Se a te Malo o te Atua?

1. Se a te Malo o te Atua?

A te Malo o te Atua se pulega faka-te-lagi. Ka sui ne ia a nisi pulega katoa kae ka fai foki ne ia te loto o te Atua i te lagi mo te lalolagi. E fai eiloa te Malo o te Atua mo fai se tala ‵lei. E se leva kae ka fakamalie aka ne te Malo o te Atua a manakoga o tino mō se pulega ‵lei. Ka fai ei a tino katoa i te lalolagi ke fealofani.​—Faitau te Tanielu 2:44; Mataio 6:9, 10; 24:14.

E ‵tau o isi se tupu i se malo. Ne ‵tofi aka ne Ieova tena Tama, ko Iesu Keliso, mo fai te Tupu i Tena Malo.​—Faitau te Fakaasiga 11:15.

2. Kaia e ‵lei ei ke fai a Iesu mo fai te Tupu?

A te Tama a te Atua ko te Tupu ‵lei ona ko te mea e atafai kae ‵mautakitaki a ia mō te mea tonu. (Ioane 1:14) E maua foki ne ia te ‵mana ke fesoasoani atu ki tino ona ko te mea ka pule mai a ia ki te lalolagi mai te lagi. Mai tua o tena toetuga, ne fanaka a ia ki te lagi kae ne sagasaga a ia o faka‵tali i te feitu fakaatamai o Ieova. (Epelu 10:12, 13) Fakamuli loa, ne tuku atu ei ne te Atua a te malosi ke kamata o pule mai.​—Faitau te Tanielu 7:13, 14.

3. Ko oi ka pule fakatasi mo Iesu?

E isi se potukau e taku ki “tino tapu” ka pule fakatasi mo Iesu i te lagi. (Tanielu 7:27) A tino muamua ke filifili ko apositolo fakamaoni a Iesu. Ne tumau eiloa a Ieova i te filifiliga o tāgata mo fāfine fakamaoni e pelā me ne tino tapu ke oko mai eiloa ki aso nei. E pelā mo Iesu, e toe‵tu aka latou i se foitino faka-te-agaga.​—Faitau te Ioane 14:1-3; 1 Kolinito 15:42-44.

E tokofia a tino e olo ki te lagi? Ne taku ne Iesu a latou ki se “lafu mamoe foliki.” (Luka 12:32) E toko 144,000 te lotou aofaki. Ka pule fakatasi latou mo Iesu ki te lalolagi.​—Faitau te Fakaasiga 14:1.

4. Se a te mea ne tupu i te kamataga o te pulega a Iesu?

Ne kamata o pule mai a te Malo o te Atua i te 1914.a A te mea muamua ne fai ne Iesu e pelā me ko te Tupu ko te ‵peiifoga o Satani mo ana temoni ki te lalolagi. Ne kaitaua malosi a Satani kae ne kamata o faka‵tupu ne ia a fakalavelave i te lalolagi kātoa. (Fakaasiga 12:7-10, 12) Talu mai te taimi tenā, ne gasolo aka eiloa o ma‵sei atu a fakalavelave o tino. Ko taua, ogegā meakai, masaki ‵pisi, mo mafuie, ko vaega katoa o te “fakailoga” me ko pili o pule katoatoa mai a te Malo ki faifaiga i te lalolagi.​—Faitau te Luka 21:7, 10, 11, 31.

5. Ne a mea ko fakataunu ne te Malo o te Atua?

E auala i te galuega talai i te lalolagi kātoa, ko oti eiloa ne fai ne te Malo o te Atua se vaitino tokouke o tino mai atufenua katoa ke ‵nofo fealofani. E lau i miliona o tino loto maulalo ko ‵lago atu ki a Iesu. Ka puipui ne te Malo o te Atua a latou māfai ko fakaseai atu a te olaga masei tenei i te lalolagi. Tela la, ko latou kolā e ma‵nako ke maua a mea aoga mai te Malo o te Atua e ‵tau o fakamasani ke fai mo tino faka‵logo ki a Iesu.​—Faitau te Fakaasiga 7:9, 14, 16, 17.

I te vaitaimi o te afe tausaga, ka fakataunu ne te Malo a te fuafuaga muamua a te Atua mō tino. Ka fai a te lalolagi kātoa mo fai te palataiso. Kae fakamuli loa, ka toe fakafoki atu ne Iesu a te Malo ki tena Tamana. (1 Kolinito 15:24-26) E mata, e isi se tino e fia fakaasi atu ne koe ki ei a mea e uiga ki te Malo o te Atua?​—Faitau te Salamo 37:10, 11, 29.