“Ko Oti ne Maua ne Matou te Mesia”!

Kāti i te fa o senitenali mai tua ifo o te tusiga o te ‵toe tusi i te Tusi Tapu Epelu, ne fakataunu mai ei a te valoaga a Mika e uiga ki te Mesia: Ne fanau mai a Iesu i Peteleema. Kāti i se 30 tausaga mai tua ifo i ei, i te 29 T.A., ne fakataunu mai i ei a te vaega muamua o te valoaga a Tanielu e uiga ki te oko mai o te Mesia. Ne papatiso a Iesu kae ne fakaekegina a ia ne te Atua ki te agaga tapu. Ne oko mai eiloa a te Mesia, te Fanau telā ko leva ne fakatalitali ki ei, i te taimi tonu!

Ne kamata fakavave ne Iesu tena galuega, mai i te “talai kae folafola atu te tala ‵lei e uiga ki te Malo o te Atua.” (Luka 8:1) E pelā eiloa mo te mea ne ‵valo mai, ne fai a Iesu mo fai se tino atafai, agamalū, kae manavase tonu e uiga ki nisi tino. Ne aoga kae lavea atu foki te alofa i ana akoakoga, ne faka‵lei ne ia a “vaegā masaki mo famai katoa o tino,” telā ne fakaasi atu ei me e fakatasi te Atua mo ia. (Mataio 4:23) Ne olo atu a tino valevale ki a Iesu kae ne fakaiku aka ne latou: “Ko oti ne maua ne matou te Mesia”!—Ioane 1:41.

Ne ‵valo mai ne Iesu, me ka ‵tupu a taua, mafuie, mo nisi fakalavelave e uke i te lalolagi, mai mua faeloa o pule katoatoa mai tena Malo. Ne fakamalosi atu a ia ki tino katoa ke “tumau i te matapula‵pula.”—Maleko 13:37.

Ne ‵lei katoatoa a Iesu, telā ne tumau i te fakalogo ki te Atua, kae e isi foki ne ana fili kolā ne tamate fakamuli ne latou a ia. Ne tuku mai ne tena mate se taulaga ‵lei katoatoa ke toe ‵togi mai i ei mō tatou a mea kolā ne ‵galo atu i a Atamu mo Eva—te fakamoemoega ko te ola se-gata-mai i te Palataiso.

A te mate o Iesu ne fakataunu mai i ei se valoaga, e pelā eiloa mo te fakatuakaga ne te Atua a Iesu e pelā me se tino malosi faka-te-agaga mai tua o aso e tolu. Ne toe fakasae atu a Iesu ki ana soko e toko 500 tupu. A koi tuai o fanaka ki te lagi, ne fakatonu atu a Iesu ki ana soko ke fakaoko atu a te tala ‵lei e uiga ki a ia mo tena Malo ki ‘tino o fenua katoa.’ (Mataio 28:19) Ne fakataunu katoatoa pefea ne latou a te galuega tenā?

​—E fakavae ki te Mataio, Maleko, Luka, Ioane, 1 Kolinito.