A Te ‵Kau Fakatasi Se Fakailoga O Te Tapuakiga Tonu

“Ka fakapotopoto ne au koutou pelā me ne mamoe ko ‵foki mai ki te lafu.”​—MIKA 2:12.

1. E fakamaoni mai pefea a te poto o te Atua mai mea kolā ne faite?

NE FOLAFOLA mai a te faisalamo: “Ko oko eiloa te uke o mea ne fai ne koe! Ko oko foki eiloa i te poto o tau faitega o mea katoa konā! A te lalolagi ko ‵fonu i au mea ola.” (Salamo 104:24) E lavea atu a te poto o te Atua mai te fia miliona o vaega o lakau, tamā manu fo‵liki, manu, mo tamā manu kolā e fakatau lagolago ki a latou eiloa i loto i te lalolagi fakaofoofogia telā e faigata ke malamalama i te fakatokaga e uiga ki te ola. I tou foitino, e lau i afe a vaega i ei, mai vaega ‵lasi ke oko ki tamā vaega o ou sela, e ga‵lue fakatasi ke fai ei ke malosi ‵lei a koe.

2. E pelā mo te mea ne fakaata mai i te itulau e 16, kaia ne foliga ei a te ‵kau fakatasi o Kelisiano i te senitenali muamua e pelā me se mea fakaofoofogia?

² Ne faite ne Ieova a tino ke fakatau fakalagolago te suā tino ki te suā tino. E lavea atu a te kese‵kese o tino i olotou foliga, uiga, mo olotou atamai. E se gata i ei, ne tuku atu ne ia ki tino muamua a uiga fakaatua kolā e fai ei ke mafai ne lāua o fesoasoani kae fakalagolago atu a te suā tino ki te suā tino. (Kenese 1:27; 2:18) Kae ko oti ne ‵vae keatea a te lalolagi o tino mai te Atua, kae seki mafai eiloa o toe ‵kau fakatasi latou. (1 Ioane 5:19) Tela la, kafai e mafaufau ki te fakapotopotoga Kelisiano i te senitenali muamua telā ne aofia i ei a tino kese‵kese e pelā mo pologa mai Efeso, fafine Eleni takutakua, tagata a‵koga ‵lei mai Iutaia, mo tino kolā ne tapuaki muamua ki tupua, e lavea atu me i te lotou ‵kau fakatasi e foliga mai e pelā me se mea fakaofoofogia.​—Galuega 13:1; 17:4; 1 Tesalonia 1:9; 1 Timoteo 6:1.

3. E fakamatala mai pefea ne te Tusi Tapu a te ‵kau fakatasi o Kelisiano, kae se a te mea ka sau‵tala tatou ki ei i te mataupu tenei?

³ E mafai ne te tapuakiga tonu o fai a tino ke ga‵lue fakatasi e pelā mo vaega o ‵tou foitino. (Faitau te 1 Kolinito 12:12, 13.) Konei a nisi vaega ka suke‵suke tatou ki ei i te mataupu tenei: E ‵kau fakatasi pefea a tino ona ko te tapuakiga tonu? Kaia e mafai fua ei ne Ieova tokotasi o fai ne ia a tino mai fenua katoa ke ‵kau fakatasi? Ne a mea faiga‵ta kolā e fesoasoani mai a Ieova ke manumalo tatou i ei, ona ko te ‵kau fakatasi? E ‵kese pefea a te lotu kelisiano tonu mai Lotu Kelisiano ‵Se ona ko te lotou ‵kau fakatasi?

E ‵Kau Fakatasi Pefea a Tino Ona ko te Tapuakiga Tonu?

4. E ‵kau fakatasi pefea a tino ona ko te tapuakiga tonu?

⁴ E malamalama kae talia ne tino kolā e aofia i te tapuakiga tonu me i a Ieova ko te Pule Sili i te lagi mo te lalolagi, me ne faite ne ia a mea katoa. (Fakaasiga 4:11) Tela la e tiga eiloa e ‵nofo atu a Kelisiano ‵tonu i koga e uke kae kese‵kese olotou fakanofonofoga, kae e ‵pau eiloa a tulafono a te Atua e faka‵logo latou ki ei, e ‵pau foki a fakatakitakiga mai i te Tusi Tapu e tau‵tali latou ki ei. E taku ne tino tapuaki ‵tonu katoa a Ieova e pelā me ko te “Tamana.” (Isaia 64:8; Mataio 6:9) Tela la, a latou katoa ne taina faka-te-agaga kae e maua ne latou te vaegā ‵kau fakatasi telā ne fakamatala mai ne te faisalamo: “Ko oko eiloa i te ‵gali mo te ‵lei, manafai e ‵nofo tasi a tino o te Atua e pelā me ne taina!”​—Salamo 133:1.

5. Se a te uiga telā e fesoasoani atu ki te ‵kau fakatasi o tino tapuaki ‵tonu?

⁵ E tiga eiloa e sē ‵lei katoatoa a Kelisiano ‵tonu, kae e ‵kau fakatasi latou i te tapuakiga me ko oti ne tauloto latou ko te mea ke fakatau a‵lofa te suā tino ki te suā tino. E akoako ne Ieova ke fakaasi atu ne latou a te alofa telā e se mafai o fakaasi atu ne se isi tino aka. (Faitau te 1 Ioane 4:7, 8.) E fai mai tena Muna: “Tela la e ‵tau mo koutou o taofi ‵mau ki te alofa, te kaimalie, te loto malalo, te agamalu, mo te loto kufaki. Ke fakatau fesoasoani koutou i a koutou eiloa, ke fakatau fakamagalo foki koutou i a koutou eiloa, manafai e isi se mea e se malie ei te suā tino ki te suā tino. E pelā mo te Aliki ko oti ne fakamagalo ne ia koutou, e ‵tau foki mo koutou o fakatau fakamagalo. Kae sili i mea katoa konei, taofi ‵mau koutou ki te alofa, telā e fusi fakatasi ei ne ia a mea katoa ke ‵lei.” (Kolose 3:12-14) A te mea telā e fusi fakatasi ne ia a mea katoa​—ko te alofa—⁠se uiga sili telā e fakailoga ki ei a Kelisiano ‵tonu. Mai te mea e iloa ne koe, e mata e seki lavea eiloa ne koe me i te vaegā ‵kau fakatasi tenei se fakailoga o te tapuakiga tonu?​—Ioane 13:35.

6. E fesoasoani mai pefea a te fakamoemoega ki te Malo ke ‵kau fakatasi tatou?

⁶ E ‵kau fakatasi foki a tino tapuaki ‵tonu me e ‵kilo atu latou ki te Malo o te Atua e pelā me ko te fakamoemoega fua e tasi mō tino katoa. E iloa ne latou me ko pili o sui ne te Malo o te Atua a malo o tagata kae fakamanuia ne ia a tino faka‵logo ki te filemu tonu telā e tumau ki te se-gata-mai. (Isaia 11:4-9; Tanielu 2:44) Tela la, e faka‵logo eiloa a Kelisiano ki pati a Iesu e uiga ki ana soko: “E se ne tino o te lalolagi latou, e penei foki mo au e sē se tino o te lalolagi.” (Ioane 17:16) E se ‵kau atu a Kelisiano ‵tonu ki kinauga a te lalolagi; tela la, e ‵kau fakatasi latou faitalia me e ‵nofo atu latou i va o tino kolā e aofia i taua.

Te Māfuaga e Tasi o Fakatakitakiga Faka-te-Agaga

7, 8. Se a te auala e fesoasoani mai ei a fakatonuga faka-te-Tusi Tapu ki te ‵tou ‵kau fakatasi?

⁷ Ne ‵kau fakatasi eiloa a Kelisiano i te senitenali muamua me ne maua katoa ne latou a fakamalosiga mai te koga eiloa e tasi. Ne iloa ne latou me ne akoako kae fakatonutonu ne Iesu a te fakapotopotoga e auala i se potukau pule, telā ne aofia i ei a apositolo mo toeaina i Ielusalema. Ne fakavae ne tagata fakamaoni konei a olotou fakaikuga ki te Muna a te Atua kae fakaaoga ne latou a ovasia faima‵laga ke fakaoko atu a mea konā ki fakapotopotoga i fenua e uke. E fai mai te Tusi Tapu e uiga ki ovasia konā: “I te lotou ologa i loto i fa‵kai, ne taku atu ne latou ki tino tali‵tonu a tulafono kolā ne fakatoka ne apositolo mo toeaina i Ielusalema, kae fai atu foki ke tausi ki ei.”​—Galuega 15:6, 19-22; 16:4.

⁸ E tai ‵pau eiloa mo aso nei, e fesoasoani atu foki a te Potukau Pule telā e aofia i ei a Kelisiano fakaekegina ki te agaga ki te ‵kau fakatasi o fakapotopotoga i te lalolagi kātoa. E ‵lomi ne te Potukau Pule a tusi faka-te-agaga kolā e fakamalosi loto i ‵gana e uke. E fakavae a meakai faka-te-agaga konei ki te Muna a te Atua. Tela la, a mea kolā e akoako mai i ei e se mai i tagata kae mai i a Ieova.​—Isaia 54:13.

9. E fesoasoani mai pefea a te ‵tou galuega telā ne tuku mai ne te Atua ke ‵kau fakatasi ei tatou?

⁹ E fakamalosi aka ne ovasia Kelisiano a te ‵kau fakatasi mai te faiga o te takitakiga i te galuega talai. A te agaga fealofani telā e fai ei ke ‵kau fakatasi a tino kolā e ga‵lue i te galuega a te Atua e malosi atu fakafia i lo te agaga o te ‵kau fakatasi telā e maua i nisi tino i te lalolagi kolā e maopoopo fakatasi faeloa. Ne seki fakatu aka te fakapotopotoga Kelisiano ke fai pelā me se potukau mō fakafiafiaga, kae ke faka‵malu ei a Ieova kae ke fakaoti se galuega​—telā ko te talaiatuga o te tala ‵lei, te faiga o soko, mo te atiakaga o te fakapotopotoga. (Loma 1:11, 12; 1 Tesalonia 5:11; Epelu 10:24, 25) Tela la, ne fai atu a te apositolo ko Paulo e uiga ki Kelisiano: “Ne ‵kau fakatasi koutou o tau mo te fakamoemoega eiloa e tasi, ona ko te fakatuanaki telā e maua i te tala ‵lei.”​—Filipi 1:27.

10. Ne a nisi auala e ‵kau fakatasi ei tatou e pelā me ne tino o te Atua?

¹⁰ E pelā me ne tino o Ieova, e ‵kau fakatasi tatou me e talia ne tatou a te pulega sili a Ieova, e a‵lofa tatou ki ‵tou taina, e fakamoe‵moe ki te Malo o te Atua, kae āva ki tino kolā e fakaaoga ne te Atua ke takitaki ei tatou. E fesoasoani mai a Ieova ke manumalo tatou i uiga kolā e mafai o fakamakosu ei a te ‵tou ‵kau fakatasi ona ko te tulaga sē ‵lei katoatoa.​—Loma 12:2.

Ke Manumalo i te Fakamatamata mo te Loto Masei

11. Kaia e fakamavaevae ei ne te fakamatamata a tino, kae e fesoasoani mai pefea a Ieova ke manumalo tatou i ei?

¹¹ A te fakamatamata e fakamavae‵vae ne ia a tino. A te tino fakamatamata e fia maluga kae maua faeloa ne ia a te manakoga kaimanako mai te fakamatamata. E masani o fakamasei ne ia a te ‵kau fakatasi o tino; a latou kolā e lagona ne latou a pati a tino fakamata‵mata e mafai o loto ma‵sei. E fai ‵tonu mai a te soko ko Iakopo, penei: “A uiga fakamata‵mata konā ne mea ‵se katoa.” (Iakopo 4:16) Se faiga sē alofa māfai e ‵kilo atu tatou ki nisi tino e pelā me ne tino ma‵lalo. Se mea fakaofoofogia me i a Ieova ko te fakaakoakoga ‵lei o te loto maulalo i ana faifaiga ki tino sē ‵lei katoatoa e pelā mo tatou. Ne tusi mai a Tavita: “Ko tou [“loto maulalo,” NW] ko fai ne ia au ke takutakua.” (2 Samuelu 22:36) E fesoasoani mai a te Muna a te Atua ke fakatakavale ne tatou a te fakamatamata e auala i te akoako ne ia tatou ke iloa o fakasakosako faka‵lei atu. Ne fakaosofia a Paulo ke fesili atu, penei: “Ko oi ne fai ne ia koe ke sili i nisi tino? Ne seki tuku atu ne te Atua a mea katoa konā e i a koe? Kafai la ko maua ne koe, ai a la ne fakamatamata ei koe? E se iloa ne koe a mea konā ne tuku atu fakameaalofa?”​—1 Kolinito 4:7.

12, 13. (a) Kaia e faigofie ei ke loto ma‵sei tatou? (e) Ne a ikuga e maua ne tatou māfai e fakagalue ne tatou te kilokiloga a Ieova ki nisi tino?

¹² A te loto masei se isi uiga telā e fai ei ke se ‵kau fakatasi a tino. Ona ko te tulaga sē ‵lei katoatoa, e maua katoa ne tatou se “manakoga masei,” kae e mafai o loto ma‵sei a Kelisiano ko leva i te munatonu ki fakanofonofoga, kope, tauliaga mo mea kolā e mafai ne nisi tino o fai. (Iakopo 4:5) E pelā me se fakaakoakoga, kāti e mafai o loto masei se taina telā ko isi sena kāiga ki tauliaga e maua ne se tino galue i te taviniga tumau, e aunoa mo te iloa ne ia me kāti e loto masei foki a te taina telā e galue tumau ki te tagata telā e isi ne ana tama‵liki. E mafai pefea o taofi aka ne tatou a te loto masei mai te fakamaseiga o te ‵tou ‵kau fakatasi?

¹³ Ke fesoasoani mai ke ‵kalo keatea mai te loto masei, masaua me ne fakatusa ne te Tusi Tapu a tino o te fakapotopotoga Kelisiano ki vaega o te foitino. (Faitau te 1 Kolinito 12:14-18.) E pelā me se fakaakoakoga, e tiga eiloa e laveagofie atu ou mata i lo tou fatu, e mata, e se tāua eiloa ki a koe a mea e lua konā? I se auala tai ‵pau, e fakatāua ne Ieova a tino katoa o te fakapotopotoga faitalia eiloa a te tāua o nisi tino i nisi taimi. Tela la, ke fakamasani tatou ki te kilokiloga a Ieova e uiga ki ‵tou taina. I lo te loto ma‵sei ki nisi tino, e mafai o fakaasi atu ne tatou a te fia‵fia mo te amanaia ‵tonu ki a latou. Mai te fai penā, ko fakaasi atu ei ne tatou a te ‵kese o Kelisiano ‵tonu mai lotu kolā e aofia i Lotu Kelisiano ‵Se.

Lotu Kelisiano ‵Se​—Se Fakamailoga o te ‵Nofo Mavae‵vae

14, 15. Ne mavae‵vae pefea a aposetate i te Lotu Kelisiano?

¹⁴ E tu ‵kese eiloa a te ‵kau fakatasi o Kelisiano ‵tonu māfai e fakatusa ki kinauga i lotu kolā e aofia i Lotu Kelisiano ‵Se kolā e māfua mai i ei a kinauga. I te fa o senitenali, ne salalau malosi atu a te Lotu Kelisiano aposetate telā ne pule atu ki ei a te tupu o Loma, kae ne fesoasoani atu ki te fakamalosiakaga o Lotu Kelisiano ‵Se. Kae i te taimi ne mavae‵vae ei, ne ‵vae keatea a malo e uke mai i Loma kae ne faka‵tu aka i ei ne fenua olotou lotu.

¹⁵ Ne fakatau taua eiloa a lotu o te fenua kolā ne aofia i Lotu Kelisiano ‵Se i te fia selau o tausaga ko ‵teka. I te 17 mo te 18 senitenali, ne ‵saga malosi atu a Peletania, Falani, mo te Iunaite Sitete ki te lotou Malo, tela la, ne kamata o fai a te loto fenua e pelā me se talitonuga. I te 19 mo te 20 senitenali, ne kamata o pule ne te loto fenua a mafaufauga o te tokoukega o tino. Fakamuli ifo, ne ‵vae aka a lotu i Lotu Kelisiano ‵Se ki tamā potukau o lotu kese‵kese, a te tokoukega e talia ne latou a te loto fenua. E olo atu foki a tino ‵lotu o taua atu ki taina tali‵tonu o te suā fenua. I aso nei, ko oti ne ‵vae a Lotu Kelisiano ‵Se ki talitonuga i tamā potukau mo te loto fenua.

16. Ne a kinauga kolā e fai ei ke mavae‵vae a tino i Lotu Kelisiano ‵Se?

¹⁶ I te 20 senitenali, ne taumafai malosi a te fia selau o potukau fo‵liki o Lotu Kelisiano ‵Se o fakamalosi aka a te lotu ke ‵kau fakatasi. Kae mai taumafaiga ne fai i te fia sefulu tausaga mai tua ifo i ei, se aofaki foliki fua o lotu ne ‵kau fakatasi, kae koi kese‵kese eiloa a manatu o tino ki vaegā fesili e uiga ki te evolusione, te faka‵tōga o pepe, amioga fakasotoma, mo te faūga o fafine e pelā me ne faifeau. I nisi vaega o Lotu Kelisiano ‵Se, e taumafai a takitaki lotu o aumai a tino mai potukau kese‵kese ke ‵kau fakatasi ko te mea ke fakafoliki aka ei a te tāua o akoakoga fakalotu kolā ne mavae‵vae muamua i ei a lotu. Kae e tiga te feitu tenā, a te sē fakatāua ne tino a akoakoga fakalotu e fakavāi‵vai atu ki olotou fakatuanaki kae fai ei ke se ‵kau fakatasi a lotu i Lotu Kelisiano ‵Se kolā ne mavae‵vae muamua.

E Sili Atu te Tapuakiga Tonu i te Loto Fenua

17. Ne ‵valo mai pefea me ka fakamaopoopo ne te tapuakiga tonu a tino “i aso mai mua nei”?

¹⁷ E tiga eiloa ko mavae‵vae nei a tino i lo taimi mua, koi tumau eiloa a te ‵kese o tino tapuaki ‵tonu ona ko te lotou ‵kau fakatasi. Ne ‵valo mai a te pelofeta a te Atua ko Mika: “Ka fakapotopoto ne au koutou pelā me ne mamoe ko ‵foki mai ki te lafu.” (Mika 2:12) Ne ‵valo mai ne Mika a te maluga o te tapuakiga tonu mai nisi vaegā tapuakiga katoa ki atua ‵se io me ki te Fenua e pelā me se atua. Ne tusi mai a ia: “I aso mai mua nei, te mauga telā e tu ei te Faletapu ka maluga atu i mauga katoa. Ka uke a malo e o‵mai ki ei, a malo katoa e tapuaki kae faka‵logo ki olotou atua, ka ko matou e tapuaki kae faka‵logo ki te Aliki te motou Atua.”​—Mika 4:1, 5.

18. Ne a ‵fuliga e fai ne tatou ona ko te fesoasoani o te tapuakiga tonu?

¹⁸ Ne fakamatala mai foki ne Mika a te auala ka fai ei ne te tapuakiga tonu a fili mua ke ‵kau fakatasi. “Ka ko olotou tino ka fai aka penei, ‘‵Tou olo ki luga i te mauga o te Aliki, ki te faletapu o te Atua o Isalaelu, me ka akoako mai ne ia ki a tatou a mea kolā e manako a ia ke fai ne tatou; Ke sasale tatou i auala ne filifili ne ia.’ . . . Ka tuki olotou pelu ke fai mo mea fakamalū laukele. Ka ko olotou tao ke fai mo naifi ‵vele vao. A malo ka se toe fai taua; Se toe fakatokatoka foki mō se taua.” (Mika 4:2, 3) A tino kolā e tiaki ne latou a te tapuaki atu ki atua faite io me ko te fenua kae taofi ‵mau ki te tapuakiga a Ieova ka ‵kau fakatasi eiloa latou i te lalolagi kātoa. E fakatonutonu ne te Atua latou i auala o te alofa.

19. Se a te mea ko fakamaoni ‵tonu mai ona ko te ‵kau fakatasi o te fia miliona o tino ki te tapuakiga tonu?

¹⁹ E tu ‵kese eiloa a Kelisiano ‵tonu kolā e ‵kau fakatasi i te lalolagi kātoa i aso nei kae se fakamaoniga tonu me e tumau eiloa i te takitaki ne Ieova ana tino e auala i tena agaga. Ko tokouke nei a tino mai fenua katoa ko ‵kau fakatasi i lo taimi mua i tala fakasolopito. A te mea tenei se fakataunuga gali o mea kolā ne fakaasi mai i te Fakaasiga 7:9, 14, kae e fakaasi mai i ei me ko pili o ‵tala ne agelu a te Atua a “matagi” kolā ka fakamasei ei a te olaga masei tenei. (Faitau te Failauga 7:1-4, 9, 10, 14.) E mata, e sē se tauliaga gali tenā ke ‵kau fakatasi mo taina i te lalolagi kātoa? E mafai pefea o aofia tatou i te mea tenā? Ka sau‵tala tatou ki ei i te suā mataupu.

E Tali Mai Pefea ne Koe?

• E fakamaopoopo mai pefea ne te tapuakiga tonu a tino?

• E mafai pefea o ‵kalo keatea tatou mai te loto masei telā e fakamasei ne ia a te ‵tou ‵kau fakatasi?

• Kaia e se mafai ei ne te loto fenua o fakamavae‵vae a tino tapuaki ‵tonu?

[Ata i te itulau e 16]

Ne au‵mai a Kelisiano i te senitenali muamua mai telega kese‵kese

[Ata i te itulau e 17]

E ‵kau fakatasi pefea koe mo tino māfai ko fesoasoani atu koe ki te faitega o Kingdom Hall?