MATAUPU 29
Ne a Mea e ‵Tupu Māfai ko ‵Mate Tatou?
Kai galo aka eiloa sou tino pele i te mate? I te taimi fakalogo‵mae tenā, kāti ka mafaufau koe: ‘Ne a mea e ‵tupu māfai ko ‵mate tatou? E mata, e isi se fakamoemoega ke mafai o toe fetaui tatou mo ‵tou tino pele?’ I te mataupu tenei mo te suā mataupu ka sau‵tala tatou ki tali fakamafanafana mai te Tusi Tapu.
1. Ne a mea e ‵tupu māfai ko ‵mate tatou?
Ne fakatusa ne Iesu a te mate ki te moe ‵nau. A te tino telā e ‵nau ‵ki tena moe e se iloa ne ia a mea e ‵tupu i ana tafa. Se a te auala e ‵pau ei te mate mo te moe? Kafai ko mate se tino, ko se lagona ne ia se ‵mae. Ko se toe ai ne ana lagonaga sē sologa faitalia te lasi o tena alofa ki ana taugasoa mo kāiga. A “tino ‵mate e seai eiloa se lotou mea e iloa,” ko pati i te Tusi Tapu.—Faitau te Failauga 9:5.
2. E aoga pefea ki a tatou ke iloa atu a te munatonu e uiga ki te mate?
E ma‵taku a tino e tokouke i te mate—kae penā foki ki tino ‵mate! Kae e fakamafanafana eiloa a pati i te Tusi Tapu e uiga ki te mate. Ne fai mai a Iesu: “Ko te munatonu ka fakasaoloto ne ia koutou.” (Ioane 8:32) E ‵kese mai i mea e akoako atu ne nisi lotu, e se akoako atu i te Tusi Tapu me e isi se mea i loto i te tino telā e tumau i te ola māfai ko mate. Tela la, kafai ko mate se tino e se logo‵mae a ia. E se gata i ei, kafai e seai se mea e iloa ne se tino māfai ko mate, e se mafai foki ne latou o fakalogo‵mae mai. Tela la, e se manakogina ke fakafiafia io me tapuaki atu ki tino ‵mate, kae e se ‵tau foki o ‵talo tatou mō latou.
E fai mai a nisi tino me e mafai o fesokotaki latou mo tino ‵mate. Kae e se mafai o tupu te mea tenā. E pelā mo te mea ne fatoa oti ne tauloto tatou ki ei, a tino ‵mate “e seai eiloa se lotou mea e iloa.” A tino kolā e mafau‵fau me mafai o fesokotaki atu latou ki olotou tino pele kolā ko ‵mate, e fesokotaki atu fua latou ki temoni kolā e fakaloiloi mai, i a latou ko tino kolā ko oti ne ‵mate. Tela la, kafai ko iloa ne tatou te munatonu e uiga ki te tino māfai ko mate, e puipui ei tatou mai temoni. Ne fakatonu mai a Ieova ke fakaeteete tatou i te fesokotaki atu ki tino ‵mate me e iloa ne ia i a tatou ka logo‵mae māfai e fesokotaki atu ki temoni.—Faitau te Teutelonome 18:10-12.
KELI MALOSI IFO
Tauloto ki mea kolā e akoako mai i te Tusi Tapu e uiga ki tino ‵mate, kae fakamalosi aka tou fakatuanaki ki te Atua alofa telā e se fakapuapuaga ne ia a tino kolā ko ‵mate.
3. Tauloto ki te tulaga tonu o tino ‵mate
E uke a talitonuga kese‵kese o tino i te lalolagi kātoa e uiga ki mea e ‵tupu māfai ko ‵mate tatou. E tonu, e se ko talitonuga katoa konā e ‵tonu.
Ne a talitonuga masani i te koga e nofo koe i ei e uiga ki tino ‵mate?
Ke iloa ne koe a mea e akoako mai i te Tusi Tapu, pei te VITIO.
Faitau te Failauga 3:20, ko sau‵tala ei ki fesili konei:
E ‵tusa mo te fuaiupu tenā, ne a mea e ‵tupu māfai ko mate se tino?
E mata, e isi se mea i te tino e tumau i te ola māfai ko mate a ia?
E fakamatala mai i te Tusi Tapu a te tala e uiga ki te taimi ne mate ei a Lasalo, se taugasoa pili o Iesu. Kafai e faitau te Ioane 11:11-14, onoono ki te auala ne fakasino atu ei a Iesu ki te tulaga o Lasalo. Ka oti ko sau‵tala ei ki fesili konei:
Se a te mea ne fakatusa ne Iesu ki ei a te mate?
Se a te mea e fakaasi mai i te fakatusaga tenei e uiga ki te tulaga o tino ‵mate?
E mata, e ‵tagi lei ki a koe a te fakamatalaga i te Tusi Tapu e uiga ki te mate?
4. E aoga ki a tatou a te munatonu e uiga ki te mate
Kafai ko iloa ne tatou a te munatonu e uiga ki te mate ko se toe ma‵taku ei tatou ki tino ‵mate. Faitau te Failauga 9:10, ko sau‵tala ei ki te fesili tenei:
E mata, e mafai o fakalogo‵mae mai a tino ‵mate ki a tatou?
A te munatonu i te Tusi Tapu e puipui ei tatou mai te talitonuga me e ‵tau o fakafiafia io me e tapuaki atu tatou ki tino ‵mate. Faitau te Isaia 8:19 mo te Fakaasiga 4:11, ko sau‵tala ei ki te fesili tenei:
Se a tau faka‵tau, ne a lagonaga o Ieova ki se tino telā e tapuaki io me ‵sala ki te fesoasoani o se tino telā ko oti ne mate?
A te munatonu e uiga ki te mate e fakasaoloto ei tatou mai tuu mo aganuu kolā e se fiafia ki ei a Ieova
5. A te munatonu e uiga ki te mate e fakamafanafana mai ki a tatou
Ko oti ne akoako atu ki tino e tokouke me kafai e ‵mate latou ka logo‵mae latou ona ko olotou mea ma‵sei ne fai i aso mua. Kae e fakamafanafana mai eiloa ke iloa atu me seai se tino e logo‵mae māfai ko mate, ke oko foki loa ki se tino ne fai ne ia a mea ma‵sei ‵ki. Faitau te Loma 6:7, ko sau‵tala ei ki te fesili tenei:
E fai mai te Tusi Tapu, me i te mate ko te ‵togi o te agasala, io me e fakasaoloto ei se tino mai te agasala, se a tau faka‵tau, e mata, e logo‵mae nei a te tino telā ko oti ne mate ona ko ana mea ‵se ne fai i aso mua?
Ko te uke o ‵tou mea e iloa e uiga ki a Ieova, ka iloa foki ei ne tatou me e se mafai o talia ne ia ke logo‵mae a tino ‵mate. Faitau te Teutelonome 32:4 mo te 1 Ioane 4:8, ko sau‵tala ei ki fesili konei:
E mata, ka talia ne te Atua telā e fakaasi mai ana uiga i fuaiupu konei ke fakapuapuaga a tino kolā ko oti ne ‵mate?
E mata, e fakamafanafana atu ki a koe a te munatonu e uiga ki te mate? Kaia?
MEA E FAI MAI NE NISI TINO: “Au e se mataku ki mea ka ‵tupu māfai ko mate au.”
Ne a fuaiupu fakamafanafana i te Tusi Tapu e mafai o fakaasi atu ne koe?
MANATU AOGA
Kafai ko mate se tino, ko gata foki tena ola. A tino ‵mate e se logo‵mae, e se mafai foki o fakalogo‵mae ne latou a tino ola.
Fesili
Ne a mea e ‵tupu ki a tatou māfai ko ‵mate?
Ka aoga pefea ki a tatou a te munatonu e uiga ki te mate?
E fakamafanafana mai pefea ki a tatou a te munatonu e uiga ki te mate?
NISI FAKAMATALAGA
Ke onoono me se a te uiga o te pati “solu” e fakaasi mai i te Tusi Tapu.
Onoono aka me e tonu te manatu i te Atua e fakaaoga eiloa ne ia a te afi i seoli ke fakasala ki ei a tino amio ma‵sei.
E mata, e ‵tau mo tatou o ma‵taku ki tino ‵mate?
Faitau ki te auala ne maua ei ne se tagata a fakamafanafanaga i te taimi ne iloa ei ne ia te munatonu e uiga ki mea e ‵tupu māfai ko mate se tino.