E Mafai Pefea o Kufaki Koe i te Faiga o te Galuega Talai?

KAI lagonaga aka loa ne koe a te ‵fiu i te faiga o te galuega talai telā ko manako ei koe ke se toe kau atu ki ei? E mafai o tofotofo aka a ‵tou kufaki ne ‵tekemaiga faiga‵ta, te manavase, masaki, taugasoa, io me ko te se fia ‵saga mai o tino ki te galuega talai. Ke mafaufau la ki te fakaakoakoga a Iesu. Ne kufaki ne ia a toe tofotofoga faiga‵ta “ona ko te fiafia telā e fakatalitali mai ki a ia.” (Epelu 12:⁠2) Ne iloa ne ia me mai te fakamaoni atu ne ia a te ‵se o losiga kolā e fai ki te Atua, ko fakafiafia ei ne ia a te loto o Ieova.​—⁠Faataoto 27:⁠11.

Kafai e kufaki tatou i te faiga o te galuega talai, e mafai foki o fakafiafia ne koe te loto o Ieova. Kae pefea la mafai ko vāivāi koe i te feitu faka-te-agaga ona ko nisi fakalavelave? Ne fai ‵tonu mai a Krystyna, telā ko matua ‵ki, kae fakamasakisaki foki, penei: “E masani eiloa au o fi‵ta kae fanoanoa. A fakalavelave o te tulaga matua, e pelā mo te fakamasakisaki mo te manavase ki te olaga i aso takitasi e mafai o fakavāivāi mai ki toku loto finafinau mō se taimi toetoe.” E mafai pefea o kufaki koe i te galuega talai faitalia a vaegā fakalavelave penei?

Fakaakoako ki Pelofeta

Ke kufaki i te faiga o te galuega talai, e mafai ne tino talai fakamaoni o te Malo o kausaki ke maua ne latou te uiga ne maua ne pelofeta i aso mua. Ke mafaufau ki a Ielemia. I te taimi ne fai atu ei ke fai a ia pelā me se pelofeta, ne seki talia muamua ne ia. Kae ne mafai ne Ielemia o kufaki i te faiga o te galuega faigata tenei i tausaga e sili atu i te 40, me ne iloa ne ia te aoga o te talitonu katoatoa ki te Atua.​—⁠Ielemia 1:6; 20:​7-11.

Ne fakamafanafana atu eiloa ki a Henryk te fakaakoakoga a Ielemia. Ne fai mai tou tagata: “I te 70 tupu tausaga o taku taviniga, ne fakavāivāi mai ki a au i nisi taimi a faifaiga a tino​—⁠te lotou ‵teke mai, io me ko te lotou sē fia ‵saga mai. I nisi taimi, e fakamasaua ifo ne au ki a au eiloa a te fakaakoakoga a Ielemia. A tena alofa ki a Ieova mo tena malosi i te feitu faka-te-agaga ne fakamalosi atu ki a ia ke tumau i tena galuega e pelā me se pelofeta.” (Ielemia 1:​17) Ne fakamalosi atu foki te fakaakoakoga a Ielemia ki a Rafał. Ne fai mai tou tagata: “I lō te saga ifo ki a ia eiloa mo ana lagonaga ne fakalagolago eiloa a Ielemia ki te Atua. Ne tumau a ia e aunoa mo te mataku faitalia te takalialia o tino ki a ia. E taumafai faeloa au ke masaua ne au te mea tenā.”

A te sua pelofeta telā ne aoga tena fakaakoakoga ki tino e tokouke ke kufaki i te galuega talai ko te pelofeta ko Isaia. Ne fai atu te Atua ki ei me ka se faka‵logo a tino o tena fenua ki a ia. Ne fai atu a Ieova: “Fai atu a mafaufau o tino konā ke valea, olotou taliga ke ‵tuli.” E mata, ko oti ne fakaiku aka ke se manuia a taumafaiga a Isaia? E se penā loa te kilokiloga a te Atua! I te taimi ne fakatonu atu ke fai a ia pelā me se pelofeta, ne tali atu a ia: “Ko au! Uga mai au!” (Isaia 6:​8-​10) Ne fakalogo eiloa a Isaia ki te fakatonuga ne fai atu ki a ia. E mata, e penā foki koe e uiga ki te fakatonuga ke talai atu?

Ke kufaki i te galuega talai faitalia te se fia ‵saga mai o tino, e pelā mo te mea ne tupu ki a Isaia, e se ‵tau o ‵saga atu tatou ki te se fia‵fia o tino ki te ‵tou fekau. Ne manumalo eiloa a Rafał i te loto vāivāi i vaegā tulaga penei: “E taumafai au ke se saga atu ki pati sē ‵lei mai tino. E maua ne tino i toku koga talai a te saolotoga ke fai so se vaegā pati e ma‵nako latou ke fai mai ki a au.” Ne toe fai mai a Ana: “E se talia ne au ke mafaufau faeloa au ki so se mea sē ‵lei io me se mea telā e fakavāivāi mai ki a au. A te mea telā e fesoasoani mai ke mafai ne au o fai te mea tenā ko te ‵talo mo te mafaufau ‵loto ki te tusi siki o te aso mai mua o kau atu ki te galuega talai. Se mea vave eiloa o ‵galo atu a mafaufauga sē ‵lei.”

Ne tavini atu te pelofeta ko Esekielu ki tino Iutaia loto make‵ke kolā ne ‵nofo fakapagota i Papelonia. (Esekielu 2:⁠6) Moi ne taofi aka ne te pelofeta a te muna a te Atua kae se fakailoa atu ki tino, kae e iku atu ki te mate o se tino masei e aunoa mo te fakailoa atu ki a ia te mea tenā, ka ‵losi atu eiloa ki a Esekielu a te mate o te tino tenā. Ne fai atu a Ieova ki a Esekielu: “Ka ‵lou ne au me ko koe e pogai ei te mate o te tagata tenā.”​—⁠Esekielu 3:​17, 18.

Ne manako foki a Henryk ke ‵pau tena kilokiloga mo Esekielu: “E se manako au ke pisipisia i toto o tino katoa. E ‵tu atu nei a ola o tino i se tulaga fakamataku.” (Galuega 20:​26, 27) E penā foki a lagonaga o Zbigniew: “Ne ‵tau o galue malosi a Esekielu faitalia a mafaufauga o nisi tino ki a ia. E fesoasoani mai a te mea tenei ke ‵pau taku kilokiloga mo te kilokiloga a te Atua ki te galuega talai.”

E se ko Koe Fua Tokotasi

E se ko koe fua tokotasi e fai ne koe te galuega talai. E pelā mo te apositolo ko Paulo, e mafai o fai atu tatou: “Me i a [matou] ne tino faigaluega, e ga‵lue fakatasi mō te Atua.” (1 Kolinito 3:⁠9) Ne fai mai a Krystyna telā e masani sāle o loto vāivāi: “Tenā te pogai e akai atu faeloa au ki a Ieova ke tuku mai te malosi. E se mafai o tuku tiaki ne ia au.” E tonu, e ma‵nako tatou ki te agaga o te Atua ke fesoasoani mai i te faiga o te galuega talai!​—⁠Sakalia 4:⁠11.

Kafai e olo atu tatou i te galuega talai, e fesoasoani mai foki te agaga tapu ke fakaasi atu ne tatou a uiga kolā e mafai o maua ei ne tatou a “fua o te agaga.” (Kalatia 5:​22, 23) Ka fesoasoani mai ke kufaki tatou i te faiga o te galuega talai, faitalia so se fakalavelave e fepaki mo tatou. Ne fai mai a Henryk: “A te kau atu ki te galuega talai e fesoasoani mai ke momea aka te ‵lei o oku uiga. Ne tauloto ne au mai ei ke iloa ne au o kufaki kae ke mafaufau foki ki nisi tino kae ke mo a e ‵fiu vave.” A te tumau i te faiga o te galuega talai faitalia so se fakalavelave e mafai o fesoasoani atu ki a koe ke ati aka a fua o te agaga.

I te faiga ne ia o te galuega tenei, e fakaaoga ne Ieova ana agelu. (Fakaasiga 14:⁠6) E fakaasi mai i te Tusi Tapu me e lau i “afe mo afe” a te aofaki o agelu. (Fakaasiga 5:​11) Mai lalo i te takitakiga a Iesu, e ‵lago atu a agelu ki tavini a te Atua i te lalolagi. E mata, e masaua ne koe te mea tenā māfai ko fanatu koe i te galuega talai?

“Kafai e mafaufau ‵loto ki te ‵kau fakatasi mai o agelu ki te faiga ne tatou o te galuega talai, se fakamalosiga lasi ‵ki ki a au,” ko pati a Ana. “E fakatāua malosi ne au te fesoasoani e tuku mai ne latou mai lalo i te takitakiga a Ieova mo Iesu.” Mafaga o tauliaga gali ko maua ne tatou ke mafai o ga‵lue fakatasi mo agelu fakamaoni!

Kae e aoga pefea te ga‵lue fakatasi mo nisi tino talai o te Malo? Se fakamanuiaga lasi eiloa mō tatou ke fakamasani faka‵lei mo te vaitino e tokouke o Molimau fakamaoni. E seai se fakalotolotolua me ko oti ne fakamaoni aka ne koe te ‵tonu o te tugapati tenei mai te Tusi Tapu: “A tino e tauloto ne latou te poto mai i nisi tino, e pelā mo te fiti e fakamata foki eiloa ki te fiti.”​—⁠Faataoto 27:⁠17.

A te ga‵lue fakatasi mo nisi tino i te galuega talai e tuku mai i ei ki a tatou se avanoaga gali ke tauloto ki nisi auala ‵fou kae ma‵goi i te faiga o te galuega talai. Ne fai mai a Elżbieta, penei: “A te ga‵lue mo tino talai kese‵kese e tuku mai ei ki a au se avanoaga ke fakaasi atu te alofa ki oku taina tapuaki e pelā foki mo tino kolā e fetaui mo au.” Taumafai ke ga‵lue koe mo tino kese‵kese i te galuega talai. Ka fai ei ke gali tau galuega talai.

Tausi Faka‵lei ki a Koe

Ke tumau i te loto finafinau i te faiga o te galuega talai, e ‵tau o palani faka‵lei ‵tou fakatokaga, fai se fakasologa ‵lei o sukesukega totino, kae ke lava foki a te taimi malolo. I nisi tugapati, e ‵tau o tausi faka‵lei ne tatou a tatou eiloa i te feitu faka-te-foitino mo te feitu faka-te-agaga.

Ne fai mai te Tusi Tapu: “Fai faka‵lei au aofaga kae ka uke au mea; kafai e sona gasue fakavavave fua koe, e se mafai o uke au mea.” (Faataoto 21:⁠5) Ne fai mai a Zygmunt telā ko 88 nei ana tausaga: “A te fakatoka faka‵lei i te faiga o taku galuega e fai ei ke aoga taku galuega. E fakasoa faka‵lei ne au oku taimi ko te mea ke lava oku taimi mō te galuega talai.”

A te iloa ‵lei ne tatou a te Tusi Tapu e fakamalosi kae fai ei ke toka tatou mō te galuega talai. E pelā eiloa mo te manakoga ke ‵kai faeloa tatou, e ‵tau foki o ‵kai faeloa tatou i te feitu faka-te-agaga ke mafai o tumau i te faiga o te galuega talai. A te kai faeloa ki te Muna a te Atua i aso takitasi e pelā foki mo ‘meakai kolā e maua i te taimi tonu’ e fakamalosi aka ei tatou i te faiga o te galuega talai.​—⁠Mataio 24:​45-​47.

Ne fai ne Elżbieta a ‵fuliga tāua i tena olaga ko te mea ke momea aka te ‵lei o tena galuega talai. Ne fai mai tou fafine: “Ko oti ne ‵kati ne au a taimi e uke mai te onoono ki te televise ko te mea ke mafai ne au o maua a taimi e lava ke fakatoka ei ki te galuega talai. Kafai e faitau au ki te Tusi Tapu i afiafi katoa, e mafaufau faeloa au ki tino i toku koga talai. E ‵sala ne au a tusi siki mo mataupu kolā e mafai o fesoasoani atu ki a latou.”

A te lava o taimi malolo ka fesoasoani atu ke maua ne koe te malosi e lava kae ke mafai o kau atu ki te galuega talai. I te suā feitu, a te uke o taimi e fakaaoga ki fakafiafiaga e mafai o fai ei ke se magoi te faiga o ‵tou galuega. Ne fai mai Andrzej, se tino talai loto finafinau: “A te se lava o te moe e iku atu ki te fi‵ta malosi, kae ko te mea tenā se lasaga foliki fua e tasi ke maua ei te loto vāivāi. E fai ne au so se mea e mafai o fai ke ‵kalo keatea mai te mea tenā.”​—⁠Failauga 4:⁠6.

Faitalia a ‵tou taumafaiga e uke, ne nāi tino fua e talia ne latou te tala ‵lei. Kae e se mafai eiloa o puli i a Ieova a ‵tou galuega. (Epelu 6:​10) E ui eiloa e se fia fai‵pati mai a tino e tokouke ki a tatou, e mafai eiloa o sau‵tala fakamuli latou ki te ‵tou āsi atu ki a latou māfai ko oti ne tiakina ne tatou te fale. E mafai o ‵pau a te mea e iku mai i ei mo te mea e fai‵tau tatou ki ei e uiga ki a Esekielu: Kae ka iloa ne tino “me e isi se pelofeta ko oti ne oko atu ki a latou.” (Esekielu 2:⁠5) E tonu, e se faigofie a te faiga o te galuega talai, kae e maua eiloa ne tatou e pelā foki mo nisi tino a mea aoga mai i ei.

“A te kau atu ki te galuega talai e fesoasoani mai ke ‵pei tatou ki uiga ‵fou kae ke fakaasi atu te alofa ki te Atua mo ‵tou tuakoi,” ko pati a Zygmunt. “Se tauliaga gali eiloa ke aofia tatou i te galuega fakaola tino tenei. Ka se toe fai eiloa te galuega tenei mai lalo i fakanofonofoga konei,” ko pati a Andrzej. E mafai foki o tau ne koe a fakamanuiaga e uke mafai e tumau koe i te kufaki i te faiga o te galuega talai i aso nei.​—⁠2 Kolinito 4:​1, 2.

[Ata i te itulau e 31]

A te tausi faka‵lei atu ki ‵tou manakoga i te feitu faka-te-agaga mo te feitu faka-te-foitino e fesoasoani mai ki a tatou ke kufaki i te faiga o te galuega talai