Mataupu e 71

Te Fui Tali‵tonu o te Kau Falesaio

NE MA‵TAKU a mātua o te tagata telā ne ‵kivi muamua i te taimi ne ‵kami mai ei laua ki mua o te kau Falesaio. Ne iloa ne laua me ko oti ne fakaiku aka ke fakatea mai te sunako so se tino telā e fai atu me e fakatuanaki a ia ki a Iesu. A te vaegā fakateaga tenā mai te kau atu ki nisi tino o te fenua ne fai mo fai se mea faigata ‵ki, kae maise eiloa mō se kāiga ma‵tiva. Telā ne fakaeteete malosi ei laua.

“Ko te lua tama tenei, telā ne fai mai ei koulua me ne ‵kivi eiloa i te fanaumaiga?” ko te fesili a te kau Falesaio. “Kae ne kite pefea?”

“Ko iloa ne maua me ko te mā tama tenei, kae e iloa tonu foki eiloa ne maua me ne fanau mai e ‵kivi,” ne fakamaoni atu ne laua. “Kae ne kite pefea, e se iloa ne maua me ko oi ne faka‵pula ne ia ona mata.” Kāti ne taku atu ne te lā tama a mea katoa kolā ne ‵tupu, kae ne fai atu mo te fakaeteete ana mātua penei: “Fesili atu ki a ia me ko matua a ia. E mafai eiloa ne ia o tali mai.”

Tela la, ne toe ‵kami mai ne te kau Falesaio a te tagata tenā. I konā loa, ne taumafai ei latou o fakamatakutaku atu ki a ia kae ne fakauiga pelā me ko oti ne maua ne latou a fakamaoniga i a Iesu ne agasala. “Avatu te vikiga ki te Atua,” ne fakatonu atu ne latou. “Me e iloa ne matou i a Iesu se tagata agasala.”

Ne seki fakafiti atu te tagata telā ne ‵kivi ki olotou pati, ana muna: “E se iloa ne au me i a ia se tagata agasala me ikai.” Kae ne toe fai atu foki a ia penei: “Kae tasi fua te mea e iloa ne au, au ne ‵kivi muamua, kae nei ko kite.”

Ne taumafai latou ke maua aka me e ‵se tena fakamatalaga, telā ne toe fesili atu ei te kau Falesaio penei: “Se a tena mea ne fai ki a koe? Kae ne fai foki pefea ne ia ke ‵pula ou mata?”

“Ko palele ne taku atu ne au ki a koutou,” ne fāmeo a ia, “kae ne seki faka‵logo mai eiloa koutou. Kae se a foki te mea ko toe fia faka‵logo mai ei koutou?” Ne fakalīlī atu a ia i tena fesili tenei: “E ma‵nako koutou ke fai koutou mo ona soko?”

Ne kaitaūa malosi te kau Falesaio i tena tali. “Ko koe tenā ko tena soko,” ne ‵losi atu ne latou, “ka ko matou ko soko o Mose. E iloa ne matou i te Atua ne faipati ki a Mose, kae e se iloa ne matou me ne vau mai i fea a te tagata tenei.”

Ne ofo te tino mativa tenā, kae ne tali atu penei: “Ko ofo toku loto i te mea tenei, me e se iloa ne koutou me ne vau a ia mai i fea, kae ko faka‵pula ne ia oku mata!” Ne a mea e ‵tau o fakaiku aka i ei? Ne fakasino atu te tino mativa tenā ki te manatu telā ne talia ne tino katoa: “E iloa ne tatou i te Atua e se fakalogo ki tino agasala; kae e fakalogo ki tino kolā e āva ki a ia kae fai foki ne latou tona loto. Talu mai te kamataga o te lalolagi, ne seki lagona eiloa me e isi se tagata ne faka‵pula ne ia a mata o se tino ne fanau mai e ‵kivi.” Tela la, e ‵tau o mautinoa te fakaikuga: “Moi se vau mai te Atua te tagata tenā, e se mafai ne ia o fai se mea e tasi.”

E seai se tali a te kau Falesaio ki vaegā manatu ‵tonu kae faigo‵fie konā. Ne seki mafai o talia ne latou te munatonu, telā ne ‵liko atu ei latou ki te tagata tenā, penei: “Ne fanau mai koe e ‵fonu i te agasala, kae ko vau koe o akoako mai matou?” I konā loa, ne tuli ei ne latou ki tua te tagata tenā, kāti ne fakatea ne latou a ia mai te sunako.

I te taimi ne logo ei a Iesu i mea kolā ne fai ne latou, kae ne fetaui laua mo te tagata tenā, ne fai atu a ia penei: “E a, e talitonu koe ki te Tama a te Tagata?”

“Te Aliki, ko oi a ia, ko te mea ke talitonu au ki a ia?” ko te tali a te tino mativa telā ne ‵kivi.

“Ko ia foki eiloa tenei e sau‵tala mo koe!” ko te tali a Iesu.

Ne totuli fakavave ifo te tagata i mua o Iesu, ana muna: “Te Aliki, au ko talitonu.”

I konā loa, ne fakamatala atu ei ne Iesu penei: “Au ne vau ki te lalolagi nei o fakamasino, ko te mea ko tino ‵kivi ke kite; kae ko tino kite ke ‵kivi.”

Tenā la ne fesili atu te kau Falesaio kolā ne fakalogo‵logo: “A matou foki e ‵kivi?” Moi ne takutonu atu ne latou me e ‵kivi olotou mafaufauga, penei ko isi se lotou fakasakoga ke mafai ei ne latou o ‵teke atu ki a Iesu. Kae e pelā mo muna a Iesu ki a latou: “Moi fai ne ‵kivi otou mata, kāti ko seai ne otou agasala.” Kae ne loto ma‵keke latou kae ne fai atu me e se ‵kivi latou kae e se ‵tau foki o maua ne latou a mainaga faka-te-agaga. Telā ne fai atu ei a Iesu penei: “Kae fai mai nei koutou, ‘A matou e se ‵kivi omotou mata,’ tela la, e tumau eiloa koutou i te agasala.” Ioane 9:19-41.

▪ Kaia ne ma‵taku ei a mātua o te tino mativa telā ne ‵kivi muamua i te taimi ne ‵kami mai ei laua ki mua o te kau Falesaio, kae ne tali atu pefea laua mo te fakaeteete?

▪ Ne taumafai pefea te kau Falesaio o fakamatakutaku ne latou te tagata telā ne ‵kivi muamua?

▪ Se a te fakamatalaga manino a te tagata telā ne fai ei ke kaitaūa malosi te kau Falesaio?

▪ Kaia e seai ei se fakasakoga a te kau Falesaio i te ‵teke atu o latou ki a Iesu?