“Ke Fakamautinoa Aka . . . A Mea Kolā E Sili Atu I Te Tāua”

1, 2. Se a te valoaga e uiga ki aso fakaoti ne fia iloa ne soko o Iesu, kae kaia?

I TE fakaotiga loa, ne ‵nofo fakatasi a Petelu, Iakopo, Ioane, mo Anitelea mo te lotou Matai. Ne ‵mafa ‵ki ki olotou mafaufau a pati a Iesu ne fai mai mua atu e uiga ki te fakamaofaga o te faletapu. (Male. 13:1-4) Tela la, ne fesili atu latou: “Fai mai aka ki a matou, Ka ‵tupu mafea a mea konei, kae se a foki te fakailoga o tou fakatasi mai mo te taimi o te gataga o te olaga tenei?” (Mata. 24:1-3) Ne kamata o fai atu ne Iesu ki a latou a mea ‵tupu, kolā ka sē iku atu fua ki ‵fuliga ‵lasi ki olaga o tino kae e fakamailoga foki ki ei a aso fakaoti o te lalolagi masei a Satani. E tasi te mea e tupu ne fia iloa ne soko o Iesu. I te otiga ne fai atu ne Iesu a fakalavelave fakama‵taku pelā mo taua, te sē lava o mea‵kai, mo te fanakaga o te solitulafono, ne fai atu ne Iesu se mea ‵lei telā ka fakamailoga foki ki ei aso fakaoti. Ana muna: “A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa; ko oko mai ei te gataga.”​—Mata. 24:7-14.

² Ne fia‵fia a soko o Iesu o talai a te tala ‵lei o te Malo fakatasi mo Keliso. (Luka 8:1; 9:1, 2) Kāti ne masaua ne latou ana pati: “Ko oko eiloa i te uke o fuataga e ‵tau o tau, kae e mu‵tana a tino ga‵lue. Tela la, fakatagi atu ki te Matai o te galuega ke uga mai a tino faigaluega o tau a fuataga.” (Luka 10:2) Kae ka talai atu pefea latou i “te lalolagi nofoaki kātoa” kae tuku atu “se molimau ki atufenua katoa”? Ka maua mai i fea a tino ga‵lue? Moi ne mafai fua la o ‵kilo atu latou ki te taimi mai mua a koi saga‵saga fakatasi latou mo Iesu i te aso tenā! E seai se fakalotolotolua me ka ofo latou i te fakataunuga o pati kolā e faitau nei ne tatou i te Mataio 24:14.

3. Ne fakataunu pefea a te Luka 21:34 i aso nei, kae se a te iloiloga totino e ‵tau o fai ne tatou?

³ E ola nei tatou i te taimi e fakataunu ei a te valoaga a Iesu. E lau i miliona a tino ko oti ne ‵kau fakatasi o faka‵fonu te lalolagi ki te talaiga o te tala ‵lei o te Malo. (Isa. 60:22) Ne fakaasi mai ne Iesu me ka faigata ki nisi tino ke fakatumau a te fakamuamua o te galuega talai i aso fakaoti konei. Ko tō fakalavelave latou i te faiga o nisi mea kae ko ‘faka‵mafa olotou loto’ ki ei. (Faitau te Luka 21:34.) Ko lavea foki ne tatou a te fakataunuga o pati konā. A nisi tino o te Atua ko kamata o ‵sipa kea‵tea. E mafai o lavea ne tatou a te mea tenei i ikuga ne fai ne latou e uiga ki galuega ‵togi, akoakoga ma‵luga, mo te mauaga o kope faka-te-foitino, e pelā foki mo te uke o taimi e fakamāumāu ki tafaoga mo fakafiafiaga. A nisi tino ko fi‵ta ona ko te uke o mea e manava‵se ki ei i aso takitasi o te olaga. Ke fesili ifo ki a koe eiloa: ‘E a nei au? E mata, e fakamuamua ne au te loto o te Atua i toku olaga?’

4. (a) Se a te mea ne ‵talo atu a Paulo e uiga ki ei mō Kelisiano i Filipi, kae kaia? (e) Se a te mea ka mafau‵fau tatou ki ei i te mataupu tenei mo te mataupu telā e ‵soko mai, kae se a te mea e fakamoemoe tatou ki ei?

⁴ Ne taumafai malosi a Kelisiano i te senitenali muamua o fakatumau a te fakamuamua ne latou o mea faka-te-agaga. Tenā te pogai ne ‵talo atu ei a Paulo ko latou kolā i Filipi “ke fakamautinoa aka . . . a mea kolā e sili atu i te tāua.” (Faitau te Filipi 1:9-11.) E pelā mo te apositolo ko Paulo, a te tokoukega o Kelisiano i taimi konā ne “loto ‵toa . . . o faipati atu te muna a te Atua e aunoa mo te ma‵taku.” (Fili. 1:12-14) I se auala tai ‵pau, e loto ‵toa foki a te tokoukega o tatou i aso nei o talai atu te Muna a te Atua. Kae e mata, e mafai o fesoasoani mai ki a tatou a te mafaufau ki mea kolā ko fakataunu nei i te fakapotopotoga a Ieova ke ‵saga malosi atu tatou ki te tāua o te galuega talai? E mafai! I te mataupu tenei, ka sau‵tala tatou ki te fakatokaga ko oti ne fai ne Ieova ke fesoasoani mai ki te fakataunuga o pati i te Mataio 24:14. Se a te mea e fai ne tena fakapotopotoga, kae e fakamalosi mai pefea a te mea tenei ki a tatou mo ‵tou kāiga? I te mataupu telā e ‵soko mai, ka mafaufau tatou ki te mea telā e mafai o fesoasoani mai ke loto ‵mau tatou kae tumau i te olo tasi mo te fakapotopotoga a Ieova.

KO GASUE A TE VAEGA FAKA-TE-LAGI O TE FAKAPOTOPOTOGA A IEOVA

5, 6. (a) Kaia ne tuku mai ei ne Ieova a fakaasiga o te vaega faka-te-lagi o tena fakapotopotoga? (e) Se a te mea ne matea ne Esekielu i te fakaasiga?

⁵ E uke a mea ne fakaiku aka ne Ieova ke sē aofia i tena Muna tusia. Pelā me se fakaakoakoga, ne seki tuku mai ne ia a fakamatalaga likiliki ki te auala e galue ei te faiai io me ko te auala e galue ei a te iunivesi, faitalia me ne mafai o fakaofoofogia a fakamatalaga penā! I lō te fai penā, ne tuku mai ne Ieova a fakamatalaga kolā e manakogina ne tatou ko te mea ke malama‵lama tatou i ana fuafuaga kae ola e ‵tusa mo ana fuafuaga. (2 Timo. 3:16, 17) Se mea fakafiafia me e fakaasi mai i te Tusi Tapu a fakamatalaga e uiga ki te vaega sē matea o te fakapotopotoga a Ieova! E fia‵fia eiloa tatou o fai‵tau ki fakamatalaga o te fakatokaga faka-te-lagi a Ieova kolā ne tusi ne Isaia, Esekielu, mo Tanielu mo te tala a Ioane i te Fakaasiga. (Isa. 6:1-4; Eseki. 1:4-14, 22-24; Tani. 7:9-14; Faka. 4:1-11) E pelā eiloa me ko ‵tala ne Ieova a te ‵pui laugatu kae fai mai ke ‵kilo atu tatou ki te lagi. Kaia ne tuku mai ei ne ia a te fakamatalaga tenei?

⁶ Ne manako a Ieova ke sē puli i a tatou ne vaega o se fakapotopotoga i te lagi mo te lalolagi. E uke ‵ki a galuega e fai i te ‵lago atu ki fuafuaga a Ieova i lō mea kolā e matea ne tatou. Pelā me se fakaakoakoga, ne lavea ne Esekielu a te vaega sē matea o te fakapotopotoga a Ieova e fakaata mai ne se ma‵tuga kaliota faka-te-lagi. E makini a te kaliota tenei kae vave foki a te ‵fuliga ki te koga e fano ki ei. (Eseki. 1:15-21) Mai i tamilosaga takitasi o ana teka, ne mafai ei o oko atu a te kaliota ki koga ‵mao. Ne mafai foki o lavea ne Esekielu a te Tino e fakatele ne ia a te kaliota i te fakaasiga. Ana muna: “A te tino tenā e pelā me se palasi e malapulapu mai i te kogaloto o te afi . . . Ko te mainaga tenā, telā e fakaasi mai ei te fakatasi mai o te Aliki [Ieova].” (Eseki. 1:25-28) Ne fakaofoofogia malosi ki a Esekielu ke kilo atu ki te fakaasiga tenei! Ne lavea ne ia a Ieova e pule katoatoa atu ki tena fakapotopotoga, kae fakatonutonu ana mea e fai e auala i tena agaga tapu. Ko oko eiloa i te fakaofoofogia o te fakaatamaiga tenā o te gasuesuega o te vaega faka-te-lagi o te fakapotopotoga a Ieova!

7. E maua pefea ne tatou a te loto talitonu mai i te fakaasiga telā ne tuku atu ki a Tanielu?

⁷ Ne lavea foki ne Tanielu se fakaasiga telā e maua mai i ei ne tatou se loto talitonu. Ne talia ke kilo atu tou tagata ki a Ieova e pelā me ko “Ia telā e ola ki te se gata mai” e sagasaga i te nofogaaliki fakatasi mo ulaga afi. A te nofogaaliki e ‵piki i ei a teka. (Tani. 7:9) Ne manako a Ieova ke lavea ne Tanielu me i Tena fakapotopotoga ko gasuesue o fakataunu a Tena fuafuaga. Ne lavea foki ne Tanielu “se mea pelā me se tino ola,” ko Iesu, ne tuku atu ki ei a te pulega ki luga i te vaega faka-te-lalolagi o te fakapotopotoga a Ieova. A te pulega ‵lei katoatoa a Keliso e se tu mai fua mō se fia o tausaga. A tena pulega “ka tumau ki te se gata mai, mo tena malo ka sē toe gata mai.” (Tani. 7:13, 14) E fakamalosi aka tatou ne te fakaasiga tenei ke tali‵tonu ki a Ieova mo mea kolā e fakataunu ne ia. Ne tuku atu ne ia “te pule, te fakaaloalo, mo te ‵malu fakatupu” ki tena Tama, ko Iesu. E talitonu a Ieova ki tena Tama. Tela la, e ‵tau foki o tali‵tonu tatou ki te takitakiga a Iesu.

8. Se a te fakamalosiga ne maua ne Esekielu mo Isaia i fakaasiga ne tuku atu ne Ieova, kae pokotia pefea tatou i ei?

⁸ E fakamalosi aka pefea tatou ne te fakaasiga tenei o te vaega e se matea o te fakapotopotoga a Ieova? E pelā mo Esekielu, e mautinoa ‵lei me e ma‵taku kae loto maula‵lo tatou ona ko mea kolā e fai ne Ieova. (Eseki. 1:28) A te mafaufau ‵loto ki te fakapotopotoga a Ieova e mafai o fakamalosi mai ki a tatou ke gasue‵sue, e pelā eiloa mo Isaia. I te taimi ne maua ei ne tou tagata a te avanoaga ke fakailoa atu ki nisi tino a mea a Ieova e fai, ne puke ‵mau fakavave tou tagata ki ei e aunoa mo te fakatalave. (Faitau te Isaia 6:5, 8.) Ne talitonu a Isaia me ne mafai o iku manuia a ia i te fakafesagai atu ki so se tulaga faigata ona ko te ‵lago atu o Ieova. I se auala tai ‵pau, a te ‵kilo atu ki te vaega se matea tenei o te fakapotopotoga a Ieova e ‵tau o ofo malosi tatou i ei kae fakamalosi aka i ei tatou ke gasue‵sue malosi. Ko oko eiloa i te fakamalosi mai ke fakamoe‵moe tatou ki te fakapotopotoga tenā, telā e gasuesue faeloa o fakataunu katoatoa a fuafuaga a Ieova!

TE VAEGA FAKA-TE-LALOLAGI O TE FAKAPOTOPOTOGA A IEOVA

9, 10. Kaia e manakogina ei se vaega matea o te fakapotopotoga a Ieova?

⁹ E auala i tena Tama, ne fakatu ne Ieova se vaega o tena fakapotopotoga i te lalolagi telā e ga‵lue tasi mo te vaega se matea i te lagi. Kaia ne manakogina ei se fakatokaga matea ke fakataunu a te galuega telā ne fakamatala mai i te Mataio 24:14? Ke mafaufau ki pogai e tolu.

¹⁰ A te mea muamua, ne fai mai a Iesu me ka olo atu ana soko o talai “ki toe koga ‵mao i te lalolagi.” (Galu. 1:8) Te lua o mea, e manakogina a fakatokaga ke tuku atu a mea‵kai faka-te-agaga kae tausi atu ki a latou kolā e aofia i te galuega tenei. (Ioa. 21:15-17) Te tolu o mea, e ‵tau o fai a fakatokaga ke mafai ne tino kolā e talai a te tala ‵lei o maopoopo fakatasi o tapuaki ki a Ieova kae akoakogina ki te auala e fai ei a te galuega. (Epe. 10:24, 25) E se mafai o tupu fakafuasei a te fakataunuga o fakamoemoega konei. Ko te mea ke iku manuia a soko o Keliso, e ‵tau o fakatoka faka‵lei a te faiga o te galuega.

11. E ‵lago atu pefea tatou ki fakatokaga ne fai ne te fakapotopotoga a Ieova?

¹¹ E ‵lago atu pefea tatou ki fakatokaga ne fai ne te fakapotopotoga a Ieova? E tasi te auala tāua ko te tali‵tonu faeloa o tatou ki tino kolā e tali‵tonu a Ieova mo Iesu ki ei ke takitaki tatou i tou galuega talai. E uke a mea e fai i te lalolagi i aso nei kolā ne mafai o fakalavelave atu ki a latou kolā e fai te takitakiga i a tatou. E ui i ei, se a te mea ne saga atu faeloa ki ei a te vaega matea o te fakapotopotoga a Ieova?

SAGA TONU KI “MEA KOLĀ E SILI ATU I TE TĀUA”

12, 13. E fakataunu pefea ne toeaina Kelisiano olotou tiute, kae kaia e fakamalosi atu ei a te mea tenā ki a koe?

¹² Ko oti ne ‵tofi aka a toeaina Kelisiano apo i te lalolagi kātoa ke onoono kae fakamalosi aka a te faiga o te galuega talai o te Malo i fenua kolā e ga‵lue latou i ei. Kafai e fai a fakaikuga a taina konei, e ‵sala atu latou ki se fakatakitakiga mai te Muna a te Atua, ke fai pelā me se ‘moli e takitaki ne ia latou, se mainaga foki ki olotou auala,’ kae ‵talo atu mō te takitakiga a Ieova.​—Sala. 119:105; Mata. 7:7, 8.

¹³ E pelā mo latou kolā ne fai te takitakiga i te senitenali muamua, e tuku katoatoa atu a toeaina Kelisiano kolā e onoono ki te faiga o te galuega talai i aso nei ki “te talaiatuga o te muna.” (Galu. 6:4) E fia‵fia malosi latou ki te gasolo ki mua o te talaiga o te tala ‵lei i olotou fenua mo te lalolagi kātoa. (Galu. 21:19, 20) E se faite ne latou ne tulafono mo fakanofonofoga tumau. E tau‵tali eiloa latou i Tusitusiga Tapu mo te takitakiga a te agaga tapu o te Atua i te faiga o fakatokaga kolā e fesoasoani ki te gasolo ki mua o te galuega talai. (Faitau te Galuega 15:28.) Mai te faiga penā, e tuku mai ei ne taina konei se fakaakoakoga ‵lei ki tino katoa i olotou fakapotopotoga.​—Efe. 4:11, 12.

14, 15. (a) Ne a fakatokaga ne fai ke ‵lago atu ki te galuega talai i te lalolagi kātoa? (e) E pefea ou lagonaga ki mea e fai ne koe ke ‵lago atu ki te galuega talai o te Malo?

¹⁴ E se lavea ne te tokoukega o tino a galuega ‵mafa ki te fakatokaga o mea‵kai faka-te-agaga mō ‵tou lōmiga, fakatasiga, mo fono o atufenua. E lau i afe a volenitia e ga‵lue kae sē fi‵ta i te ‵fuliga o mea‵kai faka-te-agaga konei ki ‵gana e 600, ko te mea ke mafai o tauloto a tino e tokouke “ki galuega fakaofoofogia a te Atua” i olotou ‵gana eiloa. (Galu. 2:7-11) E ga‵lue malosi a taina mo tuagane talavou i te faiga o ‵tou tusi i masini ‵lomi mo masini faka‵piki. E ave a tusi konei ki fakapotopotoga ke oko foki ki toe koga ‵mao i te lalolagi.

¹⁵ E uke a fakatokaga ko oti ne fai ko te mea ke mafai o ‵saga tonu atu tatou ki te talaiga o te tala ‵lei i ‵tou fakapotopotoga. Pelā me se fakaakoakoga, e lau i afe e volenitia ke fesoasoani latou ki te faitega o Kingdom Halls mo Assembly Halls, ke fesoasoani ki a latou kolā e pokotia ne fakalavelave o te natula io me kolā e ma‵nako fakavave ki te fesoasoani o te fa‵kai masaki, ke fakatoka a ‵tou fono o te fenua mo fono o te atufenua, kae akoako i akoga mō tino talai, ko nāi mea fua konei e fai kae sē matea. Se a te aoga o mea katoa konei e fai i te galuega tenei? Ke fesoasoani mai ki a tatou i te talaiga o te tala ‵lei, ke fakamalosi aka a te feitu faka-te-agaga o latou kolā e fai ne latou a te galuega tenei, kae fesoasoani ke gasolo ki mua a te tapuakiga tonu. E mata, ne tumau a te vaega faka-te-lalolagi o te fakapotopotoga a Ieova i te ‵saga tonu ki mea kolā e sili atu i te tāua? Ao!

TAUTALI I TE FAKAAKOAKOGA A TE FAKAPOTOPOTOGA A IEOVA

16. Ne a mea e mafai o sukesuke ki ei i te tapuakiga a te kāiga io me ko sukesukega totino?

¹⁶ E mata, e mafaufau koe i nisi taimi ki galuega ne fai ne te fakapotopotoga a Ieova? Ne fakaiku aka ne nisi tino ke fai olotou sukesukega ki mea konei kae mafaufau ‵loto ki ei i taimi o tapuakiga a te kāiga io me ko olotou sukesukega totino. Se mea fakamalosi loto a te sukesuke ki fakaasiga kolā ne tuku atu ki a Isaia, Esekielu, Tanielu, mo Ioane. E mafai o ‵poko ‵tou malamalama i mea e fai i te fakapotopotoga māfai e fai‵tau tatou ki te tusi ko te Jehovah’s Witnesses​—Proclaimers of God’s Kingdom mo nisi lōmiga io me onoono ki DVD kolā e mafai o maua i tau ‵gana eiloa.

17, 18. (a) Ne aoga pefea ki a koe a te sau‵talaga tenei? (e) Ne a fesili e ‵tau o mafau‵fau tatou ki ei?

¹⁷ Se mea ‵lei ke mafaufau ‵loto tatou ki mea kolā ne fakataunu ne Ieova e auala i tena fakapotopotoga. Fakatasi mo te fakapotopotoga fakaofoofogia tenei, ke na fakaiku aka ne tatou ke ‵saga tonu atu faeloa ki mea kolā e sili atu i te tāua. I te faiga tenā, ka fakamalosi aka ei tatou ke ‵pau ‵tou fakaikuga mo Paulo telā ne tusi mai, penei: “Ona ko te mea ko maua ne matou a te galuega tenei e ‵tusa mo te alofa fakamagalo telā ne fakaasi mai ki a matou, e se mafai o ‵fiu matou.” (2 Koli. 4:1) Ne fakamalosi atu tou tagata ki ana taina ga‵lue: “Ke mo a ma ‵fiu tatou i te faiga o mea ‵lei, me ka tau eiloa ne tatou a mea ‵lei i te taimi tonu māfai e se ‵fiu tatou.”​—Kala. 6:9.

¹⁸ E mata, e isi ne ‵fuliga e manakogina ke fai ne tatou taki tokotasi io me pelā me se kāiga ke fakamautinoa aka a mea kolā e sili atu i te tāua i ‵tou mea e fai i aso katoa? E mata, e mafai o fakafaigofie ‵tou olaga ko te mea ke uke atu ‵tou mea e fai i te galuega talai? I te suā mataupu, ka mafau‵fau tatou ki mea e lima kolā ka fesoasoani mai ke tumau tatou i te olo tasi mo te fakapotopotoga a Ieova.