Fakatuanaki​—Se Uiga Fakamalosi Loto

E MAUA i te fakatuanaki a te malosi fakaofoofogia. E pelā me se fakaakoakoga, e tiga eiloa e manako a Satani ke tamate tatou i te feitu faka-te-agaga, ko te fakatuanaki e mafai ei o “tamate ne [tatou] ki ei a matasana ‵ka a te tino masei.” (Efe. 6:16) Ona ko te fakatuanaki, ko mafai ne tatou o fakafesagai atu ki fakalavelave kolā e pelā me ne mauga i te ‵lasi. Ne fai atu a Iesu ki ana soko: “Kafai e fai te otou fakatuanaki e pelā mo te lasi o te fuaga o te sinapi, ka fai atu koutou ki te mauga tenei, ‘Masiki mai i konei ki te koga telā,’ ko te mea eiloa ko masiki.” (Mata. 17:20) Ona ko te mea e mafai ne te fakatuanaki o fakamalosi tatou i te feitu faka-te-agaga, e ‵tau o mafau‵fau faka‵lei tatou ki fesili konei: Se a te fakatuanaki? E pokotia pefea te tulaga o ‵tou loto i te ‵tou fakatuanaki? E mafai pefea o fakamalosi aka a ‵tou fakatuanaki? Kae ko oi te tino e ‵tau o fakatuanaki tatou ki ei?—Loma 4:3.

SE A TE FAKATUANAKI?

E uke atu a mea e ‵tau o aofia i te fakatuanaki i lō te talitonu fua io me fai ke iloa te munatonu, me ne “tali‵tonu foki a temoni [me i te Atua e ola] kae pole‵pole i te ma‵taku.” (Iako. 2:19) Tela la, se a la te fakatuanaki?

E fakamatala mai i te Tusi Tapu me e lua a vaega o te fakatuanaki. Muamua la, “a te fakatuanaki ko te talitonu mo te mautinoa ki mea kolā e fakamoe‵moe tatou ki ei.” (Epe. 11:1a) Kafai koe fakatuanaki, e talitonu katoatoa koe me i mea katoa e fai mai ne Ieova e ‵tonu kae ka fakataunu eiloa. E pelā me se fakaakoakoga, ne fai atu a Ieova ki te kau Isalaelu: “Kafai e mafai o ofa ne koe taku feagaiga e uiga ki te ao mo taku feagaiga e uiga ki te po, ke taofi ei a te ao mo te po ke mo a ma oko mai i lā taimi tonu, tenā ko mafai ei o ofa taku feagaiga ne fai mo taku tavini ko Tavita.” (Iele. 33:20, 21) E mata, ka mataku eiloa koe me ka mafai o se sae io me tō te mata o te la, ko fai ei ke seai se ao io me se po? Kafai e se fakalotolotolua koe e uiga ki tulafono o te iunivesi kolā e fakatumau ne ia te tamilosaga a te lalolagi i tena tulaga tonu mo tena fakatamilomiloga foki i tafa o te la, e mata, e ‵tau foki mo koe o fakalotolotolua me ka sē fakataunu ne te Tino telā ne māfua mai i a ia a tulafono konei ana pati? Ikai eiloa!—Isa. 55:10, 11; Mata. 5:18.

Te lua, a te fakatuanaki ko “te fakaasiga manino o mea ‵tonu kolā e se lavea ki mata.” A te fakatuanaki ne fakamatala mai e pelā me ko “te fakaasiga manino” io me ko “fakamaoniga kolā e fakatalitonugina,” o mea kolā e se lavea ki mata kae ne mea ‵tonu eiloa. (Epe. 11:1, fml.) I te auala fea? Mafaufau la me e ‵sili atu se tamaliki ki a koe. ‘E iloa pefea ne koe me e isi se ea?’ E tiga eiloa e seki lavea ne koe a te ea, e mafai o fesoasoani atu koe ki te tamaliki ke mafaufau ki fakamaoniga me e isi eiloa se ea—te mānava, te gasuesuega o te matagi, mo nisi mea aka. Kafai ko fakamaoni aka ne te tamaliki a fakaasiga manino konā, ka talitonu a ia e uiga ki se mea telā e se mafai o lavea ne ia. I se auala tai ‵pau, a te fakatuanaki e fakavae ki se fakatalitonuga mautinoa.—Loma 1:20.

E TĀUA A TE TULAGA TONU O TE LOTO

Ona ko te fakatuanaki e fakavae ki fakamaoniga, ke maua te fakatuanaki, e ‵tau mo se tino o ‵sala atu ki te “iloa tonu” e uiga ki te munatonu. (1 Timo. 2:4) Kae e se lava fua i te mea tenā. Ne tusi mai te apositolo ko Paulo: “Me i te loto e fai ei ke fakaasi atu faeloa ne te tino a te fakatuanaki ke maua i ei te amiotonu.” (Loma 10:10) E se ‵tau fua mo te tino o talitonu ki te munatonu kae e ‵tau o fakatāua foki ne ia. I te faiga tenā, ka fakamalosi aka a ia ne te fakatuanaki ke ola e ‵tusa mo te munatonu. (Iako. 2:20) A te tino telā e seai sena loto fakafetai mō te munatonu e mafai o ‵teke atu foki ki fakaasiga manino me e se talia ke ‵fuli ana talitonuga io me manako o fai a mea kolā e filifili ne ia. (2 Pe. 3:3, 4; Iuta 18) Tela la i taimi o te Tusi Tapu, e se ko tino katoa kolā ne molimau ne latou a vavega ne ati aka olotou fakatuanaki. (Nume. 14:11; Ioa. 12:37) E tuku mai ne te agaga tapu o te Atua a te fakatuanaki ki tino fua kolā e fia‵fia ki te munatonu i lō te loi.—Kala. 5:22; 2 Tesa. 2:10, 11.

TE AUALA NE ATI AKA NE TAVITA SE FAKATUANAKI MALOSI

E aofia i a latou kolā ne tu ‵kese te lotou fakatuanaki ko te Tupu ko Tavita. (Epe. 11:32, 33) E se ko tino katoa i te kāiga o Tavita ne maua ne latou te vaegā fakatuanaki tenā. E pelā me se fakaakoakoga, i se taimi e tasi, a Eliapo, te taina matua o Tavita, ne seki lava tena fakatuanaki i te taimi ne kaitaua ei a ia ki a Tavita kae fai atu me i a Tavita ne isi sena manakoga masei i tena loto ke taua atu ki a Koliata. (1 Samu. 17:26-28) E seai se tino e fanau mai mo te fakatuanaki; io me ne maua ne ia te fakatuanaki mai i ana mātua, tela la a te fakatuanaki o Tavita ne fakavae eiloa ki tena fesokotakiga ‵lei mo te Atua.

I te Salamo 27, e fakaasi mai ne Tavita te auala ne maua ei ne ia te vaegā fakatuanaki malosi penā. (Fpu. 1) Ne mafaufau ‵loto a Tavita ki mea ne fai ne ia i aso ko ‵teka mo te auala ne saga atu ei a Ieova o taua atu ki ana fili. (Fpu. 2, 3) Ne fakatāua tonu ne ia a te fakatokaga a Ieova mō te tapuakiga. (Fpu. 4) Ne tapuaki atu a Tavita ki te Atua fakatasi mo ana taina tali‵tonu i te faleie tapu. (Fpu 6) Ne fakamolemole atu a ia ki a Ieova i se ‵talo. (Fpu.7, 8) Ne manako foki a Tavita ke akoakogina a ia ki auala o te Atua. (Fpu. 11) Ko oko eiloa i te tāua o te uiga tenei ki a Tavita telā ne ‵sili atu ne ia se fesili telā ne iloa ne ia te tali ki ei: “Tefea te koga ka nofo au i ei moi ne seai soku fakatuanaki?”—Fpu. 13.

TE AUALA KE FAKAMALOSI AKA TOU FAKATUANAKI

E mafai o fakatuanaki koe e pelā mo Tavita māfai e fakaakoako koe ki tena kilokiloga mo ana uiga kolā ne fakaasi mai i te Salamo 27. Ona ko te mea e fakavae a te fakatuanaki ki te iloaga tonu, ko te uke o au mea e tauloto i te Muna a te Atua mo tusi kolā e fakavae ki te Tusi Tapu, ko te faigofie foki ke maua ne koe a te uiga tenei o fuataga o te agaga o te Atua. (Sala. 1:2, 3) Fakaavanoa se taimi ke mafaufau ‵loto ki au mea e sukesuke. A te mafaufau ‵loto ko te fakavae telā e fakamalosi aka ne ia a te loto fakafetai. Kafai ko ‵poko tou loto fakafetai mō Ieova, ka manako foki koe o fakagalue aka tou fakatuanaki mai te tapuaki ki a ia i fakatasiga a te fakapotopotoga kae fakaasi atu ki nisi tino a tou fakamoemoega. (Epe. 10:23-25) E se gata i ei, e fakaasi atu ne tatou te fakatuanaki māfai e tumau tatou i ‘te ‵talo faeloa kae ke mo a ma ‵fiu.’ (Luka 18:1-8) Tela la, “‵talo i taimi katoa” ki a Ieova, kae talitonu me ka ‘atafai mai a ia ki a koe.’ (1 Tesa. 5:17; 1 Pe. 5:7) A te fakatuanaki e fakamalosi ne ia tatou ke gasue‵sue, kae ko ‵tou faifaiga ka fakamalosi ne ia a ‵tou fakatuanaki.—Iako. 2:22.

FAKAGALUE AKA TE FAKATUANAKI KI A IESU

I te fakaafiafi mai mua o mate a ia, ne fai atu a Iesu ki ana soko: “Fakaasi atu faeloa te fakatuanaki ki te Atua; kae fakaasi mai foki te fakatuanaki ki a au.” (Ioa. 14:1) Tela la, e ‵tau o fakagalue aka ne tatou a te fakatuanaki e se fua ki a Ieova kae penā foki ki a Iesu. E mafai pefea ne koe o fakagalue aka te fakatuanaki ki a Iesu? Ke onoono nei tatou ki auala e tolu.

Muamua la, kilo atu ki te togiola e pelā me se meaalofa totino a te Atua ki a koe. Ne fai mai te apositolo ko Paulo: “E ola eiloa au i te fakatuanaki ki te Tama a te Atua, telā ene alofa mai ki a au kae tuku mai foki tena ola mō au.” (Kala. 2:20) Kafai e fakagalue aka ne koe te fakatuanaki ki a Iesu, ka talitonu katoatoa koe me ka galue a te togiola ki a koe, ko te fakavae mō te fakamagaloga o au agasala, e tuku atu ei ki a koe te fakamoemoega ke ola ki te se-gata-mai, kae ko te fakamaoniga sili eiloa o te alofa o te Atua mō koe. (Loma 8:32, 38, 39; Efe. 1:7) Ka fakamalosi ne te mea tenei ke mo a e maua ne koe a lagonaga sē ‵lei.—2 Tesa. 2:16, 17.

Te lua, fakapilipili atu ki a Ieova i te ‵talo e auala i te taulaga a Iesu. Ona ko te togiola, ko mafai o ‵talo atu tatou ki a Ieova “mo te saolotoga o fai‵pati atu, ko te mea ke maua ne tatou te alofa fakamagalo mo te alofa tauanoa ke fesoasoani mai ki a tatou i te taimi tonu.” (Epe. 4:15, 16; 10:19-22) A te ‵talo e fakamalosi ne ia ‵tou fakaikuga ke ‵teke atu ki fakaosoosoga ke agasala.—Luka 22:40.

Te tolu, ke faka‵logo ki a Iesu. Ne tusi mai te apositolo ko Ioane: “A te tino telā e fakaasi atu faeloa ne ia te fakatuanaki ki te Tama e maua ne ia te ola se-gata-mai; a te tino telā e se fakalogo ki te Tama ka se lavea ne ia te ola, kae ka tumau eiloa te kaitaua o te Atua i luga i a ia.” (Ioa. 3:36) Onoono aka la me ne faka‵kese ne Ioane a te fakatuanaki mo te sē fakalogo. Tela la, e fakatuanaki koe ki a Iesu māfai e fakalogo koe ki a ia. E fakalogo koe ki a Iesu mai te tautali i “te tulafono a Keliso,” ko tena uiga, ko mea katoa kolā ne akoako kae fakatonu mai ne ia. (Kala. 6:2) E fakalogo foki koe ki a Iesu mai te tautali i te takitaki telā e tuku mai ne ia e auala i “te tavini fakamaoni kae poto.” (Mata. 24:45) Mai te fakalogo ki a Iesu, ka maua eiloa ne koe a te malosi ke kufaki i mea faiga‵ta kolā e fai pelā me se matagi malosi.—Luka 6:47, 48.

“ATI AKA KOUTOU I LUGA I TE OTOU FAKATUANAKI”

I se taimi e tasi, ne tagi atu se tagata ki a Iesu, penei: “Au e fakatuanaki! Fesoasoani mai ke fakamalosi aka toku fakatuanaki!” (Male. 9:24) Ne isi sena tamā fakatuanaki, kae ko te tagata tenei ne fakaasi atu ne ia te agamalu me koi manakogina malosi ne ia se fakatuanaki. E pelā mo te tagata tenei, ka isi eiloa ne tulaga i te olaga kolā ka manakogina malosi i ei ne tatou a te fakatuanaki. Kae e mafai ne tatou katoa o fakamalosi aka a ‵tou fakatuanaki i te taimi nei. E pelā mo te mea ne lavea ne tatou, e fakamalosi aka ne tatou a te ‵tou fakatuanaki mai te suke‵suke ki te Muna a te Atua kae mafaufau ‵loto ki ei, kae ka faka‵poko ne ia te ‵tou loto fakafetai ki a Ieova. Ka gasolo aka foki o malosi a ‵tou fakatuanaki mafai e tapuaki fakatasi atu tatou mo ‵tou taina tali‵tonu ki a Ieova, fakailoa atu ki tino a te ‵tou fakamoemoega, kae ke ‵talo faeloa. E se gata i ei, kafai e fakamalosi aka ne tatou a te ‵tou fakatuanaki, ko maua eiloa ne tatou a te taui sili. E fai mai te Muna a te Atua ki a tatou, penei: “Aku fagasele, ke ati aka koutou i luga i te otou fakatuanaki e sili i te tapu, . . . ko te mea ke tumau koutou i loto i te alofa o te Atua.”—Iuta 20, 21.