Faipati i te Auala Masani

Mea ne Fai ne Filipo

VITIO: Ne talai a Filipo ki te Eunuka Aitiope

1. Onoono ki te VITIO, io me faitau te Galuega 8:​30, 31. Kae mafaufau ki fesili konei mai lalo:

1. a. Ne kamata pefea ne Filipo te sau‵talaga?

2. e. Kaia ne fai te mea tenei mo fai se auala masani ke kamata se sau‵talaga kae akoako atu a mea ‵fou ki te tagata tenei?

Se a te Mea e Tauloto ne Tatou Mai i a Filipo?

2. Kafai e kamata te sau‵talaga i te auala masani, ka fai ei ke faigofie ki te suā tino ke tuku mai ana manatu ki te fekau telā e folafola atu.

Fakaakoako ki a Filipo

3. Ke onoono faka‵lei. A foliga o te tino mo te auala e gasuesue ei a ia e mafai o fakaasi mai ki a koe a mea e uke. E mata, e foliga fiafia te tino o faipati ki a koe? E mafai o kamata koe o fakaasi atu se munatonu mai i te Tusi Tapu mai i te fesili atu, “E mata, e iloa ne koe me . . . ?” Ke mo a ma faimalō ke fai se sau‵talaga mo se tino telā e se fia faipati atu.

4. Ke kufaki. Ke mo a ma mafaufau koe me e ‵tau eiloa o akoako atu fakavave se munatonu mai i te Tusi Tapu i te taimi tena. Faka‵tali ki te taimi tonu ke mafai o kamata te sau‵talaga i te auala masani. I nisi taimi, kāti e manakogina ke faka‵tali ki te suā taimi e toe fetaui ei koe mo te tino tena.

5. Ke toka o fai a fakamafuliga. E mafai o mafuli te sau‵talaga ki mea kolā ne seki fakamoemoe koe ki ei. Tela la, ke fakaasi atu ki te tino se mea telā e fetaui ‵lei mo ia, faitalia foki loa mafai e iku atu ki se mataupu telā ne seki mafaufau koe ki ei.