Te Akoakoga o Faifeau Talai o te Malo

1-3. Ne fakalauefa aka pefea ne Iesu te faiga o te galuega talai, kae ne a fesili ne ‵sae aka i ei?

NE TALAI atu a Iesu i tausaga e lua i Kalilaia kātoa. (Faitau te Mataio 9:35-38.) Ne āsi atu a ia ki fa‵kai ‵lasi mo fa‵kai fo‵liki e uke, akoako atu i sunako kae talai atu te tala ‵lei o te Malo. I so se koga ne talai atu ei a ia, ne ua‵lolo atu se vaitino ki a ia. Ne lavea ne Iesu me “e uke a fuataga e ‵tau o tau,” kae ne manakogina i ei a tino ga‵lue e tokouke atu.

² Ne fakatoka ne Iesu ke fakalauefa atu te galuega talai. E pefea la? Mai te ugaatuga o ana apositolo e toko 12 “ke olo o talai a te Malo o te Atua.” (Luka 9:1, 2) Kāti e isi ne fesili a te kau apositolo e uiga ki te auala ke fai ei te galuega tenei. A koi tuai o uga atu latou, ne tuku atu mo te alofa ne Iesu ki a latou se mea telā ne tuku atu ne tena Tamana faka-te-lagi ki a ia​—akoakoga.

³ Ne ‵sae aka ei a nai fesili: Se a te akoakoga ne maua ne Iesu mai tena Tamana? Se a te akoakoga ne tuku atu ne Iesu ki ana apositolo? Kae e a i aso nei​—e mata, ne akoako ne te Tupu faka-Mesia ana soko ke fai te lotou galuega? Kafai e penā loa, e pefea la?

“Ko Mea Fua Kolā e Akoako Mai ne te Tamana ki a Au e Faipati ne Au”

4. Anafea kae tefea foki te koga ne akoako ei a Iesu ne tena Tamana?

⁴ Ne iloa ‵lei ne Iesu me ne akoako a ia ne tena Tamana. I te faiga o tena galuega, ne fai mai a Iesu: “Kae ko mea fua kolā e akoako mai ne te Tamana ki a au e faipati ne au.” (Ioa. 8:28) Anafea kae tefea foki te koga ne akoakogina ei a Iesu? Ne kamata eiloa tena akoakoga mai tua o tena faitega, te Tama toekimua eiloa a te Atua. (Kol. 1:15) I tafa o tena Tamana i te lagi, ne fakamāumāu ne te Tama a te fia miliona o tausaga ke fakalogologo kae onoono ki te ‵Toe Faiakoga Sili. (Isa. 30:20) Ne iku atu i ei ki te mauaga ne te Tama se akoakoga tafasili i te maluga i uiga, galuega, mo fuafuaga a tena Tamana.

5. Ne a fakatonutonuga ne tuku atu ne te Tamana ki tena Tama e uiga ki te galuega telā e ‵tau o fai ne ia i te lalolagi?

⁵ I tena taimi tonu, ne akoako ne Ieova tena Tama e uiga ki te galuega ka fai ne ia i te lalolagi. Mafaufau ki se valoaga telā ne fakamatala mai i ei a te fesokotakiga o te ‵Toe Faiakoga Sili mo tena Tama toekimua. (Faitau te Isaia 50:4, 5.) Ne ‵fagu aka ne Ieova tena Tama “i taeao katoa,” e fai mai te valoaga. E fakaasi mai i pati konā a te manatu e uiga ki se faiakoga telā e ‵fagu aka ne ia ana tama‵liki akoga i te taeao ke akoako ne ia. E fai mai se fakamatalaga fesoasoani ki te Tusi Tapu: “E fai pelā me e avatu a ia . . . ne Ieova e pelā me se tamaliki akoga, kae akoako atu tou tagata ki mea mo te auala ke talai atu ei a ia.” I te “akoga” tenā i te lagi, ne akoako atu ne Ieova ki tena Tama a “mea kolā e ‵tau o fakailoa atu kae faipati au ki ei.” (Ioa. 12:49) Ne tuku atu foki ne te Tamana ki tena Tama a fakatonutonuga ki te auala ke akoako atu.a I te taimi koi nofo ei i te lalolagi, ne seki fakaaoga faka‵lei fua ne Iesu ana akoakoga ke fai tena galuega kae ke akoako atu foki ana soko ke fakataunu te lotou galuega.

6, 7. (a) Se a te akoakoga ne tuku atu ne Iesu ki ana apositolo, kae se a te mea ne fakatoka ei latou ke fai? (e) Se a te vaegā akoakoga ne fakamautinoa aka ne Iesu ke maua ne ana soko i ‵tou aso nei?

⁶ Se a te akoakoga ne tuku atu ne Iesu ki ana apositolo, e pelā mo te mea ne fakaasi mai i te kamataga? E ‵tusa mo te Mataio mataupu e 10, ne tuku atu ne ia a fakatonutonuga fakapito mō te galuega talai, e aofia i ei a mea konei: te koga ke talai atu i ei (fuaiupu e 5, 6), te fekau ke fakaasi atu (fuaiupu e 7), te manakoga ke fakalagolago ki a Ieova (fuaiupu e 9, 10), te auala ke talai atu ki tino (fuaiupu e 11-13), te auala ke fakafesagai atu ki ‵tekemaiga (fuaiupu e 14, 15), mo te auala ke fakafesagai atu ki fakasauaga (fuaiupu e 16-23).b A te akoakoga manino ne tuku atu ne Iesu ki ana apositolo ne fai ei ke toka ‵lei latou o fai fakavave te galuega ko te talaiatuga o te tala ‵lei i te senitenali muamua T.A.

⁷ Kae e a ‵tou aso nei? A Iesu, te Tupu o te Malo o te Atua, ne tuku atu ne ia a te ‵toe galuega tāua ki ana soko, ko te talai atu “te tala ‵lei tenei o te Malo . . . ki te lalolagi nofoaki kātoa mo fai se molimau ki atufenua katoa.” (Mata. 24:14) E mata, ne akoako ne te Tupu a tatou ke fai a te ‵toe galuega tāua tenei? A te ‵tonuga loa, ao! Mai te lagi, ne fakamautinoa aka ne te Tupu me e maua ne ana soko, a akoakoga ke talai atu ki tino mai tua o te fakapotopotoga mo te auala ke fakataunu a tiute tāua fakapito i te fakapotopotoga.

Te Fakaakoakoga o Faifeau Talai o te Tala ‵Lei

8, 9. (a) Se a te pogai fakavae o te Akoga mō Tino Talai? (e) Ne fesoasoani atu pefea a te fakatasiga i loto i te vaiaso ki a koe?

⁸ Ko leva ne fakaaoga ne te fakapotopotoga a Ieova a tamā fono, fono ‵lasi mo fakatasiga a te fakapotopotoga​—e pelā mo Te Fakatasiga mō te Galuega Talai​—ke fakaakoako ei a tino o te Atua mō te galuega talai. Kae e kamata mai i te 1940 o vau ki mua, ne kamata o fakatoka ne taina kolā e fai ne latou te takitakiga i te laumua, a akoakoga e auala i akoga kese‵kese.

⁹ Te Akoga mō Tino Talai. E pelā mo te mea ne lavea atu ne tatou i te mataupu mai mua, ne kamata o fai a te akoga tenei i te 1943. E mata, ne fakatoka fua te akoga tenei ke fakamasani a tino a‵koga ke fai a lāuga ma‵goi i fakatasiga a te fakapotopotoga? Ikai. A te pogai fakavae o te akoga e tumau eiloa, ke fakaakoako a tino o te Atua ke fakaaoga te meaalofa o te faipati ke tavae atu ki a Ieova i te galuega talai. (Sala. 150:6) Ne fakatoka ne te akoga a taina mo tuagane katoa kolā ne ‵kau atu ki ei, ke momea aka te lotou ma‵goi e pelā me ne faifeau talai o te Malo.

10, 11. Ko oi ko mafai nei o olo atu ki te Akoga i Kiliata, kae se a tena fakamoemoega tāua?

¹⁰ Te Akoga i Kiliata. Ne kamata a te Akoga i Kiliata i te Aso Gafua, Fepuali 1, 1943. Ne fakatoka muamua eiloa te akoga ke fakaakoako a paenia mo nisi tavini i te taviniga tumau mō te taviniga fakamisionale i so se koga i te lalolagi. Kae talu mai i a Oketopa 2011, ne talia fua ke ‵kau atu ki ei a tino kolā ko aofia i se vaega o te taviniga tumau​—paenia fakapito, ovasia faima‵laga mo olotou avaga, tino i te Peteli, mo misionale kolā e seki ‵kau atu ki te akoga.

¹¹ Se a te fakamoemoega o te Akoga i Kiliata? E tali mai penei ne se taina telā ko leva ne fai pelā me se faiakoga i ei: “Ke fakamalosi aka te fakatuanaki o tino a‵koga e auala i se sukesukega maea ki te Muna a te Atua kae ke fesoasoani atu i te atiakaga o uiga faka-te-agaga kolā e manakogina ke fakafesagai atu ki tulaga faiga‵ta i olotou galuega. Kae ko te ‵toe fakamoemoega tāua o te akoga ko te fakamalosiakaga o te fia kau atu ki te galuega talai.”​—Efe. 4:11.

12, 13. Se a te aoga o te Akoga i Kiliata ki te galuega talai i te lalolagi kātoa? Tuku mai se fakaakoakoga.

¹² Se a te aoga o te Akoga i Kiliata ki te galuega talai i te lalolagi kātoa? Talu mai te 1943, ko silia atu nei i te toko 8,500 a tino ko oti ne akoako faka‵lei i te akoga,c mo misionale kolā ne a‵koga i Kiliata ko tavini atu i atufenua e silia atu i te 170 i te lalolagi kātoa. Ne fakaaoga faka‵lei eiloa ne misionale te lotou akoakoga, kae tuku mai foki ne latou se fakaakoakoga loto finafinau i te galuega talai kae akoako foki a nisi tino ke fai penā. I taimi e uke, ne fai eiloa ne misionale te takitakiga i te galuega i koga kolā e mu‵tana fua i ei a tino talai o te Malo.

¹³ Mafaufau ki te mea ne tupu i Tiapani, telā ne fakagata ei a fakatokaga katoa o te galuega talai i te taimi o te Taua i te Lua a te Lalolagi. I a Aokuso 1949, ne mu‵tana ifo i te sefulu o tino talai i Tiapani. Kae i te fakaotiga o te tausaga tenā, e toko 13 a misionale ne a‵koga i Kiliata ne fakalavelave malosi i te galuega talai i Tiapani. Ne toe olo atu foki a misionale e uke atu. Muamua la, ne ‵saga malosi atu a misionale ki fa‵kai lasi; kae fakamuli ifo ne kamata o olo atu latou ki nisi fa‵kai. Ne fakamalosi atu eiloa a misionale mo te loto kātoa ki olotou akoga mo nisi tino ke ‵kau atu ki a latou i te taviniga fakapaenia. Ne maua eiloa a ikuga ‵gali e uke mai i taumafaiga loto finafinau a misionale. Nei la, ko silia atu i te toko 216,000 a tino talai o te Malo i Tiapani, kae toeitiiti ko kātoa te 40 pasene o latou ko tavini atu e pelā me ne paenia!d

14. Se a te mea e fakamaoni mai ne akoga mai te Atua? (Ke onoono foki ki te pokisi “Akoga Kolā e Akoako ei a Faifeau Talai o te Malo.”)

¹⁴ Nisi akoga mai te Atua. A te Akoga mō Paenia, te Akoga mō Tauavaga Kelisiano, mo te Akoga mō Taina Taka ko oti ne fesoasoani atu ki tino kolā ne ‵kau atu ki ei ke ati aka te lotou malosi faka-te-agaga kae ke fai foki ne latou te takitakiga mo te loto finafinau i te galuega talai.e E fakamaoni mai ne akoga katoa konei mai te Atua me ko oti eiloa ne fakatoka katoatoa ne te ‵tou Tupu ana soko ke fakataunu te lotou galuega.​—2 Timo. 4:5.

Te Akoakoga o Taina ke Fakafesagai Atu ki Tiute Fakapito

15. Se a te auala e fia fakaakoako atu ei a taina fai tōfiga i tulaga o tiute ki a Iesu?

¹⁵ Masaua a te valoaga a Isaia telā ne faipati mai e uiga ki te akoakoga o Iesu ne te Atua. I te “akoga” faka-te-lagi tenā, ne tauloto a te Tama ke iloa ne ia “o fakamalosi a loto o tino loto vaivai.” (Isa. 50:4) Ne fakagalue aka ne Iesu a te akoakoga tenā; i te taimi koi nofo mai ei i te lalolagi, ne fakamalosi ne ia a tino kolā ko “fi‵ta i te ‵mafa [olotou] amoga.” (Mata. 11:28-30) I te fakaakoako atu ki a Iesu, e ma‵nako eiloa a taina fai tōfiga, ke fai latou mo fai se fakamalosiga ki olotou taina mo tuagane. Ke fai penā, ne faka‵tu aka ei a akoga kese‵kese ke fesoasoani atu ki taina ke momea aka te lotou ma‵goi i te tavini atu ki olotou taina tali‵tonu.

16, 17. Se a te fakamoemoega o te Akoga mō Toeaina mo Tavini Fesoasoani? (Ke onoono foki ki te fakamatalaga mai lalo.)

¹⁶ Te Akoga mō Toeaina mo Tavini Fesoasoani. A te vasega muamua o te akoga tenei ne kamata i a Mati 9, 1959 i South Lansing, i New York. Ne ‵kami atu a ovasia faima‵laga mo toeaina i te fakapotopotoga ke ‵kau atu ki te akoga telā e tasi te masina te leva. Fakamuli ifo, ne ‵fuli a te akoga mai te ‵gana Palagi ki nisi ‵gana, kae ne kamata malielie ei o akoako a taina i te lalolagi kātoa.f

¹⁷ Ne fai mai te 1962 Yearbook of Jehovah’s Witnesses e uiga ki te fakamoemoega o te Akoga tenā: “I te lalolagi fakalavelave tenei, a te ovasia i te fakapotopotoga o Molimau a Ieova se tino telā e mafai o fakatoka faka‵lei tena olaga ko te mea ke saga tonu atu ki tino katoa i te fakapotopotoga kae ke fai mo fai se fakamanuiaga ki a latou. Kae e se mafai o fai a ia mo fai se tagata telā e fakaseaoga ne ia tena kāiga ko te mea ke saga atu fua ki te fakapotopotoga, kae e ‵tau o fakaaoga faka‵lei ne ia te loto finafinau tenā mo te mafaufau ‵lei. Ko oko eiloa i te gali o te avanoaga ne tuku atu ki toeaina i te fakapotopotoga i te lalolagi kātoa ke ‵kau fakatasi i te Akoga tenei ke maua ei a akoakoga kolā ka fesoasoani atu ki a latou ke fai a mea kolā e fai mai te Tusi Tapu me e ‵tau o fai ne se ovasia!”​—1 Timo. 3:1-7; Tito 1:5-9.

18. E maua pefea ne tino katoa o te Atua a mea aoga mai te Akoga mō Toeaina mo Tavini Fesoasoani?

¹⁸ Ne maua eiloa ne tino katoa o te Atua a mea aoga mai te Akoga tenei. E pefea la? Kafai e fakagalue aka ne toeaina mo tavini fesoasoani a mea ne tauloto ne latou i te akoga, e fai eiloa latou, e pelā mo Iesu, mo fai se pogai o fakamalosiga ki olotou taina tali‵tonu. E a, e se fakatāua ne koe a pati a‵lofa, te fakalogologo mai, io me se asiga fakamalosi loto mai i se toeaina io me se tavini fesoasoani? (1 Tesa. 5:11) E fai eiloa a tāgata fetaui ‵lei penā mo fai se fakamanuiaga tonu ki olotou fakapotopotoga!

19. Ne a nisi akoga e tausi ne te Komiti o Akoakoga, kae se a te pogai o te fakatokaga o akoga konā?

¹⁹ Nisi akoga mai te Atua. E tausi ne te Komiti o Akoakoga a te Potukau Pule a nisi akoga kolā e akoako ei a taina i tulaga o tiute i te fakapotopotoga. Ne fakatoka a akoga konā ke fesoasoani atu ki taina tōfia​—toeaina i te fakapotopotoga, ovasia faima‵laga, mo sui o te Komiti o te Ofisa Lagolago​—ke momea aka te lotou ma‵goi i te fakataunuga o olotou tiute e uke. A akoga kolā e fakavae ki te Tusi Tapu e fakamalosi atu ki taina ke fakatumau te lotou ma‵losi i te feitu faka-te-agaga kae fakagalue aka akoakoga fakavae i te Tusi Tapu i olotou faifaiga ki mamoe tāua kolā ne tuku atu ne Ieova ke tausi ne latou.​—1 Pe. 5:1-3.

20. Kaia ne mafai ei o fai atu a Iesu me i a tatou katoa e “akoako” ne Ieova, kae se a te mea e fakaiku aka ne tatou ke fai?

²⁰ E manino ‵lei, me ne fakamautinoa aka ne te Tupu faka-Mesia me e akoako faka‵lei ana soko. Ne fakasolo mai eiloa a akoakoga mai te ‵toe maluga o vai ki lalo: Ne akoako ne Ieova tena Tama, kae ne akoako ne tena Tama ana soko. Tela la, ne mafai o fai atu a Iesu me i a tatou katoa “ka akoako” ne Ieova. (Ioa. 6:45; Isa. 54:13) Ke fakaiku aka ne tatou ke na fakaaoga katoatoa a te akoakoga ne fakatoka ne te ‵tou Tupu mō tatou. Kae ke na masaua ne tatou te pogai fakavae o akoakoga katoa konei, ko te fesoasoani mai ke tumau te malosi faka-te-agaga ko te mea ke fakataunu katoatoa ne tatou ‵tou galuega.