E Mata, e Fai ne Koe a Ieova e Pelā me ko Tou Ola?
“Ke ‵mua . . . o ‵sala tena Malo mo tena amiotonu; kae ka fakaopoopogina atu a mea katoa konā ki a koutou.”—MATAIO 6:33.
1, 2. (a) Ko oi e sui ne latou te “Isalaelu a te Atua” telā ne fakamatala mai i te Kalatia 6:16? (e) I te Mataio 19:28, ko oi e sui ne latou a “matakāiga e sefulu lua o Isalaelu”?
KAFAI e faitau ne koe te igoa Isalaelu i te Tusi Tapu, se a te mea e fanaka i tou mafaufau? E mata, e mafaufau koe ki te tama tagata a Isaako ko Iakopo, telā ne toe fakaigoa ki a Isalaelu? Io me e mafaufau koe ki ana tama‵liki, te fenua mua o Isalaelu? Kae se a te Isalaelu faka-te-agaga? Kafai ne fakasino atu ki Isalaelu i se auala fakatusa, e masani o fakasino atu ki “te Isalaelu a te Atua,” ko te toko 144,000, kolā ne fakaekegina ki te agaga tapu ke fai pelā me ne tupu mo faitaulaga i te lagi. (Kalatia 6:16; Fakaasiga 7:4; 21:12) Kae onoono ki te fakamatalaga fakapito e uiga ki matakāiga e 12 o Isalaelu telā ne tusi i te Mataio 19:28.
2 Ne fai mai a Iesu: “Kafai ko nofo te Tama a te Tagata i tona nofogaaliki ‵malu i te lalolagi fou; a koutou konā e tinoagafulu mo te tokolua kolā ne tau‵tali mai i a au; e ‵nofo foki koutou i nofogaaliki e sefulu lua o fakamasinoga matakāiga e sefulu lua o Isalaelu.” I te fuaiupu tenei, a “matakāiga e sefulu lua o Isalaelu” ko tino kolā ka fakamasino ne soko fakaekegina o Iesu kae e fetaui ‵lei ke maua ne latou a te ola i te Palataiso i te lalolagi. Ka maua ne latou a mea aoga mai galuega fakafaitaulaga a te toko 144,000.
3, 4. Se a te fakaakoakoga gali e tuku mai ne tavini fakamaoni kolā ne fakaekegina?
3 E pelā mo faitaulaga mo tino Levi i aso mua, e ‵kilo atu a tino fakaekegina i aso nei ki te lotou galuega e pelā me se tauliaga. (Numela 18:20) E se fakamoe‵moe a tino fakaekegina ke tuku atu se koga i te lalolagi nei e pelā me se vaega o latou. Kae e olioli eiloa latou ke fai pelā me ne tupu mo faitaulaga i te lagi fakatasi mo Iesu Keliso. Ka tumau eiloa latou i te tavini atu ki a Ieova i te galuega tenā, e pelā mo te mea ne fakaasi mai i te Fakaasiga 4:10, 11 e uiga ki te tulaga faka-te-lagi o tino fakaekegina.—Esekielu 44:28.
4 I te taimi koi ‵nofo ei latou i te lalolagi, e ola eiloa a tino fakaekegina i se auala telā e fakamaoni atu i ei i a Ieova ko te lotou ola. E fakatāua kae fakamuamua faeloa ne latou a te lotou tauliaga ke tavini atu ki a Ieova. E fakatuanaki latou ki te taulaga togiola a Keliso kae tau‵tali faeloa i a ia, telā ko ‘fai te lotou kalagaga mo te lotou filifiliga e pelā me se mea mautinoa.’ (2 Petelu 1:10) E kese‵kese olotou fakanofonofoga mo olotou atamai. Kae e se fakaaoga ne latou a tapula konā e pelā me se fakamasakoga ke mu‵tana ei olotou mea e fai i te taviniga ki te Atua. I lō te fai penā, e fakamaluga faeloa ne latou a te lotou taviniga ki te Atua, mai i te faiga o te ‵toe mea telā e mafai ne latou o fai. Kae e tuku mai ne latou se fakaakoakoga ‵lei mō latou kolā e fakamoe‵moe ke ola i te lalolagi palataiso.
5. E mafai pefea ne Kelisiano katoa o fai a Ieova e pelā me ko te lotou ola, kae kaia e faigata ei te mea tenā?
5 Faitalia me e maua ne tatou te fakamoemoega faka-te-lagi io me ko te lalolagi, e ‵tau o ‘se mafau‵fau tatou ki a tatou eiloa kae ke amo ‵tou sataulo kae tau‵tali atu faeloa i a Keliso.’ (Mataio 16:24) E lau i miliona o tino kolā e olioli ke ola i te Palataiso e tapuaki atu ki te Atua kae tau‵tali i a Keliso i te vaegā auala foki eiloa tenā. E se lotoma‵lie latou ke mu‵tana olotou mea e fai māfai e iloa tonu ne latou me e mafai o uke atu olotou mea e mafai o fai. Ne fakaiku aka ne te tokoukega ke fakafaigofie olotou olaga kae ke fai latou pelā me ne paenia. A nisi tino e paenia mō ne nai masina i tausaga takitasi. Kae faitalia me i nisi tino e se mafai o paenia, kae e loto finafinau eiloa latou i te galuega talai. E fai eiloa a latou konā e pelā mo Malia, telā ne ‵ligi ne ia te sinu manogi gali ki luga i a Iesu. Muna Iesu: “Ko oti ne fai ne ia te mea sili i te gali kae ‵lei mō oku. . . . Ko fai ne ia te mea e mafai ne ia o fai.” (Maleko 14:6-8) A te fai ne tatou a te ‵toe mea telā e mafai ne tatou o fai e se faigofie, me ko ‵nofo tonu atu nei tatou i se lalolagi e pule atu ki ei a Satani. E tiga eiloa te feitu tenā, e fai eiloa ne tatou a te ‵toe mea telā e mafai o fai mo te loto talitonu ki a Ieova. Ke onoono aka tatou me e pefea a ‵tou faifaiga i auala e fa konei.
Ke ‵Sala Muamua ki te Malo o te Atua
6. (a) E fakaasi mai pefea ne tino valevale me i te lotou ola e maua fua i te olaga tenei? (e) Kaia e ‵lei ei ke maua ne tatou te kilokiloga a Tavita?
6 Ne akoako ne Iesu ana soko ke ‵sala muamua ki te Malo mo te amiotonu o te Atua. E ma‵nako a tino o te lalolagi ke ‵sala muamua atu ki fakafiafiaga e pelā mo tino “kolā e mau‵mea i te olaga nei.” (Faitau te Salamo 17:1, 13-15.) E aunoa mo te mafau‵fau ki te lotou Mafuaga, e ‵saga atu eiloa a te tokoukega o tino i te faiga ke uke olotou tupe, te atiakaga o se kāiga, kae tiakina ne latou a te ‵toe mea tāua. A te lotou vaega e mō te olaga fua tenei. I te suā feitu, ne fiafia eiloa a Tavita i te faiga “ke taku‵leia” a tena igoa i mua o Ieova, mai tua i ei ne fakamalosi mai foki penā a tena tama ki a tatou katoa. (Failauga 7:1) E pelā mo Asafo, ne lavea ne Tavita me i te fai ne ia o Ieova e pelā me ko tena Taugasoa e ‵lei fakafia atu i lō te fakamuamua ne ia ana manakoga i te olaga. Ne fiafia a ia ke sa‵sale fakatasi mo te Atua. I ‵tou taimi nei, e tokouke a Kelisiano e fakamuamua ne latou a mea faka-te-agaga i lō olotou galuega ‵togi.
7. Ne a fakamanuiaga ne maua ne se taina tokotasi mai te fakamuamua ne ia te Malo?
7 Ke mafau‵fau ki a Jean-Claude, telā e nofo i te kogāloto o Afelika. A ia se toeaina ko oti ne avaga mo ana tama‵liki e tokotolu. I te fenua tenā, e tai faigata eiloa ke ‵sala se galuega, mō te tokoukega o tino e fai ne latou so se mea ke tumau eiloa latou i olotou galuega. I te aso e tasi, ne fai atu te menetia ki a Jean Claude me ka kamata o galue a ia i po — mai te 6:30 i te afiafi, i aso e fitu o te vaiaso. Ne fakamatala atu a Jean-Claude me i tafa o tena tausi atu ki tena kāiga i te feitu faka-te-foitino, e ‵tau foki mo ia o tausi atu ki a latou i te feitu faka-te-agaga. Ne fai atu foki a ia me e isi sena tiute ke fesoasoani atu ki te fakapotopotoga. Ne saga atu pefea te menetia ki a ia? “Kafai ko fiafia koe me ko maua sau galuega, e ‵tau o tiakina ne koe a mea katoa, e aofia i ei tau avaga, au tama‵liki, mo ou fakalavelave. E ‵tau o tuku katoatoa atu tou olaga ki tau galuega—e seai aka foki i ana tafa. Fai sau filifiliga: ko tau talitonuga io me ko tau galuega.” Ne a au mea ka fai? E tonu, ne iloa ne Jean-Claude me kafai ko tiakina tena galuega, ka tausi eiloa ne te Atua a ia. Ka tumau eiloa te uke o ana mea e fai i te galuega a te Atua, kae ka fesoasoani atu eiloa a Ieova o tausi atu ki tena kāiga i te feitu faka-te-foitino. E se gata i ei, ne kau atu eiloa a ia ki te suā fakatasiga i loto i te vaiaso. Mai tua ifo, ne fakatoka a ia ki te galuega, mo te fakalotolotolua me koi maua ne ia a tena galuega io me ikai. E se leva kae tagi te telefoni. Fakailoa atu ki a ia me ko oti ne fakatea te menetia, a ko ‵tou taina koi maua eiloa tena galuega.
8, 9. I te auala fea e mafai ei o fakaakoako atu tatou ki faitaulaga mo te kau Levi mai te fai ne tatou a Ieova e pelā me ko ‵tou ola?
8 E mafai o mafau‵fau aka penei a nisi tino kolā ne ‵tu atu i se tulaga faigata i olotou galuega, ‘Ka fakataunu pefea ne au a toku tiute ke tausi atu ki toku kāiga?’ (1 Timoteo 5:8) Faitalia me ne fepaki koe mo se tulaga tai ‵pau penā io me ikai, e tauloto ne koe mai i te fakalavelave tenā a te loto talitonu me ka se fanoanoa koe māfai a te Atua ko tou ola, kae e fakatāua ne koe a te tauliaga ke tavini atu ki a ia. I te taimi ne fai atu ei a Iesu ki ana soko ke tumau te ‵sala muamua atu ki tena Malo, ne fakatalitonu atu a ia ki a latou: “Ka fakaopoopogina atu a mea katoa konā ki a koutou”—e pelā mo mea‵kai, meainu mo gatu.—Mataio 6:33.
9 Mafaufau la ki te kau Levi, kolā e seki maua ne latou se laukele. E tiga eiloa ne fakamuamua ne latou a te tapuakiga ‵ma, ne ‵tau o fakalagolago atu latou ki a Ieova, i te tausiga o latou i te feitu faka-te-foitino telā ne fai atu ki a latou, penei: “Ko au, te Aliki, e ola ei koe.” (Numela 18:20) E tiga eiloa e se tavini atu tatou i se faletapu tonu e pelā mo te mea ne fai ne faitaulaga mo te kau Levi, e mafai o fakaakoako atu tatou ki te agaga telā e nofo mo latou, mai te tali‵tonu me ka tausi eiloa tatou ne Ieova. A te ‵tou tali‵tonu ki te malosi o te Atua ke tausi mai ko fai pelā me se mea telā ko gasolo aka ki luga tena tāua i te vaitaimi o aso fakaoti konei e ola ei tatou.—Fakaasiga 13:17.
Ke ‵Mua o ‵Sala te Amiotonu o te Atua
10, 11. Kaia e tali‵tonu ei a nisi tino ki a Ieova e uiga ki olotou galuega? Taku mai se fakaakoakoga.
10 Ne fakamalosi atu foki a Iesu ki ana soko ke ‘‵mua o ‵sala te amiotonu o te Atua.’ (Mataio 6:33) E fakauiga te mea tenei ki te fakamuamua ne tatou a tulaga o Ieova e uiga ki te mea tonu mo te mea ‵se i lō tulafono a tino. (Faitau te Isaia 55:8, 9.) E mafai o masaua ne koe me i aso mua, ne aofia a tino e tokouke i te ‵tokiga o paka io me ‵togi atu ne latou a mea kolā e fai ki paka, e fakaakoako a nisi tino ke iloa o taua, io me faite kae ‵togi ki tua a meatau kolā e fakaaoga i te taua. I te taimi ko isi ei se iloa e uiga ki te munatonu, ne filifili ne te tokoukega o tino ke ‵fuli olotou galuega kae ke kausaki atu mō te papatisoga.—Isaia 2:4; 2 Kolinito 7:1; Kalatia 5:14.
11 E fai eiloa a Andrew e pelā me se fakaakoakoga. I te taimi ne tauloto ei ne ia mo tena avaga a mea e uiga ki a Ieova, ne fai te lā fakaikuga ke tavini atu lāua ki a ia. Ne fiafia ‵ki a Andrew ki tena galuega kae ne tiakina ne ia. Kaia? Me ne galue a ia mō se fakapotopotoga telā e aofia i mea kolā e se fetaui mo mea kolā e tauloto ne ia, telā ne fai ei tena fakaikuga ke fakamuamua ne ia a te amiotonu o te Atua. I te taimi ne tiakina ei ne Andrew te galuega tenā, ko tokolua ei ana tama‵liki, ko seai sena peofuga, kae ne lava loa a tupe ke ola ei latou mō ne nai masina. Mai te kilokiloga a tino, kāti e foliga mai me ne seai ne ‘fakamanuiaga’ ne maua ne ia. Ne ‵sala ne ia sena galuega mo tena loto talitonu ki te Atua. Mai te kilo atu ki mea ne ‵tupu i te lotou kāiga, ne fakamautinoa mai ne latou me i te lima o Ieova e se toetoe. (Isaia 59:1) Mai te taumafai o latou ke ola i se olaga faigofie, ne maua foki ne Andrew mo tena avaga te tauliaga ke ga‵lue i te taviniga tumau. “E isi ne taimi e fai ne mea tau tupe, ko fale ‵nofo, ma‵saki mo te tulaga matua a māua ke manava‵se,” ko ana muna. “E nofo faeloa a Ieova i omotou tafa. . . . E mafai eiloa o fai atu ne māua e aunoa mo te fakalotolotolua me i te taviniga ki a Ieova, ko te ‵toe taumafaiga ‵lei kae isi sena taui.”a—Failauga 12:13.
12. Se a te uiga e manakogina ke fakamuamua ei a tulaga o te Atua? Ke taku mai se fakaakoakoga i tou fakapotopotoga.
12 Ne fai atu a Iesu ki ana soko: “Kafai e ‵pau te lasi o te otou fakatuanaki mo te fuaga o te sinapi, e mafai ne koutou o muna atu ki te mauga tenei, ‘Masiki mai konei ki ‵ko’, ko te mea eiloa ko masiki. Me mafai ne koutou o fai so se mea i te fakatuanaki.” (Mataio 17:20) E mata, e mafai o fakamuamua ne koe a fakatonuga a te Atua i tou olaga māfai e iloa ne koe me ka iku atu ki fakalavelave? Kafai koe e fakalotolotolua me e mafai io me se mafai ne koe o fai penā, faipati atu ki nisi tino o te fakapotopotoga. E mautinoa eiloa me ka maua ne koe te malosi fou faka-te-agaga māfai ko lagona ne koe a olotou tala.
Ke Loto Fakafetai ki Fakatokaga Faka-te-Agaga a Ieova
13. Kafai e ga‵lue malosi tatou i te taviniga a Ieova ne a mea e mafai o fakamoe‵moe tatou ki ei e uiga ki fakatokaga faka-te-agaga?
13 Kafai e fakatāua ne koe tou tauliaga ke tavini atu ki a Ieova, e mafai o mautinoa i a koe me ka tuku atu eiloa ne ia a mea faka-te-foitino mo manakoga faka-te-agaga, e ‵tusa eiloa mo mea kolā ne fai ne ia ki te kau Levi. Mafaufau ki a Tavita. Faitalia me ne nofo a ia i se ana, ne kilo atu a ia ki te Atua ke tausi atu ki a ia. E mafai foki o fakalagolago tatou ki a Ieova faitalia me ko seai aka foki eiloa se auala e lavea ne tatou ke ‵sao ei tatou. Ke masaua me i te taimi ne ulu atu ei a Asafo ki loto i te “Faletapu” o te Atua, ne maua ne ia te malamalama i te mea telā ne fanoanoa malosi ei a ia. (Salamo 73:17) I se auala tai ‵pau, e ‵tau o ‵fuli atu tatou ki te Atua telā ko te Mafuaga o ‵tou mea‵kai faka-te-agaga. Tela la, e fakaasi atu ne tatou te loto fakafetai mō ‵tou tauliaga ke tavini atu ki te Atua faitalia ‵tou fakanofonofoga. Ko fai eiloa ne tatou a Ieova e pelā me ko ‵tou ola.
14, 15. E ‵saga atu pefea tatou māfai ko gasolo aka o lasi a te ‵tou mainaga e uiga ki nai tusi siki, kae kaia?
14 Ne a ou lagonaga māfai e fakamaina mai ne Ieova, te Mafuaga o te mainaga faka-te-agaga, a “fuafuaga ‵loto a te Atua” kolā e maua i te Tusi Tapu? (1 Kolinito 2:10-13) E maua ne tatou se fakaakoakoga ‵lei e uiga ki lagonaga o te apositolo ko Petelu i te taimi ne fai atu ei a Iesu ki Ana tino fakalogologo: “Kafai e se ‵kai koutou ki te foitino o te Tama a te Tagata telā ko au, kae se inu foki koutou ki toku toto, e se maua ne koutou te ola se gata mai.” Mai te mafau‵fau me e fakauiga ‵tonu a pati konā, ne fai atu a soko e tokouke: “Se muna faigata tenā; ko oi te tino e mafai o fakalogo ki ei?” E tokouke ana soko ne “solomuli ki tua, ko se tau‵tali foki i a ia.” Kae ne fai atu a Petelu: “Te Aliki, ko oi te tino ka olo matou ki ei? A muna o te ola se gata mai, e nofo mo koe.”—Ioane 6:53, 60, 66, 68.
15 E seki malamalama katoatoa a Petelu i pati a Iesu e uiga ki te ‵kai ki Tena foitino kae inu ki Tena toto. Kae ne fakalagolago te apositolo ki te Atua mō te mainaga faka-te-agaga. Kafai ko lasi te mainaga faka-te-agaga e uiga ki nisi mea, e mata e isi ne au taumafaiga e fai ke maina ‵lei koe i te pogai tāua faka-te-Tusi Tapu ne fai ei a te fakamafuliga tenā? (Faataoto 4:18) Ne talia ne tino Pelea i te senitenali muamua a te muna mai te “sukesuke malosi . . . ki muna mai te Tusi i aso takitasi” mo te loto finafinau. (Galuega 17:11) A te fakaakoako atu ki a latou ka fai ei ke ‵poko tou loto fakafetai mō tou tauliaga ke tavini ki a Ieova, kae fai a ia e pelā me ko tou ola.
Ke Avaga Fua ki se Kelisiano
16. E fai pefea te Atua e pelā me ko ‵tou ola e ‵tusa mo te fakatakitakiga telā e maua i te 1 Kolinito 7:39?
16 A te suā feitu e ‵tau ei o masaua ne Kelisiano a fuafuaga a te Atua i olotou mafaufau ko te fakagalue aka ne latou a te fakatakitakiga i te Tusi Tapu ke avaga fua ki “se tagata Kelisiano.” (1 Kolinito 7:39) E tokouke a tino ne fakaiku aka ke ‵nofo taka latou i lō te fakaseaoga ne latou a te fakatakitakiga tenei mai te Atua. E atafai eiloa te Atua ki vaegā tino penei. Ne a mea ne fai ne Tavita i te taimi ne nofo tokotasi ei a ia kae seai se fesoasoani ne maua ne ia? Ne fai mai a ia: “Ko kalaga atu au ki te Aliki mō se fesoasoani; au e fakatagi ki a ia. Ko fakaasi atu ne au ki a ia a mea e se fiafia au ki ei; ko taku atu ne au ki a ia oku puapuaga katoa. Kafai au ka takavale, e iloa ne ia te mea e ‵tau mo au o fai.” (Salamo 142:1-3) E penā foki a lagonaga o te pelofeta ko Ielemia, telā ne tavini atu ki te Atua mo te fakamaoni i se fia sefulu tausaga e pelā me se tino nofo taka. Kāti e manako koe o sukesuke ki tena fakaakoakoga telā ne fakamatala mai i te mataupu e 8 o te tusi ko te God’s Word for Us Through Jeremiah.
17. E mafai pefea o kufaki se tuagane nofo taka i te sē sologa i nisi taimi?
17 “Au ne mafaufau ke nofo taka eiloa au,” ko pati a se tuagane i te Iunaite Sitete. “E manako eiloa au o fai toku kāiga māfai e maua ne au se tino telā e fetaui ‵lei mo au. Ne taumafai eiloa toku mātua sē talitonu o fakamalosi mai ke avaga fua au ki so se tino telā e fia fai kāiga mai ki a au. Ne ‵sili atu au ki a ia me e mata, ka ‵losi atu au ki a ia māfai ko sē ‵lei taku fakaipoipoga io me ikai. Fakamuli ifo, ne lavea ne ia me ko isi saku galuega tumau, kae ko tausi eiloa ne au a au, kae e fiafia foki au. Ne gata atu foki loa i konā ana fakamalosiga ki a au.” E nofo foki mo te tuagane tenei se lagonaga sē sologa i nisi taimi. E fai mai a ia: “Kae e taumafai eiloa au o fai a Ieova e pelā me ko te tino telā e fakalagolago au ki ei. E se mafai lele eiloa o tiakina ne ia au.” Se a te mea ne fesoasoani atu ki tou fafine ke talitonu ki a Ieova? “E fesoasoani mai te ‵talo ke talitonu au me i te Atua e ola kae fakatasi mai ki a au. E fakalogologo mai eiloa te Atua Maluga o te iunivesi, tela la kaia fua la e se fiafia ei au?” Mai te talitonu me e “sili atu te manuia o te tino telā e tuku atu fua ana mea i lō o te tino telā e talia ne ia,” e fai mai a ia: “E taumafai eiloa au o fesoasoani atu ki nisi tino, kae e se fakamoemoe au ke maua ne au se mea mai i a latou. Kafai au e mafaufau penei, ‘Ne a aku mea e mafai o fai ke fesoasoani atu ki te tino tenei?’ E maua ne au se loto fiafia.” (Galuega 20:35) Ao, e fai ne ia a Ieova e pelā me ko tena ola, kae ko fiafia a ia i tena tauliaga ke tavini atu ki a ia.
18. I te feitu fea e mafai ei ne koe o fai a Ieova e pelā me ko tou ola?
18 Faitalia me se a te tulaga e maua ne koe, e mafai o fai ne koe te Atua e pelā me ko tou ola. Kafai e fai koe penā, ka aofia koe i ana tino fia‵fia. (2 Kolinito 6:16, 17) E mafai o iku atu a te mea tenā ki te faiga o Ieova pelā me ko tou ola, e pelā mo nisi tino i aso mua. (Faitau te Teutelonome 32:9, 10.) E pelā mo Isalaelu telā ne fai ne latou te Atua e pelā me ko te lotou ola, e mafai foki o fai ne ia koe penā kae ka atafai atu foki mo te alofa ki a koe.—Salamo 17:8.
[Fakamatalaga fakaopoopo]
a Ke onoono ki te Awake! i a Novema 2009, itulau 12-14.
Ka Tali Mai Koe Pefea?
E mafai pefea o fai ne koe a Ieova e pelā me ko tou ola
• mai te ‵sala muamua ki te Malo o te Atua mo tena amiotonu?
• mai te fakaasi atu o te loto fakafetai mō mea‵kai faka-te-agaga?
• mai te sukesuke ki fakatakitakiga a te Atua ke a‵vaga fua ki Kelisiano?
[Manatu tāua i te itulau e 16]
E fai a Ieova e pelā me ko ‵tou ola māfai e fakamuamua ne tatou a tena taviniga
[Ata i te itulau e 18]
E fakamalosi loto a te fakaakoakoga a Ielemia