Fakapilipili Atu Ki Te Atua
“Ka ko Au e se Mafai o Fakapuli ne au Koutou”
E MATA, e atafai tonu a Ieova ki ana tino? Kafai e penā, e pefea te ‵poko o tena manavase ki a latou? E tasi fua te auala e mafai ei o iloa ne tatou a tali ki fesili konā—e auala i te fakaasiga totino a te Atua. I loto i te Tusi Tapu, e fakaasi manino mai i ei ne Ieova ana lagonaga. Ke mafaufau ki pati kolā e maua i te Isaia 49:15.
Ne fakaaoga ne Ieova e auala i a Isaia, se tasi o toe fakaakoakoga fakaotia loto telā e mafai o mafaufau tatou ki ei ke faka‵tusa ki ei a te ‵poko o ana lagonaga e uiga ki ana tino. Ne kamata a ia ki te fesili atu o se fesili telā e fakagasuesue ei te mafaufau: “E mafai ne se fafine o puli tena pepe, kae se alofa ki te tamaliki ne fanau mai ne ia?” I te kilo fakavave atu ki ei, e foliga mai me faigofie ke malamalama i te tali. E mafai pefea o puli i se mātua a tena pepe? E fakalagolago katoatoa atu a te pepe ki tou fafine i te ao mo te po—kae iloa eiloa ne tou fafine a te taimi e ‵tau ei o saga atu a ia ki ei! Kae koi uke aka a mea e uiga ki te fesili a Ieova.
Kaia e tausi atu ei se mātua ki tena tama kae fai ana manakoga katoa? E mata, e fai fua ke faka‵noga aka i ei a te tagi a te tamaliki? Ikai. E masani o alofa te mātua ki te “tamaliki ne fanau mai ne ia.” A te veape Epelu telā e ‵fuli i konei ki te “alofa” e fakasino atu foki ki te “kaimalie.” (Esoto 33:19; Isaia 54:10) E mafai o fakaoko atu ne te pati Epelu tenei a te manatu o te alofa atafai ki tino vāivāi io me ko tino kolā e seai se mea e mafai o fai. A te alofa o te mātua ki tena pepe se tasi o lagonaga e malosi ‵ki telā e mafai o mafau‵fau tatou ki ei.
Se mea fakafanoanoa me e se ko mātua katoa e a‵lofa ki te pepe telā ko leva ne fia ū i tena ū. Muna a Ieova, “E mafai ne se fafine o fakapuli tena pepe.” E ola nei tatou i se lalolagi telā e “se a‵lofa fakamaoni” i ei a tāgata mo fāfine e tokouke, ko “galo te alofa masani.” (2 Timoteo 3:1-5) I nisi taimi, e lagona ne tatou a tala e uiga ki mātua kolā ne fakata‵mala, maneanea, io me tiakina olotou pepe fatoā fa‵nau. I te faipati e uiga ki te Isaia 49:15, e fakamatala mai se Tusi Tapu e tasi: “A mātua ne tino e agasala kae ko te lotou a‵lofa e ‵tao ne tulaga ma‵lalo i mea tau amioga. Ke oko foki ki te ‵toe alofa tafasili e maua ne te tagata e mafai eiloa o fakatamala.”
“E ui i ei,” e fakatalitonu mai a Ieova ki a tatou, “ka ko au e se mafai o fakapuli ne au koutou.” Nei la ko mafai o lavea ne tatou a te ‵kano tonu o te fesili telā ne fakasae aka ne Ieova i te Isaia 49:15. A te mea telā e fai ne ia i konei e sē se fakatusatusaga ke lavea i ei se ‵kesega lasi. E se pelā mo mātua se ‵lei katoatoa, kolā e mafai o fakata‵mala i te fakaasi atu o te alofa ki olotou pepe fakaa‵lofa, ka se fakatamala lele a Ieova io me puli o fakaasi atu te alofa ki ana tino tapuaki kolā e ma‵nako ki se mea. E fetaui ‵lei a pati a te fakamatalaga mai luga e uiga ki te Isaia 49:15: “A te mea tenei ko te ‵toe fakaasiga lasi eiloa o te alofa o te Atua i te Feagaiga Mua.”
E mata, e sē se mea fakamafanafana ke tauloto e uiga ki “te alofa atafai o te ‵tou Atua”? (Luka 1:78) Kaia e se tauloto ei koe ki te auala e mafai ne koe o tai fakapilipili atu ki a Ieova? E fakatalitonu mai a te Atua alofa tenei ki ana tino tapuaki: “Ka se tiaki lele ne au a koutou kae ka se tuku tiaki lele ne au a koutou.”—Epelu 13:5.