Ne Fakamaluga Ne Iopu A Te Igoa O Ieova

“Ke vikia te igoa o [Ieova].”—IOPU 1:21.

1. Kāti ko oi ne tusi ne ia te tusi ko Iopu, kae i te taimi fea?

KĀTI ko 40 a tausaga o Mose i te taimi ne tele keatea ei a ia mai Aikupito ke sao ei a ia mai i te kaitaua o Falao kae ne nofo atu a ia i Mitiana. (Galuega 7:23) I te taimi ne nofo atu ei a ia i te fenua tenā, kāti ne logo a ia i tofotofoga o Iopu, telā ne nofo pili atu i te fenua o Usa. I te fia o tausaga mai tua ifo i ei, i te taimi ko pili atu ei a te fenua o Isalaelu ki Usa i te fakaotiotiga o te lotou malaga i te koga lavaki, kāti ne iloa ne Mose a mea ne ‵tupu i toe tausaga fakaotioti o te olaga o Iopu. E ‵tusa mo tuu a te kau Iutaia, ne tusi ne Mose te tusi ko Iopu mai tua ifo o te mate o Iopu.

2. Ne a auala e fai ei te tusi ko Iopu mo fai se fakamalosiga ki tavini a Ieova i aso nei?

² E fakamalosi aka ne te tusi ko Iopu a te fakatuanaki o tavini a te Atua i aso nei. Ne a auala e fakamalosi atu i ei? E fesoasoani mai te tala i te kamataga ke malamalama tatou i mea tāua kolā ne ‵tupu i te lagi kae fakamaina mai i ei a te ‵toe kinauga tāua e uiga ki te pulega sili a te Atua i te lagi mo te lalolagi. E fai ne te tala o Iopu ke momea aka te ‵tou malamalama i mea kolā e aofia i te fakatumauga o te fai mea tonu kae e fesoasoani mai foki ke maina tatou i te pogai e talia ei ne Ieova i nisi taimi ke logo‵mae ana tavini. E se gata i ei, e fakaasi mai i te tusi ko Iopu me i a Satani te Tiapolo ko te ‵toe Fili sili o Ieova mo tino. E fakaasi mai foki i te tusi me i tino sē ‵lei katoatoa e pelā mo Iopu e mafai eiloa o tumau i te a‵lofa fakamaoni ki a Ieova faitalia te ma‵losi o tofotofoga. Ke na iloilo aka ne tatou a nisi mea ne ‵tupu kolā ne fakamatala mai i te tusi o Iopu.

Ko Tofotofo a Iopu ne Satani

3. Se a te mea e iloa ne tatou e uiga ki a Iopu, kae kaia ne oso tonu atu ei a Satani ki a ia?

³ A Iopu se tagata maumea kae tāua, se ulu o te kāiga telā e ‵lei ana amioga. E fakamaoni mai me ne fai a ia mo fai se tino fakatonutonu poto telā ne fesoasoani atu ki tino fakaa‵lofa. E sili atu i te tāua, ne mataku a Iopu ki te Atua. A Iopu se tagata “‵lei, kae ko ia eiloa ko fakaeteete i a ia ma agasala.” Ko te tapuakiga a Iopu—kae e se ko tena maumea mo tena tāua—ne fai ei ke oso tonu atu a Satani te Tiapolo ki a ia.—Iopu 1:1; 29:7-16; 31:1.

4. Se a te fakamaoni?

⁴ A te fakamatalaga i te kamataga o te tala i te tusi ko Iopu e fakamatala mai i ei me ne maopoopo a te kau agelu i mua o Ieova. Ne nofo atu foki i konā a Satani, kae ne taku fakamasei ne ia a Iopu. (Faitau ki te Iopu 1:6-11.) E tiga eiloa ne taku atu ne Satani a kope o Iopu, ne saga tonu atu a ia ki te fakamaseiga o te fakamaoni o Iopu. A te tugapati ko te “fakamaoni” e fakaasi mai i ei a te fai mea tonu, te ‵ma, te amiotonu, mo te seai o se mea ‵se i ei. E pelā mo te fakaaogaga i te Tusi Tapu, e fakaasi mai i te fakamaoni o tino a te katoatoa o tena loto fia tapuaki ki a Ieova.

5. Ne a ‵losiga ‵se a Satani e uiga ki a Iopu?

⁵ Ne ‵losi atu a Satani me i te tapuakiga a Iopu ki te Atua ne fakavae ki ana uiga kaimanako, kae e se ko te fakamaoni. Ne mafaufau a Satani me e alofa fakamaoni fua a Iopu ki a Ieova māfai e tumau te Atua i te fakamanuia mo te puipuiga o ia. Ke tuku atu se tali ki ‵losiga a Satani, ne talia ne Ieova ke oso atu a Satani ki te tagata fakamaoni tenā. Ne iku atu i ei ki te iloa ne Iopu, i te aso eiloa e tasi, me ko oti ne kaisoa io me fakamaseigina ana lafu manu, ko ana tavini ne tamate, kae ne ‵mate atu foki ana tamaliki e toko sefulu. (Iopu 1:13-19) E mata, ne takavale a Iopu i osomaiga a Satani? E fakamatala mai i te tala telā ne fakaosofia ne te Atua, a te kilokiloga a Iopu e uiga ki ana fakalavelave: “Ne aumai ne te Aliki aku mea, kae nei ko ave keatea foki ne ia. Ke vikia te igoa o [Ieova]!”—Iopu 1:21.

6. (a) Ne a mea ne ‵tupu i te suā taimi ne maopoopo ei te kau agelu i te lagi? (e) Ko oi ne mafaufau ki ei a Satani i te taimi ne fakafesili ei ne ia te fakamaoni o Iopu ki a Ieova?

⁶ Fakamuli ifo, ne toe maopoopo foki te kau agelu i te lagi. Ne toe fai atu foki ne Satani a ‵losiga ‵se e uiga ki a Iopu, ana muna: “A te tagata e mafai fua o tiakina ana mea katoa manafai ko manako ke ola a ia. Kafai e fakapakia ne koe tena foitino, e iku eiloa o muna masei atu ki a koe!” Onoono la me ne aofia foki ne Satani a nisi tino i ana ‵losiga ‵se. I ana muna, “A te tagata e mafai fua o tiakina ana mea katoa manafai ko manako ke ola a ia,” ne fakafesili ne te Tiapolo te fakamaoni o so se “tagata” telā e tapuaki ki a Ieova, kae e se ko Iopu fua. Mai tua ifo i ei, ne talia ne te Atua ke fakaoko atu ne Satani se masaki fakalogo‵mae ki a Iopu. (Iopu 2:1-8) Kae e seki gata i konā a tofotofoga o Iopu.

Te Akoakoga e Maua Mai i te Kilokiloga a Iopu

7. Ne a auala ne tuku atu ei ne te avaga o Iopu mo ana malō a fakamalosiga ‵se ki a Iopu?

⁷ Muamua la, ne ‵pau eiloa te logo‵mae o Iopu mo tena avaga. Ne poi malosi eiloa tou fafine i te ‵galo atu o ana tamaliki mo te maumea o te kāiga. Ne tigaina eiloa tou fafine ke lavea atu te logo‵mae o tena avaga i se masaki fakafi‵ta. Ne tagi atu tou fafine ki a Iopu: “A koe e tumau eiloa tou fakatuanaki ki te Aliki, ne? Ai a se na muna masei ei ne koe te Atua ko mate ei koe?” Oti aka, ne oko mai a tagata e tokotolu—ko Elifasa, Pilitati, mo Sofala—kolā ne ‵tau o fakamafanafana atu ki a Iopu. I lō te fai penā, ne fakaaoga ne latou a fakamatalaga ‵se kae ne fai ei latou e pelā me ne tino “fakatigaina fua.” E pelā mo pati a Pilitati me ne aofia a tama‵liki a Iopu i te faiga o amioga ma‵sei kae ne ‵tau eiloa o ‵mate latou. Ne fai atu a Elifasa i se auala poto me i logo‵maega o Iopu se fakasalaga mō ana agasala mua. Ne fakafesili foki ne ia me e mata, e fakatāua eiloa ne te Atua a tino kolā e tumau i te fakamaoni! (Iopu 2:9, 11; 4:8; 8:4; 16:2; 22:2, 3) Mai lalo i vaegā fakamalosiga ma‵sei penā, ne tumau eiloa a Iopu i te fakamaoni. E tonu, ne ‵se a ia i te fai atu me i a ia “e taumafai eiloa o fakasao a ia kae ‵lou ne ia me ko te Atua e pogai ei tena malaia.” (Iopu 32:2) Kae ne tumau eiloa tena fakamaoni i mea katoa konā.

8. Se a te fakaakoakoga ‵lei ne tuku mai ne Eliu ki tino fakatonutonu i aso nei?

⁸ I tafa o te mea tenā, e fai‵tau tatou e uiga ki a Eliu, telā ne fanatu foki o āsi ki a Iopu. Ne fakalogologo muamua a Eliu ki fakamatalaga ne tuku atu ne Iopu mo ana taugasoa e tokotolu. E tiga eiloa e foliki ifo a ia i nisi tagata e tokofa, ne fakaasi atu eiloa ne Eliu te lasi o tena poto. Ne fakaasi atu eiloa ne ia te āva ki a Iopu, mai te taku atu o te igoa o Iopu. Ne fakamālō atu a Eliu ki a Iopu mō tena fai mea tonu. Kae ne fai atu foki a ia me ko tō saga malosi atu fua a Iopu ki te taumafai o fakamaoni aka me i a ia e se ‵se. Ne fakatalitonu atu ne Eliu ki a Iopu me e aoga faeloa a te tavini atu ki te Atua mo te fakamaoni. (Faitau te Iopu 36:1, 11.) Ko oko eiloa i te gali o te fakaakoakoga tenā mō tino kolā e ‵tau o tuku atu ne latou a pati fakatonutonu i aso nei! Ne fakaasi atu ne Eliu te loto kufaki, ne fakalogologo faka‵lei, ne fakamālō atu māfai ko ‵tau, kae ne tuku atu foki a pati fakatonutonu kae fakamalosi loto.—Iopu 32:6; 33:32.

9. Ne fesoasoani atu pefea a Ieova ki a Iopu?

⁹ Fakamuli ifo, ne āsi atu foki se malō fakaofoofogia ki a Iopu! E fai mai te tala: “A te Aliki [ko Ieova] ne faipati mai ki a Iopu mai i loto i te afā.” Mai te fakaaogaga o nāi fesili, ne fesoasoani atu a Ieova i se auala atafai kae mautinoa ki a Iopu ke faka‵tonu ana mafaufauga. Ne talia ne Iopu mo te loto fiafia a pati polopoloki konā, i ana muna konei: “Au ko oko eiloa i te ma i aku pati katoa kolā ko oti ne fai. Au ko salamo mo toku loto kātoa.” Mai tua o te taimi ne faipati atu ei a Ieova ki a Iopu, ne fakaasi atu Tena kaitaua ki taugasoa e tokotolu o Iopu, me ne seki faipati atu ne latou “te mea tonu.” Ne fai atu ki a Iopu ke ‵talo mō latou. I te otiga, ne “toe fakamaumea a [Iopu] ne te Atua, kae avatu ki a ia e lua taimi te uke atu o ana mea i te taimi nei i lō ana mea mua.”—Iopu 38:1; 40:4; 42:6-10.

E Pefea te Lasi o ‵Tou A‵lofa ki a Ieova?

10. Kaia ne seki fulitua io me fakaseai atu ei ne Ieova a Satani?

¹⁰ A Ieova ko te Mafuaga o te lagi mo te lalolagi, mo te Pule Sili o mea katoa ne faite. Kaia ne seki fulitua atu fua i ei a ia ki pati ‵toa a te Tiapolo? Ne iloa ne te Atua me i te fulitua atu ki a Satani io me ko tena fakaseaiga, e se faka‵lei aka ei te kinauga telā ne sae aka. Ne fai atu a te Tiapolo me i a Iopu, telā se tavini tu ‵kese a Ieova, e se tumau i te alofa fakamaoni māfai ko galo atu tena maumea. Ne tumau eiloa te alofa fakamaoni o Iopu faitalia te tofotofoga. Oti aka, ne fai atu a Satani me ka fulitua atu so se tino ki te Atua māfai ko logo‵mae i te feitu faka-te-foitino. Ne logo‵mae a Iopu, kae ne seki fakamasei i ei tena fakamaoni. Tela la, ne fakamaoni mai i ei me i a Satani se tino loi ona ko te fakamaoni o Iopu faitalia me i a ia se tagata sē ‵lei katoatoa. Kae e a la nisi tino tapuaki ki te Atua?

11. Ne tuku atu pefea ne Iesu se tali katoatoa ki pati ‵toa a Satani?

¹¹ E tonu, a tavini taki tokotasi a te Atua kolā e tumau i te fakamaoni faitalia a mea kolā e fai ne Satani ki a ia, e fakaasi atu i mea ne ‵tupu ki a ia, me e ‵se a ‵losiga kolā e fai atu ne te fili matagā tenei. Ne vau a Iesu ki te lalolagi kae ne tuku mai ne ia se tali katoatoa ki pati ‵toa a Satani. A Iesu se tino ‵lei katoatoa, e pelā mo te ‵tou tamana muamua, ko Atamu. A te fakamaoni o Iesu ke oko eiloa ki tena mate e fakaasi mai i ei me i a Satani se tino loi kae e ‵se foki ana ‵losiga.—Fakaasiga 12:10.

12. Se a te avanoaga mo te tiute e maua ne tavini taki tokotasi a Ieova?

¹² E tiga eiloa te feitu tenā, e tumau eiloa a Satani i te tofotofoga o tino tapuaki ki a Ieova. E maua ne tatou taki tokotasi te avanoaga mo te tiute ke fakaasi atu me i te pogai e tavini atu ei tatou ki a Ieova mo te fakamaoni, ko ‵tou a‵lofa ki a ia—kae e se ko ‵tou uiga kaima‵nako. E pefea te ‵tou kilokiloga ki te tiute tenā? E ‵kilo atu eiloa tatou ki ei e pelā me se tulaga fakaaloalo ke fakaasi atu te alofa fakamaoni ki a Ieova. E fakamafanafana mai foki ke iloa atu me e tuku mai ne Ieova te malosi ke kufaki tatou, e pelā mo te mea ne tupu ki a Iopu, telā e tuku mai eiloa ne Ia a tapulā ki tofotofoga kolā e fe‵paki mo tatou.—1 Kolinito 10:13.

Satani—Se Fili Kae se Aposetate Matagā

13. Ne a fakamatalaga likiliki e fakaasi mai i te tusi ko Iopu e uiga ki a Satani?

¹³ E tuku mai ne te Tusi Tapu faka-Epelu a fakamatalaga likiliki e uiga ki te tulaga fakamasiasi o Satani i te ‵teke atu ki a Ieova mo te takitaki ‵se ne ia o tino. I te Tusi Tapu faka-Eleni, e maua ne tatou a fakamatalaga e uke e uiga ki te ‵tekeatuga a Satani ki a Ieova, kae i te tusi ko Fakaasiga, e tauloto ne tatou i ei a te fakamalugaga o te pulega sili a Ieova mo te ‵toe fakaseaiga o Satani. E tuku mai ne te tusi ko Iopu a nisi fakamatalaga e uiga ki faifaiga ‵teke a Satani. I te taimi ne fanatu ei a Satani ki te maopoopoga i te lagi, ne seki kau atu a ia mo te manakoga ke tavae atu ki a Ieova. Ne maua ne te Tiapolo se uiga matagā mo se fakamoemoega sē ‵lei. Mai tua o te faiatuga o ana ‵losiga ‵se e uiga ki a Iopu kae maua foki ne ia te taliaga ke tofotofo aka tou tagata, “ne fano keatea ei Satani mai mua o te Aliki [ko Ieova].”—Iopu 1:12; 2:7.

14. Se a te kilokiloga ne maua ne Satani e uiga ki a Iopu?

¹⁴ Tela la, e fakaasi mai i te tusi ko Iopu me i a Satani se fili o tino telā e seai eiloa sena loto alofa. A te va o te taimi ne maopoopo ei i te lagi, e pelā mo te mea ne taku mai i te Iopu 1:6, mo te fakamatalaga mai i te Iopu 2:1, ne teka atu se vaitaimi telā ne tofotofogina ei a Iopu i se auala masei ‵ki. A te fakamaoni o Iopu ne mafai ei ne Ieova o fai atu ki a Satani: “Ne fai mai koe ki a au ke talia atu koe ke fano o fakapuapuaga a Iopu kae seai se pogai ‵tau, ka ko Iopu ne tumau eiloa tena loto fakamaoni.” Kae ne seki taku ‵tonu atu eiloa ne Satani me ne ‵se fua ana pati. E ‵kese mai i ei, ne manako foki a ia ke toe tuku atu te suā tofotofoga tai ‵mafa atu ki a Iopu. Tela la, ne tofotofo ne te Tiapolo a Iopu i te taimi ne maumea mo te taimi foki ne mativa ei a ia. E manino ‵lei, me e seai eiloa se loto alofa o Satani ki tino ma‵tiva io me ki tino kolā ko fe‵paki mo fakalavelave faiga‵ta. E takalialia a ia ki tino fakamaoni. (Iopu 2:3-5) E tiga eiloa te feitu tenā, ne fakaasi mai i te fakamaoni o Iopu me i a Satani se tino loi.

15. Ne a mea e ‵pau ei a aposetate i aso nei mo Satani?

¹⁵ A Satani ko te tino muamua ke liu aposetate. A aposetate i aso nei e fakaasi atu ne latou a uiga tai ‵pau mo te Tiapolo. Kāti ko fakapoisini olotou mafaufau ne se kilokiloga masei ki tino taki tokotasi i te fakapotopotoga, toeaina Kelisiano, io me ko te Potukau Pule. E ‵teke atu a nisi aposetate ki te fakaaogaga o te igoa o te Atua, ko Ieova. E se fia tauloto latou e uiga ki a Ieova io me fia tavini atu ki a ia. E pelā mo te lotou tamana, ko Satani, e taumafai eiloa a aposetate o fakamasei te fakatuanaki o tino fakamaoni. (Ioane 8:44) E se tioa eiloa o fakagata ne tavini a Ieova olotou fesokotakiga katoa mo latou!—2 Ioane 10, 11.

Ne Fakamaluga ne Iopu te Igoa o Ieova

16. Se a te kilokiloga ne fakaasi atu ne Iopu ki a Ieova?

¹⁶ Ne fakaaoga kae ne ‵viki atu a Iopu ki te igoa o Ieova. Ke oko foki eiloa ki te taimi ne logo ei tou tagata i te ‵mate o ana tama‵liki, ne seki fai eiloa ne ia ne pati sē ‵lei ki te Atua. E tiga eiloa ne ‵se a Iopu i te ‵losi atu ki te Atua e uiga ki te ‵galo atu o ana mea katoa, kae ne fakamaluga eiloa ne ia te igoa o Ieova. Fakamuli ifo, ne fai mai ne Iopu se faigāmuna e tasi, ana muna: “Kafai e ma‵nako koutou ke maua ne koutou te poto e ‵tau koutou o tapuaki atu ki te Aliki. Ka fia maua ne koe te malamalama, e ‵tau mo koe o fulitua keatea mai i te faiga o amioga ma‵sei.”—Iopu 28:28.

17. Se a te mea ne fesoasoani atu ki a Iopu ke fakatumau ei tena fakamaoni?

¹⁷ Se a te mea ne fesoasoani atu ki a Iopu ke fakatumau ei tena fakamaoni? E manino ‵lei, me koi tuai o oko atu a fakalavelave faiga‵ta, ko oti eiloa ne maua ne ia se fesokotakiga pili mo Ieova. E tiga eiloa e seai ne fakamaoniga e maua ne tatou me ne iloa ne ia te ‵toa atu o Satani ki a Ieova, ne fakaiku aka ne Iopu ke tumau eiloa tena alofa fakamaoni. Ana muna: “Au e makeke eiloa i a au e se ‵se [“me ka se ave keatea ne au toku fakamaoni,” NW] ke oko eiloa ki te aso e mate ei au.” (Iopu 27:5) Ne fakamalosi aka pefea ne Iopu te fesokotakiga pili tenei? E seai se fakalotolotolua, me ne fakatāua ne ia a mea ne lagona ne ia e uiga ki faifaiga a te Atua ki a Apelaamo, Isaako, mo Iakopo, ko ana kāiga kolā ne ‵nofo ‵mao atu. Kae mai i te onoono atu ki mea ne faite, ne mafai ei o iloa ne Iopu a uiga e uke o Ieova.—Faitau te Iopu 12:7-9, 13, 16.

18. (a) Ne fakaasi atu pefea ne Iopu te katoatoa o tena tapuakiga ki a Ieova? (e) Ne a auala e tau‵tali atu ei tatou ki te fakaakoakoga ‵lei a Iopu?

¹⁸ Ne fakamalosi aka ne mea kolā ne iloa ne Iopu a tena manakoga ke fakafiafia atu ki a Ieova. Ona ko tena manavase māfai e fai ne tino o tena kāiga se mea ke fakafanoanoa atu ki te Atua io me “se iloa fua manafai ne agasala se tamaliki,” ne ofo atu faeloa ne ia a taulaga. (Iopu 1:5) Ke oko foki eiloa ki te taimi ne tofotofo malosi ei a ia, ne tumau eiloa a Iopu i te faiga o pati ‵lei e uiga ki a Ieova. (Iopu 10:12) Ko tafaga la te gali o te fakaakoakoga tenā! E ‵tau foki o tumau tatou i te taumafai ke iloa tonu ne tatou a Ieova mo ana fuafuaga. E puke ‵mau tatou ki faifaiga aoga kolā e fakamalosi aka ei ‵tou fesokotakiga mo Ieova, e pelā mo sukesukega, te kau atu ki fakatasiga, ‵talo, mo te talaiatuga o te tala ‵lei. E se gata i ei, e fai ne tatou a mea katoa e mafai ne tatou o fai ke fakasalalau atu ei te igoa o Ieova. Kae e pelā eiloa mo te fakafiafia atu ki a Ieova a te fakamaoni o Iopu, e penā foki eiloa te fakafiafia ne te fakamaoni o tavini a te Atua i aso nei a te loto o Ieova. Ka sau‵tala eiloa ki te mataupu tenei i te suā mataupu.

• Kaia ne saga atu ei a Satani te Tiapolo ki a Iopu?

• Ne a tofotofoga ne kufaki i ei a Iopu, kae ne saga atu pefea a ia ki ei?

• Ne a mea ka fesoasoani mai ke fakatumau aka ei te ‵tou fakamaoni, e pelā mo Iopu?

• Ne a mea e tauloto ne tatou e uiga ki a Satani mai te tusi ko Iopu?

[Fesili mo te Sukesukega]

[Ata i te itulau e 10]

E fai ne te tala o Iopu ke iloa ne tatou a te ‵toe kinauga tāua e uiga ki te pulega sili a te Atua i te lagi mo te lalolagi

[Ata i te itulau e 12]

Ne a fakanofonofoga e mafai o tofotofo aka ei tou fakamaoni?