Ne a Auala e Talai Atu ei te Tala ‵Lei?

Ko pili fua o fakaseai atu ne Ieova a ‵tou fakalavelave katoa e auala i tena Malo. Ona ko te gali o te tala tenā e ‵tau o folafola atu ne tatou ki nisi tino. Ne manako a Iesu ke folafola atu ne ana soko a te fekau tenei ki tino katoa! (Mataio 28:19, 20) Ne ‵saga atu pefea a Molimau a Ieova ki te fakatonuga a Iesu?

1. Ne fakataunu pefea te Mataio 24:14 i aso nei?

Ne ‵valo mai a Iesu: “Te tala ‵lei tenei o te Malo ka talai atu ki te lalolagi nofoaki kātoa.” (Mataio 24:14) E fia‵fia malosi a Molimau a Ieova ke ‵kau atu ki te galuega tāua tenei. E talai ne matou te tala ‵lei i te lalolagi kātoa i ‵gana e sili atu i te 1,000! E manakogina eiloa a taumafaiga mo fakatokaga e uke ke fai te galuega lasi tenei. E se mafai o fai e aunoa mo te fesoasoani o Ieova.

2. Ne a taumafaiga ne fai ne matou ke talai atu ki tino?

E talai matou i so se koga e maua ei a tino. E pelā mo Kelisiano i te senitenali muamua, e talai matou “mai fale ki fale.” (Galuega 5:42) A te fakatokaga ‵lei tenei e fai ei ke mafai o oko matou ki te fia miliona o tino i tausaga katoa. E talai foki matou i koga e tokouke ei a tino me e se ko tino katoa e ‵nofo faeloa i olotou fale. E ‵sala faeloa matou ki so se avanoaga ke fakailoa atu ki tino a mea e uiga ki a Ieova mo ana fuafuaga.

3. Ko oi e maua ne latou a te tiute ke talai atu te tala ‵lei?

E maua ne Kelisiano ‵tonu katoa a te tiute ke folafola atu a te tala ‵lei ki nisi tino. E fakatāua eiloa ne matou te motou tiute tenā. E talai malosi matou i so se fakanofonofoga ona ko te iloa atu me e faka‵sao i ei a ola o tino. (Faitau te 1 Timoteo 4:16.) E se ‵togi matou i te faiga o te galuega tenei, me fai mai te Tusi Tapu: “Ne maua ne koutou a mea konei e aunoa mo se ‵togi, tuku atu foki e aunoa mo se ‵togi.” (Mataio 10:7, 8) E se ko tino katoa e talia ne latou a te motou fekau. Kae e tumau eiloa matou i te talai atu me se vaega o te motou tapuakiga kae fai ei a Ieova ke fiafia.

KELI MALOSI IFO

4. E ga‵lue malosi matou ke oko atu ki tino katoa

VITIO: Talai Atu ki “Toe Koga ‵Mao i te Lalolagi” (7:33)

• Se a te mea e fakaofoofogia ei ki a koe a taumafaiga a Molimau a Ieova ke talai atu?

Faitau te Mataio 22:39 mo te Loma 10:13-15, ko sau‵tala ei ki fesili konei:

• E fakaasi atu pefea e auala i te ‵tou galuega talai a te ‵tou a‵lofa ki ‵tou tuakoi?

• E pefea a lagonaga o Ieova ki tino kolā e talai atu te tala ‵lei?​—Onoono ki te fuaiupu e 15.

5. E ga‵lue fakatasi matou mo te Atua

E uke a tala e fakamaoni mai ei me e takitaki ne Ieova te motou galuega. E pelā mo te taina ko Paul mai Niu Sila ne fetaui mo se fafine i te galuega mai fale ki fale i se fakaafiafi e tasi. I te taeao eiloa tenā ne ‵talo atu tou fafine ki te Atua, kae fakaaoga ne ia te igoa o te Atua, ko Ieova, kae fakamolemole atu ke asi atu ne tino ki a ia. “E tolu itula mai tua ifo,” ko pati a Paul, “kae oko atu au ki tena fale.”

Faitau te 1 Kolinito 3:9, ko sau‵tala ei ki te fesili tenei:

• E fakaasi mai pefea ne tala e pelā mo te tala mai Niu Sila me e takitaki ne Ieova a te faiga o te galuega talai?

Faitau te Galuega 1:8, ko sau‵tala ei ki te fesili tenei:

• Kaia e ma‵nako ei tatou ki te fesoasoani o Ieova ke fakataunu te ‵tou galuega talai?

E iloa ne koe?

I vaiaso takitasi, i omotou fakatasiga i te vaiaso, e akoako ei matou ke iloa o talai atu. Kafai ko oti ne kau koe ki se fakatasiga i ei, se a tau faka‵tau ki akoakoga e maua i ei?

6. E faka‵logo matou ki te fakatonuga a te Atua ke talai

I te senitenali muamua, ne taumafai a tino ‵teke o taofi aka a soko o Iesu mai te talai atu. Ne ‵pulu ne Kelisiano i aso mua a te lotou saolotoga ke talai atu mai te “fakamau‵tuga o te tala ‵lei mai lalo i te tulafono.” (Filipi 1:7) E fai foki penā a Molimau a Ieova i aso nei.a

VITIO: Ke ‵Pulu te Tala ‵Lei Mai Lalo i te Tulafono (2:28)

Faitau te Galuega 5:27-42, ko sau‵tala ei ki te fesili tenei:

• Kaia e se fakagata ei te ‵tou galuega talai?​—Onoono ki te fuaiupu 29, 38, mo te 39.

MANATU AOGA

Ne fakatonu atu a Iesu ki ana soko ke talai a te tala ‵lei ki atufenua katoa. E fesoasoani atu a Ieova ki ana tino ke fai te galuega tenei.

Fesili

• I auala fea e talai atu ei a te tala ‵lei ki te lalolagi kātoa?

• E fakaasi atu pefea e auala i te ‵tou galuega talai me e a‵lofa tatou ki ‵tou tuakoi?

• Se a tau faka‵tau, e mata, e mafai o fai ne te galuega talai ke fia‵fia tatou? Kaia?

NISI FAKAMATALAGA

Onoono ki te auala e talai atu ei a Molimau a Ieova ki tino i fa‵kai ‵lasi.

Galuega Talai Fakapito i se Fa‵kai Lasi i Paris (5:11)

Ne oko atu pefea a Molimau a Ieova ki tino fakaa‵lofa?

Tausi Atu ki Manakoga Faka-te-Agaga o Tino Fakaa‵lofa (5:59)

Ke fakalogo ki se tala o se tino telā ne fiafia o fakaaoga tena olaga kātoa ke talai atu.

Toku Fiafia me ne Filifili ne Au te Galuega Tenei (6:29)

Ke tauloto ki nisi fakaikuga tāua i fono ma‵luga kolā ne fai ei ke faigofie te talaiatuga o te tala ‵lei.

“Ko Avatu ne Tino Talai o te Malo Olotou Tagi ki Fono Fakamasino” (Ko Pule Mai te Malo o te Atua!, mataupu 13)