku atu latou ke olo ki Apelu, kae maua mai eiloa i konā te fakaikuga.’ 19 E sui ne au a tino filemu kae fakamaoni o Isalaelu. A koutou e taumafai o fakamasei se fakai telā e fai pelā me ko te mātua o tino Isalaelu. Kaia e fakaseai ei ne koutou te tofi o Ieova?”+ 20 Ne tali atu a Ioapo: “E se mafaufau lele eiloa au o fakaseai kae fakamasei a te fakai tenei. 21 E se tenā te mea ne mafaufau au ki ei. Kae e isi se tagata e igoa ki a Seepa+ te tama tagata a Pikeli mai te koga maugā o Efalaima+ ne ‵teke ki te Tupu ko Tavita. Kafai e tuku mai ne koe te tagata tenei, ka fano kea‵tea au mai te fakai.” Tenā ne fai atu ei te fafine ki a Ioapo: “Kiloke! Ka ‵pei ifo tena ulu mai luga o te ‵pui ki a koe!”

22 I konā eiloa ne fano te fafine poto tenā ki tino katoa, kae ne ‵kati ne latou te ulu o Seepa te tama tagata a Pikeli kae ‵pei atu ki a Ioapo. I konā ne ili ei ne tou tagata te pu, kae tiaki ne latou te fakai o olo ki olotou fale;+ kae ko Ioapo ne foki atu ki te tupu i Ielusalema.

23 A Ioapo ko te pule o kautau katoa a Isalaelu;+ a Penaia+ te tama tagata a Ieoiata+ ko te takitaki o tino Keleti mo tino Peletite.+ 24 A Atulamo+ ko te takitaki o tino kolā e ‵tau o ga‵lue fakagamua mō te tupu; a Iosefatu+ te tama tagata a Ailuta ko te tino e fakamau ne ia a fakamatalaga. 25 A Seva ko te failautusi; a Satoka+ mo Aviata+ ko faitaulaga. 26 Kae ko Ila te tino Iaila ne fai foki pelā me se takitaki pule* a Tavita.