Ke Momea Aka ‵Tou Ata‵mai i te Galuega Talai​—Fakaaogaga o Fesili i se Auala Magoi

TE POGAI E TĀUA I EI: Kafai “a mafaufauga i te loto o se tagata e pelā me ne vai ‵poko,” ko fai ei a fesili e pelā me se paketi telā e asu mai ne ia a vai ki tua. (Fat 20:5) E fesoasoani mai a fesili ke fakaaofia ne tatou a ‵tou tino fakalogo‵logo. A tali ki fesili kolā e fakatoka faka‵lei e mafai eiloa o aoga malosi. Ne fakaaoga ne Iesu a fesili i se auala magoi. E mafai pefea o fakaakoako atu tatou ki a ia?

TE AUALA KE FAI EI:

• ‵Sili atu a fesili ke iloa aka olotou mafaufauga. Ne ‵sili atu ne Iesu se fakasologa o fesili ma‵goi ke iloa aka ei ne ia a kilokiloga a ana soko e uiga ki ei. (Mat 16:13-16; be 238 ¶3-5) Ne a fesili kolā e mafai o ‵sili atu ne koe?

• ‵Sili atu a fesili kolā e mafai o ‵taki atu ei te tino ki te tali mautinoa. Ke faka‵tonu aka a mafaufauga o Petelu, ne ‵sili atu ne Iesu a fesili kae tuku atu a tali kolā e mafai o takitaki atu ei ke iloa ne ia te tali mautinoa ki ei. (Mat 17:24-26) Ne a fesili e mafai ne koe o ‵sili atu ke fesoasoani ki se tino ke maua ne ia te tali mautinoa ki ei?

• Fakamālō atu ki au tino fakalogo‵logo. I te otiga ne “tali mai te tagata tenā mo te poto,” ne fakamālō atu a Iesu ki a ia. (Mko 12:34) E mafai pefea o fakamālō atu koe ki se tino telā ne tali atu ki se fesili?

ONOONO KI TE VAEGA MUAMUA O TE VITIO KE FAI TE GALUEGA NE FAI NE IESU—AKOAKO ATU, KA OTI KO TALI AKA EI A FESILI KONEI MAI LALO:

• Kaia e se ‵lei te fakaakoakoga tenei e uiga ki te akoako atu, faitalia eiloa e ‵tonu a fakamatalaga?

• I lō te fai atu fua o fakamatalaga, ne a ‵tou mea e ‵tau o fai?

ONOONO KI TE VAEGA I TE LUA O TE VITIO, KA OTI KO TALI AKA EI A FESILI KONEI MAI LALO:

• Ne fakaaoga pefea ne te taina a fesili i se auala magoi?

• Ne a nisi vaega o te akoako atu e mafai o fakaakoako tatou ki ei?