Fesoasoani ki au A‵koga Faka-te-Tusi Tapu ke Fai mo Soko Papatiso

1. Se a te mea ne fakatonu atu ki te vaitino i te senitenali muamua ke fai?

NE MAOPOOPO se potukau o tāgata mo fāfine mai fenua kese‵kese e uke kae fai‵pati ki ‵gana kese‵kese. Ne tupu se mea fakaofoofogia i te aso tenā. Ne mafai ne nisi tino Iutaia o fai‵pati ki nisi ‵gana! Ne ‵poi malosi a te vaitino me i pati kolā e fai atu ne tino Iutaia konā penā foki te apositolo ko Petelu e fakaofoofogia ‵ki. Ne aofia i ei a te fekau me e mafai latou o faka‵saogina māfai e fakaasi atu te lotou fakatuanaki ki a Iesu Keliso. Ne aoga ki te vaitino a te fekau tenā. E tonu, ona ko te otia o olotou loto, ne fesili atu ei latou: “Ne a omotou mea e ‵tau o fai?” Kae ne tali atu a Petelu ki a latou: “Ke papatiso katoa koutou.”—Galu. 2:37, 38.

2. Ne a mea ka suke‵suke tatou ki ei i te mataupu tenei? (Onoono ki te ata i te ‵kava.)

² Ne toe tupu foki se suā mea fakaofoofogia. Ne papatiso a tino e toko 3,000 i te aso loa tenā, kae fai mo soko o Keliso. Tenei eiloa te taimi ne kamata i ei te galuega tāua ko te faiga o soko, telā ne fakatonu atu ne Iesu ke fai ne ana soko. Ne salalau te galuega tenei ke oko mai loa ki te 21 senitenali. I ‵tou aso nei, e se mafai ne tatou o fesoasoani atu ki se tino ke fai mo soko i se fia fua o itula. Kāti e lau i masina io me se tausaga io me leva atu te taimi ke oko atu te tino akoga ki te lasaga tāua tenā. E manakogina a taumafaiga e uke ke fai se tino mo soko, e pelā eiloa mo te mea e iloa ne koe māfai e fai ne koe se akoga a se tino i te taimi nei. I te mataupu tenei, ka suke‵suke tatou ki mea e mafai ne koe o fai ke fesoasoani atu ki tau akoga faka-te-Tusi Tapu ke fai mo soko papatiso.

FESOASOANI KI TAU TINO AKOGA KE FAKAGALUE ANA MEA NE TAULOTO

3. E ‵tusa mo te Mataio 28:19, 20, ne a mea e ‵tau o fai ne se tino akoga ke gasolo ki mua i te papatisoga?

³ A koi tuai o papatiso se tino akoga ki te Tusi Tapu, e ‵tau o fakagalue ne ia ana mea ne tauloto i te Tusi Tapu. (Faitau te Mataio 28:19, 20.) Kafai e fakagalue ne se tino akoga ana mea ne tauloto, ka fai a ia pelā mo te “tagata poto” i te tala fakatusa a Iesu, telā ne keli ne ia ke ‵poko ki lalo ke fakatakato te fakavae o tena fale i luga i te kaupapa. (Mata. 7:24, 25; Luka 6:47, 48) E mafai pefea o fesoasoani atu tatou ki se tino akoga ke fakagalue ana mea ne tauloto? Ke onoono nei tatou ki manatu fesoasoani e tolu.

4. E mafai pefea o fesoasoani atu tatou ki se tino akoga ke gasolo ki mua ki te papatisoga? (Onoono foki ki te pokisi “Fesoasoani ki Tau Tino Akoga ke Fakatoka Ana Fakamoemoega Kae Kausaki ki ei.”)

⁴ Fesoasoani ki tau tino akoga ke fakatoka ana fakamoemoega. Kaia e ‵tau o fai ne koe te mea tenā? Mafaufau ki te tala fakatusa tenei: Kafai ko fakatoka koe o tele atu ki se koga ‵mao, kāti ka tu loa koe i koga ‵gali kolā e ‵pāsi ne koe i te auala. Tela la, ka foliga sē ‵mao a te koga e tele koe ki ei. E penā foki māfai e fakatoka kae kausaki atu se tino akoga ki te Tusi Tapu ki tamā fakamoemoega, ka lavea ne ia me e mafai loa o kausaki a ia ki te papatisoga. Fakaaoga te vaega tenei “Mea e Mafai o Fai” i te tusi ko te Ke Ola ki te Se-Gata-Mai! ke fesoasoani ki tau tino akoga ke gasolo ki mua. I te fakaotiga o mataupu takitasi, ke sau‵tala ki te auala ka fesoasoani atu ana mea ne tauloto ki tena fakamoemoega. Kafai e isi se fakamoemoega tai ‵kese e manako koe ke kausaki tau tino akoga ki ei, ke tusi ki lalo i te koga telā e fakamailoga penei “Nisi Mea.” Ke fakaaoga te vaega tenei ke toe sau‵tala ki ei mo tau tino akoga ki ana tamā fakamoemoega penā foki mo fakamoemoega tai ‵lasi atu.

5. E pelā mo te Maleko 10:17-22, se a te mea ne fakatonu atu a Iesu ke fai ne te tagata maumea, kae kaia?

⁵ Fesoasoani atu ki tau tino akoga ke fai a ‵fuliga i te olaga. (Faitau te Maleko 10:17-22.) Ne iloa ne Iesu me ka faigata ki se tagata maumea ke ‵togi ki tua ana kope katoa. (Male. 10:23) Kae ne fai atu a Iesu ki te tagata tenā ke fai ne ia te ‵fuliga lasi tenā. Kaia? Me ne alofa a Iesu ki a ia. I nisi taimi, kāti e fakatalave tatou o fakamalosi se tino akoga ke fakagalue a mea ne tauloto ne ia, me e mafau‵fau tatou me seki toka a ia o fai a ‵fuliga kolā e manakogina. E mafai o leva te taimi ke tiakina ne tino a uiga mua kae ‵pei ki uiga ‵fou. (Kolose 3:9, 10) Kae ko te vave faipati o koe ki te mataupu tenā, ko te vave foki o fai ne te tino akoga a ‵fuliga konā. A te sau‵tala ki ei se fakaasiga o tou atafai ki a ia.—Sala. 141:5; Faata. 27:17.

6. Kaia e ‵tau ei o fesili tatou ki ‵tou tino akoga me ne a ana mafaufauga ki fesili konā?

⁶ Se mea tāua ke fesili tatou ki ‵tou tino akoga me ne a ana manatu io me ne mafaufauga ki se mataupu. Fakaaoga a vaegā fesili penā ke iloa ne koe a mea e malamalama i ei tau tino akoga mo ana talitonuga. Kafai e fai faeloa ne koe, ka faigofie o sau‵tala koulua ki mea kolā e tai faigata o talia ne ia. A te tusi ko te Ke Ola ki te Se-Gata-Mai! e aofia i ei a fesili ke mafau‵fau ki ei. E pelā mo te fesili i te mataupu e 04: “Se a tau faka‵tau me ne a lagonaga o Ieova māfai e fakaaoga ne koe tena igoa?” Te fesili i te mataupu e 09: “Ne a nisi mea e manako koe ke ‵talo ki ei?” Muamua la, kāti e manakogina ne te tino akoga se taimi ke mafaufau ki te auala ke tali aka a fesili konei. E mafai koe o fesoasoani atu mai te fakaakoako a ia ke mafaufau ki tusi fai‵tau mo ata i te tusi.

7. E mafai pefea o fakaaoga ne koe a tala ‵tonu i se auala magoi?

⁷ Kafai ko malamalama tau tino akoga i mea e ‵tau o fai ne ia, fakaaoga a tala o mea ‵tonu ne ‵tupu ke fakamalosi atu ki a ia. E pelā me se fakaakoakoga, kafai e faigata ki tau tino akoga ke kau ki fakatasiga, e mafai o fakaasi ne koe ki ei te vitio Ieova ne Atafai Mai ki a Au telā e maua i te vaega “Nisi Fakamatalaga” i te mataupu e 14. I te ukega o mataupu i te tusi ko te Ke Ola ki te Se-Gata-Mai!, ka maua ne koe i ei a vaegā tala i te vaega ko te “Keli Malosi Ifo” io me ko “Nisi Fakamatalaga.”b Fakaeteete ke mo a ma fakapau‵pau ne koe tau tino akoga mo te suā tino mai te fai atu, “Kafai e mafai ne ia o fai, e mafai foki ne koe.” Tuku loa ke fai ne te tino akoga tena fakaikuga i a ia eiloa. I lō te fai penā, ke sau‵tala ki manatu tāua kolā ne fesoasoani atu ki te tino i te vitio ke fakagalue ne ia a akoakoga mai te Tusi Tapu. Kāti e mafai o fakasae aka ne koe se tusi faitau tāua io me se manatu aoga mai i ei. Kafai e mafai, ke faka‵mafa atu te auala ne fesoasoani atu ei a Ieova ki te tino tenā.

8. E mafai pefea o fesoasoani atu tatou ki ‵tou tino a‵koga ke a‵lofa ki a Ieova?

⁸ Fesoasoani ki tau tino akoga ke alofa ki a Ieova. Pefea la? ‵Sala ki avanoaga ke tauloto tau tino akoga ki uiga o Ieova. Fesoasoani ki a ia ke kilo atu ki a Ieova e pelā me se Atua fiafia telā e fesoasoani ki tino kolā e a‵lofa ki a ia. (1 Timo. 1:11; Epe. 11:6) Fakaasi atu ki tau tino akoga me ka maua ne ia mea aoga mai te fakagalue ne ia a fakamatalaga, kae fakamatala atu i te mea tenā se fakaasiga o te alofa o Ieova ki a ia. (Isa. 48:17, 18) Ona ko te ‵poko o tena alofa ki a Ieova, ka fakamalosi atu ei ke fai ne ia so se ‵fuliga telā e manakogina.—1 Ioa. 5:3.

FAKAMASANI TAU TINO AKOGA KI TAINA TAPUAKI

9. E pelā mo te Maleko 10:29, 30, se a te mea e mafai o fesoasoani atu ki se tino ke talia ne ia mea faiga‵ta ke fai a ia mo soko papatiso?

⁹ Ke gasolo ki mua ki te papatisoga, e ‵tau o talia ne te tino akoga a mea faiga‵ta. E pelā mo te tagata maumea telā ne sae mai muamua, kāti e manakogina ke tiakina ne nisi tino a‵koga a kope faka-te-foitino. Kafai e se fetaui ‵lei olotou galuega ‵togi mo fakatakitakiga i te Tusi Tapu, e mafai foki o ‵sala latou ki se suā galuega. Nisi tino kāti e ‵tau o fakagata te fai taugasoa mo latou kolā e se a‵lofa ki a Ieova. Nisi e mafai o tiakina ne olotou kāiga kolā e se fia‵fia ki Molimau a Ieova. Ne fai mai a Iesu me e se faigofie ke talia ne nisi tino a mea faiga‵ta konā. Kae ne tauto mai a ia me i a latou kolā e tau‵tali atu i a ia ka sē fanoa‵noa. Ka fakamanuiagina eiloa latou ki se kāiga faka-te-agaga a‵lofa. (Faitau te Maleko 10:29, 30.) E mafai pefea o fesoasoani atu koe ki tau akoga faka-te-Tusi Tapu ke maua ne ia mea aoga mai te meaalofa gali tenei?

10. Ne a mea e tauloto ne koe mai te tala o Manuel?

¹⁰ Ati aka se va fakataugasoa mo tau tino akoga. Se mea tāua ke fakaasi atu ki tau tino akoga a te atafai. Kaia? Mafaufau ki pati a Manuel, telā e nofo i Mexico. Ne fakamatala mai ne ia te taimi koi fai ei tena akoga, ana muna: “Koi tuai o fai te akoga, e fesili mai faeloa toku faiakoga me e a au. Ne fesoasoani mai a ia ke sē mā au o faipati ki a ia e uiga ki so se mea. Ne lagona ne au me ne atafai mai eiloa a ia ki a au.”

11. E mafai pefea o maua ne ‵tou tino a‵koga a mea aoga mai te fakamāumāu olotou taimi e uke mo tatou?

¹¹ Ke fakamāumāu ou taimi mo au tino a‵koga, pelā mo Iesu ne fakaamāumāu ana taimi e uke mo ana soko. (Ioa. 3:22) Kafai e ‵lei, ‵kami tau akoga faka-te-Tusi Tapu ke inu tī io me ‵kai fakatasi i tou fale kae onoono ki te polokalame o te leo fakasalalau. E mafai loa o fiafia malosi tau tino akoga ki te ‵kamiga tenā, maise loa vaitau o aso malōlō fapau‵pau kolā e masani o ‵kau fakatasi ei a olotou kāiga sē tali‵tonu. “Ne uke ‵ki aku mea ne tauloto e uiga ki a Ieova mai te fakamāumāu ne au oku taimi mo toku faiakoga i te taimi o te mā akoga,” ko pati a Kazibwe, telā e nofo i Uganda. “Ne lavea ne au te lasi o te atafai o Ieova ki ana tino mo te lasi o te lotou fia‵fia. Tenā te mea ne manako au ki ei i toku olaga.”

12. Kaia e ‵tau ei o ave ne tatou a tino talai kese‵kese ki se akoga faka-te-Tusi Tapu a tatou?

¹² ‵Kami a tino talai kese‵kese ki tau akoga faka-te-Tusi Tapu. I nisi taimi, kāti e mafau‵fau tatou me e faigofie atu ke olo loa i a tatou io me sē sui te tino talai e olo faeloa mo koe ki tau akoga. E tiga loa e faigofie ke fai penā, ka mafai o aoga ki ‵tou akoga faka-te-Tusi Tapu māfai e avatu ne tatou a tino talai kese‵kese ke ‵kau ki tena akoga. “A tino talai kese‵kese kolā e ‵kau mai ki taku akoga e fakamatala ne latou a mea i se auala tu ‵kese,” ne fai mai a Dmitrii, telā e nofo i Moldova. “Ne fesoasoani mai te mea tenā ke lavea ne au a auala kese‵kese e mafai o fakagalue ne au a aku mea ne tauloto. Kae ne seki mā foki au i te taimi muamua o oku ki se fakatasiga, me ko oti ne fetaui au mo taina mo tuagane kese‵kese.”

13. Kaia e ‵tau ei o fesoasoani atu tatou ki se tino akoga ke kau atu ki fakatasiga?

¹³ Fesoasoani ki tau tino akoga ke kau ki fakatasiga a te fakapotopotoga. Kaia? Me e fakatonu mai a Ieova ki ana tino tapuaki ke maopoopo fakatasi; me se vaega o te ‵tou tapuakiga. (Epe. 10:24, 25) E se gata i ei, a ‵tou taina mo tuagane ko ‵tou kāiga faka-te-agaga. Kafai e ‵kau fakatasi tatou mo latou i fakatasiga, e fai eiloa pelā me ‵kai fakatasi tatou i te fale. Kafai e fakamalosi atu koe ki tau akoga faka-te-Tusi Tapu ke kau ki fakatasiga, ko fesoasoani atu eiloa koe ke fai ne ia te ‵toe mea tāua telā e ‵taki atu ei a ia ki te papatisoga. Kae e mafai o faigata ki a ia ke fai penā. E mafai pefea o fesoasoani atu te tusi ko te Ke Ola ki te Se-Gata Mai! ki tau tino akoga ke manumalo i so se tofotofoga e fepaki mo ia?

14. E mafai pefea o fakamalosi ne tatou a ‵tou tino a‵koga ke ‵kau ki fakatasiga?

¹⁴ Fakaaoga te mataupu e 10 o te tusi ko te Ke Ola ki te Se-Gata-Mai! ke fesoasoani atu ke fakamalosi ne koe tau tino akoga. A tino talai apo kolā ne fakamolemole atu ke tofotofo aka ne latou te mataupu tenei a koi tuai o ‵tala mai te tusi, ne manuia i olotou taumafaiga ke fesoasoani atu ki olotou tino a‵koga ke ‵kau ki fakatasiga. E tonu, sa faka‵tali ke oko ki te mataupu e 10, ko ‵kami ei tau akoga faka-te-Tusi Tapu ki fakatasiga. ‵Kami fakavave a ia kae ke fai faeloa penā. E kese‵kese a fakalavelave e fe‵paki mo ‵tou tino a‵koga. Tela la, saga tonu atu ki manakoga o tau tino akoga, kae taumafai o tuku atu se fesoasoani aoga. Sa loto vāivāi māfai e tai fakatalave tena kau atu ki fakatasiga. Ke kufaki kae tumau i te ‵kami faeloa a ia ki fakatasiga.

FESOASOANI KI TAU TINO AKOGA KE MANUMALO I TE MATAKU

15. Ne a mea e mafai o ma‵taku ki ei a ‵tou tino a‵koga?

¹⁵ E mata, koe ne tai mataku malie ke fai mo fai se Molimau a Ieova? Kāti ne mafaufau koe me ka sē mafai ne koe o talai mai fale ki fale. Io me kāti e mataku koe māfai e ‵teke atu ou kāiga mo taugasoa ki a koe. Kafai e penā loa, e mafai o malamalama koe i lagonaga o tau akoga faka-te-Tusi Tapu. Ne iloa ne Iesu me e isi ne tino ka mafai o ma‵taku. Kae ne fakamalosi atu a ia ki ana soko ke mo a ma taofi aka ne te mataku a latou mai te tavini atu ki a Ieova. (Mata. 10:16, 17, 27, 28) Ne fesoasoani atu pefea a Iesu ki ana soko ke manumalo i te mataku? Kae e mafai pefea o tautali koe i tena fakaakoakoga?

16. E mafai pefea o fakaakoako ne tatou se ‵tou tino akoga ke fakaasi atu ana talitonuga ki nisi tino?

¹⁶ Ke akoako faeloa tau tino akoga ke fakaasi atu ki tino ana mea ne tauloto. Kāti ne tai ‵mā eiloa a soko o Iesu i te taimi ne uga ne ia latou ke olo o talai. Kae ne fesoasoani atu a Iesu mai te fakailoa atu ki a latou te koga ke talai i ei mo te fekau telā e talai ne latou. (Mata. 10:5-7) E mafai pefea o fakaakoako tatou ki a Iesu? Fesoasoani ki tau tino akoga ke iloa ne ia te koga e mafai o talai ei a ia. E pelā me se fakaakoakoga, fesili atu māfai e iloa ne ia se tino telā e mafai o maua ne ia mea aoga mai te tauloto ki muna‵tonu i te Tusi Tapu. Ka oti ko fesoasoani atu ki a ia ke fakatoka ana pati mai te fakaasi atu ki ei se auala faigofie ke talai atu. Kafai e ‵lei, e mafai o fakaaoga ne koulua a vaega ko te “E Fai Mai a Nisi Tino” mo te “E Mafai o Fesili Mai se Tino,” telā e maua i te tusi ko te Ke Ola ki te Se-Gata-Mai! Kafai ko fakaakoako koulua, saga tonu atu o akoako tau tino akoga ke fakaaoga te Tusi Tapu ke tuku atu ne ia ne tali faigofie kae ma‵goi.

17. E mafai pefea o fakaaoga ne tatou a te Mataio 10:19, 20, 29-31 i te taimi e fesoasoani atu tatou ki ‵tou tino a‵koga ke tali‵tonu ki a Ieova?

¹⁷ Fesoasoani ki tau tino akoga ke talitonu ki a Ieova. Ne fakatalitonu atu a Iesu ki ana soko me ka fesoasoani atu a Ieova ki a latou, me i a Ia e alofa ki a latou. (Faitau te Mataio 10:19, 20, 29-31.) Fakamasaua atu ki tau tino akoga me ka fesoasoani atu foki a Ieova ki a ia. E mafai o fesoasoani atu koe ki a ia ke fakalagolago ki a Ieova mai te ‵talo fakatasi mo ia e uiga ki ana fakamoemoega. “Ne aofia faeloa ne toku faiakoga i ana ‵talo a oku fakamoemoega,” ne fai mai a Franciszek, telā e nofo i Polani. “I te laveaga ne au te auala ne tali ne Ieova a ‵talo a toku faiakoga, ne kamata fakavave eiloa au o ‵talo. Ne lagona ne au te fesoasoani o Ieova i te taimi ne manako au ke puke oku aso malō‵lo mai taku galuega ‵togi ko te mea ke kau au ki fakatasiga mo te fono o te atufenua.”

18. E pefea a lagonaga o Ieova ki te galuega e fai ne faiakoga Kelisiano?

¹⁸ A Ieova e atafai malosi ki ‵tou tino a‵koga ki te Tusi Tapu. E iloa ne ia te faigata ki faiakoga Kelisiano ke ga‵lue o fesoasoani atu ki tino ke fakapili‵pili atu ki a ia, kae e alofa a ia ki a latou. (Isa. 52:7) Kafai e seai sau akoga faka-te-Tusi Tapu i te taimi nei, koi mafai eiloa o fesoasoani atu koe ki tino a‵koga ki te Tusi Tapu ke ga‵solo ki mua kae papatiso, mai te kau atu ki akoga faka-te-Tusi Tapu a nisi tino talai.