Te Tala ‵Lei mō Tino Katoa

A te toetuga o Iesu ne fakamalosi aka ei a te loto tali‵tonu mo te loto finafinau o ana soko. Kae maise eiloa a te apositolo ko Paulo telā ne faimalaga atu i Asia Foliki mo fenua i te Metitilani, ne fakatoka ne ia a fakapotopotoga kae fakamalosi atu ki Kelisiano ke ‵tu ‵mautakitaki i te fakafesagai atu ki amioga ma‵sei mo ‵tekemaiga fakasaua. Faitalia a vaegā tulaga faiga‵ta penā, ne gasolo aka eiloa o malosi a te Lotu Kelisiano kae ne tokouke foki a tino ko fai mo Kelisiano.

Ne ‵pei atu a Paulo ki te falepuipui. Kae ne tusi atu eiloa ne ia a tusi fakamalosi mo pati polopoloki ki fakapotopotoga Kelisiano. Ne fakailoa atu foki ne ia e uiga ki se mea telā e sili atu te fakamataku​—ko te aposetasi. Mai lalo i te takitakiga a te agaga tapu, ne lavea ‵mao ne Paulo me ka ulu mai ki loto mai i a latou a “luko fe‵kai” kolā ka “‵fuli faka‵kotua ne latou a mea” kae “‵futi atu ei a soko ki a latou.”​—Galuega 20:29, 30.

I te fakaotiga o te senitenali muamua, ne kamata ei a te aposetasi tenei. I te vaitaimi foki eiloa tenā, ne tuku atu ei ne Iesu, telā ko oti ne toe fakatu aka, ki te apositolo ko Ioane a te Fakaasiga, se ata fakavaloaga o mea ka ‵tupu i aso mai mua. E pelā mo mea ne tusi ne Ioane i te taimi tenā, e seai eiloa ne tino ‵teke io me ne faiakoga ‵loi e mafai o taofi aka ne latou a te Atua mai te fakataunuga katoatoa o tena fuafuaga muamua mō te lalolagi mo tino. Ka lagona ne “fenua katoa, mo matakāiga, ‵gana mo tino” a te tala ‵lei e uiga ki te Malo o te Atua. (Fakaasiga 14:6) Ka toe fakafoki mai a te Palataiso ki te lalolagi, kae ka ‵nofo atu foki i konā so se tino e manako o fai te loto o te Atua!

E mata, e fai eiloa te mea tenā mo fai se “tala ‵lei” ki a koe? Kafai e penā loa, ke tauloto ki mea e uke atu e uiga ki te fekau a te Atua mō tino telā e maua i te Tusi Tapu mo te auala e mafai o aoga ei nei ki a koe, penā foki loa mo aso mai mua.

E mafai o faitau koe ki te Tusi Tapu i te itaneti i te www.jw.org. I te Fakatuatusi tenei, e mafai foki o sukesuke koe ki te polosiua ko Te Tala ‵Lei Mai te Atua! e pelā foki mo te tusi ko te Ne a Mea e Akoako ‵Tonu Mai i te Tusi Tapu? fakatasi mo nisi tusi kolā e fakamatala mai i ei a pogai e mafai ei o tali‵tonu tatou ki te Tusi Tapu mo te auala e mafai ei o fakagalue aka ne tatou a pati fakatonutonu i ‵tou kāiga mo ‵tou olaga totino. Io me e fakamolemole atu ki se Molimau a Ieova e tokotasi mō nisi fakamatalaga.

​—E fakavae ki te Galuega, Efeso, Filipi, Kolose, Filemoni, 1 Ioane, Fakaasiga.