E Takalia‵lia Mai e Aunoa mo se Pogai

“Ne takalia‵lia mai latou ki a au mo te seai o se pogai.”​—IOANE 15:25.

1, 2. (a) Kaia e ‵numi ei a nisi tino māfai ko fakama‵sei atu e uiga ki Kelisiano, kae kaia e se ‵poi ei tatou i vaegā pati penā? (e) Se a te uiga o te pati ko te “takalialia” ka sau‵tala tatou ki ei i te mataupu tenei? (Ke onoono ki te fakamatalaga fakaopoopo.)

E TAUMAFAI malosi a Molimau a Ieova ke ola latou e ‵tusa mo fakatakitakiga kolā e maua i te Muna a te Atua. Ona ko te mea tenā, e amanaia eiloa a tino ki a latou i fenua e uke. Kae i nisi taimi, e fai ne tino a fakamatalaga ‵se e uiga ki a latou. E pelā mo pati a se ofisa o te malo o Lusia i St. Petersburg e uiga ki mea ne masaua ne ia: “Ne lipoti mai ki a matou me i Molimau a Ieova se potukau telā e fai ‵funa te lotou galuega kae tamate ne latou a tama‵liki mo latou foki eiloa.” Kae i tena ga‵luega mo Molimau a Ieova i te taimi o te fono lasi e tasi, ne toe fai mai te tino eiloa tenā: “Nei la ko lavea ne au a tino konei e penei eiloa mo tatou, e mata kata‵kata . . . latou e filemu kae agamalū, kae e fakatau a‵lofa malosi eiloa latou.” Ne toe fai mai penei: “E se malamalama lele eiloa au me kaia e fai ei ne tino a tala ‵loi e uiga ki a latou.”​—1 Petelu 3:16.

² E se fia‵fia eiloa a tavini a te Atua māfai e ‵losi ‵se atu i a latou ne tino amio ma‵sei kae e se ‵poi foki latou māfai e fai‵pati penā a tino ki a latou. Ko leva ne fai atu a Iesu ki ana soko: “Kafai e takalia‵lia a tino o te lalolagi ki a koutou, e ‵tau o manatua ne koutou me ne takalia‵lia muamua ki a au. . . . Ko te mea ke fakataunu ei a muna kolā e tusi i te lotou Tulafono, ‘Ne takalia‵lia mai latou ki a au mo te seai eiloa o se pogai.’ ”a (Ioane 15:​18-​20, 25; Salamo 35:19; 69:4) Mai mua atu i ei, ne fai atu a ia ki ana soko: “Kafai e taku ne latou te pule o te kāiga ko Pelesepulo, ka taku foki ne latou a tino o te kāiga ki ne igoa e ma‵sei atu!” (Mataio 10:25) E malamalama a Kelisiano me i te kufaki i vaegā tulaga fakamasiasi penā se vaega o te “sataulo” telā ne talia ne latou i te lotou faiga mo fai ne soko o Keliso.​—Mataio 16:24.

3. Ne pefea te lasi o fakasauaga ne oko atu ki tino tapuaki ‵tonu?

³ Ko leva ‵ki ne fe‵paki a tino tapuaki ‵tonu mo fakasauaga, kae ne kamata mai eiloa i te tagata amiotonu ko “Apelu.” (Mataio 23:​34, 35) Ne seki fai a fakasauaga konā i nāi taimi fua. Ne fai mai Iesu me i ana soko “ka inosia . . . ne tino katoa” ona ko tena igoa. (Mataio 10:22) E se gata i ei, ne tusi mai te apositolo ko Paulo me e ‵tau o fakamoe‵moe a tavini katoa a te Atua​—e aofia i ei ko tatou taki tokotasi​—ke fakasauagina latou. (2 Timoteo 3:12) Se a te pogai?

Te Mafuaga o te Takalialia e Aunoa mo se Pogai

4. E fakaasi mai pefea ne te Tusi Tapu a te mafuaga o takalialiaga katoa e aunoa mo se pogai?

⁴ E fakaasi mai i te Muna a te Atua me ne fakamafua aka ne se tino sē lavea i te kamataga a te uiga tenei. Ke mafau‵fau ki te tamatega fakamataku o te tagata o te fakatuanaki muamua loa, ko Apelu. E fai mai te Tusi Tapu me i te tino tatino, ko tena taina ko Kaino, ne “kau i te Tino Masei,” ko Satani te Tiapolo. (1 Ioane 3:​12) Ne maua ne Kaino a uiga o Satani, kae ne fakaaogā ne te Tiapolo ke fai ne ia te mea matagā tenā. E fakamaina mai foki i te Tusi Tapu a taumafaiga ma‵sei a Satani ne fai ki a Iopu mo Iesu Keliso. (Iopu 1:​12; 2:​6, 7; Ioane 8:​37, 44; 13:27) E fakaasi manino mai i te tusi ko Fakaasiga a te māfuaga o fakasauaga ki soko o Iesu i pati konei: “A te Tiapolo ka tofotofo ne ia koutou i te ‵pei o nisi o koutou ki te fale puipui.” (Fakaasiga 2:10) Ao, ko Satani eiloa te mafuaga o te uiga fakatakalialia tenei ki tino o te Atua e aunoa mo se pogai.

5. Se a te pogai e takalialia ei a Satani ki tino tapuaki ‵tonu?

⁵ Se a te pogai e takalialia ei a Satani ki tino tapuaki ‵tonu? I tena togafiti telā ne fakaasi mai i ei a tena fakamaualuga sē fuafuagina, ne taua atu faeloa a Satani ki te “Tupu o te se gata mai,” ko Ieova te Atua. (1 Timoteo 1:​17; 3:6) E ‵losi mai a ia me ko tō faigata katoa te pulega a te Atua ki ana mea ne faite kae e seai se tino e tavini atu ki a Ieova mo se lagonaga ‵ma, kae e tapuaki atu fua a tino ona ko olotou manakoga totino. Ne ‵losi mai a Satani me kafai e tuku atu ke tofotofo ne ia a tino, e mafai o ‵fuli ne ia a tino katoa ke sē tavini atu ki te Atua. (Kenese 3:​1-6; Iopu 1:​6-​12; 2:​1-7) I tena kinauga matagā i a Ieova se pule faimālō, se tino loi, kae seai sena aogā, ne ‵sala atu eiloa a Satani ke fai a ia mo fai te nafa o Ieova e pelā me se isi pule. Tela la, a fakasauaga kolā e fai ne ia ki tavini a te Atua e fakamāfua aka ne tena manako lasi ‵ki ke tapuaki atu a tino ki a ia.​—Mataio 4:​8, 9.

6. (a) E aofia pefea a tatou taki tokotasi i te kinauga e uiga ki te pulega a Ieova? (e) E fesoasoani mai pefea a te ‵tou malamalama i te kinauga tenei ke tumau tatou i te fakamaoni? (Ke onoono ki te pokisi i te itulau e 12.)

⁶ E mata, e lavea ne koe te auala e pokotia ei tou olaga i te kinauga tenei? E pelā me se tavini a Ieova, kāti ko iloa ne koe me e manakogina a taumafaiga e uke i te faiga o te loto o te Atua, e uke ‵ki eiloa a mea aogā e maua mai i ei. Kae pefea la māfai ko faiga‵ta a fakanofonofoga o te olaga, io me fakalogo‵mae atu ki a koe ke tumau i te tautali ki tulafono mo fakatakitakiga a Ieova? Kae pefea la māfai e foliga mai me seai ne mea aogā e maua ne koe? E mata, ka fakaiku aka ne koe me e seai se aogā ke tumau i te tavini atu ki a Ieova? Io me e fakamalosi atu a te alofa ‵nau ki a Ieova mo te fakatāua ne koe ana uiga tafasili i te ‵gali ke tumau koe i te sasale i ana auala katoa? (Teutelonome 10:​12, 13) Mai tena taliaga ke tofotofo tatou ne Satani, ko tuku mai eiloa ne Ieova ki a tatou taki tokotasi se avanoaga ke tuku atu ne tatou se tali totino e uiga ki ‵tekemaiga a Satani.​—Faataoto 27:11.

Kafai ko ‘Muna Maseigina Koutou’

7. Se a te togafiti e tasi e fakaaogā ne te Tiapolo ke ‵fuli keatea ei tatou mai i a Ieova?

⁷ Ke mafaufau ‵loto nei tatou ki se togafiti matagā e tasi telā e fakaaogā ne Satani ke fakatalitonu mai ei me e tonu tena ‵losiga e uiga ki te pulega​—ko te auala e fakaaogā ei ne ia te loi. Ne fakaigoa ne Iesu a Satani ko te “tamana . . . eiloa o tino ‵loi.” (Ioane 8:44) A te igoa ko te Tiapolo, telā e fakauiga ki te “Tino Fatufatu,” e fakasino atu i ei me i te tino tenā ko te ‵toe tino gutu fatufatu sili eiloa e uiga ki te Atua, tena muna, mo tena igoa ‵malu. E fakaaogā ne te Tiapolo a pati fakauiga, ‵losiga ‵se, mo loi fulafulaki ke fakamasei atu ei ki te pulega a Ieova, kae e fakaaogā foki ne ia a togafiti konā ki tavini fakamaoni a te Atua. Mai te ‵luku fakatasiatuga o fakamaseiga katoa konei ki Molimau, ko sinā fakafaigata aka eiloa ne ia a tofotofoga kolā e fe‵paki mo latou.

8. Ne fakamasei pefea ne Satani a Iopu, kae se a te mea ne iku mai i ei?

⁸ Ke mafau‵fau ki mea ne ‵tupu ki a Iopu, telā e fakauiga tena igoa ki “Se Mea Fakatakalialia.” E se gata fua i tena faiga ke mativa a Iopu, tamatega o ana tama‵liki kae ke masaki foki, ne fai foki ne Satani a Iopu ke foliga mai e pelā me se tino agasala telā e fakasala ne te Atua. E ui eiloa ne amanaia malosi a tino ki a ia, ne takalia‵lia a tino ki a Iopu, ke oko foki eiloa ki ana kāiga mo taugasoa ‵pili. (Iopu 19:​13-​19; 29:​1, 2, 7-​11) E se gata i ei, e auala i tino fakamafanafana fakaloi‵loi, ne taumafai foki a Satani o ‘fakavāivāi ne ia a Iopu e auala i pati ‵loi,’ muamua la, mai te fakaasiatuga me e isi eiloa sena agasala matagā ne fai kae fakapa‵tonu atu i a ia se tino amio masei. (Iopu 4:​6-9; 19:2; 22:​5-​10) Ma‵faga o mea fakaloto vāivāi ki a Iopu!

9. Ne fai pefea a Iesu ke foliga mai e pelā me se tino agasala?

⁹ E pelā me ko te ‵toe tino fakamaoni ki te pulega a Ieova, ne fai a te Tama a te Atua mo fai te ‵toe mea fakatakalialia sili ki a Satani. I te taimi ne vau ei a Iesu ki te lalolagi, ne taumafai a Satani o fakamasei tena tulaga faka-te-agaga, e pelā mo tena mea ne fai ki a Iopu, kae ke foliga mai i a Iesu se tino agasala. (Isaia 53:​2-4; Ioane 9:​24) Ne taku ne tino a ia e pelā me se tino inu kava, se tino gafula kae fai atu foki me ‘e isi se temoni i loto i a ia.’ (Mataio 11:​18, 19; Ioane 7:​20; 8:​48; 10:20) Ne ‵losi ‵se atu ki a ia me ne muna masei. (Mataio 9:​2, 3; 26:​63-​66; Ioane 10:​33-​36) Ne fakafanoanoa atu te mea tenei ki a Iesu, me ne iloa ne ia me ne fakamasiasi atu a te mea tenā ki tena Tamana. (Luka 22:​41-​44) I te fakaotiga eiloa, ne fakasataulo ei a Iesu e pelā me se pagota amio matagā. (Mataio 27:​38-​44) I tena tumau i te fakamaoni katoatoa, ne kufaki ne Iesu te ukega o “mea ma‵sei ne fai ne tino agasala ki a ia.”​—Epelu 12:​2, 3.

10. E fai pefea a te ‵toega o te kau fakaekegina e pelā me ko tino kolā e saga malosi atu ki ei a Satani i aso nei?

¹⁰ I aso nei, ko oti foki ne fai a te toega o soko fakaekegina o Keliso e pelā me ne mea fakatakalialia ki te Tiapolo. E fakamatala mai a Satani e pelā me ko “te tino telā ne ‵moli ne ia [taina o Keliso] . . . i mua o te Atua . . . i te ao mo te po.” (Fakaasiga 12:​9, 10) Me ko oti ne ‵pei ifo a ia mai te lagi kae ko nofo pili nei ki te lalolagi, ko oti eiloa ne taumafai malosi a Satani o fakamasiasi atu ki taina o Keliso. (1 Kolinito 4:13) I nisi fenua, ko oti ne taku latou e pelā me se potukau fakamataku, e pelā eiloa mo Kelisiano i te senitenali muamua. (Galuega 24:​5, 14; 28:22) E pelā mo te mea e fakaasi mai i te kamataga, ko oti ne fakamaseigina latou e auala i te fakasalalauatuga o tala ‵loi. Kae e ui i ei “i te vikia mo te sē vikia, ki te takumaseigina mo te taku‵leigina,” e taumafai malosi eiloa a taina fakaekegina o Keliso fakatasi mo te ‵lago malosi atu o ‘nisi mamoe’ ke ‘faka‵logo latou ki fakatonuga a te Atua mo te faiga o te galuega ko te molimau atu e uiga ki a Iesu’ mo te loto maulalo.​—2 Kolinito 6:8; Ioane 10:16; Fakaasiga 12:17.

11, 12. (a) Se a te mea kāti e mafua mai i ei a fakamaseiga ki Kelisiano? (e) I auala fea e mafai ei o logo‵mae se Kelisiano ona ko tena fakatuanaki e aunoa mo se pogai?

¹¹ E tonu la me e se ko fakamaseiga katoa e fepaki mo tavini a te Atua taki tokotasi e mafua mai ona ko te “amiotonu.” (Mataio 5:10) A nisi fakalavelave kāti e mafua mai eiloa ona ko ‵tou tulaga sē ‵lei katoatoa. E seai se ‵togi fakapito e maua māfai “e kufaki ne [tatou] a ‵kini e ‵tau o maua ne koe ona ko mea ‵se ne fai ne [tatou].” Kae kafai se Kelisiano “e kufaki ne [ia] te fi‵ta o te sē ‵tau o puapuagatia ona ko te mafaufau ki tena loto” e talia ne Ieova a te mea tenā. (1 Petelu 2:​19, 20) Ko fakanofonofoga fea e ‵tupu sāle i ei a mea konei?

¹² Ko oti ne fakamasiasi atu ki nisi tino ona ko te lotou sē ‵kau atu ki faifaiga masani o fanoanoa kolā e se fetaui mo te Tusi Tapu. (Teutelonome 14:1) Ko oti ne fakatauemu atu ki talavou Molimau ona ko te tau‵tali atu ki tulaga o Ieova i mea tau amioga. (1 Petelu 4:4) Ko oti ne ‵losi ‵se atu ki nisi mātua Kelisiano e pelā me e “manatu ma‵ma” io me “tamate” ne latou olotou tama‵liki ona ko te sē talia ne latou ke fakaaogā te toto ki olotou tama‵liki i togafiti fakatokita. (Galuega 15:29) Ko takalia‵lia foki a kāiga mo tuakoi ki Kelisiano ona ko te lotou fai fua pelā me ne tavini a Ieova. (Mataio 10:​34-37) Ko tau‵tali atu eiloa a tino katoa penā ki mea kolā ne ‵tupu ki pelofeta mo Iesu foki eiloa i te logo‵mae e aunoa mo se pogai.​—Mataio 5:​11, 12; Iakopo 5:10; 1 Petelu 2:21.

Te Fiafia o Kufaki a Fakamaseiga

13. Se a te mea e fesoasoani mai ke fakatumau ne tatou te ‵tou tulaga paleni faka-te-agaga māfai ko fakamaseigina tatou i auala faiga‵ta?

¹³ Kafai ko fakamaseigina malosi tatou ona ko ‵tou fakatuanaki, kāti ka loto vāivāi tatou, e pelā mo te pelofeta ko Ielemia, kae ma‵natu aka me ko sē mafai o tumau tatou i te tavini atu ki te Atua. (Ielemia 20:​7-9) Se a te mea e fesoasoani mai ke fakatumau te ‵tou tulaga paleni i te feitu faka-te-agaga? Ke ‵sala atu ki te kilokiloga a Ieova e uiga ki te mea tenā. E kilo atu a ia ki tino kolā e tumau i te fakamaoni i taimi o tofotofoga e pelā me ne tino ko manumalo, kae e se pelā me ne tino ko taka‵vale. (Loma 8:37) Ke fakaataata i tou mafaufau a tino kolā ne ‵lago atu ki te pulega a Ieova faitalia a fakamaseiga katoa mai te Tiapolo ki a latou​—ko tāgata mo fāfine e pelā mo Apelu, Iopu, te mātua o Iesu ko Malia mo nisi tino fakamaoni i aso mua, e pelā foki mo ‵tou taina i aso nei. (Epelu 11:​35-37;12:1) Ke mafau‵fau ‵loto ki auala ne fakamaoni ei latou. E ‵kami mai ne te potukau tokouke ‵ki o tino fakamaoni konā a tatou ke ‵kau fakatasi mo latou i te lotou tulaga o te manumalo telā ko oti ne fakatoka mō tino kolā ne fakatakavale ne latou te lalolagi ona ko te lotou fakatuanaki.​—1 Ioane 5:4.

14. E fakamalosi mai pefea a te ‵talo mo te loto kātoa ke tumau tatou i te fakamaoni?

¹⁴ Kafai ‘ko uke a manatu sē tokagamalie i loto i a tatou,’ e mafai o ‵saga atu tatou ki a Ieova e auala i te faiga o ‵talo, kae ka fakamafanafana kae fakamalosi ne ia tatou. (Salamo 50:15; 94:19) Ka tuku mai eiloa ne ia te poto e ‵tau ei ko te mea ke mafai o fakafesagai atu tatou ki tofotofoga kae fesoasoani mai ke matea tonu ne tatou te kinauga sili e uiga ki te pulega a Ieova, telā ko te pogai eiloa tenā o te takalialia e aunoa mo se pogai ki luga i ana tavini. (Iakopo 1:5) E mafai foki o tuku mai ne Ieova ki a tatou a “te filemu o te Atua, telā e sili atu i mea e iloa ne tatou.” (Filipi 4:​6, 7) A te tokagamalie telā e tuku mai ne te Atua e fai ne ia tatou ke toka faeloa kae tu ‵mautakitaki i taimi o fakalavelave faiga‵ta e aunoa mo te fakalotolotolua io me ko te mataku. E auala i tena agaga tapu, e fakamalosi ne Ieova a tatou i so se mea telā e talia ne ia ke tupu ki a tatou.​—1 Kolinito 10:13.

15. Se a te mea e fesoasoani mai ke sē kaitaūa tatou māfai ko logo‵mae?

¹⁵ Se a te mea e fesoasoani mai ke mo a ma kaitaūa tatou ki tino kolā e takalia‵lia mai e aunoa mo se pogai? Ke masaua me i ‵tou toe fili sili ko Satani mo ana temoni. (Efeso 6:12) E tiga eiloa e fakasāua mai a nisi tino mo te iloa tonu ki a tatou, e ‵teke atu a tino e tokouke ki tino o te Atua mo te sē iloa io me ona ko fakamalosiga mai nisi tino. (Tanielu 6:​4-16; 1 Timoteo 1:​12, 13) E manako eiloa a Ieova ke maua ne “tino katoa” te avanoaga “ke ola . . . ka ke iloa foki ne latou te munatonu.” (1 Timoteo 2:4) E tonu, ko fai nei a nisi tino kolā ne ‵teke muamua mai e pelā me ne taina Kelisiano o tatou ona ko ‵tou amioga ‵lei kolā e fakaasi atu. (1 Petelu 2:12) E se gata i ei, e maua foki ne tatou se akoakoga ‵lei mai te tamaliki a Iakopo ko Iosefa. E ui eiloa ne logo‵mae malosi a Iosefa ona ko ana āfa taina, ne seki ita fakamoemoe a ia ki a latou. Kaia? Me e iloa ne ia me ne aofia a Ieova i te mea tenā, ne fakagalue ne ia a mea ke ‵tupu i te fakataunuga o Ana fuafuaga. (Kenese 45:​4-8) E mafai foki ne Ieova o ‵fuli a logo‵maega o tatou e aunoa mo se pogai mō te faka‵maluga o tena igoa.​—1 Petelu 4:16.

16, 17. Kaia e se ‵tau ei o sōna manavase tatou e uiga ki taumafaiga a tino ‵teke ke taofi aka te galuega talai?

¹⁶ E se ‵tau o sōna manavase tatou māfai e foliga mai me e manuia a taumafaiga a ‵tou fili ke taofi aka a te talaiga o te tala ‵lei. Ko lūlū nei ne Ieova a atufenua katoa e auala i te faiga o te galuega talai i te lalolagi kātoa, kae ko koloa tāua ko laku mai nei ki loto. (Hakai 2:7) Ne fai mai te Tausi Mamoe ‵lei ko Iesu Keliso: “A aku mamoe e faka‵logo ki toku leo, kae e iloa ne au latou, kae tautali mai i a au. E avatu ne au ki a latou a te ola se gata mai; . . . kae se mafai foki ne se tino o ‵fao latou mai i a au.” (Ioane 10:​27-29) E aofia foki a agelu tapu i te ‵katigā saito lasi tenei i te feitu faka-te-agaga. (Mataio 13:​39, 41; Fakaasiga 14:​6, 7) Tela la, e se mafai lele eiloa o fakamasei ne tino ‵teke i olotou pati io me ko olotou faifaiga a fuafuaga a te Atua.​—Isaia 54:17; Galuega 5:​38, 39.

¹⁷ E masani sāle o toe foki atu a ‵tekemaiga a tino ki a latou eiloa. I se fa‵kai e tasi i Afelika, ne salalau valevale i ei a tala ‵loi e uke e uiga ki Molimau a Ieova, e aofia i ei me tapuaki atu latou ki te Tiapolo. Ona ko te mea tenā, i so se taimi e āsi atu ei a Molimau, e tele sāle a Grace o ‵muni mai tua o tena fale ke oko ki te taimi e olo ei latou keatea. I te aso e tasi, ne fakaasi atu ne se faifeau o tena lotu se tusi e tasi a tatou kae faka‵pula atu ki tino katoa i loto i ei ke sē fai‵tau ki ei me e fai fua i ei ke tiakina ne latou te lotou lotu. Ne fai i ei ke fia iloa ne Grace a mea e uke e uiga ki ei. I te suā taimi ne āsi atu ei a Molimau, i lō te ‵muni ne sau‵tala a ia mo latou kae ne talia foki ne ia se ‵kopi totino o te tusi tenā. Ne kamata i ei tena Akoga faka-te-Tusi Tapu, kae i te 1996 ne papatiso ei a ia. Ko fakaaogā nei ne Grace ana taimi ke ‵sala atu ki nisi tino kolā ko oti ne maua ne latou a tala sē ‵tonu e uiga ki Molimau a Ieova.

Ke na Fakamalosi Aka Nei Tou Fakatuanaki

18. Kaia e manakogina ei ke fakamalosi aka te ‵tou fakatuanaki a koi tuai o fe‵paki tatou mo tofotofoga fakama‵taku, kae mafai pefea o fai tatou penā?

¹⁸ Me e mafai fua o taua fakapoi mai a Satani ona ko tena takalialia e aunoa mo se pogai, se mea tāua ke na fakamalosi aka nei te ‵tou fakatuanaki. E fai pefea ne tatou te mea tenā? E fai mai se lipoti mai se fenua telā ne fakasauā malosi i ei a tino o Ieova: “E tasi te mea ko oti ne fakamautinoa mai: A tino kolā e ‵lei olotou amioga masani i te feitu faka-te-agaga kae ‵poko te lotou loto fakafetai e uiga ki te munatonu i te Tusi Tapu e tu ‵mautakitaki eiloa i taimi o tofotofoga. Kae ko tino kolā e ‘masani’ o ‵galo sāle i fakatasiga, e se ti ‵kau atu faeloa ki te galuega talai, kae e gutugutulua i mea fo‵liki, e masani sāle eiloa o ‵siga mai lalo i tofotofoga kolā e ‵ka pelā me se ‘afi’.” (2 Timoteo 4:2) Kafai e matea ne koe a feitu e ‵tau o faka‵lei aka e uiga ki a koe eiloa, galue ki ei nei e aunoa mo te fakatalave.​—Salamo 119:60.

19. Se a te mea e fakamaoni mai ne te tu ‵mautakitaki o tavini a te Atua i faifaiga fakatakalia‵lia sē ‵tonu?

¹⁹ A te fakamaoni o tino tapuaki ‵tonu mai lalo i faifaiga fakatakalialia a Satani se fakamaoniga tonu eiloa e uiga ki te ‵tonu katoatoa, te pogai e tāua ei, mo te amiotonu o te pulega a Ieova. E fakafiafia atu te lotou fakamaoni ki te loto o te Atua. Faitalia eiloa te laku atu ne tino a fakamaseiga ki luga i a latou, a te tino telā e maluga atu tena ‵malu i lō te lalolagi mo te lagi “e se mā . . . manafai e taku a ia ne latou ko te lotou Atua.” E tonu, e uiga loa ki tino fakamaoni penā, e fai mai penei: “E se aogā te lalolagi mō latou!”​—Epelu 11:​16, 38.

[Fakamatalaga mai lalo]

E Mafai o Fakamatala Mai ne Koe?

• Se a te mea e fakamafua ne ia te takalialia e aunoa mo se pogai telā e fai atu ki tino tapuaki ‵tonu?

• Ne fakaaogā pefea ne Satani a fakamaseiga i ana taumafaiga ke fakamasei atu te fakamaoni o Iopu mo Iesu?

• E fakamalosi mai pefea ne Ieova ke tu ‵mautakitaki tatou i faifaiga fakatakalia‵lia a Satani?

[Pokisi/Ata i te itulau e 12

Ne Iloa ne Latou te Kinauga Tonu

Ne fai mai se tokotasi o Molimau a Ieova i Ukraine, ko te koga telā ne fakatapu i ei te talaiatuga o te tala ‵lei o te Malo i tausaga e silia atu i te 50 penei: “A te tulaga telā ne oko ki ei a Molimau a Ieova e se ‵tau fua o fua aka ki mea kolā ne fai ne nisi tino ki a matou. . . . A te tokoukega o ofisa o te malo ne fai fua ne latou olotou tiute. Kafai ko mafuli te malo, e ma‵fuli foki a mea e fai ne tino ga‵lue i ei, kae e se ma‵fuli eiloa a matou. E iloa ne matou me i te pogai tonu o omotou fakalavelave ko oti eiloa ne fakaasi ‵tonu mai i te Tusi Tapu.

“E seki ‵kilo ifo matou ki a matou eiloa e pelā me ne pologa a tino ‵teke. A te mea telā ne fesoasoani malosi mai ke maua ne matou te loto kufaki ko te motou malamalama ‵lei i te kinauga telā ne fakasae aka i te fatoaga o Etena​—ko te kinauga e uiga ki te saolotoga o te Atua ke fai mo fai te pule. . . . E ‵lago malosi atu matou ki se kinauga telā e se aofia fua i ei a te ‵lei totino o tino kae e aofia foki i ei a manakoga o te Pule Sili o te lagi mo te lalolagi kātoa. Ne lasi ‵ki te motou mainaga e uiga ki mea ‵tonu kolā e aofia i te kinauga tenei. Ne fai i ei ke ma‵losi matou kae ke tumau matou i te fakamaoni ke oko foki eiloa ki toe tulaga faiga‵ta.”

[Ata i te itulau e 9]

Ko oi te mafuaga o faifaiga ma‵sei kolā ne fai ki a Iesu?

[Ata i te itulau e 11]

Iopu, Malia mo tavini a te Atua i aso nei e pelā mo Stanley Jones, telā ne puke ‵mautakitaki ki te pulega a Ieova

[Ata i te itulau e 12]

Ko Victor Popovych, ne ‵pei ki te falepuipui i te 1970