Talitonu Ki A Ieova Te Atua O “Taimi Mo Tau O Aso”

“E fulifuli ne Ia a taimi mo tau o aso, e tapale kea‵tea a tupu kae faka‵sopo foki ne Ia a tupu.”—TANIELU 2:21, NW.

KA TALI MAI KOE PEFEA?

E fakaasi mai pefea i mea ne faite mo te fakataunuga o valoaga i a Ieova ko te Tino Tausi Taimi Sili?

Se a te mea e fakamalosi mai ke fai ne tatou ona ko Ieova ko te Atua o “taimi mo tau o aso”?

Kaia e se pule atu ei a mea e ‵tupu i te lalolagi mo aofaga a tāgata ki mea kolā ko oti ne fakatoka ne te Atua ke ‵tupu i olotou taimi tonu?

1, 2. Ne a mea e fakaasi mai i ei i a Ieova e malamalama kātoatoa i te taimi?

NE FAKATOKA ne Ieova te Atua a mea kolā e mafai o fua aka ki ei te taimi, kae seki tāitāi o faite ne ia te tagata. I te faitega o mea i te fa o aso, ne fai atu penei te Atua: “Ke isi ne mea fakamaina i te lagi ke faka‵kese ei te ao mai te po kae ke fakasino foki ki ei te taimi e kamata ei a aso, tausaga, mo tau o te tausaga [io me ko aso].” (Kenese 1:14, 19, 26) E ‵tusa mo te loto o Ieova, e tenā eiloa te mea ne tupu.

² Kae ko oti ne kinau sāle a saienitisi e uiga ki te taimi ke oko mai eiloa ki ‵tou aso nei. “A te taimi ko te ‵toe mea faka‵numi tino eiloa e tasi i te lalolagi,” ko pati i te encyclopedia e tasi. “E seai se tino e mafai o fai ‵tonu mai me se a te mea tenā.” E tigā te feitu tenā, e malamalama kātoatoa a Ieova i te taimi. E se tioa eiloa, me ko ia “ne faite ne ia a lagi. . . . Ne faite ne ia te lalolagi.” Ko Ieova foki telā “ko leva ne ‵valo mai ne Ia a mea ka ‵tupu i te fakaotiga, mo mea kolā e seki ‵tupu.” (Isaia 45:18; 46:10, NW) Ko te mea ke fakamalosi aka te ‵tou fakatuanaki ki a ia mo tena Muna, ko te Tusi Tapu, ke na mafau‵fau tatou ki te auala e fakaasi mai ei i mea ne faite mo valoaga kolā ko oti ne fakataunu i a Ieova ko te Tino Tausi Taimi Sili.

E FAKAMALOSI AKA NE MEA NE FAITE A TE FAKATUANAKI KI TE TINO TAUSI TAIMI SILI

3. E fakaasi mai pefea a te ‵tonu o te taimi i mea kolā ne faite i te lalolagi?

³ E mafai o matea a te ‵tonu o te taimi i mea kolā ne faite i te lalolagi. E pelā me se fakaakoakoga, a te gasuesuega o paneta mo fetu katoa ko oti eiloa ne taimi faka‵lei. Ko oti ne fakaaogā olotou tulaga i te lagi ke fakamailoga ki ei a tau o aso kae aogā ki te fo‵lau. A Ieova—te Māfuaga o “mea fakasino taimi” konei—“e se faka‵tau eiloa i te malosi” kae e ‵tau eiloa o tavae ne tatou a ia.—Faitau te Isaia 40:26.

4. E fakaasi mai pefea te poto o te Atua i te gasuesuega o te taimi i loto mea ola?

⁴ E mafai foki o matea atu a te ‵tonu o te taimi i te lalolagi o mea ola. A mafulifuliga i olaga o manu mo lakau e uke e taimi katoa ne itula i loto i a latou. E uke a manu eva e iloa ne latou te taimi e kamata ei o ma‵laga atu latou ki nisi koga. (Ielemia 8:7) E isi foki ne itula i loto i tino, e masani o fakatonutonu ne te tamilosaga o te ao mo te po. Kafai ko oti ne eva atu se tino i te vakalele i loto i kogā koga kolā e kese‵kese a taimi i ei, kāti e manakogina ne nāi aso ke toe faka‵tonu aka ei a itula i loto i tena foitino. E tonu, e uke a fakaakoakoga o te gasuesuega o te taimi e fakaasi mai i mea ne faite, kae e fakaasi mai i ei a te ‵mana mo te poto o te Atua o “taimi mo tau o aso.” (Faitau te Salamo 104:24.) E tonu, e kātoatoa te poto mo te ‵mana o te Tino Tausi Taimi Sili. Tela la, e fakatuanaki eiloa tatou me ka fakataunu ne tou tagata a mea kolā e manako a ia ki ei!

E FAKAMALOSI AKA TE FAKATUANAKI NE VALOAGA KOLĀ NE FAKATAUNU I TE TAIMI TONU

5. (a) Se a te auala fua e tasi e iloa ei ne tatou a mea ka ‵tupu ki te kau kāiga o tino i aso mai mua? (e) Kaia e mafai ei ne Ieova o ‵valo mai a mea kolā ka ‵tupu mo te taimi e ‵tupu i ei?

⁵ E tauloto ne tatou a “uiga sē lavea” o Ieova mai mea e uke kolā ne faite ne ia, kae e sē tali aka i ei a fesili tāua, e pelā mo te fesili tenei, Ne a mea ka ‵tupu ki te kau kāiga o tino i aso mai mua? (Loma 1:20) Ko te mea ke maua se tali ki ei, e ‵tau o ‵saga atu tatou ki mea kolā ko oti ne fakaasi mai ne te Atua, e auala i tena Muna ko te Tusi Tapu. Kafai e iloilo ne tatou te Tusi Tapu, ka matea ei ne tatou a valoaga kolā ne fakataunu faeloa i te taimi tonu! E mafai o fakaasi mai ne Ieova a mea kolā ka fai o ‵tupu, me e mafai o matea ne ia a mea kolā ka ‵tupu tonu i aso mai mua. E se gata i ei, a mea kolā e ‵valo mai i te Tusi Tapu e taunu eiloa i te taimi tonu, me e fai ne Ieova te Atua ke ‵tupu a mea konā e ‵tusa mo ana fuafuaga mo te taimi telā ka ‵tupu i ei.

6. Se a te mea e fakaasi mai i ei me e manako a Ieova ke malama‵lama tatou i te fakataunuga o valoaga i te Tusi Tapu?

⁶ E manako a Ieova ke malamalama ana tino tapuaki i valoaga i te Tusi Tapu kae ke aogā foki ki a latou. E tigā eiloa e se fakatapulāgina te iloa o te Atua e pelā mo tatou e uiga ki te taimi, e mafai o iloa ne tatou i tugāpati kolā e fakaaogā ne ia, māfai e ‵valo mai ne ia me ka tupu se mea i se taimi mautinoa. (Faitau te Salamo 90:4.) E pelā mo te tusi ko Fakaasiga telā e fakasino atu ki “agelu e tokofa kolā ne fakatoka mō te itula tenei, te aso tenei, te masina tenei, mo te tausaga tenei”—ko taimi kese‵kese kolā e iloa ne tatou. (Fakaasiga 9:14, 15) A te matea atu o valoaga kolā ne fakataunu i taimi mautinoa, e fakamalosi aka ei te fakatuanaki ki te Atua o “taimi mo tau o aso” mo tena Muna. Ke mafau‵fau aka tatou ki nāi fakaakoakoga.

7. E fakaasi mai pefea i te fakataunuga o te valoaga a Ielemia e uiga ki Ielusalema mo Iuta, me i a Ieova ko te Tino Tausi Taimi Sili?

⁷ Muamua la, ke toe ‵foki aka tatou ki te fitu o senitenali T.L.M. “I te fa o tausaga o te nofoaiga a Ieoiakimo, te tama tagata a Iosia,” te tupu i Iuta, ne oko atu ei te muna a te Tino Tausi Taimi Sili ki a Ielemia “e uiga mo tino katoa o Iuta.” (Ielemia 25:1) Ne ‵valo atu ne Ieova te lepega o Ielusalema mo te avega fakapagota o tino Iutaia mai te fenua o Iuta ki Papelonia. I konā, ka “tavini atu latou ki te tupu o Papelonia i tausaga e fitusefulu.” Ne lepe ne kautau a Papelonia a Ielusalema i te 607 T.L.M., kae ne ave fakapagota eiloa a tino Iutaia mai Iuta ki Papelonia. Kae se a la te mea e ‵tau o tupu mai tua o te 70 tausaga? Ne ‵valo mai penei a Ielemia: “Muna a te Aliki, ‘Kafai ko katoa te fitusefulu tausaga o Papelonia, ko fakaasi atu ei ne au toku saga atu ki a koutou, kae fakataunu taku tautoga ke faka‵foki koutou ki te otou fenua.’” (Ielemia 25:11, 12; 29:10) Ne fakataunu eiloa te valoaga tenei i te taimi tonu—i te 537 T.L.M. i te otiga ne fakasaoloto ne te kau Metai mo Pelesia a tino Iutaia mai Papelonia.

8, 9. E fakaasi mai pefea i valoaga a Tanielu e uiga ki te fakatasi mai o te Mesia mo te fakatuakaga o te Malo i te lagi me i a Ieova ko te Atua o “taimi mo tau o aso”?

⁸ Mafaufau ki te suā valoaga e uiga ki tino o te Atua i aso mua. Kāti i se lua tausaga mai mua o tiaki ne tino Iutaia a Papelonia, ne ‵valo mai a te Atua e auala i te pelofeta ko Tanielu, me ka sae mai te Mesia i te 483 tausaga mai tua o te avatuga o te fakatonuga ke toe ati aka a Ielusalema. Ne avatu ne te tupu o Metai mo Pelesia a te fakatonuga tenā i te 455 T.L.M. I te kātoaga eiloa o tausaga e 483 fakamuli ifo—i te 29 T.A.—ne fakaekegina i ei a Iesu te Nasaleta ki te agaga tapu, i te taimi ne papatiso ei tou tagata, fai ei a ia mo fai te Mesia.a—Neemia 2:1, 5-8; Tanielu 9:24, 25; Luka 3:1, 2, 21, 22.

⁹ Nei la, ke onoono aka tatou ki te mea telā ne ‵valo mai i te Tusi Tapu e uiga ki te Malo. E fakaasi mai i valoaga i te Tusi Tapu me ka fakatu aka te Malo faka-Mesia i te lagi i te 1914. Ne fai penā ne te Tusi Tapu mai te tukumaiga o “te fakailoga” o te fakatasi mai o Iesu, telā e fakasino atu foki ki te taimi ka ‵pei ifo ei a Satani mai te lagi, kae ka iku atu ki fakalavelave fakama‵taku kolā ka ‵tupu i te lalolagi. (Mataio 24:3-14; Fakaasiga 12:9, 12) E se gata i ei, e fakasino atu foki te valoaga i te Tusi Tapu ki te taimi tonu—te 1914—“ki te fakataunuga o taimi ne fuafuagina mō fenua fakaa‵tea” kae ka kamata a te pulega a te Malo i te lagi.—Luka 21:24; Tanielu 4:10-17.b

10. Ne a mea kolā ka ‵tupu i te taimi tonu i aso mai mua?

¹⁰ A te mea telā koi moe nei i ‵tou mua ko “te ‵toe fakalavelave lasi” telā ne ‵valo mai ne Iesu. Ka ‵soko atu ki ei ko tena Pulega i te Afe Tausaga. E seai se fakalotolotolua me ka fakataunu eiloa a mea konei i te taimi tonu. I te taimi ne nofo ei a Iesu i te lalolagi a ko leva ne fakatoka ne Ieova a “te aso mo te itula” ka ‵tupu ei a mea konei.—Mataio 24:21, 36; Fakaasiga 20:6.

‘FAKAAOGĀ FAKA‵LEI TE TAIMI’

11. Ne a ‵tou mea e ‵tau o fai i te iloa atu me ko ola tatou i te vaitaimi o te gataga?

¹¹ Ne a la ‵tou mea e ‵tau o fai i te iloa atu me ko oti ne kamata o pule mai te Malo, kae ko ‵nofo atu foki tatou i te ‘vaitaimi o te gataga’? (Tanielu 12:4) E matea ne tino e tokouke a tulaga matagā o te lalolagi kae e sē iloa ne latou me i mea konei ko te fakataunuga o valoaga i te Tusi Tapu e uiga ki aso fakaoti. E fakamoe‵moe latou me ka fakaseai atu te olaga tenei i se aso mai mua nei, io me e tali‵tonu latou me ka maua te “filemu kae tokagamalie” e auala i taumafaiga a tāgata. (1 Tesalonia 5:3) Kae e a tatou? Kafai e iloa ne tatou me ko ola tatou i aso fakaotioti o te lalolagi a Satani, e a, e se taumafai tatou ke fakaaogā te taimi tenei koi ‵toe o tavini atu ki te Atua o “taimi mo tau o aso,” kae fesoasoani atu ki nisi tino ke iloa ne latou a ia? (2 Timoteo 3:1) E ‵tau o fai ne tatou a fakaikuga aogā e uiga ki te auala e fakaaogā ei ‵tou taimi.—Faitau te Efeso 5:15-17.

12. Ne a mea e mafai o tauloto ne tatou mai i pati a Iesu e uiga ki aso o Noa?

¹² E se faigofie ke ‘fakaaogā faka‵lei te taimi’ i te lalolagi telā e ‵fonu i mea kolā e takitaki ‵se ei a tino. “Me e pelā eiloa mo aso o Noa,” ne polopoloki mai a Iesu, “ka penā foki te fakatasi mai o te Tama a te tagata.” Ne fai pefea aso o Noa? Ko oti ne ‵valo mai me ka fakaseai atu te lalolagi i aso konā. Ka ma‵lemu a tino ma‵sei katoa i te lolo i te lalolagi kātoa, i te taimi tenā. E pelā me se “tino talai o te amiotonu,” ne folafola atu eiloa ne Noa mo te fakamaoni ki tino i ana aso a te fekau a te Atua. (Mataio 24:37; 2 Petelu 2:5) Kae ko “tino e ‵saga faeloa o ‵kai kae inu, kae fakatau a‵vaga, . . . Ne seki fia ‵saga atu latou ki ei ke oko eiloa ki te taimi ne poko ei te Lolo, tapea‵pea atu ei latou keatea.” Tela la, ne polopoloki atu a Iesu penei ki ana soko: “E ‵tau foki mo koutou o toka faeloa, me i te Tama a te tagata e vau i te itula telā e seki fakamoe‵moe koutou ki ei.” (Mataio 24:38, 39, 44) E ‵tau o fai tatou e pelā mo Noa, e se pelā mo tino i ana aso. Se a te mea ka fesoasoani mai ke toka faeloa tatou?

13, 14. Se a te mea e ‵tau o masaua ne tatou e uiga ki te fesoasoani o Ieova ke tavini atu tatou ki a ia mo te fakamaoni a koi fakatali‵tali tatou ki te oko mai o te Tama a te tagata?

¹³ E tigā eiloa ka oko mai te Tama a te tagata i te itula telā e se mafau‵fau tatou ki ei, e ‵tau o masaua ne tatou i a Ieova ko te Tino Tausi Taimi Sili. E se fakamakosu ne mea e ‵tupu i te lalolagi mo aofaga a tāgata a taimi kolā ko oti ne fakatoka ne ia. E fakatoka ne Ieova a taimi mo mea kolā ka iku mai i ei i te fakataunuga o tena loto. (Faitau te Tanielu 2:21.) Tenā eiloa te mea e fai mai i te Faataoto 21:1, NW: “A te loto o te tupu e pelā me se vai e ‵tafe i te lima o Ieova. So se koga telā e fiafia a ia ki ei, e ‵fuli atu eiloa ki ei.”

¹⁴ E mafai ne Ieova o fai a mea ke ‵tupu ke fakataunu ei ana fuafuaga i te taimi tonu. E uke a ‵fuliga ‵lasi o mea i te lalolagi e fakataunu ei a valoaga, maise eiloa e uiga ki te ‵talaiatuga o te ‵tala ‵lei o te Malo o te Atua i te lalolagi kātoa. Ke mafaufau ki te pakūga o te Soviet Union mo mea ne iku mai i ei. E mu‵tana fua a tino ne tali‵tonu me ne mafai o tupu fakavave se ‵fuliga lasi penā i faifaiga fakapolitiki. Kae ona ko ‵fuliga konei, ne mafai ei o talai atu te ‵tala ‵lei i fenua e uke kolā ne fakatapu i ei te ‵tou galuega. Tela la, ke na fakaaogā ne tatou te taimi telā ko avanoa ke tavini atu ki te Atua o “taimi mo tau o aso” mo te fakamaoni.

KE FAKATUANAKI KI TAIMI O IEOVA

15. E fakaasi atu pefea ne tatou te fakatuanaki e uiga ki fakamafuli‵fuliga mai te fakapotopotoga a Ieova?

¹⁵ E manakogina te fakatuanaki ki taimi o Ieova ke tumau ei i te galuega talai i aso fakaoti konei. Kāti e manakogina ke fai ne fakama‵fuliga ki te auala e fai ei te galuega ko te faiga o soko ona ko mafuli‵fuliga o mea e ‵tupu i te lalolagi. E fai ne te fakapotopotoga a Ieova a fakamafulifuliga i nāi taimi o fesoasoani mai ke talai atu ne tatou a te tala ‵lei i te ‵toe auala magoi. E fakaasi atu ne tatou te ‵tou fakatuanaki ki te Atua o “taimi mo tau o aso” mai te faka‵logo ki fakamafuli‵fuliga penā i te taimi e tavini atu ei tatou mai lalo i tena Tama, ko “te ulu o te fakapotopotoga.”—Efeso 5:23.

16. Kaia e fakatuanaki ei tatou me ka tuku mai ne Ieova a te fesoasoani i te taimi tonu?

¹⁶ E manako a Ieova ke ‵talo atu tatou ki ia i so se taimi mo te talitonu kātoatoa me ka tuku mai eiloa ne ia te fesoasoani telā e manakogina “i te taimi tonu.” (Epelu 4:16) E mata, e se fakaasi i ei tena alofa mo tena amanaia ki a tatou e pelā me ne tino taki tokotasi? (Mataio 6:8; 10:29-31) E fakaasi atu ne tatou te ‵tou fakatuanaki ki a Ieova te Atua mai te ‵talo atu faeloa mō tena fesoasoani, kae fai foki a mea kolā e ‵talo tatou ki ei, e pelā foki mo ana fakatonuga. E se gata i ei, ke masaua foki o ‵talo mō ‵tou taina tali‵tonu.

17, 18. (a) Se a te mea ko pili o fai ne Ieova ki ana fili? (e) Se a te malei e ‵tau o ‵kalo kea‵tea tatou mai i ei?

¹⁷ E se tenei te taimi ke ‘vāivāi ei te fakatuanaki’; tenei eiloa te taimi ke maua ei te malosi lasi e auala i te fakatuanaki. (Loma 4:20) A fili o te Atua—ko Satani mo latou kolā e ‵nofo mai lalo i tena pulega—e taumafai faeloa o fakagata te galuega telā ne tuku atu ne Iesu ki Ana soko, e aofia i ei tatou. (Mataio 28:19, 20) Faitalia a taumafaiga a Satani, e iloa ne tatou i a Ieova ko “te Atua ola, telā ko te Fakaola o tino katoa, kae maise eiloa a tino fakamaoni.” “E iloa ne Ieova o faka‵sao a tino kolā e fakamaoni ki te Atua mai i olotou tofotofoga.”—1 Timoteo 4:10; 2 Petelu 2:9.

¹⁸ Ko pili o fakagata ne Ieova te olaga matagā tenei. E tigā eiloa e seki tuku mai ki a tatou a fakamatalaga likiliki e uiga ki te taimi ka tupu ei te mea tenei, e iloa ‵lei ne tatou me ka fakaseai ne Keliso a fili o te Atua i te taimi tonu, kae ka taku‵lei i ei te pulega sili a Ieova. Tela la, se mea tafasili i te masei māfai e fakatamala se tino ke matea ne ia a “taimi mo tau o aso” kolā ko ‵nofo nei tatou i ei! Ke mo a eiloa e ‵to atu tatou ki te malei ko te mafaufau me “e seai eiloa se ‵fuliga ne lavea atu ki mea katoa talu mai te taimi ne kamata ei o faite a mea.”—1 Tesalonia 5:1; 2 Petelu 3:3, 4.

‘KE FAKAASI ATU TE LOTO FAKATALITALI’

19, 20. Kaia e ‵tau ei o fakaasi atu ne tatou te loto fakatalitali ki a Ieova?

¹⁹ E aofia i te fuafuaga muamua a Ieova te Atua mō te kaukāiga o tino ko te seai se gataga o te taimi e tauloto ei a tino e uiga ki a ia mo ana mea ‵gali ne faite. E fai mai penei te Failauga 3:11, NW: “Ko oti ne fai ne ia [Ieova] a mea katoa ke ‵gali i olotou taimi tonu. Ko oti ne tuku ne ia te taimi se-gata-mai ki olotou loto, ko te mea ke sē mafai o iloa ne te kau kāiga o tino a te galuega telā ko oti ne fai ne te Atua mai te kamataga ki te fakaotiga.”

²⁰ E fia‵fia eiloa tatou me e seki ‵fuli lele ne Ieova a tena fuafuaga mō tino katoa! (Malaki 3:6) A te Atua “e se mafulifuli e pelā mo te ata o se mea e gasuesue.” (Iakopo 1:17) A mea kolā ko oti ne fakatoka ne ia ke ‵tupu i olotou taimi tonu, e se fakalagolago ki mea kolā e fakaaogā ne tino ke fua aka ki ei te taimi, e pelā mo te takapilipili o te lalolagi. A Ieova ko “te Tupu o te se-gata-mai.” (1 Timoteo 1:17) Tela la, ke na “fakatali‵tali [tatou] ki te Aliki” o te ‵tou fakaolataga. (Mika 7:7) E tonu, “ke malosi kae loto lasi, koutou katoa kolā e [fakatali‵tali] ki te Aliki [ko Ieova.”—Salamo 31:24.

[Fakamatalaga fakaopoopo]

[Ata i te itulau e 25]

Ne fakatuanaki a Tanielu me ka fakataunu a valoaga kolā ne fakaasi atu ne te Atua ki a ia

[Ata i te itulau e 27]

E mata, e fakaaogā faka‵lei ne koe te taimi i te faiga o te loto o Ieova?