MATAUPU 23

Te Papatisoga—Se Fakamoemoega Aoga ‵ki ke Kausaki ki ei!

Printed Edition

Ne akoako mai a Iesu me i te papatisoga se mea e ‵tau o fai ne Kelisiano. (Faitau te Mataio 28:19, 20.) Kae se a te papatisoga? Ne a mea e ‵tau o fai ne se tino ke papatiso a ia?

1. Se a te papatisoga?

A te pati “papatiso” ne vau mai te pati Eleni telā e fakauiga ki te “ufi” ki lalo i te vai. I te taimi ne papatiso ei a Iesu, ne ufi a ia ki lalo i te Vaitafe ko te Iolitana, oti aka ‘fanaka ei a ia mai te vai.’ (Maleko 1:9, 10) E penā foki a Kelisiano ‵tonu, e papatiso latou māfai ko oti ne ufi katoatoa latou ki lalo i te vai.

2. Se a te mea e fakaasi mai i te papatisoga?

Kafai ko papatiso se tino e fakaasi mai ne ia me ko oti ne tukugina atu a ia ki a Ieova te Atua. E fai pefea ne se tino te tukuatuga tenā? A koi tuai o papatiso, e fai atu ne ia ki a Ieova, i se ‵talo totino, me ko manako a ia o tavini atu ki a Ia ki te se-gata-mai. E tauto atu a ia me ka tapuaki fua a ia ki a Ieova kae ko te faiga o te loto o te Atua ka fai pelā me ko te ‵toe mea tāua i tena olaga. Ko fakaiku aka ei ne ia “ke se toe mafaufau ki a ia eiloa, kae ke. . . tumau i te tautali” atu i akoakoga mo mea ne fai ne Iesu. (Mataio 16:24) A tena tukuatuga mo tena papatisoga ka fai ei ke maua ne ia se va fakataugasoa pili mo Ieova mo taina tapuaki.

3. Ne a mea e ‵tau o fai ne se tino ko te mea ke mafai o gasolo atu ki mua i te papatisoga?

E mafai o fakatoka koe ki te papatisoga mai te tauloto ki mea e uiga ki a Ieova kae ati aka tou fakatuanaki ki a ia. (Faitau te Epelu 11:6.) I te taimi e gasolo aka ei o lasi tou iloa mo tou fakatuanaki, ka gasolo aka foki o lasi tou alofa ki a Ieova. E mautinoa me ka manako foki koe o talai atu e uiga ki a ia kae ola e ‵tusa mo ana tulaga. (2 Timoteo 4:2; 1 Ioane 5:3) Kafai ko kamata o ola se tino i te “auala telā e talia ne Ieova kae ke fakafiafia katoatoa atu ki a ia,” e mafai o fakaiku aka ne ia ke tuku atu tena ola ki te Atua kae papatiso.—Kolose 1:9, 10.a

KELI MALOSI IFO

Onoono ki mea e mafai o tauloto ne tatou mai te papatisoga o Iesu mo te auala e mafai ei o fakatoka se tino ke fai ne ia te ‵toe mea tāua tenei.

4. Mea e tauloto ne tatou mai te papatisoga o Iesu

Faitau te Mataio 3:13-17 ke iloa ne koe a mea e uke atu e uiga ki te papatisoga o Iesu. Ka oti ko sau‵tala ei ki fesili konei:

E mata, a Iesu koi pepe i te taimi ne papatiso ei?
Se a te auala ne papatiso ei a ia? E mata, ne fakamatulutulu atu fua a vai ki luga i tena ulu?

A te galuega fakapito telā ne tuku atu ne te Atua ki a Iesu ke fai i te lalolagi, ne kamata i te taimi ne papatiso ei a ia. Faitau te Luka 3:21-23 mo te Ioane 6:38, ko sau‵tala ei ki te fesili tenei:

Mai tua o te papatisoga o Iesu, se a te galuega ne fakamuamua ne ia i tena olaga?

5. A te papatisoga se fakamoemoega e mafai o kausaki ki ei

E mafai o faigata i te taimi muamua a te mafaufau ke fai te tukuatuga kae papatiso. Kae e mafai eiloa o gasolo atu koe ki mua ke oko ki te taimi ko maua ei te loto talitonu ke fai a te fakaikuga tāua tenā. Ke onoono ki ata o nisi tino kolā ne fai ne latou te mea tenā, pei te VITIO.

VITIO: Ke Ati Aka se Va Fakataugasoa mo Ieova (1:11)

Faitau te Ioane 17:3 mo te Iakopo 1:5, ko sau‵tala ei ki te fesili tenei:

Ne a mea e mafai o fesoasoani atu ki se tino ke fakatoka mō te papatisoga?

A. Se fafine ko fai tena tukuatuga ki te Atua e auala i se ‵talo.

E. Ko te fafine foki tenā ko papatiso e pelā me se Molimau a Ieova mai te ufi katoatoa ki te vai.

‵tou tukuatuga ko te taimi e fai atu ki a Ieova me ko ma‵nako tatou o tavini ki a ia ki te se-gata-mai
‵tou papatisoga, ko fakaasi atu ne tatou i mua o tino e tokouke me ko oti ne fai te ‵tou tukuatuga ki te Atua

6. Kafai ko papatiso tatou, ko aofia ei tatou i te kāiga o Ieova

Kafai ko oti ne papatiso tatou, ko aofia ei tatou i se kāiga telā e ‵kau fakatasi i te lalolagi kātoa. Faitalia me ne o‵mai matou mai koga mo vaegā olaga kese‵kese, e ‵pau eiloa a mea e tali‵tonu matou katoa ki ei mo tulaga i mea tau amioga e fakatāua ne matou i te olaga. Faitau te Salamo 25:14 mo te 1 Petelu 2:17, ko sau‵tala ei ki te fesili tenei:

E aoga pefea a te papatisoga ki te va fakataugasoa o se tino mo Ieova e penā foki mo tino kolā e tapuaki atu ki a Ia?

Ata valevale: Se tuagane papatiso e mafaufau mo te fiafia ki te gali o tena fesokotakiga mo nisi tino i te fakapotopotoga. 1. E fai atu ne ia a mea e ‵mafa i tena loto ki se tuagane. 2. E fesoasoani atu a ia o fakasasale se tuagane matua. 3. E ‵kai fakatasi a ia mo taina mo tuagane mai tupulaga kese‵kese. 4. E talai atu a ia fakatasi mo se tuagane ki se tagata. 5. E pei ne ia tena ata fakatasi mo nisi Molimau mai nisi fenua i se fono lasi.

MEA E FAI MAI NE NISI TINO: “Au seki toka ke papatiso.”

Kafai e penā loa ou lagonaga, e mata, koi mafaufau koe me i te papatisoga se fakamoemoega aoga ke kausaki ki ei?

MANATU AOGA

Ne akoako mai a Iesu me e ‵tau mo Kelisiano o papatiso. Ke taunu te fakamoemoega tenā, e ‵tau o fakamalosi aka ne se tino tena fakatuanaki ki a Ieova, ke ola e ‵tusa mo Ana tulaga, kae ke fai tena tukuatuga ki a Ia.

Fesili

Se a te papatisoga, kae kaia e tāua ei?
Se a te sokoga i te faiga o te tukuatuga mo te papatisoga?
Ne a mea e ‵tau o fai ko te mea ke mafai o oko atu ki te tukuatuga mo te papatisoga?

Taimi ne oti ei te mataupu:

Mea e Mafai o Fai

Onoono ki fesili i te Vaega 4, “E Mata, ko Toka Au ke Talai Fakatasi mo te Fakapotopotoga?” mo te “E Mata, ko Toka Au ke Papatiso?,” ko te mea ke iloa ne koe a mea e ‵tau o fai ke toka ei koe mō aso mai mua.

Nisi mea:

Nisi mea e mafai o fai ne koe

NISI FAKAMATALAGA

Onoono me se a te mea e fakauiga ki ei te papatisoga mo mea e se fakauiga ki ei.

“Se a te Papatisoga?” (Mataupu i te neti)

Faitau ki auala e mafai o gasolo atu se tino ki mua i te papatisoga.

“A te Alofa mo te Loto Fakafetai ki a Ieova e Iku Atu ki te Papatisoga” (Te Faleleoleo Maluga, Mati 2020)

Faitau ki se tala o se tagata telā ne seki fakavae fua tena fakaikuga ke papatiso ki ana lagonaga.

“E Ma‵nako Lāua ke Fakatalitonu Aka ne Au me se a te Mea Tonu Telā e Faipati ki ei te Tusi Tapu” (Te Faleleoleo Maluga, Fepuali 1, 2013)

Mafaufau ki te auala e fai ei te papatisoga e pelā me se fakamoemoega aoga ‵ki ke kausaki ki ei mo auala ke fakatoka ki ei.

“E Mata, e ‵Tau Au o Papatiso?” (E Fesili Mai a Talavou —Tali Aoga, Tusi 2, mataupu 37)

a Kafai ko oti ne papatiso se tino i tena lotu mua, e ‵tau eiloa o toe papatiso a ia. Kaia? Me i tena lotu mua ne seki akoako i ei a te munatonu mai te Tusi Tapu.—Onoono ki te Galuega 19:1-5 mo te Mataupu 13.