Ke Fakaasi Atu te Āva ki ‵Tou Maopoopoga ‵Malu
“Ka aumai ne au koutou ki Siona, toku mauga tapu, ka avatu ne au te fiafia ki a koutou i loto i toku fale ‵talo.”—ISAIA 56:7.
1. Ne a pogai faka-te-Tusi Tapu e maua ne tatou mō te fakaasiatuga o te āva ‵tau ki ‵tou fakatasiga?
NE FAKAMAOPOOPO ne Ieova ana tino, Kelisiano fakaekegina mo olotou taugasoa, ke tapuaki atu ki a ia i tena “mauga tapu.” E fai ne ia ke fia‵fia latou i loto i tena “fale ‵talo,” ko tena faletapu faka-te-agaga, telā “se fale ‵talo mō tino o fenua katoa.” (Isaia 56:7; Maleko 11:17) E fakaasi mai ne mea konei me i te tapuakiga ki a Ieova e tapu, e ‵mā, kae maluga foki. Mai te fakaasi atu o te āva ‵tau ki ‵tou fakatasiga mō sukesukega mo te tapuakiga, e fakamaoni atu ei me e ‵pau ‵tou kilokiloga mo te kilokiloga a Ieova ki mea ‵malu.
2. Ne a mea e fakaasi mai me e faka‵malu ne Ieova te koga telā ne filifili aka ne ia mō tena tapuakiga, kae ne fakaasi atu pefea ne Iesu me e penā foki a ia?
2 I Isalaelu mua, ne fai te koga telā ne filifili aka ne Ieova mō tapuakiga mo fai se koga ‵malu. Ne ‵tau o ‵mili ki te sinu a te faleie tapu mo mea fai fale i ei kae faka‵malugina ko te mea ke “tapu katoatoa ei a mea konā.” (Esoto 30:26-29) Ne taku a potu e lua i te faletapu ki “te Potu Tapu” mo “te Potu e Sili i te Tapu.” (Epelu 9:2, 3) Ne sui fakamuli te faleie tapu ne te faletapu i Ielusalema. E pelā me ko te fakavae o te tapuakiga ki a Ieova, ne taku foki a Ielusalema ki “te fa‵kai tapu.” (Neemia 11:1; Mataio 27:53) I tena taviniga i te lalolagi nei, ne fakaasi atu eiloa ne Iesu te āva ‵tau ki te faletapu. Ne kaitaua a ia ki tino mō te fakaaogāga ne latou o te faletapu i se auala sē āva mai te faiga pelā me se fale faipisinisi mo se auala ke olo atu ei ki te suā feitu o Ielusalema.—Maleko 11:15, 16.
3. Se a te mea e fakaasi mai i te ‵malu o maopoopoga a te kau Isalaelu?
3 Ne maopoopo faeloa te kau Isalaelu ke tapuaki atu ki a Ieova kae ke fakalogo‵logo foki ki te faitauga o tena Tulafono. Ne taku a nisi aso o olotou ‵kaiga fiafia ki fono ‵malu io me ne tamā fono tāua, telā e fakaasi mai i ei te ‵malu o vaegā maopoopoga konei. (Levitiko 23:2, 3, 36, 37) I se maopoopoga mō tino katoa i aso o Esela mo Neemia, “ne fakamalamalama ki a latou a te Tulafono ne te kau sa Levi.” Ona ko te mea “ne ‵tagi . . . latou me ko oko eiloa i te otia o olotou loto,” ne fakatonu atu ei te kau sa Levi “ki tino o te fenua penei, ‘A te aso nei se aso e ‵malu . . . tela la, e se ‵tau koutou o ‵tagi fanoanoa.’ ” Tela la, ne fakamanatu ei ne te kau Isalaelu a te ‵Kaiga Fiafia tenā i aso e fitu mo ‘te fiafia lasi.’ E se gata i ei, “ne faitau ne latou a vaega o te Tulafono a te Atua i aso taki tasi, mai i te aso muamua o te ‵kaiga fiafia ke oko eiloa ki te ‵toe aso. Ne fakamanatu ne latou a te ‵kaiga fiafia tenā i aso e fitu, kae i te valu o aso ne fai ei a te fakafiafiaga fakaoti, e pelā eiloa mo te mea e manakogia i te Tulafono.” (Neemia 8:7-11, 17, 18) E ‵malu eiloa a maopoopoga konei telā e ‵tau o fakaasi atu ei te āva ne tino kolā ne ‵kau atu ki ei.
‵Tou Fakatasiga ne Maopoopoga ‵Malu
4, 5. Ne a vaega o ‵tou fakatasiga kolā e fakamaoni mai i ei a te ‵malu o maopoopoga konā?
4 E tonu, e seai se fa‵kai ‵malu tonu o Ieova i te lalolagi i aso nei, mo se faletapu fakapito telā ne fakaaogā katoatoa ki tena tapuakiga. E se gata i ei, e se ‵tau eiloa o puli i a tatou a te manatu me i fakatasiga mō te tapuakiga ki a Ieova ne maopoopoga ‵malu. E maopoopo tatou fakatolu i te vaiaso ke fai‵tau kae sukesuke ki te Tusi Tapu. E “faitau” atu te Muna a Ieova, e pelā eiloa mo aso o Neemia, kae “fakamalamalama atu foki.” (Neemia 8:8) E kamata kae fakaoti ‵tou fakatasiga katoa ki se ‵talo, kae i te ukega o taimi, e usu atu foki ne tatou a pese o tavaega ki a Ieova. (Salamo 26:12) E fai ‵tonu eiloa a fakatasiga a te fakapotopotoga mo fai se vaega o ‵tou tapuakiga kae e ‵tau o fakaasi atu ne tatou se kilokiloga ‵tau kae āva ki ei.
5 E fakamanuia ne Ieova ana tino māfai ko maopoopo fakatasi latou ke tapuaki atu ki a ia, sukesuke ki tena Muna, kae ke ‵kau fakatasi foki mo taina Kelisiano. Kafai ko oko ki te taimi o te fakatasiga, e mafai eiloa o tali‵tonu tatou me tenā eiloa te koga telā “ne tauto ei te Aliki [ko Ieova] ke tuku i ei tena fakamanuiaga.” (Salamo 133:1, 3) E maua ne tatou te fakamanuiaga tenā māfai e ‵kau kae fakalogo‵logo faka‵lei tatou ki te polokalame faka-te-agaga. E se gata i ei, ne fai mai Iesu: “Me so se koga e fakapotopoto ei se tokolua, io me se tokotolu i toku igoa, e iai foki au i konā.” E fakasino atu eiloa te mataupu kātoa tenā ki fono a te kau toeaina Kelisiano ke faka‵lei aka a fakalavelave faiga‵ta i vā o tino, kae e mafai foki loa o fakasino atu te manatu fakavae i ei ki ‵tou fakatasiga. (Mataio 18:20) Kafai e nofo atu a Keliso, e auala i te agaga tapu, i te taimi e maopoopo fakatasi ei a Kelisiano i tena igoa, e mata, e se ‵tau o faka‵malu ne tatou a vaegā maopoopoga penā?
6. Ne a mea e mafai o fai atu e uiga ki koga e fai ei ‵tou fakatasiga, i maopoopoga ‵lasi mo maopoopoga fo‵liki?
6 E tonu, e se nofo atu Ieova i faletapu ne faite ne tino. E tiga eiloa te feitu tenā, e fai eiloa ‵tou Kingdom Halls mo fai ne koga o te tapuakiga tonu. (Galuega 7:48; 17:24) E maopoopo tatou i konā ke sukesuke ki te Muna a te Atua, ‵talo ki a ia, kae usu atu foki ana tavaega. E penā foki loa ‵tou Fale Fai Fono. Ko koga tai ‵lasi atu kolā e ‵togi mo fai ‵tou fono ‵lasi—e pelā mo maneapa io me ko koga fai tafaoga—e fai mo koga e fai ei a tapuakiga i te taimi e fakaaogā ei mō ‵tou maopoopoga ‵malu. A vaegā taimi penei mō tapuakiga, i maopoopoga ‵lasi mo maopoopoga fo‵liki, e ‵tau eiloa o fakaasi atu ne tatou te āva, kae e ‵tau o lavea atu te mea tenā i ‵tou kilokiloga mo ‵tou amioga.
Auala ke Fakaasi Atu ei te Āva ki ‵Tou Maopoopoga
7. Se a te auala e tasi e mafai ei o fakaasi atu ne tatou te āva ki ‵tou maopoopoga?
7 E isi eiloa ne auala ‵lei e mafai ei ne tatou o fakaasi atu te āva ki ‵tou maopoopoga. A te auala e tasi ko te taumafai ke oko atu ki te usuga o pese o te Malo. Ne fakatoka eiloa a te ukega o pese konei e pelā me ne ‵talo kolā e ‵tau eiloa o usu atu i se auala ‵malu. Mai te siki atu ne ia o te Salamo 22, ne tusi atu te apositolo ko Paulo e uiga ki a Iesu: “Au e faipati ki oku taina e uiga mō koe, e pese atu foki au i pese ki a koe i mua o te fakapotopotoga kātoa.” (Epelu 2:12) Tela la, e ‵tau eiloa o fakamasani tatou ke na saga‵saga i ‵tou nofoga kae koituai o kamata ne te takitaki fono a pati fakatomua ki te pese kae ke mafaufau ‵loto foki ki uiga o pati i te taimi e usu atu ei te pese. Ke na fakaata atu eiloa i te auala e usu atu ei tatou a lagonaga o te faisalamo telā ne tusi mai: “Au e fakafetai ki te Aliki [ko Ieova] mo toku loto katoatoa, i taimi e tapuaki ei ona tino.” (Salamo 111:1) E tonu, a te usu atu o pese tavae ki a Ieova se pogai ‵lei e tasi ke oko vave atu ki ‵tou fakatasiga kae ke ‵nofo atu eiloa i ei ke oko ki te fakaotiga.
8. Se a te fakaakoakoga e fakaasi mai i te Tusi Tapu me e ‵tau o fakaasi atu ne tatou te āva ki ‵talo kolā e fai i ‵tou fakatasiga?
8 A te suā vaega telā e momea aka ei te tāua o ‵tou fakatasiga i te feitu faka-te-agaga ko ‵talo mo te loto kātoa kolā e fai atu mō tino katoa kolā e maopoopo atu i ei. I te taimi e tasi, ne maopoopo fakatasi a Kelisiano i te senitenali muamua i Ielusalema kae “‵talo fakatasi katoa latou ki te Atua.” Ne iku atu i ei ki te lotou tumau—faitalia a fakasauāga—i te “faipati atu ne latou a te muna a te Atua mo te loto toa.” (Galuega 4:24-31) E mata, e mafai o fakaataata i ‵tou mafaufau me ne seki saga tonu atu se tino i a latou kolā ne maopoopo i konā i te faiga o te ‵talo? Ikai, ne “‵talo fakatasi katoa latou.” E fakaata atu i ‵talo kolā ne fai atu i ‵tou fakatasiga a lagonaga ‵loto o tino katoa i konā. E ‵tau eiloa o fakaasi atu ne tatou te āva ki ei.
9. E mafai pefea o fakaasi atu ne tatou te āva ki te ‵malu o ‵tou maopoopoga e auala i ‵tou gatu mo ‵tou amioga?
9 E se gata i ei, e mafai foki o fakaasi atu ne tatou te lasi o ‵tou āva ki te ‵malu o ‵tou maopoopoga e auala i ‵tou gatu. E mafai eiloa o fesoasoani atu ‵tou foliga e auala i ‵tou gatu mo teuga i ‵tou ulu ki te ‵malu o ‵tou fakatasiga. Ne polopoloki mai te apositolo ko Paulo: “Au e manako ki tāgata katoa i so se koga ke ‵talo, ko latou kolā ko tuku katoatoa atu olotou loto ki te Atua, kolā e mafai ne latou o sisi ake olotou lima o ‵talo, ko te fakaasiga tenā o te tuku atu katoatoa o te loto ki te Atua e aunoa mo te ita io me ko te kinau. Au e manako foki ki fāfine ke teuteu faka‵lei, kae ke mafaufau faka‵lei ki feitu e uiga ki gatu e ‵pei ei latou, ka ke fai faka‵lei eiloa olotou gatu. Ke se teu fakagaligali olotou ulu, io me fakamau ne teuga aulo, io me ne teuga penina, io me fakaaogā ne gatu ‵togi ‵mafa, ka ke teu olotou foitino ki te amio ‵lei, tenā te teuga tonu telā e mafai o takua ei latou me ne fāfine ‵lotu.” (1 Timoteo 2:8-10) Kafai ko olo atu tatou ki fono ‵lasi kolā e fai i koga fai tafaoga, e mafai eiloa o fakafetaui aka ‵tou gatu ki te tau o te aso kae koi mata ‵malu foki eiloa. E se gata i ei, ka fai foki tatou ne te āva ki maopoopoga penei ke ‵kalo keatea tatou mai te kai mo te lamu pulu i te taimi o te polokalame. E fakaaloalo atu eiloa a gatu mo amioga ‵lei i ‵tou maopoopoga ki a Ieova te Atua, tena tapuakiga, mo ‵tou taina tapuaki.
Amioga Kolā e Fetaui ‵Lei ki te Kaukāiga o te Atua
10. Ne fakaasi mai pefea ne te apositolo ko Paulo me e manakogina a amioga tafasili i te ‵lei i ‵tou fakatasiga Kelisiano?
10 I te 1 Kolinito, mataupu e 14, e maua ne tatou a pati fakatonutonu ‵poto a te apositolo ko Paulo ki te auala e ‵tau o fai ei a fakatasiga Kelisiano. Ne fakaoti ne ia ana muna penei: “Ke fai a mea katoa ke fanofano ‵lei kae gali i taimi o tapuakiga.” (1 Kolinito 14:40) A ‵tou fakatasiga se vaega tāua o faifaiga a te fakapotopotoga Kelisiano, kae e manakogina i ei a amioga kolā e fetaui ‵lei ki te kaukāiga o Ieova.
11, 12. (a) Se a te mea e ‵tau o faka‵mafa atu ki mafaufau o tama‵liki kolā e ‵kau atu ki ‵tou fakatasiga? (e) Ne a auala ‵lei e mafai ei ne tama‵liki o fakaasi atu te lotou fakatuanaki i ‵tou fakatasiga?
11 Kae maise eiloa, tama‵liki, e ‵tau o akoako ke ‵nofo filemu i ‵tou fakatasiga. E ‵tau o fakamatala atu ne mātua Kelisiano ki olotou tama‵liki me i te Kingdom Hall mo te koga e fai ei te Sukesukega a te Fakapotopotoga i Potukau, e se ne koga ta‵fao, kae ne koga e tapuaki atu ei tatou ki a Ieova kae sukesuke ki tena Muna. Ne tusi mai te Tupu poto ko Solomona: “Fakaeteete manafai ko ulu koe ki loto i te Faletapu. E sili atu te fano ki te Faletapu o tauloto.” (Failauga 5:1) Ne akoako ne Mose te kau Isalaelu ke fakamaopoopo fakatasi aka a tino ma‵tua mo “tama‵liki.” Ne fai atu a ia: “Ka‵laga atu ki tāgata, fāfine mo tama‵liki katoa . . . ko te mea ke lagona ne tino katoa kae ke iloa foki ne latou o fakaaloalo ki te Aliki [ko Ieova] te otou Atua kae faka‵logo mo te fakamaoni ki ana akoakoga. I te faiga tenā, ka lagona ei te Tulafono a [Ieova] te otou Atua ne otou tino kolā e seki lagona eiloa ne latou. Tena la, ka mafai ei latou o faka‵logo ki a [Ieova].”—Teutelonome 31:12, 13.
12 E penā foki loa i aso nei, a te pogai tāua e ‵kau atu ‵tou tama‵liki mo olotou mātua ki fakatasiga ko te mea ke lagona kae ke iloa foki ne latou. Kafai ko mafai o ‵saga tonu atu latou ki te polokalame kae ko malamalama foki i muna‵tonu fakavae i te Tusi Tapu, e mafai eiloa ne tama‵liki o ‘molimau atu’ ki te lotou fakatuanaki mai te faiga o tali toe‵toe. (Loma 10:10) E mafai eiloa o kamata ne se tamaliki te faiga o ana tali ki nāi pati i te tali atu ki se fesili telā e malamalama a ia i ei. Muamua la, e mafai o faitau atu ne ia te tali, kae fakamuli loa, ka taumafai eiloa a ia ke fakaasi atu ana tali i ana pati eiloa. E aogā eiloa te mea tenei kae e fakafiafia atu ki te tamaliki, kae ko fakaasiga penā o te fakatuanaki e fakafiafia atu foki ki tino ma‵tua i konā. E masani eiloa o fai ne mātua se fakaakoakoga ‵lei mai i te faiga foki olotou tali. Se mea ‵lei foki ke mafai o maua ne tama‵liki olotou kopi totino o te Tusi Tapu, te tusi pese, mo se kopi o te tusi telā e sukesuke ki ei. E ‵tau o fakaakoako latou ke fakaasi atu te āva ‵tau ki vaegā tusi penā. Ka faka‵mafa atu eiloa a faifaiga katoa konei ki mafaufauga o tama‵liki me i ‵tou fakatasiga ne maopoopoga ‵malu.
13. Se a te ‵tou fakamoemoega e uiga ki tino kolā e ‵kau atu ki ‵tou fakatasiga mō te taimi muamua?
13 E tonu, e se ma‵nako tatou ke fai ‵tou fakatasiga e pelā mo lotu i Lotu Kelisiano ‵Se. E mafai o fai valevale a lotu konei io me tō faka‵malu io me ko tō logoā e pelā mo koniseti usuusu. E ma‵nako eiloa tatou ke maua atu se lagonaga alofa kae fealofani i fakatasiga i ‵tou Kingdom Halls kae ke se fakaakoako atu ki maopoopoga kolā e fai ne tino i ‵tou tafa. E maopoopo tatou ke tapuaki atu ki a Ieova, tela la, e ‵tau faeloa o mata ‵malu ‵tou fakatasiga. Kafai ko oti ne fakalogo‵logo tatou ki mataupu kolā e fakamatala mai i ei mo te tausi faka‵lei atu ki ‵tou tama‵liki, e ma‵nako eiloa tatou ke fai atu a tino kolā e ‵kau atu mō te taimi muamua, penei: “E tonu eiloa i te Atua e i konei i a koutou!”—1 Kolinito 14:25.
Se Vaega Tumau o ‵Tou Tapuakiga
14, 15. (a) E mafai pefea o ‵kalo keatea tatou mai te ‘fakapuli atu o te fale o te ‵tou Atua’? (e) Ne fakataunu pefea te Isaia 66:23?
14 E pelā mo te mea ne taku atu muamua, e fakamaopoopo ne Ieova ana tino kae fai ne ia ke fia‵fia latou i loto i tena “fale ‵talo,” ko tena faletapu faka-te-agaga. (Isaia 56:7) Ne fakamasaua atu te tagata fakamaoni ko Neemia ki ana taina Isalaelu me e ‵tau o fakaasi atu ne latou te āva ‵tau ki te faletapu mai te ‵lago atu ki ei i mea tau tupe. Ne fai atu a ia: “E se mafai o fakapuli ne matou a te Fale o te motou Atua.” (Neemia 10:39) E se gata i ei, e se ‵tau o fakata‵mala tatou ke talia te ‵kamiga a Ieova ke tapuaki atu ki a ia i loto i tena “fale ‵talo.”
15 I te fakaasi atu o te manakoga ke tumau faeloa i te maopoopo fakatasi ke tapuaki atu, ne ‵valo mai penei a Isaia: “I ‵Kaiga Fia‵fia katoa o te Masina Tu, pelā foki i Sapati katoa, a tino o malo katoa ka o‵mai o tapuaki mai ki a au i Ielusalema.” (Isaia 66:23) Ko taunu eiloa te mea tenei i aso nei. E tumau eiloa a Kelisiano tukugina atu i te maopoopo fakatasi ke tapuaki atu ki a Ieova i vaiaso katoa o masina katoa. E fai eiloa ne latou te mea tenei mai te ‵kau atu ki fakatasiga Kelisiano mo te galuega talai, i tafa o nisi mea kolā e fai sāle. E mata, e aofia koe i a latou kolā e tumau i te ‘olo atu o tapuaki atu ki a Ieova’?
16. Kaia e ‵tau ei o fai te ‵kau atu faeloa ki fakatasiga mo fai se vaega tumau o ‵tou olaga nei?
16 Ka fakataunu katoatoa te Isaia 66:23 ki te olaga i te lalolagi fou telā ne folafola mai ne Ieova. I te taimi tenā, “ka o‵mai o tapuaki” ki a Ieova a ‘tino katoa’ i vaiaso mo masina katoa ke oko eiloa ki te se-gata-mai. Ona ko te mea ka fai a fakatasiga ke tapuaki atu ki a Ieova mo fai se vaega tumau o ‵tou olaga faka-te-agaga i te fakanofonofoga fou, e mata, e se ‵tau o fai ‵tou ‵kau atu faeloa ki ‵tou maopoopoga ‵malu mo fai se vaega tumau o ‵tou olaga i aso nei?
17. Kaia e manakogina malosi ei ne tatou a ‵tou fakatasiga ona ko te ‘iloaga ne tatou i te Aso o te Aliki ko pili mai’?
17 Ona ko te pili mai o te gataga, e ‵tau o momea aka ‵tou loto finafinau i lō aso mua ke na ‵kau atu faeloa ki maopoopoga Kelisiano mō tapuakiga. Ona ko te āva ki te ‵malu o ‵tou fakatasiga, e se talia ne tatou a galuega ‵togi, mea a‵koga, io me ko nisi akoga i afiafi ke taofi aka ei te ‵tou tumau i te ‵kau atu ki fakatasiga mo ‵tou taina tali‵tonu. E ‵tau o maua ne tatou te malosi e auala i ‵tou ‵kau fakatasi. E tuku mai ne fakatasiga a ‵tou fakapotopotoga a te avanoaga ke momea aka te iloa ne tatou o nisi tino, ke tuku atu a fakamalosiga, kae ke fakatau fesoasoani foki o fakaasi atu “te alofa mo te fai mea ‵lei.” “A te mea sili ke fakatau fakamalosi eiloa ne tatou o‵tou loto; i te mea ko iloa ne [tatou] i te Aso o te Aliki ko pili mai.” (Epelu 10:24, 25) Tela la, ke na fakaasi atu faeloa ne tatou te āva ‵tau ki ‵tou maopoopoga ‵malu e auala i te ‵kau atu faeloa, te fai faka‵leiga o gatu, mo amioga ‵lei. Kafai e fai tatou penā, e fakaasi atu ei ne tatou me e ‵pau ‵tou kilokiloga mo te kilokiloga a Ieova ki mea kolā e ‵malu.
Manatu ke Toe Mafau‵fau ki ei
• Ne a mea e fakaasi mai me e ‵tau o ‵malu a maopoopoga a tino o Ieova?
• Ne a vaega o ‵tou fakatasiga kolā e fakamaoni mai i ei me e ‵malu a maopoopoga konā?
• E mafai pefea ne tama‵liki o fakaasi atu me e āva latou ki te ‵malu o ‵tou fakatasiga?
• Kaia e ‵tau ei o fai te tumau i te ‵kau atu ki fakatasiga mo fai se vaega tumau o ‵tou olaga?
[Ata i te itulau e 24]
A fakatasiga ke tapuaki atu ki a Ieova ne maopoopoga ‵malu i so se koga e fai ei
[Ata i te itulau e 25]
E ‵kau atu ‵tou tama‵liki ki fakatasiga ke fakalogo‵logo kae tauloto