Fakatoka Tou Loto

Kafai e suke‵suke tatou ki te Tusi Tapu, e ma‵nako tatou ke otia ‵tou loto i mafaufauga o Ieova. Ne tuku mai ne Esela se fakaakoakoga ‵lei i te feitu tenei i te taimi ne “fakatoka . . . a tena loto ke ‵sala atu ki te Tulafono a Ieova.” (Esela 7:10) E fakatoka pefea ne tatou a ‵tou loto?

‵Talo. Kamata au sukesukega ki se ‵talo. Fakamolemole atu ki a Ieova ke fesoasoani atu ke malamalama koe kae fakagalue aka au mea e tauloto.—Sala. 119:​18, 34.

Ati aka te loto maulalo. Ne ‵funa ne te Atua a te munatonu mai i a latou kolā e fakamata‵mata o fakalagolago ki olotou poto totino. (Luka 10:21) Kalo kea‵tea mai te faiga o sukesukega ko te mea fua ke ofo i ei a nisi tino. Ke loto maulalo o fulifuli ou mafaufauga māfai e se fetaui mo mafaufauga o te Atua.

Taumafai o fakalogologo ki se pese o te Malo. E mafai o otia ‵tou kilokiloga mo lagonaga i pese. Tela la, kafai e fakalogo‵logo tatou ki pese mai mua o fai ‵tou sukesukega, e mafai eiloa o fesoasoani mai ke ‵saga tonu tatou ki a Ieova ko te mea ke otia ‵tou loto i mea kolā e tauloto ne tatou.