Tumau i te Alofa o te Atua

1, 2. Ne a ‵tou mea e mafai o fai ke tumau tatou i te alofa o te Atua?

E MA‵NAKO a tatou katoa ke ma‵losi kae ola ‵lei tatou. Tela la, e taumafai tatou o ‵kai ki meakai aoga, fakamalosi‵losi faeloa ‵tou foitino kae tausi foki faka‵lei ki ei. E tiga eiloa e manakogina a taumafaiga e uke, e maua ne tatou mai ei a ikuga aoga, tela la, e se ‵fiu eiloa tatou. Kae manakogina foki ke ma‵losi kae ola ‵lei tatou i te suā feitu.

² E tiga eiloa ne ma‵losi tatou i te iloaga ne tatou a Ieova, e ‵tau eiloa o fakatumau ne tatou te malosi o te ‵tou fesokotakiga mo ia. I te taimi ne fakamalosi atu ei a Iuta ki Kelisiano penei, “Ke tumau koutou i loto i te alofa o te Atua,” ne fakamatala atu ne ia te auala ke fai ei ne latou te mea tenā. Ne fai atu a ia ki a latou: “Ke ati aka koutou i luga i te otou fakatuanaki e sili i te tapu.” (Iuta 20, 21) Tela la, e ati aka pefea ne tatou ke malosi te fakatuanaki?

TUMAU I TE ATI AKA FAELOA O TOU FAKATUANAKI

3-5. (a) Se a te mea e manako a Satani ke mafaufau koe ki ei e uiga ki tulaga o Ieova? (e) Ne a ou lagonaga e uiga ki tulafono mo fakatakitakiga fakavae a Ieova?

³ E tāua ‵ki ke talitonu koe me i auala o Ieova ko toe auala ‵lei eiloa. E manako a Satani ke mafaufau koe me i tulaga o te Atua ko tō faigata kae ka fiafia atu koe māfai e fakaiku ne koe te mea ‵lei mo te mea masei. Talu mai te fatoaga o Etena, koi tumau eiloa Satani i te faiga ke tali‵tonu a tino ki te mea tenei. (Kenese 3:1-6) Kae koi taumafai malosi eiloa a ia i aso nei.

⁴ E mata, e tonu a Satani? E mata, ko tō faigata a tulaga o Ieova? Ikai. Ke fai se fakatusaga, mafaufau i a koe e sasale i se koga gali e ma‵nava sāle i ei a tino. Kae lavea ne koe se koga e ‵pui faka‵lei kae maluga tena ‵pui. Kāti ka mafaufau koe, ‘Kaia e ‵pui ei te koga tenei?’ Kae i te taimi foki eiloa tenā, lagona ei ne koe se leona e ‵gulu mai i te suā feitu o te ‵pui. Ne a ou lagonaga i te taimi tenā e uiga ki te ‵pui? E fiafia koe me e puipui ne te ‵pui tenā a koe ke mo a e kai ne te leona! A fakatakitakiga a Ieova e penā mo te ‵pui tenā, kae ko te Tiapolo ko te leona. Ne fakamasaua mai te Muna a te Atua: “Ke ‵poto kae matapula‵pula koutou! A te otou fili ko te Tiapolo e livaliva sāle e pelā me se leona fekai, o salasala ke folo ne ia se tino.”—1 Petelu 5:8.

⁵ E manako a Ieova ke maua ne tatou te ‵toe olaga ‵lei. E se manako a ia ke takitaki ‵se tatou ne Satani. Tenā te pogai ne tuku mai ei ne ia a tulafono mo fakatakitakiga fakavae ke puipui tatou kae fai foki ei ke fia‵fia tatou. (Efeso 6:11) Ne tusi mai a Iakopo: “Kae ko te tino telā e onoono faka‵lei ki te tulafono ‵lei katoatoa o te saolotoga kae tumau i ei . . . ka fiafia a ia i ana mea e fai.”—Iakopo 1:25.

6. E mafai pefea o tali‵tonu tatou i auala o te Atua ko toe auala ‵lei eiloa?

⁶ Kafai e faka‵logo tatou ki te takitakiga a Ieova, ka ‵lei a ‵tou olaga kae ka gasolo foki o malosi atu te ‵tou fesokotakiga mo ia. E pelā me se fakaakoakoga, e maua ne tatou a mea aoga māfai e talia ne tatou tena kamiga ke ‵talo atu faeloa ki a ia. (Mataio 6:5-8; 1 Tesalonia 5:17) E fia‵fia tatou māfai e faka‵logo tatou ki tena fakatonuga ke ‵kau fakatasi o tapuaki ki a ia, kae fakatau fakamalosi te suā tino ki te suā tino, kae māfai e ‵kau katoatoa tatou ki te galuega ko te talaiga mo te akoakoatuga o tino. (Mataio 28:19, 20; Kalatia 6:2; Epelu 10:24, 25) Kafai e mafau‵fau tatou ki te auala ne fesoasoani mai ei a mea konei ke fakamalosi aka ei te ‵tou fakatuanaki, ka gasolo aka eiloa o malosi te ‵tou loto talitonu me i auala o Ieova ko toe auala ‵lei eiloa.

7, 8. Se a te mea ka fesoasoani mai ke se manava‵se tatou ki tofotofoga kolā ka fe‵paki mo tatou i aso mai mua?

⁷ Kāti e manava‵se tatou me i aso mai mua ka mafai o isi ne tofotofoga kolā ka tō faigata ki a tatou. Kafai e isi ne ou mafaufauga penā, ke masaua a pati a Ieova konei: “Au, Ieova, ko tou Atua, ko te Atua telā e akoako ne ia koe ke ‵lei koe, ko te Atua telā e takitaki ne ia koe ki te auala e ‵tau o sasale ei koe. Moi ne fakalogo mai eiloa koe ki aku fakatonuga! A tou filemu ka fai eiloa e pelā me se vaitafe, kae ko tou amiotonu e pelā mo galu o te tai.”—Isaia 48:17, 18.

⁸ Kafai e faka‵logo tatou ki a Ieova, a te ‵tou filemu ka pelā eiloa me se vaitafe telā e se mafai o ‵masa, kae ko ‵tou amiotonu ka pelā mo galu o te tai kolā e ‵fati faeloa ki uta i te tafatai. Faitalia a mea ‵tupu i ‵tou olaga, e mafai eiloa o fakamaoni tatou. E folafola mai te Tusi Tapu: “‵Pei atu tau amoga ki a Ieova, kae ka tausi ne ia koe. Ka se talia eiloa ne ia se tino amiotonu ke siga.”—Salamo 55:22.

‘KAUSAKI ATU KE MATUA ‵LEI’

9, 10. Se a te uiga o te matua ‵lei?

⁹ I te taimi e fakamalosi ei ne koe tou fesokotakiga mo Ieova, ka ‘kausaki eiloa koe ke matua ‵lei.’ (Epelu 6:1) Se a te uiga o te matua ‵lei?

¹⁰ E se fai tatou e pelā me ne Kelisiano ma‵tua ‵lei māfai fua ko ma‵tua tatou. Ke matua ‵lei, e ‵tau o fai ne tatou a Ieova mo fai te ‵toe Taugasoa pili o tatou kae taumafai ke iloa ne tatou a tena kilokiloga e uiga ki mea. (Ioane 4:23) Ne tusi mai a Paulo: “A latou kolā e ola e ‵tusa mo mea faka-te-foitino e tuku atu olotou mafaufau ki mea faka-te-foitino, kae ko latou kolā e ola e ‵tusa mo mea faka-te-agaga e ‵saga atu eiloa ki mea faka-te-agaga.” (Loma 8:5) A te tino telā e matua ‵lei e se saga malosi ki mea e fiafia a ia ki ei io me ko koloa faka-te-lalolagi. I lō te fai penā, e fakatāua eiloa ne ia a tena taviniga ki a Ieova kae fai ne ia a filifiliga ‵poto i tena olaga. (Faataoto 27:11; faitau te Iakopo 1:2, 3.) E se talia ne ia ke fakaosoosogina a ia ke fai se mea ‵se. A te tino telā e matua ‵lei, e iloa ne ia te mea tonu kae taumafai malosi o fai ne ia.

11, 12. (a) Ne a pati a Paulo e uiga ki te ‘malosi o te mafaufau’ o se Kelisiano? (e) I te auala fea e tai ‵pau ei se Kelisiano matua ‵lei mo se tino tafao?

¹¹ E manakogina a taumafaiga e uke ke mafai o matua ‵lei. Ne tusi mai te apositolo ko Paulo: “Meakai ma‵keke e mō tino ma‵tua fua, ko latou kolā ne fakaaoga ne latou kae ne akoako i ei te malosi o olotou mafaufau ke fakavasega aka ei a te mea tonu mai te mea ‵se.” (Epelu 5:14) A te pati “akoako” e mafai o fai ei ke mafau‵fau tatou ki fakaakoakoga e fai ne se tino tafao.

¹² Kafai e lavea ne tatou se tino apo i te tafao e tafao, e iloa ne tatou me uke eiloa taimi ne fakamāumāu ke akoako ei a ia ke apo i te tafao. Ne seki fanau mai a ia e pelā me se tino tafao. Kafai e fanau mai se pepe, e se iloa ‵lei ne ia o fakaaoga ana lima mo ana vae. Kae fakamuli loa, ka akoako a ia ke iloa ne ia o puke ki mea io me sasale. Fakatasi mo akoakoga, ka mafai o fai a ia e pelā me se tino tafao. I se auala tai ‵pau, e manakogina ne taimi mo akoakoga ke fai tatou e pelā me ne Kelisiano ma‵tua ‵lei.

13. Se a te mea e fesoasoani mai ke iloa ne tatou o mafau‵fau e pelā mo te auala e mafaufau i ei a Ieova?

¹³ I te tusi tenei, ko oti ne suke‵suke tatou ki te auala e mafai ei ne tatou o mafau‵fau e pelā mo Ieova kae ke maua foki ne tatou tena kilokiloga. Ne tauloto foki tatou ke loto fakafetai kae fia‵fia ki tulaga o Ieova. Kafai e fai ne tatou se fakaikuga, ke fesili ifo penei: ‘Ne a tulafono mo fakatakitakiga mai i te Tusi Tapu e fakaaoga i te tulaga tenei? E mafai pefea o fakagalue ne au? Ne a mea e manako a Ieova ke fai ne au?’—Faitau te Faataoto 3:5, 6; Iakopo 1:5.

14. Se a te mea e manakogina ke fai ne tatou māfai e ma‵nako tatou ke ati aka ‵tou fakatuanaki?

¹⁴ E se mafai o gata te atiakaga ne tatou te ‵tou fakatuanaki ki a Ieova. E pelā eiloa mo te kai ki meakai aoga e fai ei ke ma‵losi ‵tou foitino, a te tauloto ki mea e uiga ki a Ieova ka fesoasoani mai ke ati aka ne tatou se fakatuanaki malosi. I te taimi ne kamata ei tatou o suke‵suke ki te Tusi Tapu, ne tauloto tatou ki muna‵tonu fakavae e uiga ki a Ieova mo ana auala. Kae fakamuli ifo, ka manakogina ei ke malamalama tatou i mea e tai ‵loto atu. Tenā te mea ne fakauiga ki ei a Paulo i ana pati: “Meakai ma‵keke e mō tino ma‵tua fua.” Kafai e fakagalue ne tatou a mea ne tauloto ne tatou, ka maua eiloa ne tatou te poto. E fai mai te Tusi Tapu: “A te poto ko te ‵toe mea tāua.”—Faataoto 4:5-7; 1 Petelu 2:2.

15. E pefea te tāua ke a‵lofa ‵tonu tatou ki a Ieova mo ‵tou taina mo tuagane?

¹⁵ E mafai o malosi kae ola ‵lei se tino, kae ke tumau a ia penā, e iloa ne ia me e ‵tau mo ia o tumau i te tausi faka‵lei ki tena foitino. I se auala tai ‵pau, a te tino telā e matua ‵lei, e iloa ne ia me ‵tau mo ia o galue malosi ke fakatumau te malosi o tena fesokotakiga mo Ieova. Ne fakamasaua mai a Paulo ki a tatou: “Ke tumau i te tofotofo aka o koutou me e mata, e ‵piki ‵mau koutou ki te fakatuanaki; ke tumau faeloa i te fakamaoni aka ne koutou a koutou eiloa.” (2 Kolinito 13:5) Kae e uke atu a mea e manakogina ne tatou i lō te malosi fua o te fakatuanaki. E ‵tau o gasolo aka faeloa o malosi atu a te ‵tou a‵lofa ki a Ieova mo ‵tou taina mo tuagane. Muna a Paulo: “Kafai e maua ne au. . . te iloa, kae kafai e lasi toku fakatuanaki ke fakamasiki ne au a mauga, kae e seai se alofa, e seai eiloa soku aoga.”—1 Kolinito 13:1-3.

SAGA TONU KI TOU FAKAMOEMOEGA

16. Se a te mea e manako Satani ke mafau‵fau tatou ki ei?

¹⁶ E manako a Satani ke mafau‵fau tatou me e se mafai ne tatou o fakafiafia a Ieova. E manako a ia ke loto vāivāi tatou kae mafau‵fau me seai eiloa se faka‵leiga ki ‵tou fakalavelave. E se manako a ia ke tali‵tonu tatou ki ‵tou taina Kelisiano, kae e se manako foki a ia ke fia‵fia tatou. (Efeso 2:2) E iloa ne Satani me i kilokiloga sē ‵lei e mafai o fakamasei ei tatou e penā foki mo ‵tou fesokotakiga mo te Atua. Kae ko oti ne tuku mai ne Ieova se fesoasoani ke mafai o taua atu tatou ki kilokiloga sē ‵lei penā. Ne tuku mai ne ia ki a tatou te fakamoemoega.

17. E pefea te tāua o te fakamoemoega?

¹⁷ I te 1 Tesalonia 5:8, ne fakatusa ne te Tusi Tapu a te ‵tou fakamoemoega ki se puloutau telā e puipui ei te ulu o se sotia i te taua, kae taku i ei te puloutau tenā ki te “fakamoemoega o te fakaolataga.” A te fakamoemoe ki folafolaga a Ieova ka mafai ei o puipui ‵tou mafaufau kae fesoasoani mai ke ‵teke atu ki mafaufauga sē ‵lei penā.

18, 19. Ne fakamalosi aka pefea a Iesu ne te fakamoemoega?

¹⁸ Ne fai ne te fakamoemoega o Iesu ke malosi a ia. I te ‵toe po o tena olaga i te lalolagi nei, ne taotaomaki eiloa a ia ne fakalavelave faiga‵ta. Ne fakatogafiti a ia ne se taugasoa pili o ia. Ne fakafiti tena suā taugasoa me e se iloa ne ia a Iesu. Ne tiakina a ia ne nisi o latou kae ‵tele. A tino ‵tonu o tena fenua ne ‵teke atu ki a ia, kae ‵losi atu ke fakasaua a ia ki te mate. Se a te mea ne fesoasoani atu ki a ia ke kufaki i mea fakalogo‵mae konei? “Ona ko te fiafia telā i ana mua ne kufaki ei ne ia te pou fakasaua, ne seki saga atu ki tena masiasi, kae ne sagasaga ifo i te feitu fakaatamai o te nofogaaliki o te Atua.”—Epelu 12:2.

¹⁹ Ne iloa ne Iesu me kafai e fakatuanaki a ia, ka avatu ne ia a vikiga ki tena Tamana kae fakatalitonu atu ne ia i a Satani se tino loi. Ne maua ne ia te fiafia lasi ona ko te fakamoemoega tenei. Ne iloa foki ne ia me ko pili fua o toe fakatasi lāua mo tena Tamana i te lagi. Ne fesoasoani atu a te fakamoemoega tenei ke kufaki a ia. E pelā mo Iesu, e ‵tau mo tatou o ‵saga tonu ki ‵tou fakamoemoega. Ka fesoasoani mai ei ke kufaki tatou faitalia a mea ‵tupu.

20. Se a te mea e mafai o fesoasoani atu ke maua ne koe se kilokiloga ‵lei?

²⁰ E lavea ne Ieova tou fakatuanaki mo tou kufaki. (Isaia 30:18; faitau te Malaki 3:10.) Ne tauto mai a ia me ka “tuku atu ne ia a manakoga o tou loto.” (Salamo 37:4) Tela la, saga tonu ki tou fakamoemoega. E manako a Satani ke galo i a koe a tou fakamoemoega kae ke mafaufau koe me i folafolaga a Ieova e se mafai o fakataunu. Kae e se mafai ne ia o talia ke fakatakavale koe ne mafaufauga sē ‵lei! Kafai e lavea ne koe me ko gasolo o matafitafi tou fakamoemoega, akai atu ki a Ieova mō se fesoasoani. Ke masaua a pati i te Filipi 4:6, 7: “Ke mo a ma manava‵se koutou ki so se mea, kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga, kae ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo te malosi o otou mafaufau e auala i a Keliso Iesu.”

21, 22. (a) Se a te fuafuaga a Ieova mō te lalolagi? (e) Se a te mea ka fakaiku aka ne koe ke fai?

²¹ Ke fakaavanoa faeloa a taimi ke mafaufau ‵loto ki te olaga gali i aso mai mua. Ko pili nei o tapuaki atu a tino ola katoa ki a Ieova. (Fakaasiga 7:9, 14) Mafaufau ki te olaga i te lalolagi fou. Ka gali fakafia atu i lō te mea telā e mafau‵fau tatou ki ei! Ka fakaseai atu a Satani, ana temoni, mo amioga ma‵sei katoa. A koe ka se toe masaki, kae ka se mate foki. Kae ka ala aka faeloa koe mo te malosi katoatoa i aso takitasi mo te fiafia i a koe e ola. A tino katoa ka ga‵lue fakatasi ke fai te lalolagi e pelā me se palataiso. A tino katoa ka maua ne latou a meakai aoga mo se koga saogalemu ke ‵nofo i ei. Ka seai ne tino ma‵sei kae fakasaua kae ka fakatau fakaasi atu ne latou te alofa tonu te suā tino ki te suā tino. Fakamuli loa, ka maua ne tino katoa i te lalolagi a “te saolotoga ‵malu o tama a te Atua.”—Loma 8:21.

²² E manako a Ieova ke fai ne koe a ia e pelā me ko tou toe Taugasoa pele. Tela la, ke fai ne koe te ‵toe mea e mafai o fai ke fakalogo ki a Ieova kae fakapilipili atu ki a ia i aso takitasi. E tonu, ke na tumau eiloa a tatou katoa i loto i te alofa o te Atua ki te se-gata-mai!—Iuta 21.