MANATU I TE 6

Fai ke Manino te Pogai e Fakaaoga ei se Tusi Faitau

Ioane 10:33-36

MEA E ‵TAU O FAI: Ke mo a ma faitau atu fua se tusi faitau ko fano ei ki te suā manatu. Fai ke maina faka‵lei au tino fakalogo‵logo i te sokoga o te tusi faitau ne faitau ne koe mo te manatu a koe.

TE AUALA KE FAI EI:

Onoono ki pati tāua. Kafai ko oti ne faitau atu se tusi faitau, faka‵mafa atu a pati kolā e fakamatala mai ei te manatu tāua a koe. E fai ne koe te mea tenei mai te fakafoki‵foki atu o pati konā io me mai te faiga o fesili kolā e fai ei ke lavea ne au tino fakalogo‵logo a pati tāua konā.

Kafai e fakaaoga ne koe ne nisi pati aka ke faka‵mafa ki ei te manatu i te tusi faitau, fakamautinoa aka me lavea faka‵lei ne au tino fakalogo‵logo te sokoga o pati i te Tusi Tapu mo te manatu tāua a koe.
Faka‵mafa te manatu tāua. Kafai ne fakaasi atu ne koe muamua a te pogai e ‵tau ei o faitau ki te tusi faitau tenā, fakamatala atu te auala e ‵lago atu ei a pati tāua i te tusi faitau ki te pogai tenā.

I te taimi e sau‵tala ei ki te tusi faitau, tuku ke matala tau Tusi Tapu. Ka fesoasoani atu te mea tenei ke lavea ne au tino fakalogo‵logo te sokoga o au pati mo te fuaiupu ne fatoa oti ne faitau koe ki ei.
Fakafaigofie te auala e fakagalue ei se tusi faitau. Kalo kea‵tea mai te faipati ki manatu kolā e se fetaui tonu mo te manatu tāua. Mai mea kolā ko oti ne iloa ne au tino fakalogo‵logo e uiga ki te mataupu, fakaiku aka me ne a fakamatalaga e manakogina ke fai atu ko te mea ke manino kae ke malamalama au tino fakalogo‵logo i te manatu.