TALI KI FESILIL MAI TE TUSI TAPU

E mata, e isi se fakamoemoega mō tino ‵mate?

A te mate e fai pelā mo te moe me e seai se mea e iloa ne te tino mate kae e se mafai foki ne ia o fai so se mea. Kae ko te Mafuaga o te ola e mafai o fakafoki mai ne ia a tino ‵mate ki te ola e auala i te toetuga. Ke fakamaoni aka te manatu tenā, ne tuku atu ne te Atua te malosi ki a Iesu ke faka‵tu aka ne ia a nai tino ‵mate ki te ola.​—Faitau te Failauga 9:5; Ioane 11:11, 43, 44.

Ne tauto atu a te Atua me i tino ‵mate kolā e masaua ne ia ka toe faka‵tu mai ki te ola i te lalolagi fou kae amiotonu. A latou kolā ka toe faka‵tu aka, e ‵tau eiloa o tumau i te mate ke oko ki te taimi e toe fakafoki atu ei ne te Atua a te ola ki a latou. E olioli eiloa a te Atua Malosi Katoatoa ke fakaaoga tena ‵mana ke toe fakafoki atu a te ola ki tino ‵mate.​—Faitau te Iopu 14:14, 15.

Ka fai pefea te toetuga?

Kafai e toe faka‵tu mai ne te Atua a tino, ka mafai o iloa ne latou a latou eiloa, olotou taugasoa, mo olotou kāiga. E tiga eiloa ko pala a te foitino o te tino, e mafai o toe fakatu aka ne te Atua a te tino eiloa tenā i se foitino fou.​—Faitau te 1 Kolinito 15:35, 38.

Ne nai tino fua e toe faka‵tu aka ki te ola i te lagi. (Fakaasiga 20:6) Ka toe faka‵tu mai a te tokoukega o tino ki te palataiso i te lalolagi. Ka toe tuku atu se avanoaga ke toe kamata faka‵lei te olaga mo te fakamoemoega ke ola ki te se-gata-mai.​—Faitau te Salamo 37:29; Galuega 24:15.