MATAUPU 13
Fakamatalaga ‵Loi a Lotu ‵Se e Uiga ki te Atua
Kafai te Atua ko te alofa, kaia e uke ei a amioga ma‵sei e fai ne lotu kolā e fai mai i a latou ko sui o te Atua? A te tali faigofie, me i lotu konei e ‵se; e pati ‵loi mo olotou fakamatalaga e uiga ki te Atua. I auala fea? E pefea a lagonaga o te Atua e uiga ki te mea tenā? Kae ne a ana mea ka fai ki ei?
1. Ne a akoakoga ‵loi a lotu ‵se e uiga ki te Atua?
A lotu ‵se ko oti “ne sui ne latou te munatonu a te Atua ki te loi.” (Loma 1:25) E pelā mo te sē akoako atu ne te ukega o lotu ki olotou tino a te igoa o te Atua. Kae e fai mai te Tusi Tapu me e ‵tau o fakaaoga a te igoa o te Atua. (Loma 10:13, 14) E fai mai a nisi takitaki lotu me kafai ko tupu se mea masei, ko te loto o te Atua tenā. Kae ko te mea tenā se loi. E se mafai o māfua mai i te Atua a mea ma‵sei. (Faitau te Iakopo 1:13.) Se mea fakafanoanoa, me ko oti ne fai ne loi fakalotu konei ke ‵kalo kea‵tea a tino mai te Atua.
2. Ne fakaasi atu pefea ne lotu ‵se i olotou faifaiga a fakamatalaga ‵loi e uiga ki te Atua?
E ‵kese a faifaiga a lotu ‵se ki tino mo faifaiga a Ieova. E fai mai te Tusi Tapu me i lotu ‵se “ko fua‵tu ki luga i te lagi ana agasala.” (Fakaasiga 18:5) Ne aofia sāle a lotu i mea fakapolitiki i te fia o senitenali, ‵lago atu ki taua, kae fakamāfua io me talia ne latou te ‵mate o tino e tokouke. E ola a nisi takitaki lotu i se olaga maumea kae ma‵nako ki tupe mai olotou tino ‵lotu ke ‵togi ki ei olotou mea. E fakaasi mai i faifaiga konei me e se iloa ne latou te Atua, kae e se ‵tau foki o fai latou mo ana sui.—Faitau te 1 Ioane 4:8.
3. E pefea a lagonaga o te Atua ki lotu ‵se?
Kafai e kaitaua koe ki mea e fai ne lotu ‵se, se a tau faka‵tau e uiga ki lagonaga o Ieova? E alofa a ia ki tino kae kaitaua ki takitaki lotu kolā e fakamatala fakaloiloi ne latou a mea e uiga ki a ia kae fai fakamasei olotou tino. Ne tauto mai a ia me i lotu ‵se ka fakaseai atu kae “ka se toe maua eiloa a ia.” (Fakaasiga 18:21) Ko pili fua nei o fakaseai ne te Atua a lotu ‵se katoa.—Fakaasiga 18:8.
KELI MALOSI IFO
Tauloto ki nisi lagonaga o te Atua e uiga ki lotu ‵se, mea kolā ne fai ne ia, mo te pogai e se ‵tau o fai ne te mea tenei ke fakagata tou taumafai ke iloa ne koe a Ieova.
4. E se talia ne te Atua a lotu katoa
E tali‵tonu a tino e tokouke me i lotu ne auala kese‵kese katoa kolā e tau atu ki te Atua. E mata, e tonu te mea tenā? Faitau te Mataio 7:13, 14, ko sau‵tala ei ki te fesili tenei:
Se a te fakamatalaga i te Tusi Tapu e uiga ki te auala telā e iku atu ki te ola?
Pei te VITIO, ko sau‵tala ei ki te fesili tenei.
E mata, e fai mai i te Tusi Tapu me e fakafiafia atu a lotu e uke ki te Atua?
5. E se fakaata atu ne lotu ‵se a te alofa o te Atua
E uke a fakamatalaga ‵loi ne fai ne lotu e uiga ki te Atua. A te auala matagā e tasi ko te lotou aofia malosi i taua. Ke onoono ki se fakaakoakoga, pei te VITIO. Ko sau‵tala ei ki fesili konei.
Se a te tulaga o lotu e uke i te Taua i te Lua a te Lalolagi?
Ne a ou lagonaga e uiga ki mea ne fai ne latou?
Faitau te Ioane 13:34, 35 mo te 17:16. Ko sau‵tala ei ki fesili konei:
Se a tau faka‵tau, ne a lagonaga o Ieova ki te aofia o lotu i taua?
E uke a mea ma‵sei ne māfua mai i lotu ‵se. Ne a auala ne lavea ne koe a te fakata‵mala o lotu ke fakaata atu a te alofa o te Atua?
Ne seki fakaata atu ne lotu ‵se a te alofa o te Atua
6. E manako te Atua ke fakasaoloto a tino mai lotu ‵se
Faitau te Fakaasiga 18:4,a ko sau‵tala ei ki te fesili tenei:
Ne a ou lagonaga i te taimi ne iloa ei ne koe me e manako te Atua o fesoasoani ki tino taki tokotasi kolā ne fakaloiloi ne lotu ‵se?
7. Tumau i te tauloto e uiga ki te Atua tonu
E mata, e ‵tau o maua ne koe se kilokiloga sē ‵lei e uiga ki te Atua ona ko faifaiga a lotu ‵se? Mafaufau ki se tamaliki tagata telā ko ‵teke atu ki te fakatonuga a tena tamana. Ko tiaki ne te tamaliki te fale kae ola i se olaga masei. E se talia ne te tamana a faifaiga a tena tamaliki. Kaia e se ‵tau ei o ‵losi atu ki te tamana mō te olaga masei o tena tamaliki tagata sē fakalogo?
E mata, se mea ‵lei ke ‵losi atu ki a Ieova kae fakagata tau sukesukega e uiga ki a ia ona ko faifaiga a lotu ‵se?
MEA E FAI MAI NE NISI TINO: “Au e se fiafia ki te Atua me i lotu ko te pogai o fakalavelave e uke.”
E mata, e penā foki ou lagonaga?
Kaia e se ‵tau ei o maua ne tatou se kilokiloga sē ‵lei e uiga ki a Ieova ona ko faifaiga a lotu ‵se?
MANATU AOGA
Ko oti ne fakamatala fakaloiloi atu ne lotu ‵se a mea e uiga ki te Atua e auala i ana akoakoga ‵se mo faifaiga matagā. Ka fakaseai ne te Atua a lotu ‵se.
Fesili
Ne a ou lagonaga e uiga ki mea ne akoako mai ne lotu ‵se mo olotou faifaiga?
E pefea a lagonaga o Ieova e uiga ki lotu ‵se?
Ne a mea ka fai ne te Atua ki lotu ‵se?
NISI FAKAMATALAGA
Tauloto ki auala e lua kolā e fakafanoanoa ei ne te ukega o lotu a te Atua.
“E Mata, e ‵Pau a Lotu Katoa? E Mata, e Tapuaki Atu a Latou Katoa ki te Atua?” (Mataupu i te neti)
Kaia e manako ei a Ieova ke tapuaki atu tatou ki a ia fakatasi mo nisi tino?
“E Mata, e ‵Tau o ‵Kau Atu ki se Lotu Telā ne Fakatoka Faka‵lei?” (Mataupu i te neti)
Ne seki fiafia se faifeau ki tena lotu kae ne seki fakagata aka ei tena sukesuke ki te munatonu e uiga ki te Atua.
“Te Pogai ne Tiaki ei ne se Faifeau Tena Lotu” (Ala Mai!, Fepuali 2015)
Ko oti ne akoako ne lotu i se fia selau tausaga a fakamatalaga ‵loi kolā e fai ei a tino ke tali‵tonu me i te Atua e se alofa kae masei. Ke tauloto ki te munatonu e uiga ki fakamatalaga ‵loi e tolu konā.
a Ke iloa ne koe te pogai e taku ei a lotu ‵se i te Fakaasiga pelā me se fafine e igoa ki a Papelonia te Sili, onoono ki te Fakamatalaga Fakaopoopo 1.