Amaketo Ne A Pati A Nisi Tino E Uiga Ki Ei?

“Kae ne ‵luku fakatasi latou ne mea konā ki te koga e taku faka-Epelu ko Amaketo.”—FAKAASIGA 16:16, English Standard Version.

SE A tau faka‵tau māfai e lagona ne koe a te pati “Amaketo”? E se taumate, e fakaataata i tou mafaufau se matugā fakalavelave lasi. E tiga eiloa e sae fakatasi mai fua a te pati i loto i te Tusi Tapu, e fakaaoga faeloa a te tugāpati tenā ne takitaki lotu mo fale fakasalalau tala.

E mata, e fetaui ‵lei a mea kolā e iloa ne tino e uiga ki Amaketo mo mea kolā e akoako mai i te Tusi Tapu? E tāua ke iloa a te tali ki ei. Kaia? Me e mafai ne te mea tonu e uiga ki Amaketo o fakasaoloto koe mai te mataku valea, fai ke manino tau kilokiloga ki aso mai mua, kae fakamalosi aka a te auala e mafaufau ei koe e uiga ki te Atua.

Mafaufau ki fesili e tolu kolā e ‵soko mai kae faka‵pau aka a mea kolā e iloa ne tino e uiga ki Amaketo mo mea kolā e akoako tonu mai i te Tusi Tapu.

1. E MATA, AMAKETO SE FAKALAVELAVE NE FAI NE TĀGATA?

E masani o fakaaoga ne tino tusi tala mo tino sukesuke ki mea a te pati Amaketo ke fakamatala mai i ei a matugā fakalavelave ‵lasi kolā ne fakamāfua aka ne tāgata. Pelā me se fakaakoakoga, ko oti ne fakasino atu ki te Taua Muamua mo te Lua a te Lalolagi e pelā me ko Amaketo. Mai tua o taua konā, ne manava‵se a tino i te mea ma fakaaoga ne te Iunaite Sitete mo te Soviet Union a meatau faka-atomika ki a lāua eiloa. Ne taku ne te kau fakasalalau tala a te fe‵pakiga tenā e pelā me “se Amaketo faka-niukelea.” I aso nei, e faka‵pula mai ne tino sukesuke ki mea me ko pili o tupu se “Amaketo i tau o aso” ona ko ‵fuliga ‵lasi i tau o aso i te lalolagi kolā ne māfua mai i fakalailaiga.

Te mea e fakauiga ki ei te lotou fakamatalaga: E pule katoatoa a tāgata ki aso mai mua o te lalolagi mo mea ola katoa i ei. Kafai e fakata‵mala a malo o gasue‵sue mo te ‵poto, ka tumau eiloa a fakamaseiga ki te lalolagi.

Te mea telā e akoako mai i te Tusi Tapu: Ka sē talia eiloa ne te Atua ke fakamasei ne tino a te lalolagi. E fakatalitonu mai te Tusi Tapu ki a tatou me ne seki faite ne Ieovaa a te lalolagi ke fai mo “koga se aoga.” Ne faite eiloa ne ia ke “‵nofo i ei a tino.” (Isaia 45:18) I lō te talia ne te Atua ke fakamasei katoatoa ne tino a te lalolagi, ka “fakaseai atu foki” ne ia “a latou kolā e fakama‵sei ne latou te lalolagi.” —Fakaasiga 11:18.

2. E MATA, AMAKETO SE FAKALAVELAVE O TE NATULA?

I nisi taimi e fakaaoga ne tino tusi tala a te pati Amaketo e pelā me se fakailoga mō fakalavelave ‵lasi o te natula. Pelā me se fakaakoakoga, i te 2010, ne faipati loa se lipoti e tasi e uiga ki te “‘Amaketo’ i Haiti.” Ne fakamatala mai i ei a te logo‵mae, fakamaseiga, mo te ‵matega o tino telā ne mafua mai i se ma‵tugā mafuie lasi telā ne poko i te atufenua tenā. Ne seki fakaaoga fua ne tino fakaoko tala mo tino faite ata a te pati tenei ki mea ko oti ne ‵tupu kae penā foki loa ki mea kolā ka ‵tupu. E pelā mo te mea tenei, ko oti ne fakaaoga a te pati “Amaketo” ke fakamatala mai i ei a ikuga kolā e fakaataata i te mafaufau māfai ko taua mai se paneta foliki ‵ki eiloa ki te lalolagi.

Te mea e fakauiga ki ei te lotou fakamatalaga: Amaketo se fakalavelave telā e tamate valevale i ei a tino e seai ne olotou mea ‵se ne fai. E foliki fua te mea e mafai ne koe o fai ke puipui ei koe mai i te mea tenā.

Te mea telā e akoako mai i te Tusi Tapu: E se tamate valevale a tino i Amaketo. I lō te fai penā, ko tino amio ma‵sei fua ka ‵fulu faka‵ma i Amaketo. E tauto mai te Tusi Tapu me ko pili o “galo atu . . . a tino amio ma‵sei; ka salasala ne koe latou, kae se maua ne koe.”—Salamo 37:10.

3. E MATA, KA FAKAMASEI NE TE ATUA A TE LALOLAGI I AMAKETO?

E tokouke a tino lotu Polotesano mo tino lotu Katolika e tali‵tonu me ka isi se fe‵pakiga fakaoti i te va o te ‵lei mo te masei telā ka iku atu ki te gataga o te ‵tou paneta. Ne maua aka i se savea telā ne fai i te Iunaite Sitete me e 40 pasene o tino ma‵tua e tali‵tonu me ka gata atu a te lalolagi i “se taua i Amaketo.”

Te mea e fakauiga ki ei te lotou akoakoga: Ne seki faite a tino ke ‵nofo i luga i te lalolagi ki te se-gata-mai, io me ne faite te lalolagi ke tumau ki te se-gata-mai. Ne faite ne te Atua a tino mo te fakamoemoega me e ‵tau o ‵mate katoa latou i se taimi.

Te mea telā e akoako mai i te Tusi Tapu: E manino ‵lei a pati i te Tusi Tapu e uiga ki te Atua me “ne fakatu ne koe te lalolagi ke mautakitaki i luga i ona fakavae, ko te mea ke se toe gasuesue.” (Salamo 104:5) Kae ki tino kolā ka ‵nofo i luga i te lalolagi, e fai mai te Tusi Tapu: “A tino amio‵tonu ka fai mo latou te fenua, kae ka ‵nofo faeloa i ei ki te se gata mai.”—Salamo 37:29.

E manino ‵lei me e ‵teke atu te Tusi Tapu ki mea e uke e iloa ne tino e uiga ki Amaketo. Tela la, se a loa te ‵tonuga o te mea tenei?

[Fakamatalaga fakaopoopo]