Mea Kolā e Tauloto ne Tatou Mai i a Iesu

Te Auala ke Tau‵tali Atu ki te Keliso

Kafai ko fakaasi atu ne tino a te fakatuanaki ki a Iesu, e masani sāle o fai atu a ia penei: “Tau‵tali mai i a au.” (Mataio 9:9; 19:21) Ne a mea e aofia i te fai mo fai se soko o Iesu, telā ko te fai mo fai se Kelisiano? Mafaufau ki tali o fesili tāua e tolu konei.

E ‵tau o pefea au faifaiga ki nisi tino?

▪ E ‵tau mo se soko o Iesu o tautali ki fakatonuga e uiga ki faifaiga e ‵tau o fai ki nisi tino. E pelā mo pati a Iesu: “E pelā mo te mea e ma‵nako koutou ke fai atu ne nisi tino ki a koutou, ke fai foki eiloa ne koutou penā ki a latou.” Kae e a māfai ko fai ne se tino se mea ‵se ki a koe? Ne fai atu a Iesu: “Ke vave o faka‵lei koulua mo te tino telā e tagi me nofo mo koe ana mea.” Ne fai atu foki a ia ki ana soko: “Kafai e se loto fakamagalo atu koutou ki tino i olotou agasala, e se fakamagalogina foki koutou ne te otou Tamana i otou agasala.”​—Mataio 5:25; 6:15; 7:12.

Ki tino a‵vaga, ne tuku atu ne Iesu te polopolokiga tenei: “Ko oti foki ne lagona ne koutou me ne fai mai penei, ‘Sa mulilua.’ Kae fai atu au ki a koutou: so se tino e onoono atu ki se fafine kae manako ki ei tena loto, ko mulilua a ia i te loto.” E talia ne se Kelisiano tonu a akoakoga a Iesu ke oko atu ki tena mafaufau mo tena loto.​—Mataio 5:27, 28.

E taofi aka ne Kelisiano ‵tonu a mea kolā e ‵lei eiloa ki a latou ko te mea ke fesoasoani atu ki nisi tino. Ne alofa sē fakapito eiloa a Iesu. E pelā mo te fakafi‵ta o malaga talai, ne seki ai eiloa se taimi avanoa o Iesu mo ana apositolo ke oko foki eiloa ki se taimi ke ‵kai ei latou. Tela la, ne ave ne Iesu a latou i se poti ki se koga ‵mao ke malō‵lo i ei. Kae ne lagona ne tino a te koga ne fanatu a ia ki ei kae ne ‵mua atu latou i a ia. E fai mai a te tala i te Tusi Tapu: “Ne fanake a Iesu ki uta mai te poti, lavea ei ne ia a tino e tokouke, ko oko eiloa tena alofa ki a latou i te mea ko pelā mo mamoe e seai se lotou takitaki. Telā, kamata ei a ia o akoako atu ki a latou i mea e uke.” (Maleko 6:30-34) E mafai o fakaakoako koe ki a Iesu mai i te faiga o mea kolā e fai atu te Atua ke fai ne koe, faitalia me e mafai o fe‵paki koe mo mea faiga‵ta.

Kaia e ‵tau ei o fakaasi atu ne koe a te tala ‵lei?

▪ Ne akoako ne Iesu ana soko ke fakaasi atu te tala ‵lei. Ne fai atu a ia ki ana apositolo: “Olo o folafola atu, ‘i te malo o te lagi ko pili mai!’” (Mataio 10:⁠7) Ne tāua ‵ki eiloa a te fekau a soko o Iesu. Ne ‵talo atu a Iesu: “Tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.”​—Ioane 17:3.

Ne ‵valo mai ne Iesu se galuega telā ka ‵kau atu ki ei a te fia miliona o ana soko. Ne fai atu a ia: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.” (Mataio 24:14) Kafai ko oti ne tauloto koe e uiga ki te Malo o te Atua kae talitonu ki pati i te Tusi Tapu, e seai eiloa se fakalotolotolua me ka fiafia koe i te fakaasiatuga o mea ko iloa ne koe. E kamata a soko e tokouke o Iesu o fai‵pati atu e uiga ki te Malo o te Atua ki olotou kāiga.​—Ioane 1:40, 41.

Kaia e ‵tau ei mo koe o papatiso?

▪ I te taimi ne papatiso ei a Iesu i te vaitafe o Iolitana, ne fai ‵tonu atu eiloa a ia i tena ‵talo: “Tenei au e te Atua, o fai a te mea e loto koe ki ei.” (Epelu 10:⁠7) Kafai e fia fai ne koe te loto o te Atua, e ‵tau foki o papatiso koe. Ne fakatonu atu a Iesu: “Olo atu koutou ki fenua katoa ke fai a tino i ei mo oku soko; papatiso foki latou.”​—Mataio 28:19.

Ne a tiute mo mea aoga e maua mai i te papatiso o se tino? E tavini atu a soko papatiso o Iesu ki te Atua mo olotou ola kātoa. Ne siki atu ne Iesu a te Tulafono a te Atua, telā e fai mai: “E ‵tau mo koe o alofa ki te Aliki [ko Ieova] tou Atua mo tou loto kātoa, mo tou agaga kātoa, mo tou mafaufau kātoa.” (Mataio 22:37) Ne fai atu foki a ia: “So se tino e tautali mai i a au, ke se mafaufau ki a ia eiloa.” (Mataio 16:24) A te papatisoga e fakamailoga ki ei a te fakaikuga a se tino ke se mafaufau ki a ia eiloa kae ke pule a ia ne te Atua. A latou kolā e aofia i te fesokotakiga fakapito tenei e mafai o akai atu ki te Atua ke tuku atu se loto lagona ‵ma.​—1 Petelu 3:21.

Mō nisi fakamatalaga, ke onoono ki te mataupu e 18 o te tusi tenei, telā ne ‵lomi ne Molimau a Ieova. Ne A Mea E Akoako ‵Tonu Mai I Te Tusi Tapu?