MATAUPU 34
E Fakaasi Atu Pefea ‵Tou A‵lofa ki a Ieova?
Kai gasolo aka eiloa o pili tou va ki te Atua talu mai te taimi ne sukesuke ei koe ki te Tusi Tapu? E a, e manako koe ke fakatumau tou va fakataugasoa mo ia? Kafai e penā loa, masaua me kafai e lavea mai ne Ieova te lasi o tou alofa mō ia, ka alofa kae atafai malosi foki a ia ki a koe. E mafai pefea o fakaasi atu ne koe tou alofa ki a ia?
1. E fakaasi atu pefea ne tatou ki a Ieova me e a‵lofa tatou ki a ia?
E fakaasi atu ne tatou te ‵tou a‵lofa ki a Ieova mai te faka‵logo ki a ia. (Faitau te 1 Ioane 5:3.) E se faimalo ne ia a tino ke faka‵logo ki a ia. Kae tuku mai ne ia te avanoaga ki a tatou taki tokotasi ke filifili aka me e faka‵logo tatou ki a ia io me ikai. Kaia? E manako a Ieova ke “faka‵logo [tatou] mo te loto kātoa.” (Loma 6:17) Ko tena uiga, e manako a ia ke fakalogo koe ona ko tou alofa ki a ia, kae e se ko te faimalo. A te Vaega e 3 mo te 4 o te tusi tenei, ne fakatoka ke fesoasoani atu ki a koe ke fakaasi atu tou alofa mō Ieova, mai te faiga o te mea telā e fiafia a ia ki ei, kae ‵kalo keatea mai te mea telā e fakafanoanoa atu ki a ia.
2. Kaia e mafai ei o faigata ke fakaasi atu te ‵tou a‵lofa ki a Ieova?
“E uke a fakalavelave faiga‵ta o te tino amiotonu.” (Salamo 34:19) E taua atu faeloa tatou katoa ki ‵tou tulaga sē ‵lei katoatoa. Kae e mafai foki o fe‵paki tatou mo tulaga faiga‵ta i mea tau tupe, faifaiga sē fakamaoni, mo nisi fakalavelave. Kafai ko fe‵paki mo mea faiga‵ta, e mafai o faigata ke fai ne tatou te mea e manako ki ei a Ieova. E fai penā me e faigofie atu ke fai a te mea ‵se. Kafai e fakamaoni koe o fai a te mea e manako ki ei a Ieova, e fakaasi atu ei me e sili atu tou alofa ki a ia i lō so se isi mea aka. Kae ko fakatalitonu atu foki ne koe a tou alofa fakamaoni ki a ia. Kae ka alofa fakamaoni foki a ia ki a koe. Ka se tiaki lele ne ia koe.—Faitau te Salamo 4:3.
KELI MALOSI IFO
Ke iloilo aka me kaia e tāua ei tou fakalogo ki a Ieova, kae tauloto ki mea e mafai o fesoasoani atu ki a koe ke tumau i te fakamaoni ki a ia.
3. Se kinauga telā e aofia koe i ei
E ‵tusa mo te tusi o Iopu i te Tusi Tapu, ne fai ne Satani a ‵losiga ‵se, e uiga ki te tagata tenei ko Iopu, kae penā foki loa mo tino katoa kolā e ma‵nako o tavini atu ki a Ieova. Faitau te Iopu 1:1, 6–2:10, ko sau‵tala ei ki fesili konei:
E ‵tusa mo pati a Satani, kaia ne fakalogo ei a Iopu ki a Ieova?—Onoono ki te Iopu 1:9-11.
Ne a pati a Satani e uiga ki tino katoa, e aofia i ei koe?—Onoono ki te Iopu 2:4.
Faitau te Iopu 27:5e, ko sau‵tala ei ki te fesili tenei:
Ne fakatalitonu atu pefea ne Iopu me e alofa tonu a ia ki a Ieova?
Ne fakatalitonu atu ne Iopu tena alofa ki a Ieova mai te tumau i te fakamaoni ki a ia
E fakatalitonu atu ne tatou te ‵tou a‵lofa ki a Ieova mai te tumau i te fakamaoni ki a ia
4. Fai ke Fiafia te Loto o Ieova
Faitau te Faataoto 27:11, ko sau‵tala ei ki fesili konei:
E pefea a lagonaga o Ieova māfai e poto kae fakalogo koe ki a ia? Kaia?
5. E mafai o alofa fakamaoni koe ki a Ieova
E fakamalosi aka ne te ‵tou a‵lofa ki a Ieova ke fakaasi atu ki nisi tino a mea e uiga ki a ia, ke oko foki loa ki taimi kolā e se faigofie ke fai penā. Pei te VITIO, ko sau‵tala ei ki fesili konei.
E mata, e faigata ki a koe ke fakaasi atu ki nisi tino a mea e uiga ki a Ieova?
I te vitio, se a te mea ne fesoasoani atu ki a Grayson ke manumalo i tena mataku?
E faigofie ke fakamaoni tatou ki a Ieova māfai e fia‵fia tatou ki mea e fiafia a ia ki ei kae takalialia ki mea e takalialia a ia ki ei. Faitau te Salamo 97:10, ko sau‵tala ei ki fesili konei:
E ‵tusa mo mea ko oti ne tauloto ne koe, ne a nisi mea e fiafia ki ei a Ieova? Ne a nisi mea e takalialia a ia ki ei?
E fakamasani pefea koe ke fiafia ki te mea ‵lei kae takalialia ki te mea masei?
6. E maua ne tatou a mea aoga māfai e faka‵logo ki a Ieova
A te fakalogo ki a Ieova ko te ‵toe mea ‵lei e ‵tau o fai faeloa. Faitau te Isaia 48:17, 18, ko sau‵tala ei ki fesili konei:
Se a tau faka‵tau, e mata, e mafai o tali‵tonu tatou me e iloa ne Ieova te ‵toe mea ‵lei mō tatou? Kaia?
Ne maua pefea ne koe a mea aoga mai i au sukesukega e uiga ki te Tusi Tapu mo te Atua tonu, ko Ieova?
MEA E FAI MAI NE NISI TINO: “E se tāua aku faifaiga ki te Atua.”
Se a te tusi faitau e mafai o faitau ne koe ke fakaasi atu ei me e pokotia a lagonaga o Ieova i ‵tou faifaiga?
MANATU AOGA
E mafai o fakaasi atu ne koe tou alofa ki a Ieova mai te fakalogo kae tumau i te fakamaoni ki a ia faitalia a tulaga faiga‵ta.
Fesili
Ne a au mea ne tauloto mai te tala o Iopu?
Ka fakatalitonu atu pefea ne koe a tou alofa ki a Ieova?
Ne a mea ka fesoasoani atu ki a koe ke tumau i te fakamaoni ki a Ieova?
NISI FAKAMATALAGA
Ke onoono ki auala e mafai ei o fakamaoni koe ki a Ieova mo te fakapotopotoga.
“A Koe e Alofa Tumau ki te Tino e Alofa Tumau ki a Koe” (16:49)
Ke tauloto ki nisi pati a Satani ne fai e uiga ki tino.
“E Puke ‵Mau Iopu ki Tena Fakamaoni” (Te Tusi Tapu—Se a te Fekau i ei? vaega 6)
Ke mafaufau ki te auala e mafai foki ne tama‵liki o fakaasi atu te lotou a‵lofa ki a Ieova.
E fakatumau pefea ne se talavou tena fakamaoni ki te Atua māfai ko fe‵paki mo fakamalosiga sē ‵lei mai nisi talavou?