‘Ne Fakamagalo Koutou ne Ieova’

“A te tino telā e se mafai o fakamagalo ne ia a nisi tino e ofa ne ia te piliti telā e ‵tau o fanatu a ia i ei ki te suā feitu.” A pati konā a te tagata tusitala Peletania ko Edward Herbert i te 17 o senitenali, e faka‵mafa mai i ei a te pogai e ‵tau ei o fakamagalo ne tatou a nisi tino: Kāti i se taimi fakamuli ifo, ko ma‵nako tatou ke fakamagalo mai tatou ne nisi tino. (Mataio 7:12) Kae e isi aka foki se pogai e sili atu i te tāua ke maua te loto fakamagalo. Mafaufau ki pati a te apositolo ko Paulo kolā e maua i te Kolose 3:13.​—Faitau.

Ona ko tatou katoa ne tino sē ‵lei katoatoa, e mafai o fakaitaita io me fakafanoanoa ne tatou a nisi tino, kae e mafai foki o fai mai latou penā ki a tatou. (Loma 3:23) E mafai pefea o fakatumau ne tatou a te filemu mo ‵tou taina sē ‵lei katoatoa? Ne fakaosofia eiloa a Paulo ne te Atua ke fakamalosi mai ke maua ne tatou te loto malamalama mo te loto fakamagalo. Koi ‵pau eiloa te aoga o te polopolokiga tenā e pela eiloa mo tena aoga i te taimi ne tusi i ei, toeitiiti ko kātoa te lua afe tausaga ko ‵teka. Ke na onoono faka‵lei aka tatou ki pati a Paulo.

“Ke fakatau fa‵ki faeloa.” A pati “ke fakatau fa‵ki faeloa” ne ‵fuli mai i se pati Eleni telā e fakauiga ki te loto malamalama io me ko te uiga faigofie. E fai mai se tusi e tasi me e fakaasi atu ne Kelisiano a te uiga tenei mai i te “loto fia‵fia ke fa‵ki i tino kolā e se ‵gali io me e se fakafia‵fia olotou uiga kae fakaitaita atu ki a latou.” A pati “koutou i a koutou eiloa” e fakaasi mai i ei ki a tatou me e ‵tau o fa‵ki a tino e tokolua. Ko tena uiga, kafai e masaua ne tatou me e isi foki ne ‵tou uiga kolā e mafai o fakaitaita atu ki nisi tino, e se ‵tau o talia ne tatou a mea kolā e se fia‵fia ei tatou ki nisi tino, ke fakamakosu i ei te filemu i te va o tatou. Kae e a māfai e agasala mai a nisi tino ki a tatou?

‘Ke fakatau fakamagalo atu faeloa te suā tino ki te suā tino.’ E ‵tusa mo pati a se tagata poto e tokotasi, a te pati Eleni telā ne ‵fuli ki te “fakatau fakamagalo” “e se ko te pati masani mō te fakafoliki io me ko te fakamagaloga . . . kae se pati telā e uke atu a mea e aofia i ei telā e faka‵mafa mai i ei a te ‵kanotonu o te uiga gali o te loto fakamagalo.” A te suā tusi e fai mai me i te pati tenei e mafai o fakauiga ki te “tukuatuga o se mea gali, se faifaiga atafai, mo se mea aoga.” E fakaasi atu ‵tou uiga ‵gali mai i te loto fiafia o fakamagalo atu māfai e “isi se pogai e fameo ei se tino ki te suā tino.” Kaia e ‵tau ei o loto fia‵fia tatou o fakaasi atu se vaegā faifaiga atafai penā? A te pogai e tasi, ona ko te mea e mafai o manakogina ne tatou a te fakamagaloga a te tino fai mea ‵se i se taimi fakamuli.

“E pelā eiloa mo te fakamagaloga o koutou ne Ieova, e ‵tau foki mo koutou o fai penā.” Tenei eiloa te ‵toe pogai sili e ‵tau ei o fakatau fakamagalo atu te suā tino ki te suā tino: E fakamagalo tatou ne Ieova te Atua. (Mika 7:18) Mafaufau malie aka ki te lasi o te atafai telā e fakaasi atu ne Ieova ki tino agasala kolā ko sala‵mo tonu. E se pelā mo tatou, e se mafai o agasala a Ieova. Kae e loto fiafia a ia o fakamagalo katoatoa a tino agasala kolā e sala‵mo tonu faitalia me e iloa ne ia me e se mafai o toe fakaasi atu ne tino agasala a faifaiga atafai ki a ia mai te fakamagaloga o ia. E tonu, a Ieova ko te ‵toe tino sili telā e fakamagalo ne ia a tino agasala kolā e sala‵mo tonu!

E fai ne te alofa fakamagalo o Ieova ke fakapili‵pili atu tatou ki a ia kae fakamalosi aka ei tatou ke fakaakoako atu ki a ia. (Efeso 4:32–5:1) Se mea ‵lei ke fesili ifo tatou ki a tatou eiloa, ‘Ona ko te loto fiafia o Ieova ke fakamagalo mai au, e mafai pefea o se fakamagalo ne au se taina sē ‵lei katoatoa telā e salamo tonu mō tena agasala ne fai mai ki a au?’​—Luka 17:3, 4.