E Mata, E Fakaata Mai I A Koe Te ‵Malu O Ieova?

“Ko fakaata atu ne tatou . . . a te ‵malu o Ieova . . . e pelā me ne kilo.”​—2 KOLINITO 3:18.

KA TALI MAI KOE PEFEA?

Faitalia te ‵tou tulaga agasala, e mafai pefea o faka‵malu atu tatou ki a Ieova?

E fesoasoani mai pefea ki a tatou a ‵tou ‵talo mo ‵tou ‵kau atu ki fakatasiga faka-Kelisiano, ke fakaata atu ne tatou te ‵malu o te Atua?

Se a te mea e mafai o fesoasoani mai ke faka‵malu atu faeloa tatou ki a Ieova?

1, 2. Kaia e ‵lei ei ke fakamoe‵moe tatou me e mafai o fakaakoako tatou ki uiga ‵gali o Ieova?

A TATOU katoa e ‵soko eiloa ki ‵tou mātua i auala kese‵kese. Tela la, e sē se mea fakapoi ke lagona atu se tino e fai atu penei ki se tamaliki tagata, ‘A koe e soko eiloa ki tou tamana.’ Kāti e mafai o fai atu penei ki se tamaliki fafine, ‘A koe e pelā eiloa mo tou mātua.’ Kae e mafai o fakaakoako atu a tama‵liki ki mea kolā e matea ne latou e fai ne olotou mātua. Kae e a tatou? E mata, e mafai o fakaakoako atu tatou ki te ‵tou Tamana i te lagi ko Ieova? E tigā eiloa e seki matea ne tatou a ia, e mafai o iloa ne tatou ana uiga ‵gali mai te sukesuke ki tena Muna, te onoono atu ki ana mea ne faite, mo te mafaufau ‵loto ki mea i te Tusi Tapu, kae maise eiloa a pati mo mea kolā ne fai ne te Tama a te Atua, ko Iesu Keliso. (Ioane 1:18; Loma 1:20) E mafai eiloa o fakaata mai i a tatou a te ‵malu o Ieova.

² A koi tuai o faite a Atamu mo Eva, ne talitonu te Atua me ka mafai o fai ne tino a mea kolā e loto a ia ki ei mō latou eiloa, e fakaata mai i ei ana uiga ‵lei, kae avatu ei a vikiga ki a ia. (Faitau te Kenese 1:26, 27.) I ‵tou tapuakiga ki te Atua, e ‵tau o fakaasi atu ne tatou a uiga o te Tino telā ne faite ne ia tatou. Kafai e fai tatou penā, ka maua ei ne tatou te tauliaga manuia ke fakaata atu i a tatou te ‵malu o te Atua faitalia a ‵tou tuu mo aganuu, ‵tou akoakoga, mo ‵tou telega. Kaia? “Me i te Atua e se fakailoga tino, kae ko te tino mai so se fenua telā e mataku ki a ia kae fai mea tonu e talia eiloa ne ia.”—Galuega 10:34, 35.

3. Ne a lagonaga e mafai o maua ne Kelisiano i te taimi e tavini atu ei latou ki a Ieova?

³ E fakaata mai i Kelisiano fakaekegina a te ‵malu o Ieova. Tela la, ne tusi mai penei te apositolo ko Paulo telā ne fakaeke ki te agaga: “A ko tatou katoa, kafai ko fakaata atu ne tatou kolā e se ‵pono ‵tou mata ki se veli a te ‵malu o Ieova e pelā me ne kilo, ka ‵fuli ei tatou ki te ata foki tenā mai te ‵malu e tasi ki te suā ‵malu.” (2 Kolinito 3:18) I te taimi ne fanaifo ei a te pelofeta ko Mose mai te mauga o Sinai mo fatu mā e lua kolā e tusi i ei a Tulafono e Sefulu, ne maina mai i ana mata a te mainaga me ko oti ne fai‵pati a lāua mo Ieova. (Esoto 34:29, 30) E tigā eiloa e se maua i Kelisiano se vaegā mea penā kae e se maina atu foki i olotou mata a te mainaga, e fia‵fia eiloa latou i te taimi e fakailoa atu ei ne latou ki nisi tino e uiga ki a Ieova, ana uiga, mo ana fuafuaga fakaofoofogia mō te kaukāiga o tino. E pelā eiloa mo kilo matilo‵tilo i aso mua, e penā foki te fakaata mai ne tino fakaekegina mo olotou taugasoa i te lalolagi a te ‵malu o Ieova i olotou olaga mo te lotou galuega talai. (2 Kolinito 4:1) E mata, e fakaata mai ne koe te ‵malu o Ieova mai te ola e ‵tusa mo mea kolā e fiafia a ia ki ei kae kau faeloa ki te galuega talai?

E MA‵NAKO TATOU O FAKAATA ATU TE ‵MALU O IEOVA

4, 5. (a) Se a te taua e taua ei tatou e pelā mo Paulo? (e) Ne pokotia pefea tatou i te agasala?

⁴ E pelā me ne tavini a Ieova, e ma‵nako eiloa tatou o fakaaloalo kae faka‵malu atu ki te ‵tou Māfuaga i mea katoa e fai ne tatou. Kae e uke a taimi, e se fai ne tatou a mea kolā e ma‵nako tatou o fai. Ne ‵tau o taua atu a Paulo ki te fakalavelave tenā i a ia eiloa. (Faitau te Loma 7:21-25.) I tena fakamatalaga e uiga ki te pogai e taua atu ei tatou penā, ne tusi mai penei a Paulo: “Ko oti ne agasala a tino katoa kae ko ‵mao mai te ‵malu o te Atua.” (Loma 3:23) Ao, e auala i te agasala telā ne togi mai ne Atamu, ne pule atu ei te ‘Tupu ko te Agasala’ ki te kaukāiga o tino i se auala fakasauā.—Loma 5:12; 6:12.

⁵ Se a te agasala? Ko so se mea telā e se fetaui mo uiga o Ieova, ana auala, ana tulaga, mo tena loto. E fakamasei ne te agasala a te fesokotakiga ‵lei o te tino mo te Atua. E fai ne te agasala ke sē fakaata atu ne tatou te ‵malu o te Atua, e pelā eiloa mo te seke o te matāsana a se tino mai tena tāketi. E mafai o agasala tatou mo te iloa tonu io me se mea pāsala. (Numela 15:27-31) E ‵piki ‵mau te agasala ki luga i tino, kae fai mo fai se ‵pui i te vā o latou mo te lotou Māfuaga. (Salamo 51:5; Isaia 59:2; Kolose 1:21) Tela la, ko sē kātoatoa a te fealofani o tino katoa mo Ieova, kae ko sē maua foki ne tatou te avanoaga tafasili i te tāua ke fakaata mai ne tatou te ‵malu o te Atua. E seai se fakalotolotolua me i te agasala ko te ‵toe mea masei telā e pokotia ei te kaukāiga o tino.

6. Faitalia ‵tou tulaga agasala, e mafai pefea o faka‵malu atu tatou ki te Atua?

⁶ Faitalia a ‵tou tulaga agasala, ko oti ne fakatalitonu mai i a Ieova ko “te Atua, telā e tuku mai ne ia te fakamoemoega.” (Loma 15:13) Ko oti ne fakatoka ne ia te auala ke fakaseai atu ei te agasala—ko te taulaga togiola a Iesu Keliso. Mai te fakatuanaki ki te taulaga tenā, ko sē fai ei tatou mo fai “a pologa a te agasala,” kae ko ‵tu atu tatou i te tulaga telā ka fakaata mai i a tatou a te ‵malu o Ieova. (Loma 5:19; 6:6; Ioane 3:16) A te fakatumauga o te fesokotakiga ‵lei tenā mo te Atua, e fakamautinoa mai i ei ki a tatou a fakamanuiaga a Ieova i aso nei, e pelā foki mo te tulaga ‵lei kātoatoa mo te ola se-gata-mai i aso mai mua. E tigā eiloa koi fai tatou mo fai ne tino agasala, se fakamanuiaga lasi ‵ki māfai e kilo mai te Atua ki a tatou e pelā me ne tino taki tokotasi kolā e fakaata atu ne tatou tena ‵malu!

KE FAKAATA ATU A TE ‵MALU O TE ATUA

7. Se a te mea e ‵tau o matea ne tatou e uiga ki a tatou eiloa, ko te mea ke fakaata atu ne tatou te ‵malu o te Atua?

⁷ Ko te mea ke ‵tu tatou i te tulaga tonu ke fakaata atu te ‵malu o te Atua, e ‵tau o fakamaoni tatou o ‵kilo ifo ki ‵tou tulaga agasala. (2 Nofoaiga Tupu 6:36) E manakogina ke iloa ne tatou ‵tou uiga agasala, kae ga‵lue ke pule atu ki ei, ko te mea ke ga‵solo atu tatou ki te tulaga telā ko mafai ei o fakaata ‵tonu atu ne tatou te ‵malu o te Atua. E pelā me se fakaakoakoga, kafai ko ‵to atu tatou ki te agasala ko te onoono ki ata ma‵sei, e mautinoa ‵lei me e ma‵nako tatou ki se fesoasoani i te feitu faka-te-agaga—kae fai se faiga ke maua te mea tenā. (Iakopo 5:14, 15) Tenei eiloa te lasaga muamua e ‵tau o fai ke maua ei se olaga telā e fakaaloalo kātoatoa atu ki te Atua. E pelā me ne tino tapuaki ki a Ieova, e ‵tau o iloilo faeloa ne tatou a tatou eiloa, ke onoono aka me e tumau tatou i ana tulaga amio‵tonu io me ikai. (Faataoto 28:18; 1 Kolinito 10:12) Faitalia a ‵tou tulaga agasala, e ‵tau mo tatou o tumau i te ‵kalo kea‵tea mai mea konā ko te mea ke mafai o fakaata atu ne tatou te ‵malu o te Atua.

8. E tigā eiloa e se ‵lei kātoatoa tatou, ne a ‵tou mea e ‵tau o fai?

⁸ A Iesu ko te tino fua e tokotasi telā ne ola kae mate i te faiga o mea katoa kolā e fakafiafia atu ki te Atua kae fakaata atu i ei a Tena ‵malu. E tigā eiloa e se ‵lei kātoatoa tatou e pelā mo Iesu, e mafai kae ‵tau foki o taumafai malosi tatou ke tau‵tali atu i tena fakaakoakoga. (1 Petelu 2:21) E iloa ‵lei ne Ieova a ‵tou taumafaiga e fai, e pelā foki mo ‵tou ga‵solo ki mua, kae e fakamanuia ne ia a ‵tou taumafaiga ke avatu ei ki a ia a vikiga.

9. Se a te tusaga o te Tusi Tapu i olaga o Kelisiano kolā e ma‵nako ke fakafetaui aka latou mo tulaga amio‵tonu o te Atua?

⁹ E mafai o fakamaina ne te Muna tusia a Ieova a ‵tou auala ke oko atu tatou ki se tulaga telā e ‵lei atu. E tāua ‵ki te sukesuke mo te mafaufau ‵loto ki mea kolā e fai‵tau tatou ki ei i te Tusi Tapu. (Salamo 1:1-3) E fesoasoani mai te faitau ki te Tusi Tapu i aso katoa ke ga‵solo aka tatou o ‵lei atu. (Faitau te Iakopo 1:22-25.) A te iloaga mai te Tusi Tapu e fakavae ki ei a te ‵tou fakatuanaki, kae ko te auala foki e fakamalosi aka ei a ‵tou fakaikuga ke ‵kalo kea‵tea mai i agasala matagā kae fakafiafia atu ki a Ieova.—Salamo 119:11, 47, 48.

10. E fesoasoani mai pefea a ‵talo ko te mea ke ‵lei atu te ‵tou taviniga ki a Ieova?

¹⁰ Ko te mea ke fakaata atu ne tatou te ‵malu o te Atua, e manakogina ke “‵talo faeloa” tatou. (Loma 12:12) E mafai kae e ‵tau foki o ‵talo atu tatou ke fesoasoani mai a Ieova ko te mea ke tavini atu tatou i te auala telā e talia ne ia. Ko te mea ke fai penā, e mafai o fakamolemole atu tatou ke maua ne tatou tena agaga tapu, ke momea aka te ‵tou fakatuanaki, te malosi ke ‵teke atu ki fakaosoosoga, mo te poto ‘ke akoako ‵tonu atu ne koe te munatonu.’ (2 Timoteo 2:15; Mataio 6:13; Luka 11:13; 17:5) E pelā eiloa mo te fakalagolago o se tamaliki ki tena tamana, e penā foki te ‵tou fakalago‵lago ki te ‵tou Tamana i te lagi, ko Ieova. Kafai e fakatagi atu tatou ke fesoasoani mai ko te mea ke faka‵lei aka te ‵tou tapuakiga ki a ia, e tali‵tonu tatou me tenā eiloa te mea ka fai ne ia. Ke mo a ma mafau‵fau tatou i a tatou ko sōna fakalavelave atu fua ki a ia! I lō te fai penā, ke na tavae atu tatou ki a ia i ‵tou ‵talo, fakafetai atu ki a ia, ‵sala atu ki tena takitakiga maise mai lalo i tofotofoga, kae fakatagi atu ke fesoasoani mai ke tavini atu tatou ki a ia i auala kolā e faka‵malu ei ki tena igoa tapu.—Salamo 86:12; Iakopo 1:5-7.

11. E fesoasoani mai pefea a fakatasiga a te fakapotopotoga ke fakaata atu ne tatou a te ‵malu o te Atua?

¹¹ Ko oti ne tuku atu ne te Atua ana mamoe pele mai lalo i te tausiga a “te tavini fakamaoni kae poto.” (Mataio 24:45-47; Salamo 100:3) Ko oko eiloa i te fia iloa ne te potukau pelā me se tavini a te auala e fakaata mai ei ne taina tali‵tonu a te ‵malu o Ieova. E fesoasoani mai a ‵tou fakatasiga ke fai a fakamafuli‵fuliga ki ‵tou olaga kae tai faka‵lei atu a ‵tou uiga faka-Kelisiano, e pelā eiloa mo te ‵fuli ne se tino suisui ‵tou gatu ko te mea ke ‵gali atu ‵tou foliga. (Epelu 10:24, 25) Tela la, e ‵tau o oko atu tatou i te taimi tonu, me kafai e fakamasani tatou ki te tuai ‵soko, ko sē maua ei ne tatou a nisi ‘suisuiga’ faka-te-agaga kolā e aoga ki te fakagaligaliga o ‵tou foliga e pelā me ne tavini a Ieova.

KE NA FAKAAKOAKO TATOU KI TE ATUA

12. E mafai pefea o fakaakoako tatou ki te Atua?

¹² Kafai e fakaata atu ne tatou te ‵malu o Ieova, e ‵tau o “fakaakoako [tatou] ki te Atua.” (Efeso 5:1) E tasi te auala e fakaakoako atu ei tatou ki te Atua ko te tau‵tali i tena kilokiloga e uiga ki so se mea. A te taumafai ke ola i so se olaga e se fakaaloalo atu ki a ia kae fakamasei mai fua ki a tatou. Ona ko tatou e sikomia ne te lalolagi telā e pule ne te tino masei, ko Satani te Tiapolo, e ‵tau o ga‵lue malosi tatou ko te mea ke takalia‵lia tatou ki mea kolā e takalialia ki ei a Ieova, kae ke a‵lofa malosi foki ki mea kolā e alofa a ia ki ei. (Salamo 97:10; 1 Ioane 5:19) E ‵tau o tali‵tonu tatou i ‵tou loto me i te auala fua e tasi e ‵tau ei o tavini atu tatou ki te Atua, ko te faiga o mea katoa mō ana vikiga.—Faitau te 1 Kolinito 10:31.

13. Kaia e ‵tau ei o takalia‵lia tatou ki te agasala, kae se a te mea ka fakamalosi mai ne te mea tenei ke fai ne tatou?

¹³ E takalialia a Ieova ki te agasala, kae e ‵tau foki o penā tatou. Kafai e takalia‵lia tatou ki te agasala, ka faka‵mao eiloa tatou kea‵tea mai te faiga o so se mea telā e mafai o fai ei tatou ke agasala. E pelā me se fakaakoakoga, e manakogina ke puipui tatou mai tino kolā e ‵teke ki akoakoga a te Atua, se agasala telā ka fai i ei tatou ke sē faka‵malu atu ki te Atua. (Teutelonome 13:6-9) Tenā eiloa te pogai e ‵tau ei o ‵kalo kea‵tea tatou mai tino ‵teke io me ko so se tino telā e fai mai i a ia se taina kae tela la e se fakaaloalo atu ki te Atua. E penā foki loa māfai a ia se tino o tou kāiga. (1 Kolinito 5:11) E seai se mea aoga e maua ne tatou mai te taumafai o faka‵se aka a kinauga a tino ‵teke io me ko latou kolā e fakamasei atu ki te fakapotopotoga a Ieova. A te ‵tonuga loa, se mea fakamataku i te feitu faka-te-agaga ke iloilo aka olotou fakamatalaga, faitalia me i olotou tusi io me i te Itaneti.—Faitau te Isaia 5:20; Mataio 7:6.

14. I te taimi e ga‵lue ei ke fakaata atu te ‵malu o te Atua, se a te uiga tafasili i te tāua telā e ‵tau o lavea i a tatou, kae kaia?

¹⁴ A te fakaasiatuga o te alofa ko te auala tafasili i te ‵lei i te fakaakoako atu ki te ‵tou Tamana i te lagi. Ao, e ‵tau tatou o a‵lofa e pelā mo ia. (1 Ioane 4:16-19) A te ‵tonuga loa, a te alofa telā e maua i vā o tatou e fakaasi atu i ei i a tatou ko soko o Iesu kae ko tavini foki a Ieova. (Ioane 13:34, 35) E tigā eiloa e fakalavelave mai te ‵tou tulaga agasala i nisi taimi, e ‵tau o ‵teke ne tatou kea‵tea, kae fakatalitonu atu i a tatou e a‵lofa i taimi katoa. A te atiakaga o te alofa mo nisi uiga o te Atua e puipui ei tatou mai te faiga o te agasala mo mea sē ‵lei.—2 Petelu 1:5-7.

15. E pokotia pefea te ‵tou fesokotakiga mo nisi tino i te alofa?

¹⁵ E fai ne te alofa ke ma‵nako tatou o fai a mea ‵lei ki nisi tino. (Loma 13:8-10) E pelā mo ‵tou a‵lofa ki ‵tou avaga e fai ei ke tausi ne tatou te moega o te fakaipoipoga ke mo a ma lailai. Te alofa ki toeaina, fakatasi mo te āva ki olotou galuega, ka fesoasoani mai ke faka‵logo tatou ki olotou fakatonuga. A tama‵liki kolā e a‵lofa ki olotou mātua, e faka‵logo kae āva ki a latou, kae e se fakamasei atu ki a latou. Kafai e a‵lofa tatou ki ‵tou tino, ka sē ‵kilo atu tatou ki a latou e pelā me ne tino fatauvā, io me fai‵pati atu tatou ki a latou mo te sē āva. (Iakopo 3:9) Kae ko toeaina kolā e a‵lofa ki mamoe a te Atua e atafai eiloa ki a latou.—Galuega 20:28, 29.

16. E fesoasoani mai pefea ki a tatou a te fakaasiatuga o te alofa i te ‵tou galuega talai?

¹⁶ E ‵tau foki o fakaasi atu te uiga ko te alofa i te ‵tou galuega talai. Ona ko te lasi o te ‵tou a‵lofa ki a Ieova, e sē ‵tau o faka‵tuka mai ki a tatou a te sē fia ‵saga mai o tino i nisi fale. I lō te fai penā, ka talai atu faeloa ne tatou te ‵tala ‵lei. Ka fakamalosi mai te alofa ke fakatoka faka‵lei tatou, kae taumafai ke magoi te ‵tou galuega. Kafai e a‵lofa tonu tatou ki te Atua mo ‵tou tuakoi, ka sē ‵kilo atu eiloa tatou ki te faiga o te galuega talai o te Malo e pelā me se tiute fua e ‵tau o fai. I lō te fai penā, e ‵tau o ‵kilo atu tatou ki ei e pelā me se tauliaga tafasili i te tāua telā e fai ne tatou mo te fiafia lasi.—Mataio 10:7.

KE TUMAU I TE FAKA‵MALU ATU KI A IEOVA

17. Kaia e aoga ei ke iloa ne tatou i ‵tou tulaga ko ‵mao mai te ‵malu o te Atua?

¹⁷ E se iloa ne te tokoukega o tino i te lalolagi a te fakamataku o te agasala, kae e iloa ne tatou. E fai ne te mea tenei ke matea ne tatou te manakoga ke taua atu ki ‵tou uiga mo ‵tou manakoga agasala. A te iloa atu o te ‵tou tulaga agasala e fai ei ke akoako ne tatou ‵tou loto lagona ko te mea ke ga‵sue fakavave tatou i se auala ‵tau, māfai ko tupu aka se fakamalosiga i ‵tou mafaufau mo ‵tou loto ke fai se agasala. (Loma 7:22, 23) E tonu, e mafai o vāi‵vai tatou, kae e mafai o fakamalosi aka tatou ne te Atua ke fai ne tatou te mea tonu mai lalo i so se fakanofonofoga.—2 Kolinito 12:10.

18, 19. (a) Se a te mea e fai ei ke manumalo tatou i te ‵tou taua mo agaga ma‵sei? (e) Se a te fakaikuga mautinoa e ‵tau o fai ne tatou?

¹⁸ Kafai e faka‵malu ne tatou a Ieova, e ‵tau foki o taua atu tatou ki agaga ma‵sei. E mafai o fai ne tatou te mea tenei mo te manuia mai te fakaaogāga o ‵tou meatau faka-te-agaga mai te Atua. (Efeso 6:11-13) E taumafai faeloa a Satani ke kaisoa ne ia te ‵malu telā e ‵tau fua o maua ne Ieova. E fai foki ne te Tiapolo so se taumafaiga ke fakamasei aka ei te ‵tou fesokotakiga mo Ieova. Kae ko oko eiloa i te lasi o te logo‵mae o Satani māfai e fakatumau ne tatou mo nisi tāgata, fāfine, mo tama‵liki sē ‵lei katoatoa te ‵tou a‵lofa fakamaoni kae faka‵malu atu ki te Atua! Tela la, ke na tumau tatou i te tavae atu ki a Ieova, e pelā mo agelu i te lagi kolā ne usu mai penei: “E ‵tau eiloa o avatu ki a koe, e Ieova, te motou Atua, te vikiga, te ‵malu, mo te malosi, me ne faite ne koe a mea katoa, kae ona ko tou loto ne ola mai ei a mea konā me ne faite ne koe latou.”—Fakaasiga 4:11.

¹⁹ Ke na fakaiku aka ne tatou mo te mautinoa ke faka‵malu atu faeloa ki a Ieova, faitalia me se a te mea e tupu. E mautinoa eiloa me fiafia faeloa a ia me e tokouke a tino a‵lofa fakamaoni e fai ne latou te ‵toe mea e mafai o fai ke fakaakoako atu ki a ia kae fakaata mai ne latou tena ‵malu. (Faataoto 27:11) Ke na fai tatou pelā mo Tavita, telā ne usu mai penei: “Te Aliki toku Atua, e tavae au ki a koe mo toku loto kātoatoa, kae folafola atu ne au tou ‵malu ki te se gata mai.” (Salamo 86:12) E olioli eiloa tatou ke na oko mai te aso telā ka fakaata atu ei ne tatou te ‵malu o Ieova i se auala ‵lei kātoatoa, kae tavae atu ki a ia ki te se-gata-mai! Ka fai a te mea tenei mo fai se mea fakafiafia ki tino faka‵logo katoa. E mata, e fakaata atu nei ne koe te ‵malu o Ieova te Atua, mo te fakamoemoega ke fai penā ke oko eiloa ki te se-gata-mai?

[Ata i te itulau e 31]

E mata, e fakaata atu ne koe te ‵malu o Ieova i auala konei?