Mataupu e 76
Ne ‵Kai Fakatasi a Ia mo te Falesaio
KO OTI ne tali atu a Iesu ki tino munasele kolā ne fesili atu ki a ia e uiga ki te mafuaga o tena ‵mana ke faka‵lei ei ne ia te tagata gūgū, kae ne ‵kami a ia ne te Falesaio ke kai i tena fale. Koi tuai o ‵kai latou, kae ne fai ne te kau Falesaio te faiga masani o te ‵fanoga o olotou lima, ke oko eiloa ki olotou tulilima. Ne fai sāle latou penā a koi tuai o ‵kai kae māfai ko oti ne ‵kai kae penā foki loa mo nisi taimi kolā e faka‵tali ei ki nisi meakai. E tiga eiloa e se solitulafono te tū tenā ki tulafono tusia a te Atua, ne fakasilisili ne latou te mea tenā i lō mea kolā ne manako te Atua ki ei i te ‵mā faka-te-tapuakiga.
I te taimi ne seki fai ei ne Iesu te tū tenā, ne ofo te tagata telā ne talimālō ki a ia. E tiga eiloa ne seki taku tonu atu ne ia tena ofo, ne maina ‵lei a Iesu i ei kae ne fai atu penei: “A koutou Falesaio, e ‵fulu fua i tua o te ipu mo te tifa; kae i loto i a koutou, e ‵fonu i te pukemālō o mea mo te ma‵sei. Tino ‵supa! E a, a te tino ne fai ne ia a te feitu ki tua o te mea, e seki fai foki ne ia a te koga i loto?”
Ne fakaasi atu penā ne Iesu a te amio fakaloi‵loi o te kau Falesaio kolā ne ‵fulu fua ne latou olotou lima kae ne seki ‵fulu ne latou olotou loto mai amioga ma‵sei. Ne fakatonutonu atu a ia penei: “Ke tuku atu a mea kolā i otou loto ke fai mo meaalofa, kae kiloke, ko faka‵māgina a mea katoa mō koutou.” A te faiga ne latou o meaalofa e ‵tau o mafua mai i te loto alofa, kae e se ko te manakoga ke fai a nisi tino ke ofo i te amio‵tonu o latou.
“Kalofa eiloa i a koutou Falesaio!” Ne toe fai atu a Iesu, “ne tuku atu ne koutou ki te Atua a te tasi vae sefulu o fuagā lakau valevale, ke oko eiloa ki fuaga fo‵liki, kae e fakapuli ne koutou te fakamasinoga mo te alofa o te Atua. E ‵tau o fai a mea konei, kae ke mo a foki ma tiakina atu a nisi mea.” I te Tulafono a te Atua, ne ‵tau ei mo tino Isalaelu o ‵togi atu te tasi vae sefulu o fuataga mai olotou fatoaga. A fuaga fo‵liki konā, ko vaegā fuaga fo‵liki kolā e fakaaogā ke fai ei a meakai ke manogi ‵gali. Ne fakaeteete malosi a te kau Falesaio o ‵togi atu ne latou te tasi vae sefulu o vaegā fuaga fo‵liki kae sē taulia konā, kae ne taku fakamasei ne Iesu a latou konā me ne seki ‵saga atu ki te fakatonuga telā ne sili atu tena tāua ke fakaasi atu ne latou te alofa, te kaimalie, penā foki loa mo te loto maulalo.
Ne toe taku fakamasei ne Iesu a latou penei: “Kalofa eiloa i a koutou Falesaio! I te mea e ma‵nako koutou ki nofoga ma‵luga i loto i fale tapuaki, mo te fia fakaaloalogina ne tino i malae. Kalofa eiloa i a koutou! Me i a koutou ko pelā eiloa mo tānuga e se matea, e sa‵sale i ei a tino, kae e se iloa lele ne latou.” E se mateagofie te lai‵lai o latou. E isi ne faifaiga matea a te kau Falesaio kae e seai se mea aogā i ei! Ne fakavae fua te mea tenā ki amioga fakaloi‵loi.
I te fakalogologo ki te taku fakamaseiga tenā, e tokotasi te lōia, telā ne fakaa‵koga ki te Tulafono a te Atua, ne seki loto malie kae ne fai atu penei: “Te Faiakoga, a tau faipatiga ki mea konei, ko fakamasei mai foki ei ne koe a matou.”
Ne manatu aka foki a Iesu me e ‵se a tino ‵poto konā i te Tulafono, ana muna: “Kalofa eiloa i a koutou faiakoga o te Tulafono! I te mea ko fakaeke atu ne koutou ki tāgata a amoga ‵mafa, kolā e se mafai ne latou o amo; ako koutou e se mafai lele eiloa o fakapatele atu se maikao e tasi ki te amoga. Kalofa eiloa i a koutou! I te mea ko ati aka ne koutou a tānuga o pelofeta kolā ne tamate ne otou tamana.”
A amoga kolā ne faipati a Iesu ki ei, ko tū kolā ne taku mai ne latou, kae ne seki ave lele eiloa keatea ne lōia konā se tamā fakatonuga foliki e tasi ke fai ei ke tai faigofie ki tino. Ne fakaasi atu ne Iesu me ne loto ma‵lie foki latou ki te ‵taga o te kau pelofeta, kae ne fakailoa atu ne ia penei: “Me i toto o pelofeta katoa ne ma‵ligi mai i te kamataga o te lalolagi, ka sui ne te kautama tenei; mai te toto o Apelu ke oko ki te toto o Sakalia, telā ne tamate i te va o te fatafaitaulaga mo te potu tapu. E tonu, au e fai atu ki a koutou, me ka sui mai i te kautama tenei.”
Ne kamata eiloa te lalolagi o tino kolā ne ‵tau o fakaola, mai te fa‵naumaiga o tama‵liki a Atamu mo Eva. Tela la, ne ola a Apelu i “te kamataga o te lalolagi.” Mai tua ifo o te mate fakasauā o Sakalia, ne fakamasei ei ne kautau Asulia a Iuta. Kae ne ‵valo atu ne Iesu se fakamaseiga telā e masei atu mō tena kautama ona ko te matagā o olotou amioga ma‵sei. Ne tupu te fakamaseiga tenā i te 38 tausaga mai tua ifo i ei, i te 70 T.A.
Ne toe taku fakamasei ne Iesu a latou, ana muna: “Kalofa eiloa i a koutou faia‵koga o te Tulafono! I te mea ko ave keatea ne koutou te kī o te poto, kae e se ulu atu koutou, kae ne taofi foki ne koutou a tino kolā ne ulu atu ki ei.” Ne isi se tiute o tino konā i te Tulafono ke fakamatala atu te muna a te Atua ki tino valevale, io me ke ‵tala mai tena fakamatalaga tonu. Kae ne fakata‵mala latou ke fai penā. Kae ne ave foki keatea ne latou mai tino konā a te avanoaga tenā ke malamalama latou i ei.
Ne kaitaūa malosi a te kau Falesaio mo faiakoga o te Tulafono me ne fakaasi mai ne pati a Iesu a olotou faiga ‵se. I te taimi ne tiakina ei ne ia te fale, ne kamata o ‵teke malosi atu latou ki a ia kae ne ‵ti atu ne latou a fesili e uke ki a ia. Ne taumafai latou o ‵po a ia i ana pati ke mafai ei o puke fakapagota ne latou a ia. Luka 11:37-54; Teutelonome 14:22; Mika 6:8; 2 Nofoaiga Tupu 24:20-25.
▪ Kaia ne taku fakamasei ei ne Iesu te kau Falesaio mo faiakoga o te Tulafono?
▪ Ne a amoga ne avatu ne lōia konā ki tino?
▪ Se a te “kamataga o te lalolagi”?