Ne a Mea e Fai Nei ne te Atua?

“Te Aliki [ko Ieova], ai a ko faka‵mao ei koe keatea? Ai a e fakagalo ei koe i taimi e puapuagatia ei matou?”a​—SALAMO 10:1.

ATE onoono fakavave atu fua ki ulutala o tala e fakamautinoa mai i ei me ko ola tatou i ‘taimi o puapuaga.’ Kafai ko oko mai se fakalavelave faigata ki te kāiga​—māfai ko pokotia eiloa tatou i amioga solitulafono, se fakalavelave tupu fakafuasei, io me ko te mate o se tino pele—⁠e mafai o fesili ifo tatou penei, E mata, e lavea mai ne te Atua? E mata, e atafai mai a ia? E mata, e ola eiloa a ia?

Kae e mafaufau koe me e mafai o fakavae ‵tou fakamoemoega e uiga ki te Atua ki se manatu ‵se? Ke fai se fakatusaga: Mafaufau la ki se tamā tamaliki telā ko se fiafia me ko fano tena tamana ki te galuega. E se sologa te tamaliki i te galo o tena tamana kae e olioli eiloa ke na vau tou tagata ki te fale. E mafaufau te tamaliki me ko tuku tiaki a ia. I te aso kātoa, e fesili atu faeloa a ia, “Tefea Papa?”

E mafai eiloa o lavea atu ne tatou se mea ‵se i mafaufauga o te tamaliki tenā. I te taimi eiloa tenā, e galue tena tamana ke tausi atu ki te kāiga kātoa. E mata, e mafai o ‵se foki tatou māfai ko ‵tagi atu tatou, “Tefea te Atua”?

E pelā mo nisi tino e ma‵nako ke fai te Atua mo fai se tino tatino ke fakaoko fakavave atu ne ia a te fakasalaga ki te tino fai mea ‵se. E ‵kilo atu a nisi tino ki te Atua e pelā me e tai sili atu i a Santa Claus telā e tuku mai ne ia a meaalofa​—se galuega, se avaga, io me ke manumalo i te tafaoga ko te lottery.

A kilokiloga konā e lua e fakaasi mai i ei me kafai e se fakaoko fakavave mai ne te Atua te fakamasinoga tonu io me e se tuku mai ne ia a te mea telā e akai atu tatou ki ei, ko tena uiga, e se fia saga mai a ia ki ‵tou logo‵maega kae e se iloa foki ne ia ‵tou manakoga. Kae e seai eiloa se mea e ‵mao atu mai i te munatonu! A te manatu tonu, me i te taimi eiloa tenei, e galue a Ieova te Atua ke tausi mai ki te kāiga kātoa o tino, kae e se ko te auala telā e akai atu ei a tino e tokouke.

Kae, ne a la a mea e fai ne te Atua? Ke tali aka a te fesili tenā, e ‵tau o toe onoono tatou ki te kamataga eiloa o te olaga o tino i te taimi ne fakamasei ei a te fesokotakiga o tino mo te Atua​—kae ko se mafai o faka‵lei aka.

Te Fakamaseiga Telā ne Iku Mai i te Agasala

Mafaufau la ki se fale telā e fai pelā me se fakamalumalu i tausaga e uke. Ko ‵koko a te tuafale, ko ‵to a mataloa, kae ko oti ne fakamaseigina valevale a te koga i loto. I te taimi e tasi, ne gali ‵ki eiloa te tulaga o te fale​—kae ko se toe fai penā. A te mafaufau ki te lasi o te fakamaseiga ko oti ne fai, ka se faigofie te galuega e fai ki te fakafouga; ka se mafai fua o fai te mea tenā i te po.

Nei la, ke mafaufau ki te fakamaseiga telā ne tupu ki tino i se 6,000 tausaga ko ‵teka i te taimi ne faka‵segina ei ne se agaga sē matea, ko Satani, a Atamu mo Eva ke ‵teke atu ki te Atua. A koi tuai o tupu te mea tenā, ne maua ne te tauavaga muamua a te malosi ‵lei katoatoa mo te fakamoemoega ke ola ki te se-gata-mai fakatasi mo lā tamaliki. (Kenese 1:28) Kae i te taimi ne agasala ei lāua, ne fai pelā me ne fakamasei ne Atamu mo Eva a te kāiga kātoa o tino kolā e seki fa‵nau mai.

Ke mo a ma manatu ma‵mā ki te fakamaseiga telā ne iku mai i te ‵tekeatuga tenā. E fai mai te Tusi Tapu: “Ne oko mai te agasala ki te lalolagi i te tagata e tokotasi, ne aumai foki ne tena agasala te mate.” (Loma 5:12) I tafa o te fakaokomaiga o te mate, ne fakamasei ne te agasala a ‵tou fesokotakiga mo te ‵tou Mafuaga kae ne pokotia i ei tatou i te feitu faka-te-foitino, faka-te-mafaufau, mo mea tau lagonaga. Ne iku atu i ei ki te fai o ‵tou tulaga e pelā me se fale telā ko masei valevale. Ne fakatoetoe aka ne te tagata amiotonu ko Iopu a ‵tou tulaga i te taimi ne fai mai ei me i te tagata ‘e ola katoa i te olaga toetoe tenei, kae ‵fonu i fakalavelave.’​—Iopu 14:1.

Kae e mata, ne tiakina ne te Atua a tino mai tua o te agasala a Atamu mo Eva? Ikai, e se penā loa! A te ‵tonuga loa, mai i te taimi tenā ke oko mai ki aso nei, e galue faeloa a te ‵tou Tamana faka-te-lagi mō te ‵lei o te kāiga o tino. Ke malamalama faka‵lei tatou i mea e fai ne ia mō tatou, mafaufau ki mea e tolu kolā e manakogina ke toe fakafou aka ei se fale mo te auala e fetaui ei a mea takitasi konei ki mea ko oti ne fai ne te Atua ke toe faka‵fou aka ei a tino.

1 Mai tua o te iloiloga o se fale ko masei, e ‵tau o fakaiku aka ne te tino e o ia te fale me e ‵tau o toe fakafou io me e ofa ki lalo a te fale.

Mai tua malie eiloa o te ‵tekeatuga i Etena, ne faka‵pula atu ne Ieova te Atua tena fuafuaga ke toe fakafou a tino. Ne fai atu a ia ki se agaga sē matea telā ne fakamalosi aka ne ia te ‵tekeatuga tenā: “Ka fai ne au koulua mo te fafine ke fai fili; a tau fanau mo tena fanau ka fai fili faeloa. Ka tuki pala ne te fanau a te fafine a tou ulu, kae ka u ne koe [tena] vae.”​—Kenese 3:15.

Mai i pati konā, ne tauto mai a Ieova ke fakaseai atu a te tino telā ne takitaki ne ia a te ‵tekeatuga i Etena. (Loma 16:20; Fakaasiga 12:9) E se gata i ei, ne ‵valo mai ne Ieova me ka fakasaoloto ne se “fanau” i aso mai mua a tino mai i te agasala.b (1 Ioane 3:8) Ne fakaasi faka‵sau mai eiloa i folafolaga konā a mea kolā ka fai ne Ieova: Ka faka‵lei aka ne te Atua ana mea ne faite, kae e se ofa ki lalo. Kae e manakogina a taimi e lava ke toe fakafou aka ei a tino.

2 E fakatoka ne se tino fakatutu fale se ata telā e fakaasi faka‵lei mai i ei a mea ka fai i te galuega ko te fakafouga o te fale.

Ne tuku atu ne Ieova te Atua ki te kau Isalaelu se fakasologa o tulafono kae ‵lomi te ata o se faletapu telā ka tapuaki atu latou i ei. E fai mai te Tusi Tapu: “A mea nei ne ata fua o mea ka oko mai, ka ko te mea tonu ko Keliso.” (Kolose 2:17) E pelā mo te ata o te fale, e sui ne latou a mea kolā e sili atu.

E pelā mo te ofoatuga ne te kau Isalaelu a taulaga manu ke fakamagalo ei a agasala. (Levitiko 17:11) Ne fakaata mai i te faifaiga tenā se taulaga e sili atu telā ka ofo atu i te fia o senitenali mai tua ifo​—se taulaga telā ka tuku mai i ei a te fakasaolotoga tonu.c A te ata o te faleie tapu mo te faletapu telā ne tapuaki atu i ei a te kau Isalaelu ne fakaata mai i ei a mea kolā ne ‵tau o fai ne te Mesia i aso mai mua, mai i tena mate e pelā me se taulaga ke oko eiloa ki tena fanakaga ki te lagi.​—Ke onoono ki te ata i te itulau e 7.

3 E filifili aka se tino fakatūtū telā ka tautali atu ki te ata kae fakafou foki ne ia te fale.

A Iesu ko te Mesia telā ne folafola mai me ka tautali ki te ata ne tuku mai ne taulaga a te kau Isalaelu kae tuku mai foki tena ola ke fakasaoloto ei a tino. A te ‵tonuga loa, ne taku ne Ioane te Papatiso a Iesu ko “te Tamā Mamoe a te Atua ka ave ne ia keatea agasala a te lalolagi.” (Ioane 1:29) Ne talia mo te loto fiafia ne Iesu a te tofiga tenā. Ne fai mai a ia: “Me i a au ne seki fanaifo mai te lagi o fai te mea e loto eiloa au ki ei, kae ne fanaifo au o fai te mea e loto ki ei te tino telā ne uga mai ne ia au.”​—Ioane 6:38.

Ne seki aofia fua i te loto o te Atua mō Iesu a te ‘tuku atu o tena ola mō tino e tokouke’ kae ke fai foki se feagaiga mo ana soko e uiga ki se Malo. (Mataio 20:28; Luka 22:29, 30) A te Malo tenā ko te auala telā ka fakataunu ei ne te Atua tena fuafuaga mō tino. A te fekau e uiga ki te Malo o te Atua e taku ki “te tala ‵lei” me e fakamatala mai i ei a te fakatuakaga ne te Atua o se pulega i te lagi ke pule mai ki mea katoa i te lalolagi!​—Mataio 24:14; Tanielu 2:44.d

E Tumau Eiloa te Faiga o te Fakafouga o Mea

A koi tuai o fanaka a ia ki te lagi, ne fakatonu atu a Iesu ki ana soko: “Olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama, mo te agaga tapu. . . . Kiloke! Au e fakatasi faeloa mo koutou, ke oko eiloa ki te gataga o te lalolagi.”​—Mataio 28:19, 20.

Tela la, a te fakafouga o tino e seki gata atu fua i te mate o Iesu. Ka tumau eiloa ke oko ki te vaitaimi o “te gataga o te lalolagi”​—ko te taimi telā ka kamata ei o pule katoatoa mai a te Malo o te Atua ki te ‵tou lalolagi nei. Ko oko mai eiloa nei te taimi tenā. E iloa ne tatou a te mea tenei me ko oti ne fakataunu a te fakailoga telā ne ‵valo mai ne Iesu e uiga ki “te gataga o te lalolagi.”e​—Mataio 24:3-14; Luka 21:7-11; 2 Timoteo 3:1-5.

I aso nei, i fenua e 236, e faka‵logo eiloa a Molimau a Ieova ki te fakatonuga a Iesu ke talai atu a te tala ‵lei o te Malo o te Atua. A te ‵tonuga loa, a te mekesini tenei e faitau koe ki ei, ne fakatoka ke fesoasoani atu ki a koe ke tauloto ki mea e uke atu e uiga ki te Malo tenā mo mea ka fai ne ia. I te itulau e 2 o lomiga takitasi o Te Faleleoleo Maluga, ka maua atu ne koe i ei a te fakamatalaga tenei: “Te mekesini tenei . . . e fakamafanafana atu ne ia a tino ki te tala ‵lei e uiga ki te Malo o te Atua, se pulega tonu i te lagi, telā ka pili o fakagata ne ia a amioga matagā katoa kae ‵fuli ne ia te lalolagi mo fai se palataiso. E fakamalosi atu ei te fakatuanaki ki a Iesu Keliso, telā ne mate ko te mea ke maua ne tatou te ola se-gata-mai kae telā ko pule mai nei e pelā me ko te Tupu o te Malo o te Atua.”

E tonu, nei la, koi lagona eiloa ne koe a osomaiga a tagata amio takafia‵toa io me ko fakalavelave ‵tupu, io me kāti e fepaki koe mo se fakalavelave totino. Kae ka fakatalitonu atu ki a koe a te sukesuke ki te Tusi Tapu me e seki tiakina ne te Atua a tino. E ‵kese mai i ei, me i a “ia foki e se ‵mao mai i a tatou taki tokotasi.” (Galuega 17:27) Kae ka manuia eiloa tena folafolaga ke toe fakafoki mai a mea ne ‵galo i ‵tou mātua muamua.​—Isaia 55:11.

[Fakamatalaga fakaopoopo]

[Ata i te itulau e 7]

“Se Fakatusa Fua O Te Mea Tonu”​—Mea Kolā ne Fakaata Mai i te Faleie Tapu

TE FATAFAITAULAGA

Ko te loto fiafia o te Atua ke talia ne ia te taulaga a Iesu.​—EPELU 13:10-12.

TE FAITAULAGA PULE

Iesu.​—EPELU 9:11.

1 I te Aso o te Faka‵maga, e ofo atu ne te faitaulaga pule se taulaga mō agasala a tino.​—LEVITIKO 16:15, 29-31.

1 I a Nisani po 14, i te 33 T.A., ne ofo atu ei ne Iesu tena ola mō tatou.​—EPELU 10:5-10; 1 IOANE 2:1, 2.

TE POTU TAPU

Ko te tulaga o Iesu e pelā me se tino faka-te-agaga.​—MATAIO 3:16, 17; LOMA 8:14-17; EPELU 5:4-6.

TE ‵PUI LAUGATU

A te foitino o Iesu, ko te ‵pui telā ne ‵vae keatea ei a te ola i te lalolagi mo te ola i te lagi.​—1 KOLINITO 15:44, 50; EPELU 6:19, 20; 10:19, 20.

2 E fanatu a te faitaulaga pule ki te suā feitu o te ‵pui laugatu telā e ‵vae ne ia a te Potu Tapu mai te Potu Tafasili i te Tapu.

2 Mai tua o tena toetuga, ne ‘ulu atu a ia ki te suā feitu o te ‵pui laugatu’ mai te fanakaga ki te lagi ke “fai mo sui o tatou i mua o te Atua.”​—EPELU 9:24-28.

TE POTU TAFASILI I TE TAPU

Te Lagi.​—EPELU 9:24.

3 Kafai ko ulu fakatasi atu ki loto i te Potu Tafasili i te Tapu, e ‵ligi atu ne te faitaulaga pule a nai toto mai te taulaga ki luga i te pusa o te feagaiga.​—LEVITIKO 16:12-14.

3 Mai te ofoatuga o tena toto tāua telā ne maligi, ne mafai ei ne Iesu o faka‵ma tonu ‵tou agasala.​—EPELU 9:12, 24; 1 PETELU 3:21, 22.