MANATU I TE 11

Faipati mo te Loto Finafinau

Loma 12:11

MEA E ‵TAU O FAI: Fakamalosi au tino fakalogo‵logo i te auala e faipati ei koe.

Fai ke otia tou loto i ei. I te taimi e fakatoka ei koe ke fai tau lāuga, ke mafaufau ‵loto ki te tāua o tau fekau. Fai ke iloa faka‵lei ne koe tau mataupu ko te mea ke faipati atu koe mai tou ‵kano loto tonu.
Mafaufau ki au tino fakalogo‵logo. Mafaufau ‵loto ki te aoga ki nisi tino a fakamatalaga kolā e faitau io me akoako atu ne koe. Mafaufau ki auala ka fakaoko atu ei ne koe a fakamatalaga konā i se auala telā ka fai ei ke lasi te loto fakafetai o latou ki ei.
Fai ke matagi tau lāuga. Faipati atu mo te loto finafinau. Fakaaoga a tāga masani kae ke fakaasi atu i foliga i ou mata a lagonaga ‵tonu o koe.

Fakaeteete ke mo a ma fakafoki‵foki faeloa se tāga e tasi a koe. Fakaaoga a tāga kolā e isi ne uiga ki ei. Fakaasi atu te loto finafinau māfai ko akoako atu a manatu tāua kae māfai ko fakamalosi atu ki au tino fakalogo‵logo ke fakagalue a mea konā. Ke mo a ma fakafi‵ta ne koe au tino fakalogo‵logo mai te fakaasi atu te lasi o tou loto finafinau i te taimi kātoa e fai ei tau lāuga.