Te 3 O Auala

Ke Fakatumau se Uiga Loto Fakafetai

SE A TE MEA E AKOAKO MAI I TE TUSI TAPU? “Ke loto fakafetai foki koutou ki mea katoa.”​—⁠1 Tesalonia 5:⁠18.

SE A TE MEA FAIGATA? E sikomia tatou ne tino fakamaua‵luga kae se loto fakafetai, ko uiga kolā e mafai o fakaakoako atu tatou ki ei. (2 Timoteo 3:​1, 2) I tafa i ei, e mafai o fakamalosi aka tatou ke fakaopoopo atu a mea e uke ki ‵tou olaga kolā e fakalavelave ‵ki. E mafai o ‵mafa ‵tou amoga ona ko fakalavelave io me ko te saga malosi atu ki ‵tou manakoga totino telā ko seai ei se taimi ke fakatāua ne tatou a mea ko maua ne tatou io me ke fakaasi atu te loto fakafetai ki mea e fai ne nisi tino mō tatou.

NE A AU MEA E MAFAI O FAI? Ke fakaavanoa ne taimi ke mafaufau ‵loto ki mea ‵lei ko maua nei ne koe. E tonu, e mafai o fi‵ta koe i te uke o fakalavelave. Kae mafaufau la ki te fakaakoakoga a te Tupu ko Tavita. Ne loto vāivāi a ia i nisi taimi, kae ne mafatia tena loto ona ko mea faiga‵ta. Faitalia a mea konā, ne ‵talo atu a ia ki te Atua: “Ne mafaufau ei au ki au mea katoa ne fai, ko fakamasaua ne au au galuega katoa ne fai.” (Salamo 143:​3-5) Faitalia a mea faiga‵ta ne fe‵paki mo ia, ne fakatumau ne Tavita se uiga loto fakafetai mo te lotomalie.

Mafaufau ki mea ko oti ne fai ne nisi tino ke fesoasoani atu ki a koe, kae fakaasi atu i ei ne koe te loto fakafetai mō olotou taumafaiga. Ne tuku mai ne Iesu se fakaakoakoga tafasili i te gali i te feitu tenei. E pelā mo te ‵ligiga ne tena taugasoa ko Malia se sinu ‵togi ‵mafa ki tena ulu mo ana vae, ne fesili atu a nisi tino: “Se a te mea ka fakamāumāu ei fua a te sinu manogi tenei?”a Ne mafau‵fau a tino ma‵sei konā me ne ‵tau o ‵togi atu a te sinu kae tuku atu a tupe ki tino ma‵tiva. Ne tali atu a Iesu: “Sa fakalavelave ki a ia! Ai a e fia ‵saga fua ei koutou ki a ia?” Kae ne toe fai atu a ia: “Ko oti ne fai ne ia te mea sili i te gali kae ‵lei mō oku.” (Maleko 14:​3-8; Ioane 12:⁠3) I lō te saga tonu atu ki te mea ne seki fai ne Malia, ne fakaasi atu ne Iesu a te loto fakafetai ki te mea ne fai ne tou fafine.

E fatoa maua ne nisi tino a te loto fakafetai ki olotou kāiga, taugasoa, io me ko nisi fakamanuiaga māfai fua ko oti ne ‵galo atu. E mafai o ‵kalo keatea koe i te ikuga fakafanoanoa tenā mai i te mafaufau ki mea ‵lei ko maua nei ne koe! Kaia e se fai ei ne koe se fakasologa i tou mafaufau io me e tusi ki lalo a mea kolā e loto fakafetai koe ki ei?

Ona ko te mea e aumai mai te Atua a “meaalofa katoatoa takitasi,” se mea ‵lei ke fakaasi atu ‵tou loto fakafetai ki a ia i se ‵talo. (Iakopo 1:17) A te fai faeloa penei e mafai o fesoasoani mai ki a tatou ke fakatumau se uiga loto fakafetai kae fakamalosi aka foki i ei a te lotomalie.​—⁠Filipi 4:​6, 7.

[Fakamatalaga fakaopoopo]

[Ata i te itulau e 6]

E mata, e fakaasi atu ne koe a te loto fakafetai ki mea e fai ne nisi tino mō koe?