Ko Momea Aka a Avanoaga ke Tavae Atu ki a Ieova
1. Se a te fakatokaga fou ka fesoasoani mai ki a tatou ke ‘tavae atu ki a Ieova’ i se auala lasi ‵ki?
1 I te masina o Mati tenei ko teka atu, ne kamata ei se fakatokaga fou, telā e tuku mai ei te avanoaga ki tino talai ke paenia lagolago i te masina o Mati mo Apelila mō itula e 30, e penā foki mo te masina o te āsiga masani a te ovasia o te fenua. Kafai e nofo pelā ki se lua masina te leva o te āsiga a te ovasia o te fenua, a te tino talai telā e fia paenia mō itula e 30, e mafai o filifili ne ia se masina e tasi ke paenia lagolago i ei. E mafai o ‵kau atu a paenia lagolago katoa ki te fono kātoa telā e fai ne ia mo paenia tumau mo paenia fakapito. E fakauiga i ei me kafai foki loa e se mafai o paenia tatou mō itula e 50, koi mafai eiloa o ‘tavae atu ki a Ieova’ i se auala lasi ‵ki, e pelā me ne paenia lagolago, fakafa taimi i te tausaga mō itula e 30!—Sala. 109:30; 119:171.
2. Ne a mea ‵gali ka maua ne tino kolā e paenia lagolago i te āsiga a te ovasia o te fenua?
2 Te Āsiga a te Ovasia o te Fenua: Nei la, ko mafai o uke atu a tino ka paenia lagolago i te āsiga a te ovasia o te fenua kae ka fia‵fia foki ki fakamalosiga kolā e maua mai i te ga‵lue fakatasi mo ia i te galuega talai. (Loma 1:11, 12) Kāti ka puke ne paenia lagolago e tokouke se aso malōlō i te vaiaso ke ga‵lue fakatasi mo te ovasia o te fenua. A latou kolā e ga‵lue i aso o te vaiaso e mafai o fakamolemole atu ke ga‵lue fakatasi latou mo ia i te Aso Ono io me ko te Aso Sa. E se gata i ei, e lasi ‵ki te fakamalosiga e maua ne paenia lagolago ke ‵kau atu ki te fono mō paenia fakatasi mo paenia tumau mo paenia fakapito!
3. Kaia e fai ei te vaitaimi o te Fakamanatuga mo fai se taimi tafasili i te ‵lei ke paenia lagolago?
3 I a Mati mo Apelila: A latou kolā e fakaaoga faka‵lei ne latou a te fakatokaga mua ke paenia lagolago mō itula e 30 i se masina e tasi i te vaitaimi o te Fakamanatuga ko mafai o tapolo atu nei olotou “taulaga o vikiga”! (Epe. 13:15) E fai eiloa a Mati mo Apelila mo fai ne toe masina ‵lei ke fakalauefa atu tau taviniga e pelā me se paenia lagolago. I tausaga takitasi i masina konā, e ‵kau atu eiloa tatou ki se galuega fakafiafia ke ‵kami atu a nisi tino ke ‵kau mai ki te Fakamanatuga. E se gata i ei, ona ko te tokouke o tino ko momea aka olotou mea e fai i te galuega talai i te vaitaimi o te Fakamanatuga, e mafai eiloa o ga‵lue tasi tatou mo tino talai kese‵kese. Mai tua o te Fakamanatuga, e mafai o toe asi atu tatou ki tino fia‵fia kolā ne ‵kau mai kae toe fakamalosi atu foki latou ke ‵kau mai ki te lāuga fakapito mō tino katoa. E mata, ka fakaosofia tou loto ke fakaaoga faka‵lei a avanoaga fakaopoopo konei ke paenia lagolago?—Luka 6:45.