Te Lua Samuelu

3 Ne tumau eiloa te taua i te va o te kāiga o Saulo mo te kāiga o Tavita i se taimi tai mata leva; kae ko Tavita ne gasolo aka faeloa o malosi atu,+ kae ko te kāiga o Saulo ne gasolo ifo eiloa o vāivāi.+

2 I te taimi tenā, ne fa‵nau a tama tāgata a Tavita i Hepelona.+ A tena toekimua ko Amanono+ i a Ainoama+ mai Ieseleelu. 3 A te tokolua ko Kiliapa i a Apikaila,+ te avaga a Napalu te tino Kalamelu telā ko mate; a te tokotolu ko Apisaloma+ te tama tagata a Maaka, te tama fafine a Talamai+ te tupu o Kesula. 4 A te tokofa ko Atonia+ te tama tagata a Hakita, kae ko te tokolima ko Sefatia te tama tagata a Apitala. 5 A te tokoono ko Iteleamo i te avaga a Tavita ko Ekelaa. Konei a tama a Tavita ne fa‵nau i Hepelona.

6 I te taimi koi taua i ei te kāiga o Saulo mo te kāiga o Tavita, ne fakamalosi aka faeloa ne Apinelu+ a tena tulaga i loto i te kāiga o Saulo. 7 Kae ne isi se avaga fakasalasala a Saulo e igoa ki a Lisepa,+ te tama fafine a Aia. Fakamuli ifo, ne fai atu a Isoposeta+ ki a Apinelu: “Kaia ne ‵moe fakatasi ei koe mo te avaga fakasalasala a toku tamana?”+ 8 Ne kaitaua malosi a Apinelu i pati a Isoposeta kae fai atu: “E a, au nei se kuli mai i Iuta? Ke oko mai ki te aso nei ne fakaasi atu faeloa ne au te alofa fakamaoni ki te kāiga o tou tamana ko Saulo mo ana taina mo ana taugasoa, kae ne seki fakatogafiti eiloa ne au a koe ke tuku atu ki lima o Tavita; kae i te aso nei ko ‵losi mai koe i a au ne agasala mo se fafine. 9 Ke fakasala faeloa ne te Atua a Apinelu māfai e se fai ne au mō Tavita a mea kolā ne tauto atu ei a Ieova ki a ia:+ 10 ke ave kea‵tea a te malo mai te kāiga o Saulo kae ke fakatu aka a te nofogaaliki o Tavita i Isalaelu mo Iuta, mai Tanu ke oko ki Pelesepa.”+ 11 Kae ne seki ai eiloa sena pati ne mafai o fai atu ki a Apinelu, me i a ia e mataku i tou tagata.+

12 Ne uga fakavave atu ne Apinelu a avefekau ki a Tavita, ana muna: “Ko oi te tino i o ia a te fenua?” Ne toe fakaopoopo atu a ia: “Fai aka se feagaiga mo au, kae ka fai ne au so se mea e mafai* ne au o fai ke ‵fuli a tino Isalaelu katoa ki tou feitu.”+ 13 Ne tali atu a ia: “Ko ‵lei la! Ka fai ne au se feagaiga mo koe. E tasi fua taku fakamolemole ke mo a eiloa e lavea ne koe oku mata vagana ke puke muamua mai ne koe a Mekala,+ te tama fafine a Saulo, māfai ko vau koe ki a au.” 14 Tenā ne uga ei ne Tavita a avefekau ki a Isoposeta,+ te tama tagata a Saulo, ana muna: “Aumai taku avaga ko Mekala, telā ne ‵sai feagaiga māua ki muāpa‵kili e 100 o tāgata Filisitia.”+ 15 Ne ave te fekau a Isoposeta ke puke mai tou fafine mai tena avaga ko Palatielu,+ te tama tagata a Laisa. 16 Kae ne sa‵sale fakatasi atu eiloa a ia mo tena avaga, kae ne tagitagi faeloa a ia ke oko atu ki Paulima.+ Kae ne fai atu a Apinelu ki a ia: “Fano, toe foki!” Tenā ne foki ei a ia.

17 I te taimi tenā, ne avatu ei te fekau a Apinelu ki toeaina o Isalaelu, ana muna: “Ko tai leva eiloa ne ma‵nako koutou ke fai a Tavita mo fai te otou tupu. 18 Tenei te taimi ke gasue‵sue i ei koutou, me i a Ieova ne fai ki a Tavita: ‘E auala i te lima o taku tavini ko Tavita+ ka faka‵sao ne au oku tino Isalaelu mai lima o tino Filisitia mo lima o olotou fili katoa.’” 19 Tenā ne faipati atu ei a Apinelu ki tino Peniamina.+ Ne fano foki a Apinelu o fai‵pati mo Tavita i Hepelona ke fakailoa atu ki ei a mea ko oti ne lotoma‵lie ki ei a Isalaelu mo te kāiga kātoa o Peniamina.

20 I te okoatuga a Apinelu ki a Tavita i Hepelona fakatasi mo tāgata e toko 20, ne fai ne Tavita se ‵kaiga ki a Apinelu mo tāgata kolā ne o‵mai tasi mo ia. 21 Tenā ne fai atu ei a Apinelu ki a Tavita: “Tuku mai au ke fano o fakamaopoopo mai a tino Isalaelu katoa ki toku aliki te tupu, ko te mea ke fai ne latou se feagaiga mo koe, kae ka fai koe mo tupu i koga katoa kolā e manako koe ki ei.” Tenā ne uga atu ei ne Tavita a Apinelu ke fano, kae ne fano ei a ia mo te filemu.

22 I te taimi eiloa tenā, ne ‵foki mai ei a tavini a Tavita mo Ioapo mai te taua, kae ne aumai ne latou a mea e uke mai te taua. A Apinelu i te taimi tenā ko se nofo i a Tavita i Hepelona, me ko oti ne uga ne ia ke fano mo te filemu. 23 I te okoatuga a Ioapo+ mo tena kautau katoa, ne fakailoa atu ki a Ioapo: “A Apinelu+ te tama tagata a Nelu+ ne vau ki te tupu, kae ko oti ne uga ne ia tou tagata ke fano, kae ne fano a ia mo te filemu.” 24 Ne fanatu a Ioapo ki te tupu kae fai atu: “Se a te mea ne fai ne koe? A Apinelu ne vau ki a koe. Kaia ne uga atu ei ne koe ke fano, tenā ko fano ei a ia mo te manuia? 25 E iloa ne koe a Apinelu te tama tagata a Nelu! Ne vau fua a ia o fakakolekole koe kae ke iloa ne ia a gasuesuega katoa a koe mo au mea katoa e fai.”

26 Tenā ne tiaki ei ne Ioapo a Tavita kae uga atu ne ia a avefekau ke olo i tua o Apinelu, kae ne puke mai ne latou a ia mai te vaikeli o Silaa; kae e se iloa ne Tavita a te mea tenei. 27 I te fokiatuga a Apinelu ki Hepelona,+ ne puke ne Ioapo tou tagata ki loto i ‵pui o te fakai ke fai‵pati lāua. Kae i te koga eiloa tenā ne ‵suki ei ne ia tou tagata i tena tinae, tenā ne mate+ ei a ia; ne fai ne ia te mea tenei ona ko te mea ne tamate* ne ia a tena taina ko Asaelu.+ 28 Fakamuli ifo, i te logoga a Tavita i te mea tenei, ne fai aka a ia: “Au e ‵ma eiloa mo toku malo ki te se-gata-mai i mua o Ieova ona ko te fakamaligiga o toto+ o Apinelu te tama tagata a Nelu. 29 Ke pakū atu eiloa ki luga i a Ioapo+ mo te kāiga kātoa o tena tamana a te fakasalaga. Ke maua faeloa i te kāiga o Ioapo se tagata telā e masaki me e fano tena sua+ io me se lepela+ io me se tagata e galue i te koga ‵laga laugatu* io me se tino e mate i te pelu io me fiakai!”+ 30 Ne tamate ne Ioapo mo tena taina ko Apisai+ a Apinelu+ me ne tamate ne ia te lā taina ko Asaelu i te taua+ i Kipeona.

31 Tenā ne fai atu ei a Tavita ki a Ioapo mo ana tāgata katoa: “Saesae otou gatu kae ‵pei ki gatu lautaga kae ‵tagi ona ko Apinelu.” A te Tupu ko Tavita ne sasale atu mai i tua o te pusa o te tino mate. 32 Ne tanu ne latou a Apinelu i Hepelona; kae ne tagi malosi a te tupu i te tanuga o Apinelu, kae ne ‵tagi foki ei a tino katoa. 33 Ne usu ne te tupu a tena pese fakaalofalofa e uiga ki a Apinelu, ana muna:

“E mata, ne ‵tau o mate a Apinelu e pelā me se tino valea?

A koe ne mate e pelā me se tino e tamate i mua o tino solitulafono.”*+

Tenā ne toe ‵tagi i ei a tino katoa.

35 Fakamuli ifo, ne olo atu a tino katoa o avatu a meakai ki a Tavita ke fakamafanafana* ei a ia i te aso tenā, kae ne tauto atu a Tavita: “Ke fakasala faeloa au ne te Atua māfai e tami au ki se meakai io me se isi mea aka kae koi tuai o tō te mata o te la!”+ 36 Ne lavea ne tino katoa te mea tenā, kae ne fia‵fia latou ki ei. So se mea ne fai ne te tupu, ne fia‵fia eiloa ki ei a tino katoa. 37 Ne iloa ne tino katoa mo Isalaelu kātoa i te aso tenā me e seki māfua mai i te tupu a te mate o Apinelu te tama tagata a Nelu.+ 38 Tenā ne fai atu ei te tupu ki ana tavini: “E a, e se iloa ne koutou me ko oti ne mate se pelenise mo se tagata takutakua i Isalaelu i te aso nei?+ 39 I te aso nei, au ko vāivāi, faitalia me i a au ko te tupu ne ‵tofi aka,+ kae ko tāgata konei, ko tama tāgata a Seluia+ ko tō ma‵sei katoa ki a au.+ Ke toe taui atu eiloa ne Ieova ki te tino masei e ‵tusa mo tena mea masei ne fai.”+