Fakatonuga mō Taina Kolā e Fai Tofiga i Te Fakatasiga mō te Galuega Talai

E kamata mai i te lomiga tenei o Te ‵Tou Galuega Talai, ka fakafaigofie aka a tugapati kolā e fakaaoga i te Fakasologa o Te Fakatasiga mō te Galuega Talai. Ka fakamatala mai a fakatonuga mo fakamasauaga i te mataupu ko “Te Auala ke Fakatoka ei ki Te Fakatasiga mō te Galuega Talai,” telā ne sae mai i Te ‵Tou Galuega Talai i a Me 2009.

◼ Lauga: E fakasino atu a te mea tenei ki se lauga telā e fakavae ki se mataupu telā ne fakatoka e aunoa mo te aofia o te kautaina i ei. E ‵tau o saga tonu atu a te failauga ki mea kolā ka aoga malosi ki te fakapotopotoga.

◼ Fesili mo Tali: E pelā eiloa mo te faiga o te Sukesukega ki te Faleleoleo Maluga, e aofia eiloa i te vaega tenei se fakatomuaga mo te fakaotiga toetoe, ko ‵sili atu ei a fesili i palakalafa katoa. E ‵tau o ‵kalo keatea a te taina telā e fai ne ia a te vaega tenei mai i te sōna faipati ‵soko atu. E ‵tau o faitau a tusi siki aoga e ‵tusa mo te leva o te taimi. E se ‵tau o faitau atu a palakalafa vagana ke isi se fakatonuga ke fai penā.

◼ Sau‵talaga: A te mea tenei se lauga telā e aofia i ei a te kautaina i nisi taimi. E sē se lauga fua, kae e sē se faiga foki o fesili mo tali.

◼ Fakaasiga mo Fakasau‵talaga: A fakatonuga ke fai te fakaasiga e fakauiga i ei me e ‵tau o fakatoka ne te taina telā ne ‵tofi ke fai ne ia te tofiga se fakaasiga; e mafai o ‵tofi ne ia se tino ke fai ne ia. A tino kolā e filifili ne ia ke fesoasoani atu ki a ia e ‵tau o atamai kae fai mo fai ne fakaakoakoga ‵lei, kae e ‵tau o fai ne ia a fakatokaga mai mua o te taimi e fai i ei māfai e mafai. Se mea ‵lei ke se fakaaoga a tino talai ‵fou kae e se atamai malosi ke fai ne latou a te fakaasiga e uiga ki te faiga o te galuega ko te mea fua ke olo atu latou ki te tulaga, faitalia me e mafai o fakaaoga a nisi o latou e pelā me ne tino e talai ki ei. E ‵tau o ‵saga tonu atu a tino talai kolā e fai ne latou a fakaasiga ki te kautaina. A latou kolā e fakaaoga ke fakasau‵tala aka, e ‵tau o fai olotou fakamatalaga mai i te tulaga i lō mai i olotou nofoga. E ‵tau o fakaakoako faka‵lei a fakaasiga mo fakasau‵talaga. Kafai ko pili o ta te taimi kae e ‵tau o fakatoetoe aka ne se taina tena tofiga, ka taofi aka ne ia a fakaasiga io me ko fakasau‵talaga. E ‵tau mo tavini fakafaifeau o fesili atu ki te ovasia tausi o te kau toeaina io me se isi toeaina a koi tuai o filifili aka ne latou a tino kolā e fia fakaaoga ne latou.

Kafai e isi se tofiga tāua telā e isi ne fakatonuga fakapito ki ei, e ‵tau o tautali faka‵lei atu ki ei. Mai i te faiga o tofiga i Te Fakatasiga mō te Galuega Talai e pelā mo mea ne fakaasi atu mai luga, ka fesoasoani atu ei a taina ki te faiga o Te Fakatasiga mō te Galuega Talai “ke fanofano ‵lei kae gali i taimi o tapuakiga.”​—1 Kolinito 14:40.